'ਐਨਰਿਚਡ ਯੂਰੇਨੀਅਮ ਕਿਤੇ ਟ੍ਰਾਂਸਫਰ ਨਹੀਂ ਹੋਵੇਗਾ', ਟ੍ਰੰਪ ਦੇ ਦਾਵਿਆਂ 'ਤੇ ਈਰਾਨ ਦਾ ਦੋ ਟੁਕ ਜਵਾਬ
ਈਰਾਨ ਨੇ ਸ਼ੁੱਕਰਵਾਰ ਨੂੰ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟ੍ਰੰਪ ਦੇ ਉਸ ਦਾਵੇ ਨੂੰ ਸਿਰੇ ਤੋਂ ਖਾਰਜ ਕਰ ਦਿੱਤਾ ਹੈ, ਜਿਸ ਵਿੱਚ ਕਿਹਾ ਗਿਆ ਸੀ ਕਿ ਤੇਹਰਾਨ ਆਪਣੇ 'ਐਨਰਿਚਡ ਯੂਰੇਨੀਅਮ' (Enriched Uranium) ਦੇ ਭੰਡਾਰ ਨੂੰ ਸੌਂਪਣ ਲਈ ਸਹਿਮਤ ਹੋ ਗਿਆ ਹੈ। ਈਰਾਨ ਦੇ ਵਿਦੇਸ਼ ਮੰਤਰਾਲੇ ਨੇ ਸਪੱਸ਼ਟ ਕੀਤਾ ਕਿ ਇਹ ਭੰਡਾਰ ਕਿਸੇ ਵੀ ਦੇਸ਼ ਨੂੰ ਟ੍ਰਾਂਸਫਰ ਨਹੀਂ ਕੀਤਾ ਜਾਵੇਗਾ।
Posted By Sunita
Publish Date: Sat, 18 Apr 2026 01:50 PM (IST)
Updated Date: Sat, 18 Apr 2026 01:53 PM (IST)
ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਈਰਾਨ ਨੇ ਸ਼ੁੱਕਰਵਾਰ ਨੂੰ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟ੍ਰੰਪ ਦੇ ਉਸ ਦਾਵੇ ਨੂੰ ਸਿਰੇ ਤੋਂ ਖਾਰਜ ਕਰ ਦਿੱਤਾ ਹੈ, ਜਿਸ ਵਿੱਚ ਕਿਹਾ ਗਿਆ ਸੀ ਕਿ ਤੇਹਰਾਨ ਆਪਣੇ 'ਐਨਰਿਚਡ ਯੂਰੇਨੀਅਮ' (Enriched Uranium) ਦੇ ਭੰਡਾਰ ਨੂੰ ਸੌਂਪਣ ਲਈ ਸਹਿਮਤ ਹੋ ਗਿਆ ਹੈ। ਈਰਾਨ ਦੇ ਵਿਦੇਸ਼ ਮੰਤਰਾਲੇ ਨੇ ਸਪੱਸ਼ਟ ਕੀਤਾ ਕਿ ਇਹ ਭੰਡਾਰ ਕਿਸੇ ਵੀ ਦੇਸ਼ ਨੂੰ ਟ੍ਰਾਂਸਫਰ ਨਹੀਂ ਕੀਤਾ ਜਾਵੇਗਾ।
ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਇਸਮਾਈਲ ਬਾਕਾਈ ਨੇ ਸਰਕਾਰੀ ਟੀਵੀ ਰਾਹੀਂ ਕਿਹਾ, "ਈਰਾਨ ਦਾ ਐਨਰਿਚਡ ਯੂਰੇਨੀਅਮ ਕਿਤੇ ਵੀ ਟ੍ਰਾਂਸਫਰ ਨਹੀਂ ਕੀਤਾ ਜਾਵੇਗਾ। ਈਰਾਨ ਦੇ ਯੂਰੇਨੀਅਮ ਭੰਡਾਰ ਨੂੰ ਅਮਰੀਕਾ ਨੂੰ ਸੌਂਪਣ ਦਾ ਮੁੱਦਾ ਗੱਲਬਾਤ ਦੌਰਾਨ ਕਦੇ ਉਠਾਇਆ ਹੀ ਨਹੀਂ ਗਿਆ।"
ਯੂਰੇਨੀਅਮ ਸੌਂਪਣ ਦੇ ਦਾਵਿਆਂ ਨੂੰ ਈਰਾਨ ਨੇ ਕੀਤਾ ਖਾਰਜ
ਇਹ ਬਿਆਨ ਉਸ ਵੇਲੇ ਆਇਆ ਹੈ ਜਦੋਂ ਟ੍ਰੰਪ ਨੇ ਪਹਿਲਾਂ 'ਟਰੂਥ ਸੋਸ਼ਲ' (Truth Social) 'ਤੇ ਕਿਹਾ ਸੀ, "ਅਮਰੀਕਾ ਨੂੰ ਉਹ ਸਾਰੀ 'ਨਿਊਕਲੀਅਰ ਧੂੜ' ਮਿਲੇਗੀ, ਜੋ ਸਾਡੇ ਮਹਾਨ B2 ਬਾਂਬਰ ਨੇ ਬਣਾਈ ਹੈ।" ਟ੍ਰੰਪ ਦਾ ਇਸ਼ਾਰਾ ਉਸ ਐਨਰਿਚਡ ਯੂਰੇਨੀਅਮ ਵੱਲ ਸੀ, ਜੋ ਕਥਿਤ ਤੌਰ 'ਤੇ ਅਮਰੀਕਾ ਦੇ ਪਿਛਲੇ ਹਮਲਿਆਂ ਦੌਰਾਨ ਜ਼ਮੀਨ ਵਿੱਚ ਦੱਬ ਗਿਆ ਸੀ। ਹਾਲਾਂਕਿ, ਬਾਕਾਈ ਨੇ ਕਿਹਾ ਕਿ ਵਾਸ਼ਿੰਗਟਨ ਨਾਲ ਹਾਲੀਆ ਗੱਲਬਾਤ ਦਾ ਮੁੱਖ ਮਕਸਦ ਜੰਗ ਨੂੰ ਖ਼ਤਮ ਕਰਨਾ ਸੀ, ਨਾ ਕਿ ਯੂਰੇਨੀਅਮ ਵਾਪਸ ਹਾਸਲ ਕਰਨਾ।
ਹੁਣ ਗੱਲਬਾਤ ਜੰਗ ਖ਼ਤਮ ਕਰਨ 'ਤੇ ਕੇਂਦਰਿਤ - ਈਰਾਨੀ ਬੁਲਾਰਾ
ਈਰਾਨੀ ਬੁਲਾਰੇ ਨੇ ਅੱਗੇ ਕਿਹਾ, "ਪਿਛਲੀ ਗੱਲਬਾਤ ਦਾ ਫੋਕਸ ਪਰਮਾਣੂ ਮੁੱਦੇ 'ਤੇ ਸੀ, ਪਰ ਹੁਣ ਚਰਚਾ ਜੰਗ ਨੂੰ ਖ਼ਤਮ ਕਰਨ 'ਤੇ ਕੇਂਦਰਿਤ ਹੈ। ਜ਼ਾਹਿਰ ਹੈ ਕਿ ਹੁਣ ਵਿਚਾਰ-ਵਟਾਂਦਰੇ ਦੇ ਵਿਸ਼ਿਆਂ ਦਾ ਦਾਇਰਾ ਕਾਫ਼ੀ ਵਧ ਗਿਆ ਹੈ। ਪਾਬੰਦੀਆਂ ਹਟਾਉਣ ਲਈ ਬਣਾਇਆ ਗਿਆ 10 ਨੁਕਾਤੀ ਪਲਾਨ ਸਾਡੇ ਲਈ ਬਹੁਤ ਮਹੱਤਵਪੂਰਨ ਹੈ। ਥੋਪੀ ਗਈ ਜੰਗ ਦੌਰਾਨ ਹੋਏ ਨੁਕਸਾਨ ਦੇ ਮੁਆਵਜ਼ੇ ਦਾ ਮੁੱਦਾ ਸਾਡੇ ਲਈ ਖ਼ਾਸ ਅਹਿਮਿਅਤ ਰੱਖਦਾ ਹੈ।"
ਅਮਰੀਕੀ ਮੀਡੀਆ ਰਿਪੋਰਟ ਦੇ ਦਾਵੇ
ਈਰਾਨੀ ਬੁਲਾਰੇ ਦਾ ਇਹ ਬਿਆਨ ਅਮਰੀਕੀ ਨਿਊਜ਼ ਵੈੱਬਸਾਈਟ 'ਐਕਸੀਓਸ' (Axios) ਦੀ ਇੱਕ ਰਿਪੋਰਟ ਤੋਂ ਬਾਅਦ ਆਇਆ ਹੈ। ਉਸ ਰਿਪੋਰਟ ਵਿੱਚ ਦਾਵਾ ਕੀਤਾ ਗਿਆ ਸੀ ਕਿ ਅਮਰੀਕਾ ਅਤੇ ਈਰਾਨ ਇੱਕ ਅਜਿਹੇ ਪ੍ਰਸਤਾਵ 'ਤੇ ਗੱਲਬਾਤ ਕਰ ਰਹੇ ਹਨ, ਜਿਸ ਤਹਿਤ ਈਰਾਨ ਵੱਲੋਂ ਯੂਰੇਨੀਅਮ ਦਾ ਭੰਡਾਰ ਸੌਂਪਣ ਦੇ ਬਦਲੇ ਅਮਰੀਕਾ ਈਰਾਨ ਦੇ ਫ੍ਰੀਜ਼ ਕੀਤੇ ਗਏ 20 ਅਰਬ ਡਾਲਰ ਦੇ ਫੰਡ ਜਾਰੀ ਕਰ ਸਕਦਾ ਹੈ।