ਵਿਧਾਇਕ ਪਠਾਣਮਾਜਰਾ ਦੀਆਂ ਵਧਣਗੀਆਂ ਮੁਸ਼ਕਲਾਂ: ਜਬਰ-ਜਨਾਹ ਤੋਂ ਬਾਅਦ ਹੁਣ ਮਾਈਨਿੰਗ ਤੇ NDPS ਕੇਸਾਂ 'ਚ ਹੋਵੇਗੀ ਪੁੱਛਗਿੱਛ

ਸੀਨੀਅਰ ਰਿਪੋਰਟਰ, ਪੰਜਾਬੀ ਜਾਗਰਣ, ਪਟਿਆਲਾ : ਜਬਰ-ਜਨਾਹ ਦੇ ਮਾਮਲੇ ’ਚ ਗ੍ਰਿਫ਼ਤਾਰ ਸਨੌਰ ਤੋਂ ਵਿਧਾਇਕ ਹਰਮੀਤ ਸਿੰਘ ਪਠਾਣਮਾਜਰਾ ਨੂੰ ਆਸਟ੍ਰੇਲੀਆ, ਦੁਬਈ, ਭੂਟਾਨ ਅਤੇ ਨੇਪਾਲ ਵਿੱਚ ਹਰ ਜਗ੍ਹਾ ਫੰਡ ਵਿਦੇਸ਼ ਬੈਠੇ ਲੋਕਾਂ ਨੇ ਮੁਹੱਈਆ ਕਰਵਾਏ ਸਨ। ਪੁਲਿਸ ਨੂੰ ਸਥਾਨਕ ਪੱਧਰ ’ਤੇ ਫੰਡ ਮੁਹੱਈਆ ਕਰਵਾਉਣ ਵਾਲਿਆਂ ਦਾ ਕੋਈ ਖ਼ਾਸ ਸੁਰਾਗ ਨਹੀਂ ਲੱਗ ਸਕਿਆ ਹੈ। ਹੁਣ ਪਟਿਆਲਾ ਪੁਲਿਸ ਵਿਧਾਇਕ ਪਠਾਣਮਾਜਰਾ ਤੋਂ ਮਾਈਨਿੰਗ ਅਤੇ ਐੱਨਡੀਪੀਐਸ ਦੇ ਕੇਸ ਵਿੱਚ ਪੁੱਛਗਿੱਛ ਦੀ ਤਿਆਰੀ ਕਰ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਜੁਲਕਾ ਥਾਣੇ ’ਚ ਐੱਨਡੀਪੀਐਸ ਅਤੇ ਮਾਈਨਿੰਗ ਦੇ ਪੁਰਾਣੇ ਮਾਮਲੇ ’ਚ ਸਤੰਬਰ ਮਹੀਨੇ ’ਚ ਪਠਾਣਮਾਜਰਾ ਦਾ ਨਾਂ ਮੁਲਜ਼ਮਾਂ ’ਚ ਸ਼ਾਮਲ ਕੀਤਾ ਗਿਆ ਸੀ। ਅਜਿਹੇ ’ਚ ਜਬਰ-ਜਨਾਹ ਦੇ ਇਸ ਮਾਮਲੇ ’ਚ ਰਿਮਾਂਡ ਖ਼ਤਮ ਹੁੰਦੇ ਹੀ ਉਕਤ ਦੋਵਾਂ ਕੇਸਾਂ ਸਬੰਧੀ ਪੁੱਛਗਿੱਛ ਹੋਵੇਗੀ, ਜਦਕਿ ਕਰਨਾਲ ’ਚ ਪੁਲਿਸ ਹਿਰਾਸਤ ’ਚੋਂ ਫ਼ਰਾਰ ਹੋਣ ਦਾ ਵੱਖਰਾ ਮਾਮਲਾ ਦਰਜ ਹੈ।