ਸੂਬੇ ਭਰ ’ਚ ਹੁਣ ਤੱਕ ਨਾੜ ਫੂਕਣ ਦੇ ਕੁੱਲ 9452 ਮਾਮਲੇ ਹੋਏ ਰਿਪੋਰਟ, ਇਕ ਕਰੋੜ ਤੋਂ ਵੱਧ ਜੁਰਮਾਨਾ, ਵਸੂਲੀ ਸਿਰਫ਼ 7 ਫ਼ੀਸਦੀ

ਸੀਨੀਅਰ ਰਿਪੋਰਟਰ, ਪੰਜਾਬੀ ਜਾਗਰਣ, ਪਟਿਆਲਾ ਸੂਬੇ ਭਰ ਵਿੱਚ ਹੁਣ ਤੱਕ ਨਾੜ ਫੂਕਣ ਦੇ ਕੁੱਲ 9452 ਮਾਮਲੇ ਰਿਪੋਰਟ ਹੋਏ ਹਨ। ਅੰਕੜਿਆਂ ਅਨੁਸਾਰ, ਸੂਬੇ ਵਿੱਚ ਨਾੜ ਫੂਕਣ ਦੇ ਸਭ ਤੋਂ ਵੱਧ 903 ਮਾਮਲੇ ਫ਼ਿਰੋਜ਼ਪੁਰ ਜ਼ਿਲ੍ਹੇ ਵਿੱਚ ਸਾਹਮਣੇ ਆਏ ਹਨ। ਇਸ ਤੋਂ ਬਾਅਦ ਬਠਿੰਡਾ ਵਿੱਚ 740 ਅਤੇ ਮੋਗਾ ਵਿੱਚ 736 ਘਟਨਾਵਾਂ ਦਰਜ ਕੀਤੀਆਂ ਗਈਆਂ ਹਨ। ਉੱਥੇ ਹੀ ਸਭ ਤੋਂ ਘੱਟ 21 ਮਾਮਲੇ ਰੋਪੜ ਜ਼ਿਲ੍ਹੇ ਵਿੱਚ ਸਾਹਮਣੇ ਆਏ ਹਨ। ਦੂਜੇ ਪਾਸੇ ਨਾੜ ਫੂਕਣ ਦੇ ਇਨ੍ਹਾਂ ਮਾਮਲਿਆਂ ਵਿੱਚ ਕੁੱਲ ਇੱਕ ਕਰੋੜ 19 ਹਜ਼ਾਰ ਰੁਪਏ ਦਾ ਜੁਰਮਾਨਾ ਲਗਾਇਆ ਗਿਆ ਹੈ, ਪਰ ਹੈਰਾਨੀ ਦੀ ਗੱਲ ਇਹ ਹੈ ਕਿ ਹੁਣ ਤੱਕ ਸਿਰਫ਼ 7 ਲੱਖ 15 ਹਜ਼ਾਰ ਰੁਪਏ ਦੀ ਹੀ ਵਸੂਲੀ ਹੋ ਸਕੀ ਹੈ, ਜੋ ਕਿ ਕੁੱਲ ਜੁਰਮਾਨਾ ਰਾਸ਼ੀ ਦਾ ਮਹਿਜ਼ 7 ਫ਼ੀਸਦੀ ਹੈ। ਇਸ ਤੋਂ ਇਲਾਵਾ 738 ਐੱਫ.ਆਈ.ਆਰ. ਦਰਜ ਕੀਤੀਆਂ ਗਈਆਂ ਹਨ, ਜਦੋਂ ਕਿ 846 ਕਿਸਾਨਾਂ ਖ਼ਿਲਾਫ਼ ਰੈੱਡ ਐਂਟਰੀ ਦੀ ਕਾਰਵਾਈ ਵੀ ਕੀਤੀ ਗਈ ਹੈ। ਜਾਣਕਾਰੀ ਅਨੁਸਾਰ ਇਸ ਸਾਲ ਪੰਜਾਬ ਵਿੱਚ ਕਣਕ ਦੀ ਖੇਤੀ ਲਗਭਗ 33.07 ਲੱਖ ਹੈਕਟੇਅਰ ਰਕਬੇ ਵਿੱਚ ਕੀਤੀ ਗਈ ਸੀ। ਅਨੁਮਾਨ ਹੈ ਕਿ ਇਸ ਨਾਲ ਲਗਭਗ 20 ਮਿਲੀਅਨ ਟਨ ਨਾੜ ਪੈਦਾ ਹੋਈ ਹੈ। ਮੌਜੂਦਾ ਸਮੇਂ ਵਿੱਚ ਕਣਕ ਦੀ ਵਾਢੀ ਦਾ ਕੰਮ ਲਗਭਗ ਪੂਰਾ ਹੋ ਚੁੱਕਾ ਹੈ, ਜਿਸ ਤੋਂ ਬਾਅਦ ਖੇਤਾਂ ਵਿੱਚ ਨਾੜ ਫੂਕਣ ਦੀਆਂ ਘਟਨਾਵਾਂ ਇੱਕਦਮ ਵਧੀਆਂ ਹਨ।

ਪੰਜਾਬ ਪ੍ਰਦੂਸ਼ਣ ਰੋਕਥਾਮ ਬੋਰਡ ਚੇਅਰਪਰਸਨ ਰੀਨਾ ਗੁਪਤਾ ਦਾ ਕਹਿਣਾ ਹੈ ‘ਅਸੀਂ ਵੱਡੇ ਪੱਧਰ ’ਤੇ ਸੁਧਾਰ ਕੀਤੇ ਹਨ, ਅੰਕੜਿਆਂ ਵਿਚ ਪਿਛਲੇ ਸਾਲ ਨਾਲੋਂ ਕਮੀ ਹੈ। ਛੋਟੇ ਕਿਸਾਨਾਂ ਨੂੰ ਲੋੜੀਂਦੀ ਮਸ਼ਨਿਰੀ ਮੁਹੱਈਆ ਕਰਵਾਉਣ ਲਈ ਯੌਜਨਾ ਬਣਾਈ ਜਾ ਰਹੀ ਹੈ। ਅਗਲੇ ਸਾਲ ਨਾੜ ਸੜਣ ਦੇ ਮਾਮਲਿਆਂ ਨੂੰ ਨੱਥ ਪਾਉਣ ਲਈ ਵੱਡੇ ਪੱਧਰ ’ਤੇ ਕੰਮ ਕਰ ਰਹੇ ਹਾਂ।’

ਜ਼ਿਲ੍ਹਾ : ਅੰਕੜੇ

ਅੰਮ੍ਰਿਤਸਰ: 696

ਬਰਨਾਲਾ:343

ਬਠਿੰਡਾ:740

ਫ਼ਤਹਿਗੜ੍ਹ ਸਾਹਿਬ:114

ਫ਼ਰੀਦਕੋਟ:367

ਫ਼ਾਜ਼ਿਲਕਾ:407

ਫ਼ਿਰੋਜ਼ਪੁਰ:903

ਗੁਰਦਾਸਪੁਰ:623

ਹੁਸ਼ਿਆਰਪੁਰ:229

ਜਲੰਧਰ:352

ਕਪੂਰਥਲਾ:306

ਲੁਧਿਆਣਾ: 610

ਮਾਨਸਾ: 341

ਮੋਗਾ: 736

ਮੁਕਤਸਰ:531

ਨਵਾਂਸ਼ਹਿਰ:118

ਪਠਾਨਕੋਟ:36

ਪਟਿਆਲਾ:396

ਰੋਪੜ:21

ਮੋਹਾਲੀ:26

ਸੰਗਰੂਰ:678

ਤਰਨਤਾਰਨ:712

ਮਾਲੇਰਕੋਟਲਾ: 167

ਕੁੱਲ 9452