Smuggling In Punjab: ਨਸ਼ਾ ਤਸਕਰ ਕਿਸ਼ਤੀ ਲੈ ਕੇ ਹੋਇਆ ਫ਼ਰਾਰ, ਆਬਕਾਰੀ ਤੇ ਪੁਲਿਸ ਟੀਮ ਨੂੰ ਜਾਣਿਆ ਟਿੱਚ

ਜਾਗਰਣ ਪੱਤਰ ਪ੍ਰੇਰਕ, ਗੁਰਦਾਸਪੁਰ : ਪੰਜਾਬ ਸਰਕਾਰ ਵੱਲੋਂ ਨਸ਼ੇ ਅਤੇ ਸ਼ਰਾਬ ਦਾ ਧੰਦਾ ਕਰਨ ਵਾਲਿਆਂ ਖ਼ਿਲਾਫ਼ ਵਿੱਢੀ ਗਈ ਮੁਹਿੰਮ ਦੌਰਾਨ ਇੱਕ ਬਹੁਤ ਹੀ ਦਿਲਚਸਪ ਮਾਮਲਾ ਸਾਹਮਣੇ ਆਇਆ ਹੈ। ਆਬਕਾਰੀ ਵਿਭਾਗ ਅਤੇ ਪੁਲਿਸ ਟੀਮ ਵੱਲੋਂ ਦੇਸੀ ਸ਼ਰਾਬ (ਲਾਹਣ) ਬਣਾਉਣ ਦੀ ਤਿਆਰੀ ਕਰ ਰਹੇ ਇਕ ਮੁਲਜ਼ਮ ਨੂੰ ਖਾਲੀ ਡੱਬੇ ਅਤੇ ਗੁੜ ਸਮੇਤ ਕਾਬੂ ਕੀਤਾ ਗਿਆ ਪਰ ਉਹ ਟੀਮ ਨੂੰ ਚਕਮਾ ਦੇ ਕੇ ਫ਼ਰਾਰ ਹੋ ਗਿਆ। ਵਿਭਾਗ ਦਾ ਦਾਅਵਾ ਹੈ ਕਿ ਮੁਲਜ਼ਮਾਂ ਕੋਲੋਂ ਲਾਹਨ ਬਰਾਮਦ ਨਹੀਂ ਹੋਈ। ਅਜੇ ਤੱਕ ਉਕਤ ਮਾਮਲੇ 'ਚ ਸ਼ਨਾਖਤ ਨਾ ਹੋਣ ਕਾਰਨ ਕੋਈ ਕਾਰਵਾਈ ਨਹੀਂ ਕੀਤੀ ਗਈ।

ਵੀਡੀਓ ਇੰਟਰਨੈੱਟ ਮੀਡੀਆ 'ਤੇ ਵਾਇਰਲ

ਦੱਸਣਯੋਗ ਹੈ ਕਿ ਪੰਜਾਬ ਸਰਕਾਰ ਦੀਆਂ ਹਦਾਇਤਾਂ ਤਹਿਤ ਆਬਕਾਰੀ ਤੇ ਪੁਲਿਸ ਵਿਭਾਗ ਵੱਲੋਂ ਦੇਸੀ ਸ਼ਰਾਬ ਤਿਆਰ ਕਰਨ ਵਾਲੇ ਵਿਅਕਤੀਆਂ ਖ਼ਿਲਾਫ਼ ਵਿਸ਼ੇਸ਼ ਮੁਹਿੰਮ ਚਲਾ ਕੇ ਲਗਾਤਾਰ ਛਾਪੇਮਾਰੀ ਕੀਤੀ ਜਾ ਰਹੀ ਹੈ। ਇਸੇ ਕੜੀ ਵਿੱਚ ਆਬਕਾਰੀ ਤੇ ਪੁਲੀਸ ਦੀ ਟੀਮ ਵੱਲੋਂ ਦਰਿਆ ਬਿਆਸ ਦੇ ਕੰਢੇ ਵਸੇ ਪਿੰਡ ਬੁੱਢਾ ਬਾਲਾ ਅਤੇ ਭੋਚਪੁਰ ਵਿੱਚ ਛਾਪੇਮਾਰੀ ਕੀਤੀ ਗਈ। ਇਸ ਦੌਰਾਨ ਟੀਮ ਵੱਲੋਂ ਦਰਿਆ ਦੇ ਪਾਰ ਤੋਂ ਇੱਕ ਵਿਅਕਤੀ ਨੂੰ ਗੁੜ ਦੀਆਂ ਤਿੰਨ ਤੋਂ ਚਾਰ ਬੋਰੀਆਂ ਅਤੇ ਇੱਕ ਖਾਲੀ ਡੱਬੇ ਸਮੇਤ ਕਾਬੂ ਕੀਤਾ ਗਿਆ। ਜਿਸ ਨੂੰ ਕਿਸ਼ਤੀ ਰਾਹੀਂ ਇਸ ਪਾਸੇ ਲਿਆਂਦਾ ਗਿਆ।

ਜਦੋਂ ਟੀਮ ਦੇ ਮੈਂਬਰ ਕਿਸ਼ਤੀ ਵਿੱਚੋਂ ਸਾਮਾਨ ਉਤਾਰ ਕੇ ਆਪਣੇ ਵਾਹਨਾਂ ਵਿੱਚ ਲੱਦਣ ਵਿੱਚ ਰੁੱਝ ਗਏ ਤਾਂ ਮੁਲਜ਼ਮ ਬੜੀ ਚਲਾਕੀ ਨਾਲ ਕਿਸ਼ਤੀ ਲੈ ਕੇ ਦਰਿਆ ਵਿੱਚ ਫ਼ਰਾਰ ਹੋ ਗਿਆ। ਟੀਮ ਕੋਲ ਹੋਰ ਕਿਸ਼ਤੀ ਨਾ ਹੋਣ ਕਾਰਨ ਅਤੇ ਦਰਿਆ ਵਿੱਚ ਪਾਣੀ ਜ਼ਿਆਦਾ ਹੋਣ ਕਾਰਨ ਮੁਲਜ਼ਮ ਬੜੀ ਆਸਾਨੀ ਨਾਲ ਫ਼ਰਾਰ ਹੋ ਗਿਆ ਅਤੇ ਟੀਮ ਹੱਥ-ਪੈਰ ਮਲਦੀ ਰਹਿ ਗਈ। ਇਸ ਤੋਂ ਬਾਅਦ ਪੂਰੇ ਮਾਮਲੇ ਦੀ ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ ਲੋਕ ਇਸ ਨੂੰ ਇੰਟਰਨੈੱਟ ਮੀਡੀਆ 'ਤੇ ਵਾਇਰਲ ਕਰਕੇ ਐਕਸਾਈਜ਼ ਅਤੇ ਪੁਲਿਸ ਵਿਭਾਗ ਦਾ ਮਜ਼ਾਕ ਉਡਾ ਰਹੇ ਹਨ।

ਗੁੜ ਅਤੇ ਖਾਲੀ ਡੱਬੇ ਬਰਾਮਦ

ਮਾਮਲੇ ਸਬੰਧੀ ਐਕਸਾਈਜ਼ ਵਿਭਾਗ ਦੇ ਈਟੀਓ ਰਜਿੰਦਰ ਕੁਮਾਰ ਨਾਲ ਸੰਪਰਕ ਕਰਨ ’ਤੇ ਉਨ੍ਹਾਂ ਘਟਨਾ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਮੁਲਜ਼ਮ ਕੋਲੋਂ ਸਿਰਫ਼ ਗੁੜ ਅਤੇ ਖਾਲੀ ਡੱਬਾ ਹੀ ਬਰਾਮਦ ਹੋਇਆ ਹੈ, ਜਿਸ ਕਾਰਨ ਉਸ ਖ਼ਿਲਾਫ਼ ਕੋਈ ਕਾਰਵਾਈ ਨਹੀਂ ਕੀਤੀ ਗਈ। ਮੁਲਜ਼ਮ ਤੋਂ ਪੁੱਛਗਿੱਛ ਕਰਨ ਮਗਰੋਂ ਅਗਲੀ ਕਾਰਵਾਈ ਕੀਤੀ ਜਾਣੀ ਸੀ ਪਰ ਉਹ ਟੀਮ ਨੂੰ ਚਕਮਾ ਦੇ ਕੇ ਫ਼ਰਾਰ ਹੋ ਗਿਆ। ਫਿਲਹਾਲ ਮੁਲਜ਼ਮ ਦੀ ਭਾਲ ਜਾਰੀ ਹੈ।