Pathankot News : ਨਸ਼ਾ ਤਸਕਰ ਹੱਥਕੜੀਆਂ ਸਣੇ ਪੁਲਿਸ ਹਿਰਾਸਤ 'ਚੋਂ ਫ਼ਰਾਰ, ਡਾਕਟਰੀ ਜਾਂਚ ਤੋਂ ਵਾਪਸ ਲਿਜਾਂਦੇ ਸਮੇਂ ਵਾਪਰੀ ਘਟਨਾ

ਆਰ ਸਿੰਘ, ਪੰਜਾਬੀ ਜਾਗਰਣ, ਪਠਾਨਕੋਟ : ਐੱਨਡੀਪੀਐੱਸ ਐਕਟ ਅਧੀਨ ਗ੍ਰਿਫ਼ਤਾਰ ਕੀਤਾ ਗਿਆ ਇੱਕ ਨਸ਼ਾ ਤਸਕਰ ਡਾਕਟਰੀ ਜਾਂਚ ਤੋਂ ਬਾਅਦ ਸਦਰ ਪੁਲਿਸ ਸਟੇਸ਼ਨ ਵਾਪਸ ਲਿਜਾਂਦੇ ਸਮੇਂ ਪੁਲਿਸ ਹਿਰਾਸਤ ਵਿੱਚੋਂ ਫ਼ਰਾਰ ਹੋ ਗਿਆ।

ਮੁਲਜ਼ਮ ਦੇ ਭੱਜਣ ਤੋਂ ਬਾਅਦ ਡਿਵੀਜ਼ਨ ਨੰਬਰ ਦੋ ਵੱਲੋਂ ਦਰਜ ਕੀਤੀ ਗਈ ਐੱਫਆਈਆਰ ਦੇ ਅਨੁਸਾਰ ਮੁਲਜ਼ਮ ਨਵੀਨ ਕੁਮਾਰ ਉਰਫ਼ ਕਾਲੀ ਵਾਸੀ ਸੁੰਦਰ ਨਗਰ ਪਠਾਨਕੋਟ, ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ ਅਤੇ 14 ਦਿਨਾਂ ਦਾ ਨਿਆਂਇਕ ਰਿਮਾਂਡ ਦਿੱਤਾ ਗਿਆ। ਡਾਕਟਰੀ ਜਾਂਚ ਤੋਂ ਬਾਅਦ ਪੁਲਿਸ ਉਸਨੂੰ ਪਠਾਨਕੋਟ ਸਬ-ਜੇਲ੍ਹ ਲੈ ਗਈ, ਪਰ ਕੈਦੀਆਂ ਦੀ ਗਿਣਤੀ ਪੂਰੀ ਹੋਣ ਕਾਰਨ ਜੇਲ੍ਹ ਸਟਾਫ ਨੇ ਇੱਕ ਨਵੇਂ ਕੈਦੀ ਨੂੰ ਦਾਖਲ ਕਰਨ ਤੋਂ ਇਨਕਾਰ ਕਰ ਦਿੱਤਾ।

ਪੁਲਿਸ ਉਦੋਂ ਮੁਲਜ਼ਮ ਨੂੰ ਲੈ ਕੇ ਥਾਣੇ ਵਾਪਸ ਆ ਰਹੀ ਸੀ। ਸ਼ਾਮ ਦੇ ਸਮੇਂ ਚੱਕੀ ਪੁਲ ਨੇੜੇ ਟ੍ਰੈਫਿਕ ਜਾਮ ਕਾਰਨ ਗੱਡੀ ਰੁਕ ਗਈ। ਜਿਸ ਤੇ ਮੁਲਜ਼ਮ ਨੇ ਮੌਕਾ ਦੇਖਦੇ ਡਿਊਟੀ 'ਤੇ ਮੌਜੂਦ ਪੀਐਚਜੀ ਲੁਭਾਇਆ ਰਾਮ ਨੂੰ ਧੱਕਾ ਦਿੱਤਾ ਅਤੇ ਗੱਡੀ ਦਾ ਦਰਵਾਜ਼ਾ ਖੋਲ੍ਹ ਕੇ ਹੱਥਕੜੀਆਂ ਸਮੇਤ ਫਰਾਰ ਹੋ ਗਿਆ।

ਪੁਲਿਸ ਨੇ ਮੁਲਜ਼ਮ ਦੀ ਭਾਲ ਲਈ ਆਲੇ-ਦੁਆਲੇ ਦੇ ਇਲਾਕਿਆਂ ਵਿੱਚ ਨਾਕਾਬੰਦੀ ਕਰ ਦਿੱਤੀ ਹੈ, ਉਸ ਵਿਰੁੱਧ ਨਵੀਆਂ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਹੈ ਅਤੇ ਉਸਦੀ ਭਾਲ ਲਈ ਛਾਪੇਮਾਰੀ ਕੀਤੀ ਜਾ ਰਹੀ ਹੈ।