ਡੀਸੀ ਦਫ਼ਤਰ ਅੱਗੇ ਕਿਸਾਨਾਂ ਦਾ ਧਰਨਾ ਜਾਰੀ

ਸੁਖਦੀਪ ਸਿੰਘ ਗਿੱਲ, ਪੰਜਾਬੀ ਜਾਗਰਣ ਸ੍ਰੀ ਮੁਕਤਸਰ ਸਾਹਿਬ : ਡਿਪਟੀ ਕਮਿਸ਼ਨਰ ਦੇ ਦਫਤਰ ਮੂਹਰੇ ਪਿਛਲੇ ਅੱਠ ਦਿਨਾਂ ਤੋਂ ਖੇਤਾਂ ਦੇ ਪੁੱਤਰਾਂ ਦਾ ਰੋਸ ਧਰਨਾ ਚੱਲ ਰਿਹਾ ਹੈ।ਰੋਸ ਧਰਨੇ ਤੋਂ ਮਗਰੋਂ ਦਫਤਰ ਸਾਹਮਣੇ ਵਾਲਾ ਪਾਰਕ ਕਿਸਾਨਾਂ ਦਾ ਰੈਣ ਬਸੇਰਾ ਹੁੰਦਾ ਹੈ। ਚੜ੍ਹਦੇ ਸਿਆਲ ਦੀ ਰੁੱਤ ਵਿੱਚ ਕਿਸਾਨ ਆਪਣੇ ਹੱਕਾਂ ਲਈ ਡਟ ਗਏ ਹਨ। ਭਾਰਤੀ ਕਿਸਾਨ ਯੂਨੀਅਨ (ਏਕਤਾ ਉਗਰਾਹਾਂ) ਦੇ ਜਿਲ੍ਹਾ ਪ੍ਰਧਾਨ ਹਰਬੰਸ ਸਿੰਘ ਕੋਟਲੀ ਆਖ਼ਦੇ ਹਨ, ਅਸੀਂ ਸਰਕਾਰ ਤੋਂ ਕੋਈ ਤਾਜ ਨੀਂ ਮੰਗਦੇ। ਫਾਜ਼ਿਲਕਾ ਦੇ ਹੜ੍ਹ ਪੀੜਿਤ ਪਿੰਡਾਂ ਵਿੱਚ ਕਿਸਾਨਾਂ ਨੂੰ ਕਣਕ ਦਾ ਬੀਜ ਵੰਡ ਕੇ ਮੁੜਦਿਆਂ ਨੇੜਲੇ ਪਿੰਡ ਉਦੇਕਰਨ ਕੋਲ ਸੜਕ ਹਾਦਸੇ ’ਚ ਜਾਨ ਲਗਾ ਕੇ ਕਿਸਾਨ ਆਗੂ ਹਰਜੀਤ ਸਿੰਘ ਕੋਟਕਪੂਰਾ ਦੇ ਪਰਿਵਾਰ ਲਈ ਇਨਸਾਫ ਮੰਗਦੇ ਹਾਂ। ਪਰਿਵਾਰ ਲਈ 10 ਲੱਖ ਦਾ ਮੁਆਵਜ਼ਾ, ਸਾਰਾ ਕਰਜ਼ਾ ਮੁਆਫ਼ ਤੇ ਪਰਿਵਾਰ ਦੇ ਇੱਕ ਜੀਅ ਲਈ ਸਰਕਾਰੀ ਨੌਕਰੀ।ਨਾਲ ਹੀ ਗੰਭੀਰ ਜ਼ਖਮੀ ਹੋਏ ਹਸਪਤਾਲ ਵਿੱਚ ਜ਼ਿੰਦਗੀ ਮੌਤ ਦੀ ਲੜ੍ਹਾਈ ਲੜ ਰਹੇ ਕਿਸਾਨ ਆਗੂ ਬਲਵੰਤ ਸਿੰਘ ਨੰਗਲ ਦੇ ਸਾਰੇ ਇਲਾਜ ਦਾ ਖਰਚੇ ਲਈ ਧਰਨੇ ’ਚ ਬੈਠੇ ਹਾਂ। ਸਿਤਮ ਦੀ ਗੱਲ ਹੈ ਕਿ ਪ੍ਰਸ਼ਾਸਨ ਨੂੰ ਆਪਣੇ ਬਾਰ ਮੂਹਰੇ ਸੜਕ ’ਤੇ ਬੈਠੇ ਕਿਸਾਨ ਨਜ਼ਰ ਹੀ ਨਹੀਂ ਆਉਂਦੇ। ਸ਼ਾਮ ਸਵੇਰ ਕਿਸਾਨਾਂ ਦੇ ਪਾਰਕ ਵਾਲੇ ਰੈਣ ਬਸੇਰੇ ਵਿੱਚ ਬੈਠਕ ਜੁੜਦੀ ਹੈ। ਖਾਣਾ ਬਣਾਉਂਦੇ, ਖਾਂਦੇ ਕਿਸਾਨ ਸਰਕਾਰ ਨੂੰ ਕੋਸਦੇ ਹਨ। ਖੇਤੀਬਾੜੀ ਮੰਤਰੀ ਗੁਰਮੀਤ ਸਿੰਘ ਖੁੱਡੀਆਂ ਦੇ ਹਲਕੇ ਤੋਂ ਆਇਆ ਕਿਸਾਨ ਗੁਰਸੇਵਕ ਸਿੰਘ ਲੰਬੀ ਆਖਦਾ ਹੈ ਕਿ ਪਿੰਡਾਂ ਦੀਆਂ ਸੱਥਾਂ ਵਿੱਚੋਂ ਸਰਕਾਰਾਂ ਚਲਾਉਣ ਦੀਆਂ ਟਾਹਰਾਂ ਮਾਰਨ ਵਾਲੇ ਡੀਸੀ ਦਫਤਰ ਮੂਹਰੇ ਬੈਠਿਆਂ ਦੀ ਵੀ ਸੁਣਵਾਈ ਨੀਂ ਕਰਦੇ। ਸਰਕਾਰ ਦਾ ਹਰਾ ਪੈੱਨ ਕਿਸਾਨਾਂ, ਮਜ਼ਦੂਰਾਂ ਦੇ ਭਲੇ ਲਈ ਨਹੀਂ ਸਗੋਂ ਕਾਰਪੋਰੇਟ ਘਰਾਣਿਆਂ ਦੇ ਘਰ ਭਰਨ ਲਈ ਚਲਦਾ ਹੈ। ਦਿਨ ਰਾਤ ਕਿਸਾਨਾਂ ਦੇ ਲੰਗਰ ’ਚ ਸੇਵਾ ਕਰਦੇ, ਰੋਟੀ ਪਾਣੀ ਫੜਾਉਂਦੇ ਅਜਾਇਬ ਸਿੰਘ ਆਖ਼ਦੇ ਹਨ, ਸਰਕਾਰ ਕੋਈ ਵੀ ਹੋਵੇ, ਹੱਕ ਤਾਂ ਲੜਿਆਂ ਹੀ ਮਿਲਦੇ ਹਨ। ਪੰਜਾਬ ਸਰਕਾਰ ਦਿੱਲੀ ਦੇ ਇਤਿਹਾਸਕ ਮੋਰਚੇ ਦਾ ਧਿਆਨ ਕਰਨਾ ਚਾਹੀਦਾ ਹੈ। ਸਾਡੇ ਕੋਲ ਸਿਦਕ ਸਬਰ ਦੇ ਨਾਲ ਨਾਲ ਸੰਘਰਸ਼ਾਂ ਨੂੰ ਜਿੱਤ ਤੱਕ ਲਿਜਾਣ ਦਾ ਜ਼ਜ਼ਬਾ ਤੇ ਤਜਰਬਾ ਹੈ।ਗੂੰਗੇ ਬੋਲੇ ਹੋਏ ਪ੍ਰਸ਼ਾਸਨ ਤੇ ਸਰਕਾਰ ਤੋਂ ਹੱਕੀ ਮੰਗਾਂ ਮਨਵਾ ਕੇ ਹੀ ਘਰਾਂ ਦਾ ਮੂੰਹ ਵੇਖਾਂਗੇ। ਡੀਸੀ ਦਫ਼ਤਰ ਅੱਗੇ ਤੇ ਪਾਰਕ ਦੇ ਬਾਹਰਵਾਰ ਕਿਸਾਨਾਂ ਦੀਆਂ ਹੱਕੀ ਮੰਗਾਂ ਦਾ ਲੱਗਾ ਬੋਰਡ ਦਫਤਰ ਆਉਂਦੇ ਜਾਂਦੇ ਲੋਕਾਂ ਦੀਆਂ ਨਜ਼ਰਾਂ ਤੇ ਚੜ੍ਹਦਾ ਹੈ।ਸਰਕਾਰ ਦੇ ਉਨ੍ਹਾਂ ਦਾਅਵਿਆਂ ਦੀ ਫੂਕ ਕੱਢਦਾ ਨਜ਼ਰ ਆਉਂਦਾ ਹੈ, ਅਖੇ ਸਾਡੀ ਸਰਕਾਰ ਵਿੱਚ ਕਿਸੇ ਨੂੰ ਧਰਨੇ ਲਾਉਣ ਦੀ ਲੋੜ ਨੀਂ ਪੈਣੀ। ਅਣਮਿੱਥੇ ਸਮੇਂ ਦੇ ਧਰਨੇ ਵਿੱਚ ਡਟੇ ਕਿਸਾਨ ਆਗੂ ਗੁਰਭਗਤ ਸਿੰਘ ਭਲਾਈਆਣਾ ਦਾ ਕਹਿਣਾ ਹੈ ਕਿ ਕਿਸਾਨਾਂ ਦੀ ਅਣਦੇਖੀ ਦੇ ਚਲਦਿਆਂ ਦਿਨੋ ਦਿਨ ਲੰਬਾ ਹੋ ਰਿਹਾ ਧਰਨਾ ਕਿਸਾਨਾਂ ਵਿੱਚ ਰੋਸ ਵਧਾ ਰਿਹਾ ਹੈ।ਆਉਣ ਵਾਲੇ ਦਿਨਾਂ ’ਚ ਸੂਬਾ ਕਮੇਟੀ ਦੀ ਅਗਵਾਈ ਇਹ ਸੰਘਰਸ਼ ਵਿਸ਼ਾਲ ਰੂਪ ਵਿੱਚ ਸਾਹਮਣੇ ਆਵੇਗਾ। ਹਾਲ ਦੀ ਘੜੀ ਕਿਸਾਨ ਆਪਣੀਆਂ ਮੰਗਾਂ ਲਈ ਸਰਕਾਰ ਸਾਹਮਣੇ ਸਿਰ ਉਠਾ ਕੇ ਖੜ੍ਹੇ ਹਨ। ਗੇਂਦ ਸਰਕਾਰ ਦੇ ਪਾਲੇ ਵਿੱਚ ਹੈ, ਕਿਸਾਨਾਂ ਦੇ ਬੁਲੰਦ ਹੌਂਸਲੇ ਤੇ ਸੰਘਰਸ਼ ਪ੍ਰਸ਼ਾਸਨ ਲਈ ਗਲੇ ਦੀ ਹੱਡੀ ਬਣ ਗਿਆ ਜਾਪਦਾ ਹੈ। ਕਿਸਾਨਾਂ ਦਾ ਕਹਿਣਾ ਹੈ ਕਿ ਸਾਡੇ ਕੋਲ ਸਬਰ ਸਿਦਕ ਤੇ ਸੰਘਰਸ਼ ਦਾ ਸਾਥ ਹੈ। ਮੰਗਾਂ ਮੰਨੇ ਜਾਣ ਤੱਕ ਸਾਡਾ ਰੈਣ ਬਸੇਰਾ ਏਥੇ ਹੀ ਰਹੇਗਾ।