ਤਰਨਤਾਰਨ: ਐਂਟੀ ਡ੍ਰੋਨ ਸਿਸਟਮ ਨੇ ਦਿਖਾਇਆ ਅਸਰ, ਪਿੰਡ ਵਾਂ ਤਾਰਾ ਸਿੰਘ ਦੀ ਮੰਡੀ 'ਚ ਡੇਗੇ 3 ਪਾਕਿਸਤਾਨੀ ਡ੍ਰੋਨ
ਸਰਹੱਦ ਪਾਰੋਂ ਪਾਕਿਸਤਾਨੀ ਤਸਕਰਾਂ ਵੱਲੋਂ ਕੀਤੀਆਂ ਜਾ ਰਹੀਆਂ ਨਾਪਾਕ ਕੋਸ਼ਿਸ਼ਾਂ ਨੂੰ ਰੋਕਣ ਲਈ ਸਥਾਪਤ ਕੀਤੇ ਗਏ 'ਐਂਟੀ ਡ੍ਰੋਨ ਸਿਸਟਮ' (ADS) ਨੂੰ ਅੱਜ ਉਸ ਵੇਲੇ ਵੱਡੀ ਕਾਮਯਾਬੀ ਮਿਲੀ ਜਦੋਂ ਇਸ ਸਿਸਟਮ ਨੇ ਤਿੰਨ ਡ੍ਰੋਨਾਂ ਨੂੰ ਜੈਮ ਕਰਕੇ ਹੇਠਾਂ ਸੁੱਟ ਲਿਆ। ਇਹ ਘਟਨਾ ਸਰਹੱਦੀ ਪਿੰਡ ਵਾਂ ਤਾਰਾ ਸਿੰਘ ਦੀ ਦਾਣਾ ਮੰਡੀ ਵਿੱਚ ਵਾਪਰੀ ਹੈ।
Posted By Sunita
Publish Date: Thu, 29 Jan 2026 02:53 PM (IST)
Updated Date: Thu, 29 Jan 2026 02:54 PM (IST)
ਸਟਾਫ ਰਿਪੋਰਟਰ, ਪੰਜਾਬੀ ਜਾਗਰਣ, ਤਰਨਤਾਰਨ : ਸਰਹੱਦ ਪਾਰੋਂ ਪਾਕਿਸਤਾਨੀ ਤਸਕਰਾਂ ਵੱਲੋਂ ਕੀਤੀਆਂ ਜਾ ਰਹੀਆਂ ਨਾਪਾਕ ਕੋਸ਼ਿਸ਼ਾਂ ਨੂੰ ਰੋਕਣ ਲਈ ਸਥਾਪਤ ਕੀਤੇ ਗਏ 'ਐਂਟੀ ਡ੍ਰੋਨ ਸਿਸਟਮ' (ADS) ਨੂੰ ਅੱਜ ਉਸ ਵੇਲੇ ਵੱਡੀ ਕਾਮਯਾਬੀ ਮਿਲੀ ਜਦੋਂ ਇਸ ਸਿਸਟਮ ਨੇ ਤਿੰਨ ਡ੍ਰੋਨਾਂ ਨੂੰ ਜੈਮ ਕਰਕੇ ਹੇਠਾਂ ਸੁੱਟ ਲਿਆ। ਇਹ ਘਟਨਾ ਸਰਹੱਦੀ ਪਿੰਡ ਵਾਂ ਤਾਰਾ ਸਿੰਘ ਦੀ ਦਾਣਾ ਮੰਡੀ ਵਿੱਚ ਵਾਪਰੀ ਹੈ।
ਜੈਮਰ ਦੀ ਮਦਦ ਨਾਲ ਡੇਗੇ ਡ੍ਰੋਨ
ਐੱਸ.ਐੱਸ.ਪੀ. ਤਰਨਤਾਰਨ, ਸੁਰੇਂਦਰ ਲਾਂਬਾ ਨੇ ਮਾਮਲੇ ਦੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਪੰਜਾਬ ਸਰਕਾਰ ਵੱਲੋਂ ਸਰਹੱਦ ਪਾਰੋਂ ਹੋ ਰਹੀ ਨਸ਼ੇ ਅਤੇ ਹਥਿਆਰਾਂ ਦੀ ਤਸਕਰੀ ਨੂੰ ਰੋਕਣ ਲਈ ਵਿਸ਼ੇਸ਼ ਐਂਟੀ ਡ੍ਰੋਨ ਸਿਸਟਮ ਲਗਾਏ ਗਏ ਹਨ। ਸਥਾਨਕ ਆਪ੍ਰੇਟਰ ਨੇ ਸਿਸਟਮ ਰਾਹੀਂ ਪਛਾਣ ਕੀਤੀ ਕਿ ਪਾਕਿਸਤਾਨ ਵਾਲੇ ਪਾਸਿਓਂ ਤਿੰਨ ਡ੍ਰੋਨ ਭਾਰਤੀ ਖੇਤਰ ਵਿੱਚ ਦਾਖਲ ਹੋਏ ਹਨ। ਮੁਸਤੈਦੀ ਵਰਤਦਿਆਂ ਜੈਮਰ ਦੀ ਮਦਦ ਨਾਲ ਉਹਨਾਂ ਨੂੰ ਕੰਟਰੋਲ ਤੋਂ ਬਾਹਰ ਕਰ ਦਿੱਤਾ ਗਿਆ, ਜਿਸ ਕਾਰਨ ਤਿੰਨੇ ਡ੍ਰੋਨ ਵਾਂ ਤਾਰਾ ਸਿੰਘ ਦੀ ਦਾਣਾ ਮੰਡੀ ਵਿੱਚ ਜਾ ਡਿੱਗੇ।
ਹਾਈ-ਟੈਕ ਡ੍ਰੋਨ ਕੀਤੇ ਬਰਾਮਦ
ਥਾਣਾ ਖਾਲੜਾ ਦੀ ਪੁਲਿਸ ਨੇ ਸੂਚਨਾ ਮਿਲਦੇ ਹੀ ਮੌਕੇ 'ਤੇ ਪਹੁੰਚ ਕੇ ਤਲਾਸ਼ੀ ਅਭਿਆਨ ਚਲਾਇਆ ਅਤੇ ਤਿੰਨੋਂ ਡ੍ਰੋਨਾਂ ਨੂੰ ਆਪਣੇ ਕਬਜ਼ੇ ਵਿੱਚ ਲੈ ਲਿਆ। ਬਰਾਮਦ ਕੀਤੇ ਗਏ ਡ੍ਰੋਨਾਂ ਦੇ ਮਾਡਲ ਇਸ ਪ੍ਰਕਾਰ ਹਨ:
DJI Mavic-4 Pro
DJI Mavic-3 Classic
DJI Air-3
ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਕੇਸ ਦਰਜ
ਪੁਲਿਸ ਅਧਿਕਾਰੀਆਂ ਅਨੁਸਾਰ ਇਹ ਡ੍ਰੋਨ ਕਾਫੀ ਉੱਨਤ ਤਕਨੀਕ ਦੇ ਹਨ। ਇਸ ਸਬੰਧੀ ਥਾਣਾ ਖਾਲੜਾ ਵਿਖੇ ਅਣਪਛਾਤੇ ਵਿਅਕਤੀਆਂ ਵਿਰੁੱਧ ਏਅਰ ਕਰਾਫਟ ਐਕਟ (Aircraft Act) ਦੀਆਂ ਵੱਖ-ਵੱਖ ਧਾਰਾਵਾਂ ਤਹਿਤ ਕੇਸ ਦਰਜ ਕਰ ਲਿਆ ਗਿਆ ਹੈ। ਪੁਲਿਸ ਹੁਣ ਇਹ ਜਾਂਚ ਕਰ ਰਹੀ ਹੈ ਕਿ ਇਹ ਡ੍ਰੋਨ ਕਿਸ ਮਕਸਦ ਲਈ ਭੇਜੇ ਗਏ ਸਨ ਅਤੇ ਭਾਰਤੀ ਖੇਤਰ ਵਿੱਚ ਇਹਨਾਂ ਦੀ ਡਿਲੀਵਰੀ ਕਿਨ੍ਹਾਂ ਤਸਕਰਾਂ ਨੇ ਲੈਣੀ ਸੀ।