ਰਸੋਈ 'ਚ ਵਾਰ-ਵਾਰ ਦੁੱਧ, ਨਮਕ ਜਾਂ ਤੇਲ ਦਾ ਡਿੱਗਣਾ ਨਹੀਂ ਹੈ ਸ਼ੁੱਭ ਸੰਕੇਤ; ਜਾਣੋ ਕੀ ਹਨ ਸੰਕੇਤ ਤੇ ਬਚਣ ਦੇ ਉਪਾਅ

ਧਰਮ ਡੈਸਕ, ਨਵੀਂ ਦਿੱਲੀ : ਰਸੋਈ 'ਚ ਕੰਮ ਕਰਦੇ-ਕਰਦੇ ਦੁੱਧ, ਨਮਕ ਜਾਂ ਤੇਲ ਦਾ ਡਿੱਗ ਜਾਣਾ ਆਮ ਗੱਲ ਹੋ ਸਕਦੀ ਹੈ, ਪਰ ਜੇਕਰ ਅਜਿਹਾ ਵਾਰ-ਵਾਰ ਹੁੰਦਾ ਹੈ ਤਾਂ ਇਹ ਤੁਹਾਡੇ ਲਈ ਮੁਸੀਬਤ ਖੜ੍ਹੀ ਕਰ ਸਕਦਾ ਹੈ। ਸ਼ਕੁਨ ਸ਼ਾਸਤਰ 'ਚ ਇਨ੍ਹਾਂ ਚੀਜ਼ਾਂ ਦਾ ਵਾਰ-ਵਾਰ ਡਿੱਗਣਾ ਕੋਈ ਆਮ ਸੰਕੇਤ ਨਹੀਂ ਹੁੰਦਾ, ਸਗੋਂ ਇਹ ਭਵਿੱਖ ਵਿਚ ਵਾਪਰਨ ਵਾਲੇ ਕੁਝ ਅਸ਼ੁੱਭ ਸੰਕੇਤਾਂ ਵੱਲ ਇਸ਼ਾਰਾ ਕਰਦੇ ਹਨ। ਆਓ ਜਾਣਦੇ ਹਾਂ ਕਿ ਅਜਿਹਾ ਹੋਣ 'ਤੇ ਤੁਹਾਨੂੰ ਕੀ ਉਪਾਅ ਕਰਨੇ ਚਾਹੀਦੇ ਹਨ।

ਕੀ ਹੋ ਸਕਦਾ ਹੈ ਸੰਕੇਤ?

ਵਾਰ-ਵਾਰ ਦੁੱਧ ਦਾ ਉਬਲ ਕੇ ਡਿੱਗਣਾ ਜੋਤਿਸ਼ ਦੀ ਨਜ਼ਰ 'ਚ ਚਿੰਤਾ ਦਾ ਵਿਸ਼ਾ ਮੰਨਿਆ ਜਾਂਦਾ ਹੈ। ਜੋਤਿਸ਼ ਸ਼ਾਸਤਰ 'ਚ ਚਿੱਟੇ ਰੰਗ ਦੀਆਂ ਚੀਜ਼ਾਂ ਨੂੰ ਚੰਦਰਮਾ ਨਾਲ ਜੋੜ ਕੇ ਦੇਖਿਆ ਜਾਂਦਾ ਹੈ। ਅਜਿਹੇ ਵਿਚ ਵਾਰ-ਵਾਰ ਦੁੱਧ ਦਾ ਉਬਲ ਕੇ ਬਰਤਨ ਤੋਂ ਬਾਹਰ ਡਿੱਗਣਾ ਚੰਦਰ ਦੋਸ਼ ਦਾ ਸੰਕੇਤ ਮੰਨਿਆ ਜਾਂਦਾ ਹੈ। ਵਾਰ-ਵਾਰ ਦੁੱਧ ਡਿੱਗਣਾ ਘਰ ਵਿਚ ਅਸ਼ਾਂਤੀ, ਧਨ ਦੀ ਹਾਨੀ ਜਾਂ ਕਿਸੇ ਆਉਣ ਵਾਲੀ ਬਿਪਦਾ ਵੱਲ ਇਸ਼ਾਰਾ ਕਰਦਾ ਹੈ। ਪਰ ਤੁਸੀਂ ਕੁਝ ਜੋਤਿਸ਼ ਉਪਾਅ ਰਾਹੀਂ ਇਸ ਦੋਸ਼ ਤੋਂ ਬਚ ਸਕਦੇ ਹੋ।

ਉਪਾਅ: ਜੋਤਸ਼ੀਆਂ ਅਨੁਸਾਰ, ਦੋਸ਼ ਤੋਂ ਬਚਣ ਲਈ ਦੁੱਧ ਡਿੱਗ ਜਾਣ 'ਤੇ ਦੇਵੀ ਅੰਨਪੂਰਨਾ ਤੋਂ ਖਿਮਾ ਮੰਗੋ। ਇਸਦੇ ਨਾਲ ਹੀ ਸੋਮਵਾਰ ਨੂੰ ਸ਼ਿਵਲਿੰਗ 'ਤੇ ਕੱਚਾ ਦੁੱਧ ਚੜ੍ਹਾਓ ਤੇ ਘਰ ਵਿਚ ਸ਼ਾਂਤੀ ਲਈ ਕਪੂਰ ਜਲਾਓ।

ਨਮਕ ਦਾ ਡਿੱਗਣਾ ਕੀ ਸੰਕੇਤ ਦਿੰਦਾ ਹੈ?

ਜੋਤਿਸ਼ ਸ਼ਾਸਤਰ 'ਚ ਨਮਕ ਨੂੰ ਸ਼ੁੱਕਰ ਤੇ ਚੰਦਰਮਾ ਨਾਲ ਜੋੜ ਕੇ ਦੇਖਿਆ ਜਾਂਦਾ ਹੈ। ਅਜਿਹੇ ਵਿੱਚ ਜੇਕਰ ਤੁਹਾਡੇ ਹੱਥੋਂ ਵਾਰ-ਵਾਰ ਨਮਕ ਡਿੱਗ ਰਿਹਾ ਹੈ ਤਾਂ ਇਸਨੂੰ ਚੰਗਾ ਨਹੀਂ ਮੰਨਿਆ ਜਾਂਦਾ। ਇਹ ਤੁਹਾਡੀ ਕੁੰਡਲੀ ਵਿੱਚ ਸ਼ੁੱਕਰ ਜਾਂ ਚੰਦਰਮਾ ਦੇ ਕਮਜ਼ੋਰ ਹੋਣ ਦਾ ਸੰਕੇਤ ਦਿੰਦਾ ਹੈ। ਇਸਦਾ ਮਤਲਬ ਹੈ ਕਿ ਨੇੜਲੇ ਭਵਿੱਖ ਵਿਚ ਤੁਹਾਨੂੰ ਧਨ ਦੀ ਹਾਨੀ ਅਤੇ ਪਰਿਵਾਰ ਵਿੱਚ ਕਲੇਸ਼ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।

ਉਪਾਅ: ਜੇਕਰ ਤੁਹਾਡੇ ਹੱਥੋਂ ਨਮਕ ਡਿੱਗ ਜਾਂਦਾ ਹੈ ਤਾਂ ਇਸਨੂੰ ਝਾੜੂ ਨਾਲ ਨਹੀਂ ਹੂੰਝਣਾ ਚਾਹੀਦਾ, ਖਾਸ ਕਰਕੇ ਰਾਤ ਦੇ ਸਮੇਂ। ਇਸਨੂੰ ਸਿੱਧੇ ਹੱਥ ਨਾਲ ਚੁੱਕਣ ਦੀ ਬਜਾਏ ਕਿਸੇ ਹੋਰ ਵਸਤੂ ਨਾਲ ਸਾਫ਼ ਕਰੋ। ਇਸ ਤੋਂ ਬਾਅਦ ਦੋਸ਼ ਤੋਂ ਬਚਣ ਲਈ ਉਸ ਸਥਾਨ 'ਤੇ ਥੋੜ੍ਹਾ ਜਿਹਾ ਕਪੂਰ ਜਲਾਓ।

ਤੇਲ ਦਾ ਡਿੱਗਣਾ ਵੀ ਨਹੀਂ ਹੈ ਸ਼ੁਭ

ਜੋਤਿਸ਼ ਤੇ ਵਾਸਤੂ ਸ਼ਾਸਤਰ ਦੀ ਦ੍ਰਿਸ਼ਟੀ ਤੋਂ ਨਮਕ ਅਤੇ ਦੁੱਧ ਦੀ ਤਰ੍ਹਾਂ ਤੇਲ ਦਾ ਡਿੱਗਣਾ ਵੀ ਸ਼ੁਭ ਨਹੀਂ ਮੰਨਿਆ ਜਾਂਦਾ। ਜੇਕਰ ਤੁਹਾਡੇ ਹੱਥੋਂ ਫਿਸਲ ਕੇ ਵਾਰ-ਵਾਰ ਤੇਲ ਡਿੱਗ ਜਾਂਦਾ ਹੈ ਤਾਂ ਇਹ ਰਾਹੂ ਦੇ ਦੋਸ਼, ਧਨ ਦੀ ਹਾਨੀ ਜਾਂ ਫਿਰ ਕਿਸੇ ਆਉਣ ਵਾਲੀ ਮੁਸੀਬਤ ਦਾ ਸੰਕੇਤ ਮੰਨਿਆ ਜਾਂਦਾ ਹੈ।

ਉਪਾਅ: ਦੋਸ਼ ਤੋਂ ਬਚਣ ਲਈ ਤੁਸੀਂ ਸ਼ਨੀਵਾਰ ਨੂੰ 'ਛਾਇਆ ਦਾਨ' ਕਰੋ। ਇਸਦੇ ਲਈ ਇਕ ਕਟੋਰੇ 'ਚ ਤੇਲ ਲੈ ਕੇ ਆਪਣਾ ਚਿਹਰਾ ਦੇਖੋ ਅਤੇ ਉਸਨੂੰ ਸ਼ਨੀ ਮੰਦਰ 'ਚ ਦਾਨ ਕਰ ਦਿਓ। ਇਸਦੇ ਨਾਲ ਹੀ ਭਗਵਾਨ ਭੈਰਵ ਦੀ ਪੂਜਾ ਵੀ ਇਸ ਦੋਸ਼ ਤੋਂ ਬਚਣ ਦਾ ਇੱਕ ਚੰਗਾ ਉਪਾਅ ਮੰਨਿਆ ਗਿਆ ਹੈ।