ਅੰਤਿਮ ਸੰਸਕਾਰ ਮੌਕੇ ਵਰਤੇ ਜਾਣਗੇ ਗੋਬਰ ਦੇ ਬਾਲੇ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਰੂਪਨਗਰ : ਰੂਪਨਗਰ ਦੀ ਗੋਪਾਲ ਗਊਸ਼ਾਲਾ ਨੇ ਹਵਾ ਪ੍ਰਦੂਸ਼ਣ ਘਟਾਉਣ ਅਤੇ ਸ਼ਮਸ਼ਾਨਘਾਟਾਂ ਵਿਚ ਵਰਤੀ ਜਾਣ ਵਾਲੀ ਲੱਕੜ ਦੀ ਖਪਤ ਨੂੰ ਘਟਾਉਣ ਲਈ ਇੱਕ ਵਿਲੱਖਣ ਪਹਿਲਕਦਮੀ ਸ਼ੁਰੂ ਕੀਤੀ ਹੈ। ਗਊਸ਼ਾਲਾ ਪ੍ਰਬੰਧਨ ਨੇ ਸ਼ਹਿਰ ਦੇ ਦੋਵਾਂ ਸ਼ਮਸ਼ਾਨਘਾਟਾਂ ਦੇ ਪ੍ਰਬੰਧਕਾਂ ਨੂੰ ਸ਼ਮਸ਼ਾਨਘਾਟਾਂ ਵਿਚ ਵਰਤੀ ਜਾਣ ਵਾਲੀ ਲੱਕੜ ਦੇ ਰੂਪ ਵਿਚ ਗੋਬਰ ਦੇ ਬਾਲਿਆਂ ਦੀ ਵਰਤੋਂ ਕਰਨ ਲਈ ਮਨਾ ਲਿਆ ਹੈ। ਇਸ ਸਬੰਧੀ ਗੋਪਾਲ ਗਊਸ਼ਾਲਾ ਦੇ ਮੁੱਖ ਇੰਜੀਨੀਅਰ ਭਾਰਤ ਭੂਸ਼ਣ ਸ਼ਰਮਾ ਨੇ ਕਿਹਾ ਕਿ ਸ਼ਮਸ਼ਾਨਘਾਟ ਵਿਚ ਵਰਤੀ ਜਾਣ ਵਾਲੀ ਲੱਕੜ ਦਾ 20 ਤੋਂ 30 ਫੀਸਦੀ ਗੋਬਰ ਦੇ ਬਾਲਿਆਂ ਦਾ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਮੌਜੂਦਾ ਸਮੇਂ ਦੌਰਾਨ ਸ਼ਹਿਰ ਦੀ ਹਵਾ ਦੀ ਗੁਣਵੱਤਾ 200 ਅਤੇ 300 ਏਕਿਊਆਈ ਦੇ ਵਿਚਕਾਰ ਰਹਿੰਦੀ ਹੈ। ਬੜੀ ਹਵੇਲੀ ਅਤੇ ਗਊਸ਼ਾਲਾ ਰੋਡ ’ਤੇ ਸਥਿਤ ਸ਼ਮਸ਼ਾਨਘਾਟ ਦੇ ਪ੍ਰਬੰਧਕਾਂ ਨੇ ਸੰਸਕਾਰ ਦੇ ਕਾਰਜਾਂ ਲਈ ਗੋਬਰ ਦੇ ਬਾਲਿਆਂ ਦੀ ਵਰਤੋਂ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਇਸ ਸਬੰਧੀ ਪ੍ਰਬੰਧਕਾਂ ਨਾਲ ਵਿਚਾਰ-ਵਟਾਂਦਰਾ ਕੀਤਾ ਗਿਆ ਕਿ ਜੇਕਰ ਸ਼ਮਸ਼ਾਨਘਾਟ ਵਿਚ 20-30 ਫੀਸਦੀ ਲੱਕੜ ਨੂੰ ਮਸ਼ੀਨ ਨਾਲ ਬਣੇ ਗੋਬਰ ਦੇ ਬਾਲਿਆਂ ਨਾਲ ਬਦਲ ਦਿੱਤਾ ਜਾਵੇ, ਤਾਂ ਇਸ ਨਾਲ ਵਾਤਾਵਰਣ ਵਿਚ ਸੁਧਾਰ ਹੋ ਸਕਦਾ ਹੈ। ਗੋਬਰ ਦੇ ਬਾਲੇ ਜਲਾਉਣ ਨਾਲ ਹਵਾ ਵਿਚ ਕਾਰਬਨ ਦੀ ਮਾਤਰਾ ਘੱਟ ਸਕਦੀ ਹੈ। ਲੱਕੜ ਬਚਾਉਣ ਨਾਲ ਬਹੁਤ ਸਾਰੇ ਰੁੱਖਾਂ ਨੂੰ ਕੱਟਣ ਤੋਂ ਬਚਾਇਆ ਜਾ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਹਿੰਦੂ, ਸਨਾਤਨ ਗ੍ਰੰਥਾਂ ਅਤੇ ਵਿਗਿਆਨਕ ਦ੍ਰਿਸ਼ਟੀਕੋਣਾਂ ਅਨੁਸਾਰ, ਗੋਬਰ ਜਲਾਉਣ ਨਾਲ ਵਾਤਾਵਰਣ ਵੀ ਸ਼ੁੱਧ ਹੁੰਦਾ ਹੈ। ਉਨ੍ਹਾਂ ਕਿਹਾ ਕਿ ਇੱਕ ਕੁਇੰਟਲ ਲੱਕੜ ਦੀ ਬਜਾਏ ਗੋਬਰ ਨੂੰ ਚਿਖਾ ਜਲਾਉਣ ਨਾਲ 1 ਕੁਇੰਟਲ ਲੱਕੜ ਸਾੜਨ ਨਾਲ ਪੈਦਾ ਹੋਣ ਵਾਲੇ ਕਾਰਬਨ ਨੂੰ ਬਚਾਇਆ ਜਾ ਸਕਦਾ ਹੈ। ਸ਼ਮਸ਼ਾਨਘਾਟ ਪ੍ਰਬੰਧਕਾਂ ਨੇ ਅਜ਼ਮਾਇਸ਼ ਦੇ ਤੌਰ ’ਤੇ 5-7 ਕੁਇੰਟਲ ਸੁੱਕੇ ਗੋਬਰ ਦੇ ਬਾਲੇ ਸਪਲਾਈ ਕਰਨ ਲਈ ਸਹਿਮਤੀ ਦਿੱਤੀ ਹੈ। ਇਸ ਮੌਕੇ ਇੰਜੀਨੀਅਰ ਪ੍ਰਦੀਪ ਧਵਨ, ਮਹੇਸ਼ ਓਬਰਾਏ, ਸ਼ਿਵ ਕਾਂਤ ਕਾਲੀਆ, ਸੂਰਜ ਪ੍ਰਕਾਸ਼ ਪੱਪੂ ਆਦਿ ਹਾਜ਼ਰ ਸਨ।