' काल टू पुलिस ' , बेरोजगारी की निराशा ने दिखाया नहर का रास्ता

ਕਾਲ ਟੂ ਪੁਲਿਸ , ਬੇਰੋਜ਼ਗਾਰੀ ਦੀ ਨਿਰਾਸ਼ਾ ਨੇ ਦਿਖਾਇਆ ਨਹਿਰ ਦਾ ਰਸਤਾ 25 ਸਾਲਾ ਬੀਟੈਕ ਪਾਸ ਨੌਜਵਾਨ ਦੇ ਗਾਇਬ ਹੋਣ ਨਾਲ ਪਰਿਵਾਰ ਤੇ ਟੁੱਟਿਆ ਦੁੱਖਾਂ ਦਾ ਪਹਾੜ ਕੁਲਵਿੰਦਰ ਭਾਟੀਆ, ਪੰਜਾਬੀ ਜਾਗਰਣ, ਨੰਗਲ : ਪੜ੍ਹਾਈ ਕਰਕੇ ਸਾਲਾਂ ਤੱਕ ਰੋਜ਼ਗਾਰ ਦੀ ਭਾਲ ਵਿਚ ਲੱਗੇ ਇਕ ਨੌਜਵਾਨ ਦਾ ਸਾਮਾਨ ਨੰਗਲ ਵਿਚ ਨਹਿਰ ਦੇ ਕਿਨਾਰੇ ਮਿਲਣ ਨਾਲ ਪੂਰੇ ਖੇਤਰ ਵਿਚ ਡੂੰਘੀ ਉਦਾਸੀ ਅਤੇ ਬੇਚੈਨੀ ਦਾ ਮਾਹੌਲ ਬਣ ਗਿਆ ਹੈ। ਨਵਾਂ ਨੰਗਲ ਦੀ ਪੁਰਾਣੀ ਪੀਏਸੀਐੱਲ ਕਾਲੋਨੀ ਵਿਚ ਰਹਿਣ ਵਾਲੇ ਨੌਜਵਾਨ ਦਾ ਸਮਾਨ ਮੰਗਲਵਾਰ ਨੂੰ ਜਵਾਹਰ ਮਾਰਕੀਟ ਦੇ ਸਾਹਮਣੇ ਨਹਿਰ ਦੇ ਪੁਲ ਵਿਚਕਾਰ ਮਿਲਿਆ। ਜਦੋਂ ਕਿ ਨੌਜਵਾਨ ਦਾ ਹੁਣ ਤੱਕ ਕੋਈ ਸੁਰਾਗ ਨਹੀਂ ਮਿਲਿਆ। ਘਟਨਾ ਸਥਾਨ ਦੇ ਨੇੜੇ ਇਕ ਨੋਟ ਵੀ ਮਿਲਿਆ ਹੈ ਜਿਸ ਤੇ ਕਾਲ ਟੂ ਪੁਲਿਸ ਲਿਖਿਆ ਹੋਇਆ ਹੈ, ਜਿਸ ਨੇ ਲੋਕਾਂ ਦੇ ਦਿਲਾਂ ਵਿਚ ਸ਼ੱਕ ਨੂੰ ਹੋਰ ਵਧਾ ਦਿੱਤਾ ਹੈ। ਨੌਜਵਾਨ ਦੇ ਗਾਇਬ ਹੋਣ ਨਾਲ ਉਸ ਦੇ ਮਾਤਾ-ਪਿਤਾ ਚਿੰਤਾ ਵਿਚ ਹਨ ਅਤੇ ਉਨ੍ਹਾਂ ਦਾ ਰੋ-ਰੋ ਕੇ ਬੁਰਾ ਹਾਲ ਹੈ। ਪਰਿਵਾਰ ਦੀਆਂ ਅੱਖਾਂ ਵਿਚ ਪੁੱਤਰ ਦੀ ਸਲਾਮਤੀ ਦੀ ਉਮੀਦ ਹੈ, ਪਰ ਚਿਹਰੇ ਤੇ ਪੁੱਤਰ ਦੇ ਆਰਥਿਕ ਦਬਾਅ ਅਤੇ ਧੁੰਦਲੇ ਭਵਿੱਖ ਦੀ ਚਿੰਤਾ ਸਾਫ਼ ਦਿਖਾਈ ਦੇ ਰਹੀ ਹੈ। ਨੰਗਲ ਪੁਲਿਸ ਨੇ ਭਾਲ ਮੁਹਿੰਮ ਸ਼ੁਰੂ ਕਰ ਦਿੱਤੀ ਹੈ, ਪਰ ਖ਼ਬਰ ਲਿਖੇ ਜਾਣ ਤੱਕ ਨੌਜਵਾਨ ਨਾਲ ਸਬੰਧਤ ਕੋਈ ਠੋਸ ਜਾਣਕਾਰੀ ਸਾਹਮਣੇ ਨਹੀਂ ਆ ਸਕੀ। ਇਹ ਘਟਨਾ ਇਕ ਨੌਜਵਾਨ ਦੇ ਨਾਲ ਨਾਲ ਉਸ ਪੀੜ੍ਹੀ ਦੀ ਵਿਥਿਆ ਨੂੰ ਵੀ ਸਾਹਮਣੇ ਲਿਆਉਂਦੀ ਹੈ ਜੋ ਪੜ੍ਹਾਈ ਪੂਰੀ ਕਰਨ ਦੇ ਬਾਵਜੂਦ ਰੋਜ਼ਗਾਰ ਦੀ ਘਾਟ ਵਿਚ ਨਿਰਾਸ਼ਾ ਦੇ ਹਨੇਰੇ ਵਿਚ ਗੁਜ਼ਰ ਰਹੀ ਹੈ। ਖੇਤਰ ਵਿਚ ਲਗਾਤਾਰ ਵਧ ਰਹੀ ਬੇਰੋਜ਼ਗਾਰੀ ਦੇ ਕਾਰਨ ਆਰਥਿਕ ਮੰਦੀਆਂ ਦਾ ਅਸਰ ਆਮ ਪਰਿਵਾਰਾਂ ਤੇ ਸਾਫ਼ ਦਿਖਾਈ ਦੇ ਰਿਹਾ ਹੈ। ਸੀਮਿਤ ਆਮਦਨ, ਵਧਦਾ ਖਰਚ ਅਤੇ ਕਰਜ਼ ਦਾ ਬੋਝ ਲੋਕਾਂ ਨੂੰ ਮਾਨਸਿਕ ਤੌਰ ਤੇ ਤੋੜ ਰਿਹਾ ਹੈ। ਕੁਝ ਦਿਨ ਪਹਿਲਾਂ ਅੱਡਾ ਮਾਰਕੀਟ ਖੇਤਰ ਵਿਚ ਸਬਜ਼ੀ ਦਾ ਕਾਰੋਬਾਰ ਕਰਨ ਵਾਲੇ ਇਕ ਵਿਅਕਤੀ ਨੇ ਫਾਇਨੈਂਸਰ ਦੀਆਂ ਕਿਸਤਾਂ ਅਦਾ ਨਾ ਕਰ ਪਾਉਣ ਦੇ ਕਾਰਨ ਆਤਮਹੱਤਿਆ ਕਰ ਲਈ ਸੀ, ਜਿਸ ਨੇ ਸਮਾਜ ਨੂੰ ਜ਼ੋਰਦਾਰ ਝਟਕਾ ਦਿੱਤਾ ਸੀ। ਲਗਾਤਾਰ ਸਾਹਮਣੇ ਆ ਰਹੀਆਂ ਐਸੀਆਂ ਝੰਜੋੜਨ ਵਾਲੀਆਂ ਘਟਨਾਵਾਂ ਇਹ ਸੰਕੇਤ ਦੇ ਰਹੀਆਂ ਹਨ ਕਿ ਆਰਥਿਕ ਤੰਗੀ ਅਤੇ ਬੇਰੋਜ਼ਗਾਰੀ ਹੁਣ ਸਿਰਫ ਅੰਕੜੇ ਨਹੀਂ, ਸਗੋਂ ਜਿੰਦਗੀਆਂ ਨੂੰ ਨਿਗਲ ਰਹੀ ਸੱਚਾਈ ਬਣ ਰਹੀ ਹੈ। ਖੇਤਰ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਜੇਕਰ ਸਮੇਂ ਤੇ ਰੋਜ਼ਗਾਰ ਦੇ ਸਾਧਨ ਨਹੀਂ ਬਣਾਏ ਗਏ ਅਤੇ ਨੌਜਵਾਨਾਂ ਨੂੰ ਆਦਰਸ਼ ਜੀਵਨ ਜਿਊਣ ਦਾ ਮੌਕਾ ਨਹੀਂ ਮਿਲਿਆ, ਤਾਂ ਇਹ ਨਿਰਾਸ਼ਾ ਹੋਰ ਵੀ ਡੂੰਘੀ ਹੋ ਜਾਵੇਗੀ। ਸਮਾਜ ਨੂੰ ਇਸ ਪੀੜਾ ਨੂੰ ਸਮਝਦਿਆਂ ਸੰਵੇਦਨਸ਼ੀਲਤਾ ਨਾਲ ਇਕੱਠੇ ਹੋਣਾ ਪਵੇਗਾ ਅਤੇ ਸਰਕਾਰ ਤੋਂ ਵੀ ਠੋਸ ਕਦਮਾਂ ਦੀ ਉਮੀਦ ਹੈ ਤਾਂ ਜੋ ਉਮੀਦ ਦੀ ਲੋਅ ਦੁਬਾਰਾ ਜਲ ਸਕੇ। ਯੋਗਤਾ ਮੁਤਾਬਕ ਨੌਕਰੀ ਨਾ ਮਿਲਣ ਕਾਰਨ ਨਿਰਾਸ਼ ਸੀ ਅੰਕੁਸ਼ ਗਾਇਬ ਹੋ ਚੁੱਕੇ 25 ਸਾਲਾ ਨੌਜਵਾਨ ਅੰਕੁਸ਼ ਚੌਧਰੀ ਦੇ ਪਿਤਾ ਪ੍ਰਵੀਨ ਕੁਮਾਰ ਦੱਸਦੇ ਹਨ ਕਿ ਉਨ੍ਹਾਂ ਦਾ ਪੁੱਤਰ 15 ਦਿਨ ਪਹਿਲਾਂ ਹੀ ਮੋਹਾਲੀ ਵਿਚ ਇਕ ਫੈਕਟਰੀ ਵਿਚ ਨੌਕਰੀ ’ਤੇ ਲੱਗਾ ਸੀ। ਐਤਵਾਰ ਦੀ ਰਾਤ ਉਹ ਘਰ ਆਇਆ। ਕਹਿ ਰਿਹਾ ਸੀ ਕਿ ਉਸਨੂੰ ਯੋਗਤਾ ਮੁਤਾਬਕ ਨੌਕਰੀ ਨਹੀਂ ਮਿਲੀ। ਬੀਟੈੱਕ ਕਰ ਚੁੱਕਾ ਅੰਕੁਸ਼ ਇਹ ਵੀ ਕਹਿੰਦਾ ਸੀ ਕਿ ਉਸ ਦੇ ਨਾਲ ਪੜ੍ਹਾਈ ਕਰਨ ਵਾਲੇ ਸਾਰੇ ਦੋਸਤ ਨੌਕਰੀਆਂ ਤੇ ਲੱਗ ਚੁੱਕੇ ਹਨ, ਪਰ ਉਸਨੂੰ ਅਜੇ ਤੱਕ ਯੋਗਤਾ ਮੁਤਾਬਕ ਨੌਕਰੀ ਨਹੀਂ ਮਿਲੀ। ਪਿਤਾ ਦੱਸਦੇ ਹਨ ਕਿ ਰਾਤ ਦੇ ਸਮੇਂ ਉਨ੍ਹਾਂ ਨੇ ਅੰਕੁਸ਼ ਨੂੰ ਇਹ ਵੀ ਕਿਹਾ ਸੀ ਕਿ ਉਹ ਕੁਝ ਸਮਾਨ ਅਤੇ ਕਪੜੇ ਲੈ ਲਵੇ, ਜਿਸ ਤੇ ਉਸਨੇ ਕਿਹਾ ਕਿ ਕੋਈ ਗੱਲ ਨਹੀਂ, ਮੈਂ ਬਾਅਦ ਵਿਚ ਲੈ ਲਵਾਂਗਾ। ਇਹ ਵੀ ਕਿਹਾ ਕਿ ਉਸਦੇ ਕੋਲ 500 ਰੁਪਏ ਹਨ। ਪਿਤਾ ਨੇ ਕਿਹਾ ਕਿ ਉਹ ਉਸਦੇ ਮੋਬਾਈਲ ਤੋਂ ਪੈਸੇ ਆਪਣੇ ਖਾਤੇ ਵਿਚ ਟ੍ਰਾਂਸਫਰ ਕਰ ਲਵੇ। ਇਸ ਤੇ ਵੀ ਅੰਕੁਸ਼ ਅਸਹਿਮਤ ਰਿਹਾ। ਮੰਗਲਵਾਰ ਤੜਕੇ ਮੋਹਾਲੀ ਜਾਣ ਲਈ ਉਹ ਪੰਜ ਵਜੇ ਉੱਠ ਕੇ ਤਿਆਰ ਹੋਇਆ। ਕੁਝ ਹੀ ਦੇਰ ਬਾਅਦ ਇਹ ਜਾਣਕਾਰੀ ਮਿਲ ਗਈ ਕਿ ਅੰਕੁਸ਼ ਦਾ ਸਮਾਨ ਨਹਿਰ ਦੇ ਪੁਲ ਤੇ ਲਾਵਾਰਿਸ ਹਾਲਤ ਵਿਚ ਪਿਆ ਹੋਇਆ ਹੈ। ਅੱਗੇ ਸਭ ਕੁਝ ਠੀਕ ਰਹੇ ਅਤੇ ਅੰਕੁਸ਼ ਸਲਾਮਤ ਹੋਵੇ, ਐਸੀਆਂ ਦੁਆਵਾਂ ਲੋਕ ਕਰ ਰਹੇ ਹਨ ਪਰ ਰਿਸ਼ਤੇਦਾਰ ਅੰਕੁਸ਼ ਦੇ ਅਜੇ ਤੱਕ ਨਾ ਮਿਲਣ ਕਾਰਨ ਰੋ-ਰੋ ਕੇ ਬੇਹਾਲ ਹਨ।