ਏਡਜ਼ ਦੀ ਜਾਣਕਾਰੀ ਸਭ ਤੋਂ ਵੱਡਾ ਹਥਿਆਰ : ਕਰਮਜੀਤ ਕੌਰ

ਪਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਪਟਿਆਲਾ : ਵਿਸ਼ਵ ਏਡਜ਼ ਜਾਗਰੂਕਤਾ ਦਿਵਸ ਦੇ ਮੌਕੇ ਪੀਐਮ ਸ਼੍ਰੀ ਸਰਕਾਰੀ ਕੰਨਿਆ ਸੀਨੀਅਰ ਸੈਕੰਡਰੀ ਸਕੂਲ ਸਨੌਰ ਵਿਖੇ ਸਥਾਪਤ ਸਾਇੰਸ ਸਰਕਲ ਵੱਲੋਂ ਪੋਸਟਰ ਮੇਕਿੰਗ ਮੁਕਾਬਲਾ ਕਰਵਾਇਆ ਗਿਆ। ਮੁਕਾਬਲੇ ’ਚ ਲਗਭਗ 50 ਵਿਦਿਆਰਥਣਾਂ ਨੇ ਭਾਗ ਲੈਂਦੇ ਹੋਏ ਆਪਣੀ ਕਲਾ, ਵਿਗਿਆਨਕ ਸੋਚ ਅਤੇ ਸਮਾਜਕ ਜ਼ਿੰਮੇਵਾਰੀ ਦਾ ਪ੍ਰਗਟਾਵਾ ਕੀਤਾ। ਇਸ ਗਤੀਵਿਧੀ ਦੀ ਅਗਵਾਈ ਸਕੂਲ ਪ੍ਰਿੰਸੀਪਲ ਡਾ. ਕਰਮਜੀਤ ਕੌਰ ਦੁਆਰਾ ਕੀਤੀ ਗਈ, ਜਦੋਂਕਿ ਸਾਇੰਸ ਸਰਕਲ ਐਕਟੀਵਿਟੀ ਇੰਚਾਰਜ ਵਿਗਿਆਨ ਆਧਿਆਪਕ ਅਭਿਨਵ ਜੋਸ਼ੀ ਤੇ ਸਕੱਤਰ ਡਾ. ਸੋਨੀਆ ਚਹਿਲ ਨੇ ਪ੍ਰੋਗਰਾਮ ਨੂੰ ਸੁਚਾਰੂ ਢੰਗ ਨਾਲ ਕਰਵਾਉਣ ਲਈ ਸਹਿਯੋਗ ਕੀਤਾ। ਇਸ ਦੌਰਾਨ ਵਿਦਿਆਰਥੀਆਂ ਵੱਲੋਂ ਤਿਆਰ ਰਚਨਾਤਮਕ ਪੋਸਟਰਾਂ ਰਾਹੀਂ ਏਡਸ ਦੇ ਕਾਰਨ, ਰੋਕਥਾਮ ਤੇ ਜਾਗਰੂਕਤਾ ਸੰਦੇਸ਼ ਬਹੁਤ ਹੀ ਪ੍ਰਭਾਵਸ਼ਾਲੀ ਢੰਗ ਨਾਲ ਦਰਸਾਏ ਗਏ। ਵਿਦਿਆਰਥੀਆਂ ਨੂੰ ਸੰਬੋਧਨ ਕਰਦਿਆਂ ਪ੍ਰਿੰਸੀਪਲ ਡਾ. ਕਰਮਜੀਤ ਕੌਰ ਨੇ ਕਿਹਾ ਕਿ ਏਡਜ਼ ਰੋਗੀ ਸਾਡੇ ਸਮਾਜ ਦਾ ਅਭਿੰਨ ਹਿੱਸਾ ਹਨ। ਇਹ ਰੋਗ ਛੁਹਣ, ਗੱਲਬਾਤ ਕਰਨ ਜਾਂ ਇਕੱਠੇ ਬਹਿਣ ਨਾਲ ਨਹੀਂ ਫੈਲਦਾ। ਜਾਣਕਾਰੀ ਹੀ ਇਸ ਬਿਮਾਰੀ ਖਿਲਾਫ ਸਭ ਤੋਂ ਵੱਡਾ ਹਥਿਆਰ ਹੈ। ਇਸ ਮੌਕੇ ਸਾਇੰਸ ਅਧਿਆਪਕਾਵਾਂ ਵੱਲੋਂ ਵਿਦਿਆਰਥੀਆਂ ਨੂੰ ਸਾਇੰਸ ਸਰਕਲ ਬੈਜ ਵੀ ਵੰਡੇ ਗਏ। ਪ੍ਰੋਗਰਾਮ ਵਿਚ ਸਾਇੰਸ ਅਧਿਆਪਕਾ ਨਵਿਤਾ ਭੰਡਾਰੀ ਨੇ ਵੀ ਮੁਹੱਤਵਪੂਰਨ ਯੋਗਦਾਨ ਦਿੱਤਾ।