ਮਾਨਵ ਤਸਕਰੀ ਤੇ ਸਾਈਬਰ ਅਪਰਾਧ 'ਤੇ ਚੀਨ ਦੀ ਵੱਡੀ ਕਾਰਵਾਈ, ਮਿਆਂਮਾਰ ਦੇ ਮਿੰਗ ਗਿਰੋਹ ਦੇ 11 ਮੈਂਬਰਾਂ ਨੂੰ ਫਾਂਸੀ 'ਤੇ ਲਟਕਾਇਆ

ਡਿਜੀਟਲ ਡੈਸਕ, ਨਵੀਂ ਦਿੱਲੀ। ਆਨਲਾਈਨ ਧੋਖਾਧੜੀ ਤੇ ਮਾਨਵ ਤਸਕਰੀ ਵਿਰੁੱਧ ਚੀਨ ਨੇ ਹੁਣ ਤੱਕ ਦੀ ਸਭ ਤੋਂ ਵੱਡੀ ਕਾਰਵਾਈ ਕੀਤੀ ਹੈ। ਚੀਨ ਨੇ ਮਿਆਂਮਾਰ ਦੇ ਕੁਖਿਆਤ 'ਮਿੰਗ ਪਰਿਵਾਰ' ਦੇ 11 ਮੈਂਬਰਾਂ ਨੂੰ ਫਾਂਸੀ ਦੀ ਸਜ਼ਾ ਦਿੱਤੀ ਹੈ। ਅਗਵਾ ਅਤੇ ਆਨਲਾਈਨ ਧੋਖਾਧੜੀ ਦੇ ਦੋਸ਼ੀ ਪਾਏ ਗਏ 'ਮਿੰਗ ਪਰਿਵਾਰ' ਦੇ 11 ਮੈਂਬਰਾਂ ਨੂੰ ਵੀਰਵਾਰ ਨੂੰ ਫਾਂਸੀ ਦਿੱਤੀ ਗਈ।

ਦਰਅਸਲ, ਚੀਨੀ ਸਰਕਾਰੀ ਮੀਡੀਆ ਨੇ ਵੀਰਵਾਰ ਨੂੰ ਦੱਸਿਆ ਕਿ ਚੀਨ ਨੇ ਕੁਖਿਆਤ ਮਿੰਗ ਪਰਿਵਾਰ ਦੇ ਅਪਰਾਧਿਕ ਗਿਰੋਹ ਦੇ 11 ਮੈਂਬਰਾਂ ਨੂੰ ਫਾਂਸੀ ਦੇ ਦਿੱਤੀ ਹੈ। ਇਨ੍ਹਾਂ ਅਪਰਾਧੀਆਂ ਵੱਲੋਂ ਮਿਆਂਮਾਰ ਦੇ ਸਰਹੱਦੀ ਇਲਾਕਿਆਂ ਵਿੱਚ 'ਸਕੈਮ ਸੈਂਟਰ' ਚਲਾਏ ਜਾਂਦੇ ਸਨ, ਜਿੱਥੇ ਬੰਧਕ ਬਣਾਏ ਗਏ ਮਜ਼ਦੂਰਾਂ ਦੀ ਹੱਤਿਆ ਅਤੇ ਤਸੀਹਿਆਂ ਰਾਹੀਂ ਅਰਬਾਂ ਡਾਲਰਾਂ ਦਾ ਕਾਲਾ ਕਾਰੋਬਾਰ ਕੀਤਾ ਜਾ ਰਿਹਾ ਸੀ।

ਧੋਖਾਧੜੀ ਤੇ ਵੇਸਵਾਗਮਨੀ ਵਿੱਚ ਸ਼ਾਮਲ ਸੀ ਗਿਰੋਹ

CNN ਦੀ ਰਿਪੋਰਟ ਦੇ ਅਨੁਸਾਰ, ਮਿੰਗ ਪਰਿਵਾਰ ਉੱਤਰੀ ਮਿਆਂਮਾਰ ਦੇ ਅਖੌਤੀ ਚਾਰ ਪਰਿਵਾਰਾਂ ਵਿੱਚੋਂ ਇੱਕ ਸੀ—ਇਹ ਅਜਿਹੇ ਅਪਰਾਧਿਕ ਗਿਰੋਹ ਸਨ, ਜਿਨ੍ਹਾਂ 'ਤੇ ਇੰਟਰਨੈੱਟ ਧੋਖਾਧੜੀ, ਵੇਸਵਾਗਮਨੀ ਅਤੇ ਨਸ਼ੀਲੇ ਪਦਾਰਥਾਂ ਦੇ ਉਤਪਾਦਨ ਨਾਲ ਜੁੜੇ ਸੈਂਕੜੇ ਕੰਪਲੈਕਸ ਚਲਾਉਣ ਦਾ ਦੋਸ਼ ਸੀ। ਇਨ੍ਹਾਂ ਦੇ ਮੈਂਬਰ ਸਥਾਨਕ ਸਰਕਾਰ ਅਤੇ ਮਿਆਂਮਾਰ ਦੇ ਸੱਤਾਧਾਰੀ ਫੌਜੀ ਸ਼ਾਸਨ ਨਾਲ ਜੁੜੇ ਮਿਲੀਸ਼ੀਆ ਵਿੱਚ ਪ੍ਰਮੁੱਖ ਅਹੁਦਿਆਂ 'ਤੇ ਸਨ।

ਸ਼ਿਨਹੂਆ ਨਿਊਜ਼ ਏਜੰਸੀ ਦੇ ਅਨੁਸਾਰ, ਜਿਨ੍ਹਾਂ 11 ਲੋਕਾਂ ਨੂੰ ਫਾਂਸੀ ਦਿੱਤੀ ਗਈ, ਉਨ੍ਹਾਂ ਨੂੰ ਸਤੰਬਰ ਵਿੱਚ ਹੱਤਿਆ, ਨਜਾਇਜ਼ ਹਿਰਾਸਤ ਅਤੇ ਧੋਖਾਧੜੀ ਸਮੇਤ ਵੱਖ-ਵੱਖ ਅਪਰਾਧਾਂ ਵਿੱਚ ਦੋਸ਼ੀ ਪਾਏ ਜਾਣ ਤੋਂ ਬਾਅਦ ਮੌਤ ਦੀ ਸਜ਼ਾ ਸੁਣਾਈ ਗਈ ਸੀ।

ਮਿੰਗ ਜੂਚਾਂਗ ਦੀ ਅਗਵਾਈ ਵਾਲਾ ਇਹ ਅਪਰਾਧਿਕ ਗਿਰੋਹ ਲੰਬੇ ਸਮੇਂ ਤੋਂ ਮਿਆਂਮਾਰ ਦੀ ਚੀਨ ਸਰਹੱਦ ਨਾਲ ਲੱਗਦੇ ਖ਼ੁਦਮੁਖਤਿਆਰ ਖੇਤਰ ਕੋਕਾਂਗ ਵਿੱਚ ਸਥਿਤ ਕੁਖਿਆਤ ਕੰਪਲੈਕਸ 'ਕਰਾਊਚਿੰਗ ਟਾਈਗਰ ਵਿਲਾ' ਨਾਲ ਜੁੜਿਆ ਹੋਇਆ ਸੀ। ਇਸ ਗਿਰੋਹ ਵਿੱਚ 10,000 ਲੋਕ ਸ਼ਾਮਲ ਸਨ ਜੋ ਧੋਖਾਧੜੀ ਅਤੇ ਹੋਰ ਅਪਰਾਧ ਕਰਦੇ ਸਨ।

2023 ਵਿੱਚ ਚੀਨ ਨੇ ਸ਼ੁਰੂ ਕੀਤੀ ਕਾਰਵਾਈ

ਮਾਨਵ ਤਸਕਰੀ ਦੇ ਸ਼ਿਕਾਰ ਲੋਕਾਂ ਦੇ ਪਰਿਵਾਰਾਂ ਵੱਲੋਂ ਸਾਲਾਂ ਤੋਂ ਕੀਤੀਆਂ ਜਾ ਰਹੀਆਂ ਸ਼ਿਕਾਇਤਾਂ ਅਤੇ ਅੰਤਰਰਾਸ਼ਟਰੀ ਮੀਡੀਆ ਦੇ ਵਧਦੇ ਧਿਆਨ ਤੋਂ ਬਾਅਦ, ਬੀਜਿੰਗ ਨੇ 2023 ਵਿੱਚ ਇਨ੍ਹਾਂ 'ਤੇ ਕਾਰਵਾਈ ਸ਼ੁਰੂ ਕੀਤੀ। ਚੀਨ ਨੇ ਪਰਿਵਾਰਕ ਮੈਂਬਰਾਂ ਦੇ ਖਿਲਾਫ ਧੋਖਾਧੜੀ, ਹੱਤਿਆ ਅਤੇ ਤਸਕਰੀ ਦਾ ਦੋਸ਼ ਲਗਾਉਂਦੇ ਹੋਏ ਗ੍ਰਿਫਤਾਰੀ ਵਾਰੰਟ ਜਾਰੀ ਕੀਤੇ ਅਤੇ ਉਨ੍ਹਾਂ ਦੀ ਗ੍ਰਿਫਤਾਰੀ ਲਈ 14,000 ਡਾਲਰ ਤੋਂ ਲੈ ਕੇ 70,000 ਡਾਲਰ ਤੱਕ ਦਾ ਇਨਾਮ ਘੋਸ਼ਿਤ ਕੀਤਾ।

ਵੀਰਵਾਰ ਨੂੰ ਕੁਖਿਆਤ 'ਮਿੰਗ ਪਰਿਵਾਰ' ਦੇ 11 ਮੈਂਬਰਾਂ ਨੂੰ ਫਾਂਸੀ ਦਿੱਤੀ ਗਈ। ਫਾਂਸੀ ਤੋਂ ਪਹਿਲਾਂ ਉਨ੍ਹਾਂ ਦੀ ਮੁਲਾਕਾਤ ਨਜ਼ਦੀਕੀ ਰਿਸ਼ਤੇਦਾਰਾਂ ਨਾਲ ਕਰਵਾਈ ਗਈ।