ਹਮਲੇ ਤੋਂ ਬਾਅਦ ਹੋਰ ਭੜਕਿਆ ਈਰਾਨ, IRGC ਨੇ ਖਾੜੀ ਦੇਸ਼ਾਂ ਦੇ 8 ਪ੍ਰਮੁੱਖ ਪੁਲਾਂ ਨੂੰ 'ਹਿੱਟ ਲਿਸਟ' 'ਚ ਕੀਤਾ ਸ਼ਾਮਲ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਮੱਧ ਪੂਰਬ ਵਿੱਚ ਜਾਰੀ ਜੰਗ ਦੇ ਦਰਮਿਆਨ ਅਮਰੀਕਾ-ਇਜ਼ਰਾਈਲ ਨੇ ਈਰਾਨ ਦੇ ਸਭ ਤੋਂ ਉੱਚੇ ਬੀ1 (B1) ਪੁਲ ਨੂੰ ਨਿਸ਼ਾਨਾ ਬਣਾਇਆ ਹੈ, ਜਿਸ ਤੋਂ ਬਾਅਦ ਖੇਤਰ ਵਿੱਚ ਜੰਗ ਦੀ ਅੱਗ ਹੋਰ ਭੜਕ ਗਈ ਹੈ। ਪੁਲ 'ਤੇ ਹੋਏ ਇਸ ਹਮਲੇ ਤੋਂ ਬਾਅਦ ਈਰਾਨ ਨੇ ਹੁਣ ਜਵਾਬੀ ਕਾਰਵਾਈ ਦੀ ਤਿਆਰੀ ਕਰ ਲਈ ਹੈ।

ਈਰਾਨ ਦੀ ਸਰਕਾਰੀ ਸਮਾਚਾਰ ਏਜੰਸੀ 'ਫਾਰਸ' ਨੇ ਖਾੜੀ ਦੇਸ਼ਾਂ ਅਤੇ ਜਾਰਡਨ ਦੇ ਅੱਠ ਮਹੱਤਵਪੂਰਨ ਪੁਲਾਂ ਦੀ ਇੱਕ ਸੂਚੀ ਜਾਰੀ ਕੀਤੀ ਹੈ, ਜਿਸ ਨੂੰ ਇਸਲਾਮਿਕ ਰਿਵੋਲਿਊਸ਼ਨਰੀ ਗਾਰਡ ਕੋਰ (IRGC) ਨੇ ਆਪਣੇ ਸੰਭਾਵੀ ਹਮਲੇ ਦੇ ਨਿਸ਼ਾਨਿਆਂ ਵਜੋਂ ਚੁਣਿਆ ਹੈ।

ਈਰਾਨ ਕਿਹੜੇ ਪੁਲਾਂ ਨੂੰ ਬਣਾ ਸਕਦਾ ਹੈ ਨਿਸ਼ਾਨਾ?

ਰਿਪੋਰਟਾਂ ਅਨੁਸਾਰ, ਈਰਾਨ ਦੀ ਇਸ ਹਿੱਟ ਲਿਸਟ ਵਿੱਚ ਹੇਠ ਲਿਖੇ ਪੁਲ ਸ਼ਾਮਲ ਹਨ:

ਕੁਵੈਤ: ਸ਼ੇਖ ਜਾਬੇਰ ਅਲ-ਅਹਿਮਦ ਅਲ-ਸਬਾਹ ਸਮੁੰਦਰੀ ਪੁਲ।

ਸੰਯੁਕਤ ਅਰਬ ਅਮੀਰਾਤ (UAE): ਸ਼ੇਖ ਜਾਇਦ ਪੁਲ, ਅਲ ਮਕਤਾ ਪੁਲ ਅਤੇ ਸ਼ੇਖ ਖਲੀਫਾ ਪੁਲ।

ਸਾਊਦੀ ਅਰਬ ਤੇ ਬਹਿਰੀਨ: ਦੋਵਾਂ ਦੇਸ਼ਾਂ ਨੂੰ ਜੋੜਨ ਵਾਲਾ ਕਿੰਗ ਫਾਹਦ ਕਾਜ਼ਵੇਅ।

ਜਾਰਡਨ: ਕਿੰਗ ਹੁਸੈਨ ਪੁਲ, ਦਾਮੀਆ ਪੁਲ ਅਤੇ ਅਬਦੌਨ ਪੁਲ।

ਟਰੰਪ ਦੀ ਧਮਕੀ ਅਤੇ ਈਰਾਨੀ ਪੁਲ 'ਤੇ ਹਮਲਾ

ਜ਼ਿਕਰਯੋਗ ਹੈ ਕਿ ਇਹ ਹਮਲਾ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਈਰਾਨ ਨੂੰ "ਪੱਥਰ ਯੁੱਗ ਵਿੱਚ ਵਾਪਸ ਭੇਜਣ" ਦੀ ਧਮਕੀ ਤੋਂ ਬਾਅਦ ਹੋਇਆ ਹੈ। ਵੀਰਵਾਰ ਨੂੰ ਹੋਏ ਅਮਰੀਕੀ-ਇਜ਼ਰਾਈਲੀ ਹਮਲਿਆਂ ਵਿੱਚ ਮੱਧ ਪੂਰਬ ਦਾ ਸਭ ਤੋਂ ਉੱਚਾ ਪੁਲ ਅੰਸ਼ਕ ਤੌਰ 'ਤੇ ਨੁਕਸਾਨਿਆ ਗਿਆ। 136 ਮੀਟਰ ਉੱਚਾ ਬੀ1 ਪੁਲ ਅਜੇ ਨਿਰਮਾਣ ਅਧੀਨ ਸੀ ਅਤੇ ਇਸ ਨੇ ਤੇਹਰਾਨ ਨੂੰ ਪੱਛਮੀ ਸ਼ਹਿਰ ਕਰਾਜ ਨਾਲ ਜੋੜਨਾ ਸੀ।

ਹਮਲੇ ਵਿੱਚ 8 ਲੋਕਾਂ ਦੀ ਮੌਤ

ਈਰਾਨੀ ਮੀਡੀਆ ਅਨੁਸਾਰ ਅਮਰੀਕਾ ਵੱਲੋਂ ਕੀਤੇ ਗਏ ਇਸ ਹਮਲੇ ਵਿੱਚ ਘੱਟੋ-ਘੱਟ ਅੱਠ ਲੋਕਾਂ ਦੀ ਮੌਤ ਹੋ ਗਈ ਅਤੇ ਲਗਪਗ 95 ਹੋਰ ਜ਼ਖ਼ਮੀ ਹੋ ਗਏ। ਇਹ ਲੋਕ ਪੁਲ ਦੇ ਨੇੜੇ 'ਪ੍ਰਕਿਰਤੀ ਦਿਵਸ' ਮਨਾਉਣ ਲਈ ਇਕੱਠੇ ਹੋਏ ਸਨ।

ਟਰੰਪ ਦੀ ਚਿਤਾਵਨੀ

ਰਾਸ਼ਟਰਪਤੀ ਟਰੰਪ ਨੇ ਬੀ1 ਪੁਲ ਤੋਂ ਧੂੰਆਂ ਉੱਠਣ ਦੀ ਫੁਟੇਜ ਸਾਂਝੀ ਕਰਦਿਆਂ ਚਿਤਾਵਨੀ ਦਿੱਤੀ ਕਿ ਜੇਕਰ ਈਰਾਨ ਪੰਜ ਹਫ਼ਤਿਆਂ ਤੋਂ ਚੱਲ ਰਹੀ ਜੰਗ ਨੂੰ ਖ਼ਤਮ ਕਰਨ ਲਈ ਗੱਲਬਾਤ ਲਈ ਤਿਆਰ ਨਹੀਂ ਹੁੰਦਾ, ਤਾਂ ਹੋਰ ਵਿਨਾਸ਼ ਹੋਵੇਗਾ। ਟਰੰਪ ਨੇ ਕਿਹਾ, "ਈਰਾਨ ਦਾ ਸਭ ਤੋਂ ਵੱਡਾ ਪੁਲ ਢਹਿ ਗਿਆ ਹੈ, ਹੁਣ ਸਮਝੌਤਾ ਕਰਨ ਦਾ ਸਮਾਂ ਹੈ ਇਸ ਤੋਂ ਪਹਿਲਾਂ ਕਿ ਬਹੁਤ ਦੇਰ ਹੋ ਜਾਵੇ!"

ਈਰਾਨੀ ਵਿਦੇਸ਼ ਮੰਤਰੀ ਦਾ ਪਲਟਵਾਰ

ਦੂਜੇ ਪਾਸੇ ਈਰਾਨ ਦੇ ਵਿਦੇਸ਼ ਮੰਤਰੀ ਅੱਬਾਸ ਅਰਾਘਚੀ ਨੇ ਕਿਹਾ ਕਿ ਨਾਗਰਿਕ ਢਾਂਚਿਆਂ 'ਤੇ ਹਮਲੇ ਕਰਨ ਨਾਲ ਈਰਾਨੀਆਂ ਨੂੰ ਆਤਮ-ਸਮਰਪਣ ਕਰਨ ਲਈ ਮਜਬੂਰ ਨਹੀਂ ਕੀਤਾ ਜਾ ਸਕੇਗਾ। ਉਨ੍ਹਾਂ ਕਿਹਾ ਕਿ ਇਹ ਹਮਲੇ ਸਿਰਫ਼ ਦੁਸ਼ਮਣ ਦੀ ਹਾਰ ਅਤੇ ਮਨੋਬਲ ਦੇ ਡਿੱਗਣ ਨੂੰ ਦਰਸਾਉਂਦੇ ਹਨ।