17 ਸਾਲਾਂ ਦਾ ਬਨਵਾਸ ਖ਼ਤਮ ਕਰਕੇ ਬਣ ਸਕਦੇ ਹਨ ਬੰਗਲਾਦੇਸ਼ ਦੇ PM, 4 ਸਾਲ ਦੀ ਉਮਰ 'ਚ ਗਏ ਸਨ ਜੇਲ੍ਹ
ਅੱਜ ਤੋਂ ਬੰਗਲਾਦੇਸ਼ ਦੀ ਰਾਜਨੀਤੀ ਵਿੱਚ ਇੱਕ ਨਵੇਂ ਅਧਿਆਏ ਦੀ ਸ਼ੁਰੂਆਤ ਹੋ ਚੁੱਕੀ ਹੈ ਅਤੇ ਤਾਰਿਕ ਰਹਿਮਾਨ ਦਾ ਪ੍ਰਧਾਨ ਮੰਤਰੀ ਬਣਨਾ ਤੈਅ ਮੰਨਿਆ ਜਾ ਰੂਹਾ ਹੈ। ਆਓ ਜਾਣਦੇ ਹਾਂ ਕੌਣ ਹਨ ਤਾਰਿਕ ਰਹਿਮਾਨ ਅਤੇ PM ਬਣਨ ਲਈ ਉਨ੍ਹਾਂ ਨੂੰ ਕਿੰਨੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪਿਆ।
Posted By Neha Diwan
Publish Date: Fri, 13 Feb 2026 10:41 AM (IST)
Updated Date: Fri, 13 Feb 2026 10:43 AM (IST)
ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਬੰਗਲਾਦੇਸ਼ ਵਿੱਚ ਹੋਈਆਂ ਚੋਣਾਂ ਤੋਂ ਬਾਅਦ ਵੋਟਾਂ ਦੀ ਗਿਣਤੀ ਜਾਰੀ ਹੈ। 17 ਸਾਲਾਂ ਬਾਅਦ ਬੰਗਲਾਦੇਸ਼ ਪਰਤੇ ਤਾਰਿਕ ਰਹਿਮਾਨ ਦੀ ਪਾਰਟੀ ਬੀ.ਐਨ.ਪੀ. (BNP) ਬਹੁਮਤ ਦਾ ਅੰਕੜਾ ਪਾਰ ਕਰ ਚੁੱਕੀ ਹੈ।
ਅੱਜ ਤੋਂ ਬੰਗਲਾਦੇਸ਼ ਦੀ ਰਾਜਨੀਤੀ ਵਿੱਚ ਇੱਕ ਨਵੇਂ ਅਧਿਆਏ ਦੀ ਸ਼ੁਰੂਆਤ ਹੋ ਚੁੱਕੀ ਹੈ ਅਤੇ ਤਾਰਿਕ ਰਹਿਮਾਨ ਦਾ ਪ੍ਰਧਾਨ ਮੰਤਰੀ ਬਣਨਾ ਤੈਅ ਮੰਨਿਆ ਜਾ ਰੂਹਾ ਹੈ। ਆਓ ਜਾਣਦੇ ਹਾਂ ਕੌਣ ਹਨ ਤਾਰਿਕ ਰਹਿਮਾਨ ਅਤੇ PM ਬਣਨ ਲਈ ਉਨ੍ਹਾਂ ਨੂੰ ਕਿੰਨੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪਿਆ।
ਕੌਣ ਹਨ ਤਾਰਿਕ ਰਹਿਮਾਨ?
ਤਾਰਿਕ ਰਹਿਮਾਨ ਬੰਗਲਾਦੇਸ਼ ਦੀ ਸਾਬਕਾ ਪ੍ਰਧਾਨ ਮੰਤਰੀ ਖਾਲਿਦਾ ਜ਼ੀਆ ਅਤੇ ਸਾਬਕਾ ਰਾਸ਼ਟਰਪਤੀ ਜ਼ੀਆ-ਉਰ-ਰਹਿਮਾਨ ਦੇ ਪੁੱਤਰ ਹਨ। ਉਨ੍ਹਾਂ ਦਾ ਜਨਮ 20 ਨਵੰਬਰ 1965 ਨੂੰ ਢਾਕਾ ਵਿੱਚ ਹੋਇਆ। 1971 ਵਿੱਚ ਬੰਗਲਾਦੇਸ਼ ਦੀ ਆਜ਼ਾਦੀ ਦੀ ਜੰਗ ਦੌਰਾਨ ਤਾਰਿਕ ਸਿਰਫ਼ ਚਾਰ ਸਾਲ ਦੇ ਸਨ ਅਤੇ ਉਨ੍ਹਾਂ ਨੂੰ ਕੁਝ ਸਮੇਂ ਲਈ ਹਿਰਾਸਤ ਵਿੱਚ ਵੀ ਰੱਖਿਆ ਗਿਆ ਸੀ। ਇਹੀ ਕਾਰਨ ਹੈ ਕਿ ਉਨ੍ਹਾਂ ਦੀ ਪਾਰਟੀ BNP ਉਨ੍ਹਾਂ ਨੂੰ 'ਜੰਗ ਦੇ ਸਭ ਤੋਂ ਘੱਟ ਉਮਰ ਦੇ ਬੰਦੀਆਂ' ਵਿੱਚ ਸ਼ਾਮਲ ਕਰਕੇ ਸਨਮਾਨਿਤ ਕਰਦੀ ਹੈ। ਪਿਤਾ ਜ਼ੀਆ-ਉਰ-ਰਹਿਮਾਨ (BNP ਦੇ ਸੰਸਥਾਪਕ ਅਤੇ ਸਾਬਕਾ ਰਾਸ਼ਟਰਪਤੀ), ਮਾਤਾ ਖਾਲਿਦਾ ਜ਼ੀਆ (3 ਵਾਰ ਦੇਸ਼ ਦੀ ਪ੍ਰਧਾਨ ਮੰਤਰੀ)।
17 ਸਾਲਾਂ ਦਾ ਦੇਸ਼ ਨਿਕਾਲਾ
ਤਾਰਿਕ ਰਹਿਮਾਨ ਜੇਲ੍ਹ, ਤਸ਼ੱਦਦ ਅਤੇ ਸਿਆਸੀ ਸਾਜ਼ਿਸ਼ਾਂ ਦੇ ਸ਼ਿਕਾਰ ਵੀ ਹੋਏ ਅਤੇ 17 ਸਾਲਾਂ ਤੱਕ ਦੇਸ਼ ਨਿਕਾਲਾ ਵੀ ਝੱਲਿਆ। ਉਹ ਲੰਡਨ ਵਿੱਚ ਰਹਿ ਕੇ ਵੀ ਵੀਡੀਓ ਕਾਲਾਂ, ਸੋਸ਼ਲ ਮੀਡੀਆ ਅਤੇ ਡਿਜੀਟਲ ਸਭਾਵਾਂ ਰਾਹੀਂ ਆਪਣੀ ਪਾਰਟੀ ਦੀ ਅਗਵਾਈ ਕਰਦੇ ਰਹੇ।
84 ਅਪਰਾਧਿਕ ਮਾਮਲੇ
ਤਾਰਿਕ ਰਹਿਮਾਨ 'ਤੇ ਭ੍ਰਿਸ਼ਟਾਚਾਰ ਅਤੇ ਹੋਰ ਦੋਸ਼ਾਂ ਦੇ ਲਗਪਗ 84 ਕੇਸ ਦਰਜ ਸਨ। ਮਾਰਚ 2007 ਵਿੱਚ ਫੌਜ ਦੀ ਹਮਾਇਤ ਵਾਲੀ ਅੰਤਰਿਮ ਸਰਕਾਰ ਨੇ ਉਨ੍ਹਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਸੀ। ਜੇਲ੍ਹ ਵਿੱਚ ਤਸ਼ੱਦਦ ਝੱਲਣ ਤੋਂ ਬਾਅਦ, ਸਤੰਬਰ 2008 ਵਿੱਚ ਜ਼ਮਾਨਤ 'ਤੇ ਰਿਹਾਅ ਹੋ ਕੇ ਉਹ ਇਲਾਜ ਦੇ ਬਹਾਨੇ ਲੰਡਨ ਚਲੇ ਗਏ ਸਨ।
ਸਿਆਸੀ ਸਫ਼ਰ ਅਤੇ ਵਾਪਸੀ
ਸਾਲ 2024 ਵਿੱਚ ਸ਼ੇਖ ਹਸੀਨਾ ਦੀ ਸਰਕਾਰ ਡਿੱਗਣ ਤੋਂ ਬਾਅਦ ਬੰਗਲਾਦੇਸ਼ ਦੇ ਕਾਨੂੰਨੀ ਮਾਹੌਲ ਵਿੱਚ ਵੱਡੀ ਤਬਦੀਲੀ ਆਈ। 2026 ਦੀ ਸ਼ੁਰੂਆਤ ਤੱਕ ਉਨ੍ਹਾਂ ਨੂੰ ਜ਼ਿਆਦਾਤਰ ਵੱਡੇ ਮਾਮਲਿਆਂ ਵਿੱਚੋਂ ਬਰੀ ਕਰ ਦਿੱਤਾ ਗਿਆ, ਜਿਸ ਵਿੱਚ ਸ਼ੇਖ ਹਸੀਨਾ ਦੀ ਰੈਲੀ 'ਤੇ ਹੋਏ ਗ੍ਰਨੇਡ ਹਮਲੇ ਦਾ ਮਾਮਲਾ ਵੀ ਸ਼ਾਮਲ ਸੀ। ਦਸੰਬਰ 2025 ਵਿੱਚ ਤਾਰਿਕ ਢਾਕਾ ਵਾਪਸ ਪਰਤ ਆਏ। ਵਾਪਸੀ ਤੋਂ ਪਹਿਲਾਂ ਉਹ ਲੰਡਨ ਵਿੱਚ ਅੰਤਰਿਮ ਸਰਕਾਰ ਦੇ ਮੁਖੀ ਮੁਹੰਮਦ ਯੂਨਸ ਨਾਲ ਵੀ ਮੁਲਾਕਾਤ ਕਰ ਚੁੱਕੇ ਸਨ।
2026 ਚੋਣਾਂ ਦੇ ਨਤੀਜੇ
13ਵੀਂ ਸੰਸਦੀ ਚੋਣ ਵਿੱਚ ਤਾਰਿਕ ਰਹਿਮਾਨ ਦੀ ਪਾਰਟੀ 151 ਸੀਟਾਂ 'ਤੇ ਜਿੱਤ ਦਰਜ ਕਰ ਚੁੱਕੀ ਹੈ। ਰਹਿਮਾਨ ਨੇ ਖੁਦ ਦੋ ਸੀਟਾਂ—ਢਾਕਾ-17 ਅਤੇ ਬੋਗੁਰਾ-6 ਤੋਂ ਵੱਡੇ ਫਰਕ ਨਾਲ ਜਿੱਤ ਹਾਸਲ ਕੀਤੀ ਹੈ। ਬੋਗੁਰਾ ਉਨ੍ਹਾਂ ਦੇ ਪਰਿਵਾਰ ਦਾ ਪੁਰਾਣਾ ਗੜ੍ਹ ਹੈ, ਜਦਕਿ ਢਾਕਾ-17 ਦੇਸ਼ ਦੀ ਰਾਜਧਾਨੀ ਦਾ ਮੁੱਖ ਕੇਂਦਰ ਮੰਨੀ ਜਾਂਦੀ ਹੈ।