ਮੋਹਿਨੀ ਇਕਾਦਸ਼ੀ 'ਤੇ ਗ਼ਲਤੀ ਨਾਲ ਵੀ ਨਾ ਖਾਓ ਇਹ ਚੀਜ਼ਾਂ, ਨਹੀਂ ਤਾਂ ਖੰਡਿਤ ਹੋ ਜਾਵੇਗਾ ਤੁਹਾਡਾ ਵਰਤ ਤੇ ਪੁੰਨ!

ਧਰਮ ਡੈਸਕ, ਨਵੀਂ ਦਿੱਲੀ: ਹਿੰਦੂ ਧਰਮ 'ਚ ਇਕਾਦਸ਼ੀ ਦੇ ਵਰਤ ਦਾ ਵਿਸ਼ੇਸ਼ ਮਹੱਤਵ ਹੈ, ਅਤੇ ਵੈਸਾਖ ਮਹੀਨੇ ਦੇ ਸ਼ੁਕਲ ਪੱਖ ਦੀ ਮੋਹਿਨੀ ਇਕਾਦਸ਼ੀ ਤਾਂ ਖੁਦ ਭਗਵਾਨ ਵਿਸ਼ਨੂੰ ਦੇ ਸਭ ਤੋਂ ਮਨਮੋਹਕ ਰੂਪ ਨਾਲ ਜੁੜੀ ਹੋਈ ਹੈ। ਪੁਰਾਣੀਆਂ ਕਥਾਵਾਂ ਅਨੁਸਾਰ, ਇਸੇ ਦਿਨ ਪ੍ਰਭੂ ਨੇ ਮੋਹਿਨੀ ਰੂਪ ਧਾਰਨ ਕਰ ਕੇ ਅਸੁਰਾਂ (ਰਾਖਸ਼ਾਂ) ਤੋਂ ਅੰਮ੍ਰਿਤ ਦੀ ਰੱਖਿਆ ਕੀਤੀ ਸੀ। ਅਜਿਹੀ ਮਾਨਤਾ ਹੈ ਕਿ ਇਹ ਵਰਤ ਰੱਖਣ ਨਾਲ ਵਿਅਕਤੀ ਦੇ ਸਾਰੇ ਪਾਪਾਂ ਦਾ ਅੰਤ ਹੋ ਜਾਂਦਾ ਹੈ ਅਤੇ ਮੋਕਸ਼ ਦੀ ਪ੍ਰਾਪਤੀ ਹੁੰਦੀ ਹੈ।

ਹਾਲਾਂਕਿ, ਇਕਾਦਸ਼ੀ ਦਾ ਵਰਤ ਜਿੰਨਾ ਫਲਦਾਇਕ ਹੈ, ਇਸ ਦੇ ਨਿਯਮ ਓਨੇ ਹੀ ਕਠਿਨ ਹਨ। ਅਣਜਾਣੇ 'ਚ ਕੀਤਾ ਗਿਆ ਗਲਤ ਖਾਣ-ਪੀਣ ਤੁਹਾਡੀ ਪੂਰੇ ਦਿਨ ਦੀ ਤਪੱਸਿਆ ਨੂੰ ਖਤਮ ਕਰ ਸਕਦਾ ਹੈ। ਜੇਕਰ ਤੁਸੀਂ ਵੀ ਇਸ ਸਾਲ ਮੋਹਿਨੀ ਇਕਾਦਸ਼ੀ ਦਾ ਵਰਤ ਰੱਖ ਰਹੇ ਹੋ, ਤਾਂ ਇਨ੍ਹਾਂ ਚੀਜ਼ਾਂ ਦਾ ਧਿਆਨ ਜ਼ਰੂਰ ਰੱਖੋ।

ਕੀ ਨਾ ਖਾਓ?

ਚੌਲਾਂ ਦਾ ਤਿਆਗ: ਇਕਾਦਸ਼ੀ ਦੇ ਦਿਨ ਚੌਲ ਖਾਣਾ ਸਭ ਤੋਂ ਵੱਡਾ ਪਾਪ ਮੰਨਿਆ ਜਾਂਦਾ ਹੈ। ਧਾਰਮਿਕ ਮਾਨਤਾਵਾਂ ਅਨੁਸਾਰ, ਇਕਾਦਸ਼ੀ ਦੇ ਦਿਨ ਚੌਲਾਂ 'ਚ 'ਮਹਾਰਿਸ਼ੀ ਮੇਧਾ' ਦੇ ਅੰਸ਼ ਦਾ ਵਾਸ ਹੁੰਦਾ ਹੈ। ਇਸ ਦਿਨ ਚੌਲਾਂ ਦਾ ਸੇਵਨ ਕਰਨਾ ਜੀਵ ਹੱਤਿਆ ਦੇ ਬਰਾਬਰ ਮੰਨਿਆ ਗਿਆ ਹੈ। ਚਾਹੇ ਤੁਸੀਂ ਵਰਤ ਰੱਖ ਰਹੇ ਹੋਵੋ ਜਾਂ ਨਹੀਂ, ਇਕਾਦਸ਼ੀ 'ਤੇ ਘਰ ਵਿੱਚ ਚੌਲ ਨਹੀਂ ਬਣਾਉਣੇ ਚਾਹੀਦੇ।

ਅਨਾਜ ਅਤੇ ਦਾਲਾਂ ਤੋਂ ਬਣਾਓ ਦੂਰੀ: ਮੋਹਿਨੀ ਇਕਾਦਸ਼ੀ ਦੇ ਦਿਨ ਕਣਕ, ਜੌਂ, ਮੱਕੀ ਤੇ ਹਰ ਤਰ੍ਹਾਂ ਦੀਆਂ ਦਾਲਾਂ ਦਾ ਸੇਵਨ ਵਰਜਿਤ ਹੈ। ਅਜਿਹੇ 'ਚ ਵਰਤ ਦੌਰਾਨ ਸਿਰਫ ਫਲਾਂ ਦਾ ਹੀ ਸੇਵਨ ਕਰਨਾ ਚਾਹੀਦਾ ਹੈ। ਜੇਕਰ ਤੁਸੀਂ ਪੂਰਨ ਨਿਰਜਲਾ ਜਾਂ ਫਲਹਾਰੀ ਵਰਤ ਨਹੀਂ ਕਰ ਪਾ ਰਹੇ ਹੋ ਤਾਂ ਕੁਟੂ ਦਾ ਆਟਾ ਜਾਂ ਸਿੰਘਾੜੇ ਦੇ ਆਟੇ ਦੀ ਵਰਤੋਂ ਕਰ ਸਕਦੇ ਹੋ, ਪਰ ਆਮ ਅਨਾਜ ਨੂੰ ਹੱਥ ਵੀ ਨਾ ਲਗਾਓ।

ਤਾਮਸਿਕ ਭੋਜਨ: ਪਿਆਜ਼ ਅਤੇ ਲਸਣ ਨੂੰ ਤਾਮਸਿਕ ਮੰਨਿਆ ਗਿਆ ਹੈ। ਇਹ ਭੋਜਨ ਮਨ ਵਿੱਚ ਆਲਸ ਪੈਦਾ ਕਰਦੇ ਹਨ, ਜੋ ਇਕਾਦਸ਼ੀ ਦੀ ਸਾਤਵਿਕਤਾ ਨੂੰ ਖਤਮ ਕਰਦਾ ਹੈ। ਵਰਤ ਰੱਖਣ ਵਾਲੇ ਵਿਅਕਤੀ ਦੇ ਨਾਲ-ਨਾਲ ਪਰਿਵਾਰ ਦੇ ਹੋਰ ਮੈਂਬਰਾਂ ਨੂੰ ਵੀ ਇਸ ਦਿਨ ਸਾਦੇ ਅਤੇ ਬਿਨਾਂ ਪਿਆਜ਼-ਲਸਣ ਵਾਲੇ ਭੋਜਨ ਦਾ ਸੇਵਨ ਕਰਨਾ ਚਾਹੀਦਾ ਹੈ।

ਸ਼ਹਿਦ ਅਤੇ ਬੈਂਗਣ ਦਾ ਪਰਹੇਜ਼: ਬਹੁਤ ਘੱਟ ਲੋਕ ਜਾਣਦੇ ਹਨ ਕਿ ਇਕਾਦਸ਼ੀ 'ਤੇ ਸ਼ਹਿਦ ਦਾ ਸੇਵਨ ਵੀ ਵਰਜਿਤ ਹੈ। ਸ਼ਹਿਦ ਨੂੰ ਕਈ ਵਾਰ ਤਾਮਸਿਕ ਚੀਜ਼ਾਂ 'ਚ ਗਿਣਿਆ ਜਾਂਦਾ ਹੈ। ਇਸ ਤੋਂ ਇਲਾਵਾ, ਸ਼ਾਸਤਰਾਂ ਵਿੱਚ ਇਕਾਦਸ਼ੀ ਦੇ ਦਿਨ ਬੈਂਗਣ, ਫਲੀਆਂ ਅਤੇ ਪੱਤੇਦਾਰ ਸਬਜ਼ੀਆਂ ਖਾਣਾ ਵੀ ਵਰਜਿਤ ਦੱਸਿਆ ਗਿਆ ਹੈ।

ਮਾਸ-ਸ਼ਰਾਬ: ਧਾਰਮਿਕ ਅਨੁਸਠਾਨ ਵਿੱਚ ਮਾਸ ਅਤੇ ਸ਼ਰਾਬ ਦਾ ਸੇਵਨ ਬਹੁਤ ਵੱਡਾ ਪਾਪ ਮੰਨਿਆ ਜਾਂਦਾ ਹੈ। ਮੋਹਿਨੀ ਇਕਾਦਸ਼ੀ 'ਤੇ ਮਨ, ਕਰਮ ਅਤੇ ਵਚਨ ਦੀ ਪਵਿੱਤਰਤਾ ਜ਼ਰੂਰੀ ਹੁੰਦੀ ਹੈ। ਇਸ ਦਿਨ ਕਿਸੇ ਦੀ ਬੁਰਾਈ ਕਰਨਾ ਜਾਂ ਗੁੱਸਾ ਕਰਨਾ ਵੀ ਵਰਤ ਨੂੰ ਖੰਡਿਤ ਕਰ ਸਕਦਾ ਹੈ।

ਕੀ ਖਾਓ?

• ਇਸ ਦਿਨ ਸਾਰੇ ਤਰ੍ਹਾਂ ਦੇ ਤਾਜ਼ੇ ਫਲ ਜਿਵੇਂ ਕੇਲਾ, ਸੇਬ, ਅੰਬ, ਅੰਗੂਰ ਅਤੇ ਅਨਾਰ ਦਾ ਸੇਵਨ ਕੀਤਾ ਜਾ ਸਕਦਾ ਹੈ।
• ਇਸ ਤਿਥੀ 'ਤੇ ਦੁੱਧ, ਦਹੀ, ਪਨੀਰ ਅਤੇ ਘਰ ਦੇ ਬਣੇ ਮੱਖਣ ਦਾ ਸੇਵਨ ਸਭ ਤੋਂ ਉੱਤਮ ਮੰਨਿਆ ਜਾਂਦਾ ਹੈ।
• ਮੇਵਿਆਂ 'ਚ ਤੁਸੀਂ ਬਾਦਾਮ, ਕਾਜੂ, ਅਖਰੋਟ, ਪਿਸਤਾ ਅਤੇ ਮਖਾਣਿਆਂ ਦਾ ਸੇਵਨ ਕਰ ਸਕਦੇ ਹੋ।
• ਆਮ ਕਣਕ ਦੇ ਆਟੇ ਦੀ ਜਗ੍ਹਾ ਕੁਟੂ, ਸਿੰਘਾੜਾ ਜਾਂ ਰਾਜਗੀਰਾ ਦੇ ਆਟੇ ਦੀ ਵਰਤੋਂ ਕਰਕੇ ਪੂੜੀ ਜਾਂ ਹਲਵਾ ਬਣਾ ਸਕਦੇ ਹੋ।
• ਇਸ ਵਰਤ ਵਿੱਚ ਸਾਬੂਦਾਣੇ ਦੀ ਖਿਚੜੀ ਜਾਂ ਖੀਰ ਵੀ ਖਾਧੀ ਜਾ ਸਕਦੀ ਹੈ।
• ਆਲੂ, ਸ਼ਕਰਕੰਦੀ, ਕੱਦੂ ਅਤੇ ਅਰਬੀ ਦਾ ਸੇਵਨ ਵੀ ਕਰ ਸਕਦੇ ਹੋ। ਕੁਝ ਲੋਕ ਇਸ ਦਿਨ ਖੀਰਾ ਅਤੇ ਗਾਜਰ ਵੀ ਖਾਂਦੇ ਹਨ।