ਸਾਵਧਾਨ! 8 ਸਤੰਬਰ ਤੋਂ ਇਨ੍ਹਾਂ Android ਫ਼ੋਨਾਂ 'ਚ ਬੰਦ ਹੋ ਜਾਵੇਗਾ WhatsApp, ਦੇਖੋ ਕਿਤੇ ਤੁਹਾਡਾ ਫ਼ੋਨ ਵੀ ਤਾਂ ਨਹੀਂ ਇਸ ਲਿਸਟ 'ਚ?

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ: ਜੇਕਰ ਤੁਸੀਂ ਵੀ Android ਸਮਾਰਟਫ਼ੋਨ ਦੀ ਵਰਤੋਂ ਕਰ ਰਹੇ ਹੋ, ਤਾਂ ਤੁਹਾਡੇ ਲਈ ਵੱਡੀ ਖ਼ਬਰ ਹੈ। WhatsApp ਨੇ ਆਪਣੇ ਪਲੇਟਫਾਰਮ ਲਈ ਘੱਟੋ-ਘੱਟ ਸਿਸਟਮ ਲੋੜਾਂ (System Requirements) ਵਿੱਚ ਬਦਲਾਅ ਕਰਨ ਦਾ ਫੈਸਲਾ ਕੀਤਾ ਹੈ। ਜੀ ਹਾਂ, ਹੁਣ ਕੰਪਨੀ 8 ਸਤੰਬਰ 2026 ਤੋਂ Android 6.0 ਤੋਂ ਪੁਰਾਣੇ ਵਰਜ਼ਨਾਂ 'ਤੇ WhatsApp ਸਪੋਰਟ ਨੂੰ ਪੂਰੀ ਤਰ੍ਹਾਂ ਬੰਦ ਕਰਨ ਜਾ ਰਹੀ ਹੈ।

ਸੌਖੇ ਸ਼ਬਦਾਂ ਵਿੱਚ ਕਹੀਏ ਤਾਂ ਜੇਕਰ ਤੁਹਾਡਾ ਫ਼ੋਨ Android 5.0 ਜਾਂ 5.1 'ਤੇ ਚੱਲ ਰਿਹਾ ਹੈ, ਤਾਂ ਇਸ ਤਰੀਕ ਤੋਂ ਬਾਅਦ WhatsApp ਉਸ ਡਿਵਾਈਸ 'ਤੇ ਕੰਮ ਨਹੀਂ ਕਰੇਗਾ।

ਕੰਪਨੀ ਨੇ ਇਹ ਫੈਸਲਾ ਕਿਉਂ ਲਿਆ?

ਦਰਅਸਲ, WhatsApp ਲਗਾਤਾਰ ਨਵੇਂ-ਨਵੇਂ ਫੀਚਰਜ਼ ਪੇਸ਼ ਕਰ ਰਿਹਾ ਹੈ ਅਤੇ ਬਿਹਤਰ ਪ੍ਰਦਰਸ਼ਨ ਲਈ ਐਪ ਨੂੰ ਅਪਡੇਟ ਕਰਨਾ ਜ਼ਰੂਰੀ ਹੈ। ਪਰ ਪੁਰਾਣੇ Android ਵਰਜ਼ਨ ਅਤੇ ਕਮਜ਼ੋਰ ਹਾਰਡਵੇਅਰ ਕਾਰਨ ਇਨ੍ਹਾਂ ਨਵੇਂ ਫੀਚਰਜ਼ ਨੂੰ ਸਹੀ ਢੰਗ ਨਾਲ ਚਲਾਉਣ ਵਿੱਚ ਮੁਸ਼ਕਲ ਆ ਸਕਦੀ ਹੈ। ਇਸੇ ਕਾਰਨ ਕੰਪਨੀ ਹੁਣ ਪੁਰਾਣੇ ਵਰਜ਼ਨਾਂ ਦਾ ਸਪੋਰਟ ਖ਼ਤਮ ਕਰਨ ਜਾ ਰਹੀ ਹੈ।

ਰਿਪੋਰਟਾਂ ਅਨੁਸਾਰ ਭਾਰਤ, ਬ੍ਰਾਜ਼ੀਲ, ਪਾਕਿਸਤਾਨ ਅਤੇ ਕਈ ਏਸ਼ੀਆਈ ਤੇ ਅਫਰੀਕੀ ਦੇਸ਼ਾਂ ਵਿੱਚ ਅਜੇ ਵੀ ਵੱਡੀ ਗਿਣਤੀ ਵਿੱਚ ਯੂਜ਼ਰਜ਼ ਪੁਰਾਣੇ Android ਫ਼ੋਨ ਵਰਤ ਰਹੇ ਹਨ। ਅਜਿਹੇ 'ਚ ਇਹ ਬਦਲਾਅ ਲੱਖਾਂ ਯੂਜ਼ਰਜ਼ ਨੂੰ ਪ੍ਰਭਾਵਿਤ ਕਰ ਸਕਦਾ ਹੈ।

WhatsApp ਭੇਜ ਰਿਹਾ ਹੈ ਅਲਰਟ

ਇੰਨਾ ਹੀ ਨਹੀਂ, WhatsApp ਨੇ ਪ੍ਰਭਾਵਿਤ ਯੂਜ਼ਰਜ਼ ਨੂੰ ਪਹਿਲਾਂ ਹੀ ਅਲਰਟ ਭੇਜਣਾ ਸ਼ੁਰੂ ਕਰ ਦਿੱਤਾ ਹੈ। ਐਪ ਖੋਲ੍ਹਦੇ ਹੀ ਯੂਜ਼ਰਜ਼ ਨੂੰ ਇੱਕ ਨੋਟੀਫਿਕੇਸ਼ਨ ਦਿਖਾਈ ਦੇ ਰਿਹਾ ਹੈ, ਜਿਸ ਵਿੱਚ ਦੱਸਿਆ ਜਾ ਰਿਹਾ ਹੈ ਕਿ 8 ਸਤੰਬਰ 2026 ਤੋਂ ਬਾਅਦ ਇਹ ਸੇਵਾ ਉਪਲਬਧ ਨਹੀਂ ਰਹੇਗੀ।

ਹਾਲਾਂਕਿ, ਜੇਕਰ ਤੁਹਾਡੇ ਡਿਵਾਈਸ ਵਿੱਚ Android 6.0 ਜਾਂ ਉਸ ਤੋਂ ਉੱਪਰ ਦਾ ਵਰਜ਼ਨ ਇੰਸਟਾਲ ਹੈ, ਤਾਂ ਤੁਹਾਨੂੰ ਚਿੰਤਾ ਕਰਨ ਦੀ ਕੋਈ ਲੋੜ ਨਹੀਂ ਹੈ। ਤੁਹਾਡਾ WhatsApp ਪਹਿਲਾਂ ਵਾਂਗ ਹੀ ਚੱਲਦਾ ਰਹੇਗਾ। ਨਾਲ ਹੀ iPhone ਅਤੇ iPad ਯੂਜ਼ਰਜ਼ 'ਤੇ ਵੀ ਇਸ ਦਾ ਕੋਈ ਅਸਰ ਨਹੀਂ ਪਵੇਗਾ।

ਤੁਰੰਤ ਕਰ ਲਓ ਇਹ ਜ਼ਰੂਰੀ ਕੰਮ

ਜੇ ਤੁਹਾਡਾ ਡਿਵਾਈਸ Android 5.0 ਜਾਂ 5.1 ਜਾਂ ਉਸ ਤੋਂ ਘੱਟ ਵਰਜ਼ਨ 'ਤੇ ਚੱਲ ਰਿਹਾ ਹੈ, ਤਾਂ ਤੁਹਾਨੂੰ ਇਸਨੂੰ ਤੁਰੰਤ ਅਪਡੇਟ ਕਰ ਲੈਣਾ ਚਾਹੀਦਾ ਹੈ। ਜੇ ਤੁਹਾਡੇ ਫ਼ੋਨ 'ਤੇ ਕੋਈ ਅਪਡੇਟ ਉਪਲਬਧ ਨਹੀਂ ਹੈ, ਤਾਂ ਨਵਾਂ ਸਮਾਰਟਫ਼ੋਨ ਖਰੀਦਣਾ ਹੀ ਇੱਕੋ-ਇੱਕ ਆਪਸ਼ਨ ਰਹਿ ਜਾਵੇਗਾ। ਇਸ ਤੋਂ ਇਲਾਵਾ, ਹੁਣੇ ਤੋਂ ਆਪਣੀਆਂ ਚੈਟਸ ਦਾ ਬੈਕਅੱਪ ਲੈ ਲਓ ਤਾਂ ਜੋ ਤੁਹਾਡਾ ਸਾਰਾ ਡਾਟਾ ਸੁਰੱਖਿਅਤ ਰਹੇ।