ਮੁੜ ਇਕੱਠੇ ਹੋਏ 1975 ਦੌਰਾਨ ਥਾਪਰ ਵਿਖੇ ਪੜ੍ਹੇ ਨਾਮੀ ਇੰਜੀਨੀਅਰ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਪਟਿਆਲਾ : ਥਾਪਰ ਇੰਸਟੀਚਿਊਟ ਆਫ਼ ਇੰਜੀਨੀਅਰਿੰਗ ਐਂਡ ਟੈਕਨਾਲੋਜੀ ਦੇ 1975 ਦੇ ਬੈਚ ਨੇ ਜਬ ਵੀ ਮੈੱਟ ਦੇ ਪੰਜਾਹ ਸਾਲ ਤਹਿਤ ਗੋਲਡਨ ਜੁਬਲੀ ਰੀ ਯੂਨੀਅਨ ਦਿਹਾੜਾ ਮਨਾ ਕੇ ਆਪਣੀਆਂ ਪੰਜ ਦਹਾਕੇ ਵਿਦਿਆਰਥੀ ਹੋਣ ਸਮੇਂ ਦੀਆਂ ਪੁਰਾਣੀਆਂ ਯਾਦਾਂ ਤਾਜ਼ੀਆਂ ਕੀਤੀਆਂ। ਥਾਪਰ ਇੰਸਟੀਚਿਊਟ ਦੇ ਇਸ ਅਲਮਾ ਮੇਟਰ ’ਚ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਆਏ 65 ਤੋਂ ਵੱਧ ਬੈਚਮੇਟ, ਜਿਨ੍ਹਾਂ ’ਚੋਂ 9 ਵਿਦੇਸ਼ਾਂ ਤੋਂ ਪੁੱਜੇ ਸਨ, ’ਚ ਸੀਨੀਅਰ ਪ੍ਰਸ਼ਾਸਨਿਕ ਅਧਿਕਾਰੀਆਂ ਸਣੇ ਪੁਰਾਣੇ ਅਧਿਆਪਕ ਤੇ ਵਿਦਿਆਰਥੀ ਵਲੰਟੀਅਰ ਸ਼ਾਮਲ ਹੋਏ। ਇਸ ਸ਼ਾਨਾਮੱਤੇ ਪ੍ਰੋਗਰਾਮ ਦੌਰਾਨ ਵਾਈਸ ਚਾਂਸਲਰ ਪ੍ਰੋ. ਪਦਮਕੁਮਾਰ ਨਾਇਰ, ਵਿਦਿਆਰਥੀ ਮਾਮਲਿਆਂ ਦੀ ਡੀਨ ਡਾ. ਮੀਨਾਕਸ਼ੀ ਰਾਣਾ, ਅਕਾਦਮਿਕ ਮਾਮਲਿਆਂ ਦੀ ਡੀਨ ਡਾ. ਸ਼ਰੂਤੀ ਸ਼ਰਮਾ, ਵਿਭਾਗਾਂ ਦੇ ਮੁਖੀ ਤੇ ਸਾਬਕਾ ਫੈਕਲਟੀ ਮੈਂਬਰ ਪ੍ਰੋ. ਸੁੰਦਰ ਸਿੰਘ, ਪ੍ਰੋ. ਪੀ. ਐਲ. ਬਾਲੀ, ਡਾ. ਪੀ. ਕੇ. ਬਾਂਸਲ, ਅਤੇ ਡਾ. ਵੀ. ਪੀ. ਬਾਂਸਲ ਸਮੇਤ ਅਲੂਮਨੀ ਰਿਲੇਸ਼ਨਜ਼ ਦੀ ਮੁਖੀ ਮਾਨਸੀ ਭਾਰਗਵ ਤੇ ਵਿਦਿਆਰਥੀ ਵਲੰਟੀਅਰਾਂ ਨੇ ਇਸ ਸਮਾਰੋਹ ਨੂੰ ਸਿਖ਼ਰਾਂ ਉਤੇ ਪਹੁੰਚਾ ਦਿੱਤਾ। ਵਾਈਸ ਚਾਂਸਲਰ ਨੇ ਸਾਬਕਾ ਵਿਦਿਆਰਥੀਆਂ ਦਾ ਉਨ੍ਹਾਂ ਦੇ ਅਲਮਾ ਮੇਟਰ ’ਚ ਵਾਪਸ ਆਉਣ ਅਤੇ ਆਪਣੀਆਂ ਯਾਦਾਂ ਤਾਜ਼ਾ ਕਰਨ ਲਈ ਭਰਵਾਂ ਸਵਾਗਤ ਕੀਤਾ। ਉਨ੍ਹਾਂ ਨੇ ਇਸ ਮੌਕੇ ਨੂੰ ਮਨਾਉਣ ਲਈ ਵਿਸ਼ੇਸ਼ ਤੌਰ ਤੇ ਤਿਆਰ ਕੀਤਾ ਗਿਆ ਇਕ ਸਮਾਰਕ ਵੀ ਜਾਰੀ ਕੀਤਾ। 50 ਸਾਲ ਪੁਰਾਣੇ ਇਸ ਇੰਜਨੀਅਰਾਂ ਦੇ ਬੈਚ ਨੇ ਥਾਪਰ ਪ੍ਰਸ਼ਾਸਨ ਅਤੇ ਵਿਦਿਆਰਥੀਆਂ ਵੱਲੋਂ ਇਸ ਸਮਾਗਮ ਨੂੰ ਯਾਦਗਾਰ ਬਣਾਉਣ ਲਈ ਧੰਨਵਾਦ ਕੀਤਾ। ਉਨ੍ਹਾਂ ਨੇ ਆਪਣੇ ਵਿਦਿਆਰਥੀ ਸਮੇਂ ਦੇ ਕਲਾਸਾਂ ’ਚ ਹੋਏ ਲੰਬੇ ਭਾਸ਼ਣਾਂ, ਦੇਰ ਰਾਤ ਦੇ ਅਧਿਐਨ ਸੈਸ਼ਨਾਂ, ਕੰਟੀਨ ਵਿੱਚ ਮਜ਼ਾਕ, ਦੋਸਤੀ ਅਤੇ ਥਾਪਰੀਅਨ ਭਾਵਨਾ ਨੂੰ ਯਾਦ ਕੀਤਾ। ਇਸ ਮੌਕੇ ਸਾਬਕਾ ਵਿਦਿਆਰਥੀਆਂ ਨੂੰ ਯਾਦਗਾਰੀ ਚਿੰਨ੍ਹ ਦਿੱਤੇ ਗਏ।