ਰੇਲਵੇ ਯਾਤਰੀਆਂ ਨੂੰ ਮਿਲੀ ਵੱਡੀ ਰਾਹਤ! ਰੇਲਵੇ ਬੋਰਡ ਨੇ ਲਿਆ ਗੁਰਮੁਖੀ ਐਕਸਪ੍ਰੈਸ ਰੂਟ ਨੂੰ ਅੰਬ ਅੰਦੌਰਾ ਤੱਕ ਵਧਾਉਣ ਦਾ ਫ਼ੈਸਲਾ

ਲਖਵੀਰ ਖਾਬੜਾ, ਪੰਜਾਬੀ ਜਾਗਰਣ, ਰੂਪਨਗਰ : ਗੁਰਮੁਖੀ ਐਕਸਪ੍ਰੈਸ ਟ੍ਰੇਨ ਨੰਬਰ 12325-12326 ਦੇ ਰੂਟ ਨੂੰ ਲੋਕਾਂ ਦੀ ਮੰਗ ’ਤੇ ਅੰਬ ਅੰਦੌਰਾ ਤੱਕ ਵਧਾਇਆ ਜਾ ਰਿਹਾ ਹੈ। ਰੇਲਵੇ ਬੋਰਡ ਨੇ ਇਸ ਸਬੰਧ ਵਿਚ ਪ੍ਰਵਾਨਗੀ ਦੇ ਦਿੱਤੀ ਹੈ, ਉਮੀਦ ਹੈ ਕਿ ਇਹ ਰੇਲ-ਗੱਡੀ ਮਈ ਦੇ ਪਹਿਲੇ ਹਫ਼ਤੇ ਤੋਂ ਵਧੇ ਹੋਏ ਰੂਟ 'ਤੇ ਚੱਲਣਾ ਸ਼ੁਰੂ ਕਰ ਦੇਵੇਗੀ। ਦੂਜੇ ਪਾਸੇ, ਲੋਕਾਂ ਦੀ ਮੰਗ ਹੈ ਕਿ ਇਸ ਰੇਲ-ਗੱਡੀ ਨੂੰ ਹਫ਼ਤੇ ਵਿਚ ਦੋ ਦਿਨ ਚਲਾਉਣ ਦਾ ਇੰਤਜ਼ਾਮ ਕੀਤਾ ਜਾਵੇ ਕਿਉਂਕਿ ਇਸ ਰੇਲ-ਗੱਡੀ ਵਿਚ ਯਾਤਰਾ ਕਰਨ ਵਾਲੇ ਲੋਕਾਂ ਦੀ ਭੀੜ ਬਹੁਤ ਜ਼ਿਆਦਾ ਬਣੀ ਰਹਿੰਦੀ ਹੈ।

ਜ਼ਿਕਰਯੋਗ ਹੈ ਕਿ ਗੁਰਮੁਖੀ ਐਕਸਪ੍ਰੈਸ, ਜੋ ਕਿ ਕੋਲਕਾਤਾ ਤੇ ਨੰਗਲ ਡੈਮ ਦਰਮਿਆਨ ਚੱਲਦੀ ਹੈ, ਹਰ ਵੀਰਵਾਰ ਨੂੰ ਕੋਲਕਾਤਾ ਤੋਂ ਰਵਾਨਾ ਹੁੰਦੀ ਹੈ। ਇਹ ਰੇਲ-ਗੱਡੀ ਚਾਰ ਪ੍ਰਮੁੱਖ ਰਾਜਾਂ ਨੂੰ ਪਟਨਾ, ਵਾਰਾਣਸੀ, ਲਖਨਊ, ਬਰੇਲੀ, ਮੁਰਾਦਾਬਾਦ, ਸਹਾਰਨਪੁਰ, ਅੰਬਾਲਾ, ਸਰਹਿੰਦ, ਰੂਪਨਗਰ ਤੇ ਸ੍ਰੀ ਅਨੰਦਪੁਰ ਸਾਹਿਬ ਰਾਹੀਂ ਪੰਜਾਬ ਨਾਲ ਜੋੜਦੀ ਹੈ। ਇਹ ਸ਼ੁੱਕਰਵਾਰ ਨੂੰ ਨੰਗਲ ਡੈਮ ਪਹੁੰਚਦੀ ਹੈ, ਫਿਰ ਇਹ ਸ਼ਨੀਵਾਰ ਨੂੰ ਨੰਗਲ ਡੈਮ ਤੋਂ ਉਸੇ ਰਸਤੇ 'ਤੇ ਚੱਲਦੀ ਹੈ ਅਤੇ ਐਤਵਾਰ ਨੂੰ ਕੋਲਕਾਤਾ ਪਹੁੰਚਦੀ ਹੈ। ਇਹ ਰੇਲ-ਗੱਡੀ ਪੰਜਾਬ, ਹਰਿਆਣਾ, ਉੱਤਰ ਪ੍ਰਦੇਸ਼, ਬਿਹਾਰ ਤੇ ਪੱਛਮੀ ਬੰਗਾਲ ਵਿਚ ਰਹਿਣ ਵਾਲੇ ਲੋਕਾਂ ਲਈ ਜੀਵਨ ਰੇਖਾ ਬਣ ਗਈ ਹੈ। ਇਨ੍ਹਾਂ ਸੂਬਿਆਂ ਦੇ ਵਸਨੀਕਾਂ ਦੇ ਨਾਲ-ਨਾਲ ਹਿਮਾਚਲ ਪ੍ਰਦੇਸ਼ ਦੇ ਲੋਕਾਂ ਨੇ ਲੰਬੇ ਸਮੇਂ ਤੋਂ ਮੰਗ ਕੀਤੀ ਹੈ ਕਿ ਗੁਰਮੁਖੀ ਐਕਸਪ੍ਰੈਸ ਨੂੰ ਦੌਲਤਪੁਰ ਜਾਂ ਅੰਬ ਅੰਦੌਰਾ ਤੱਕ ਵਧਾਇਆ ਜਾਵੇ ਤੇ ਹਫ਼ਤੇ ਵਿਚ ਦੋ ਵਾਰ ਰੇਲ-ਗੱਡੀ ਚਲਾਉਣ ਦਾ ਪ੍ਰਬੰਧ ਕੀਤਾ ਜਾਵੇ। ਹੁਣ, ਰੇਲਵੇ ਬੋਰਡ ਨੇ ਹਿਮਾਚਲ ਪ੍ਰਦੇਸ਼ ਵਿਚ ਰਹਿਣ ਵਾਲੇ ਵੱਖ-ਵੱਖ ਸੂਬਿਆਂ ਦੇ ਲੋਕਾਂ ਦੀਆਂ ਮੰਗਾਂ ਨੂੰ ਸਵੀਕਾਰ ਕਰ ਲਿਆ ਹੈ, ਗੁਰਮੁਖੀ ਐਕਸਪ੍ਰੈਸ ਨੂੰ ਨੰਗਲ ਡੈਮ ਤੋਂ ਪਰ੍ਹੇ ਊਨਾ, ਹਿਮਾਚਲ ਤੇ ਅੰਬ ਅੰਦੌਰਾ ਤੱਕ ਵਧਾਉਣ ਦਾ ਫੈਸਲਾ ਕੀਤਾ ਹੈ ਤੇ ਇਸ ਸਬੰਧ ਵਿਚ ਪੱਤਰ ਜਾਰੀ ਕੀਤਾ ਹੈ। ਅੰਬਾਲਾ ਡਵੀਜ਼ਨ ਤੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਇਹ ਰੇਲ-ਗੱਡੀ ਮਈ ਦੇ ਪਹਿਲੇ ਹਫ਼ਤੇ ਤੋਂ ਵਧੇ ਹੋਏ ਰੂਟ 'ਤੇ ਚੱਲਣੀ ਸ਼ੁਰੂ ਹੋ ਜਾਵੇਗੀ।