Tarntaran News : ਨਾਕਾ ਤੋੜ ਕੇ ਭਜਾਈ ਐੱਸਯੂਵੀ, ਪਿੱਛਾ ਕਰਦੀ ਪੁਲਿਸ ’ਤੇ ਚਲਾਈਆਂ ਗੋਲ਼ੀਆਂ; ਜਵਾਬੀ ਕਾਰਵਾਈ ਦੌਰਾਨ ਕਾਰ ਸਵਾਰ ਜ਼ਖ਼ਮੀ

ਸਟਾਫ ਰਿਪੋਰਟਰ•ਪੰਜਾਬੀ ਜਾਗਰਣ, ਤਰਨਤਾਰਨ : ਤਰਨਤਾਰਨ ਜ਼ਿਲ੍ਹੇ ਦੇ ਪਿੰਡ ਨਾਗੋਕੇ ਕੋਲ ਪੁਲਿਸ ਪਾਰਟੀ ਦੇ ਨਾਕੇ ਨੂੰ ਤੋੜ ਕੇ ਭੱਜ ਰਹੇ ਐੱਸਯੂਵੀ ਸਵਾਰ ਨੌਜਵਾਨ ਨੇ ਪਿੱਛਾ ਕਰ ਰਹੀ ਪੁਲਿਸ ਪਾਰਟੀ ਉੱਪਰ ਦੋਵਾਂ ਹੱਥਾਂ ’ਚ ਪਿਸਟਲ ਲੈ ਕੇ ਫਿਲਮੀ ਸਟਾਈਲ ਨਾਲ ਫਾਇਰਿੰਗ ਕਰ ਦਿੱਤੀ। ਹਾਲਾਂਕਿ ਇਸ ਗੋਲ਼ੀਬਾਰੀ ਦੌਰਾਨ ਪੁਲਿਸ ਕਰਮਚਾਰੀ ਵਾਲ ਵਾਲ ਬਚੇ। ਪਰ ਦੁਵੱਲੀ ਗੋਲੀਬਾਰੀ ਦੌਰਾਨ ਐੱਸਯੂਵੀ ਸਵਾਰ ਨੌਜਵਾਨ ਲੱਤ ’ਚ ਗੋਲ਼ੀ ਲੱਗਣ ਕਾਰਨ ਜ਼ਖ਼ਮੀ ਹੋ ਗਿਆ। ਜਿਸ ਨੂੰ ਕਾਬੂ ਕਰਕੇ ਪੁਲਿਸ ਨੇ ਉਸਦੇ ਦੋਵੇਂ ਪਿਸਟਲ ਕਬਜ਼ੇ ਵਿਚ ਲੈ ਲਏ ਹਨ।

ਡੀਐੱਸਪੀ ਸਬ ਡਵੀਜ਼ਨ ਤਰਨਤਾਰਨ ਸੁਖਬੀਰ ਸਿੰਘ ਨੇ ਦੱਸਿਆ ਕਿ ਬੁੱਧਵਾਰ ਦੇਰ ਰਾਤ ਥਾਣਾ ਵੈਰੋਂਵਾਲ ਦੀ ਪੁਲਿਸ ਨੇ ਨਾਗੋਕੇ ਨਹਿਰ ਦੇ ਪੁਲ਼ ’ਤੇ ਨਾਕੇਬੰਦੀ ਕੀਤੀ ਹੋਈ ਸੀ। ਇਸੇ ਦੌਰਾਨ ਇਕ ਬਿਨਾਂ ਨੰਬਰ ਦੀ ਐੱਸਯੂਵੀ ਗੱਡੀ ਆਈ ਅਤੇ ਉਸਦਾ ਚਾਲਕ ਨਾਕਾ ਤੋੜ ਕੇ ਗੱਡੀ ਭਜਾ ਕੇ ਲੈ ਗਿਆ। ਜਿਸਦੇ ਚੱਲਦਿਆਂ ਪੁਲਿਸ ਪਾਰਟੀ ਨੇ ਤੁਰੰਤ ਗੱਡੀ ਦਾ ਪਿੱਛਾ ਸ਼ੁਰੂ ਕਰ ਦਿੱਤਾ। ਪਰ ਗੱਡੀਆਂ ਦੇ ਬਰਾਬਰ ਹੋਣ ’ਤੇ ਕਾਰ ਸਵਾਰ ਨੇ ਪੁਲਿਸ ਪਾਰਟੀ ਉੱਪਰ ਫਾਇਰ ਕੀਤੇ। ਹਾਲਾਂਕਿ ਜਵਾਬੀ ਗੋਲ਼ੀਬਾਰੀ ਦੌਰਾਨ ਉਸਦੀ ਗੱਡੀ ਵੀ ਸਲਿਪ ਹੋ ਕੇ ਰੁਕ ਗਈ ਅਤੇ ਗੱਡੀ ਵਿੱਚੋਂ ਉੱਤਰੇ ਨੌਜਵਾਨ ਦੇ ਦੋਵਾਂ ਹੱਥਾਂ ਵਿਚ ਪਿਸਟਲ ਸਨ, ਜਿਸ ਨਾਲ ਉਸ ਨੇ ਪੁਲਿਸ ਕਰਮਚਾਰੀਆਂ ’ਤੇ ਫਾਇਰਿੰਗ ਸ਼ੁਰੂ ਕਰ ਦਿੱਤੀ। ਜਿਸ ਤੋਂ ਕਰਮਚਾਰੀ ਵਾਲ ਵਾਲ ਬਚੇ। ਪਰ ਜਵਾਬੀ ਗੋਲ਼ੀਬਾਰੀ ਦੌਰਾਨ ਇਕ ਗੋਲ਼ੀ ਉਸਦੀ ਲੱਤ ’ਤੇ ਲੱਗੀ ਅਤੇ ਜ਼ਖ਼ਮੀ ਹਾਲਤ ਵਿਚ ਉਸ ਨੂੰ ਕਾਬੂ ਕਰ ਲਿਆ। ਉਨ੍ਹਾਂ ਦੱਸਿਆ ਕਿ ਫੜੇ ਗਏ ਨੌਜਵਾਨ ਦੀ ਪਛਾਣ ਰਾਕੇਸ਼ ਭਾਰਤੀ ਵਾਸੀ ਬਿਆਸ ਵਜੋਂ ਹੋਈ ਹੈ।