ਕੈਬਨਿਟ ਮੰਤਰੀ ਡਾ. ਬਲਜੀਤ ਕੌਰ ਵੱਲੋਂ ਮਿਮਿਟ ’ਚ ਵੇਰਕਾ ਮਿਲਕ ਬੂਥ ਦਾ ਉਦਘਾਟਨ

ਪੱਤਰ ਪ੍ਰੇਰਕ. ਪੰਜਾਬੀ ਜਾਗਰਣ, ਮਲੋਟ : ਪੰਜਾਬ ਕੈਬਨਿਟ ਮੰਤਰੀ ਡਾ. ਬਲਜੀਤ ਕੌਰ ਨੇ ਮਲੋਟ ਇੰਸਟੀਚਿਊਟ ਆਫ਼ ਮੈਨੇਜਮੈਂਟ ਐਂਡ ਇਨਫਰਮੇਸ਼ਨ ਟੈਕਨਾਲੋਜੀ (ਮਿਮਿਟ) ਮਲੋਟ ਦੇ ਕੈਂਪਸ ’ਚ ਇੱਕ ਨਵੇਂ ਵੇਰਕਾ ਮਿਲਕ ਬੂਥ ਦਾ ਉਦਘਾਟਨ ਕੀਤਾ ਜਿਸ ਨਾਲ ਜਨਤਾ ਲਈ ਗੁਣਵੱਤਾ ਵਾਲੇ ਦੁੱਧ ਤੇ ਡੇਅਰੀ ਉਤਪਾਦਾਂ ਤੱਕ ਪਹੁੰਚ ਵਧੇਗੀ। ਇਸ ਮੌਕੇ ਇਕੱਠ ਨੂੰ ਸੰਬੋਧਨ ਕਰਦਿਆਂ ਡਾ. ਬਲਜੀਤ ਕੌਰ ਨੇ ਕਿਹਾ ਕਿ ਵੇਰਕਾ ਜੋ ਕਿ 1963 ਤੋਂ ਪੰਜਾਬ ਸਟੇਟ ਕੋਆਪਰੇਟਿਵ ਮਿਲਕ ਪ੍ਰੋਡਿਊਸਰਜ਼ ਫੈਡਰੇਸ਼ਨ ਲਿਮਟਿਡ ਦਾ ਇੱਕ ਪ੍ਰਮੁੱਖ ਬਾਂਡ ਹੈ ਨੂੰ ਸ਼ੁੱਧਤਾ ਗੁਣਵੱਤਾ ਤੇ ਵਿਸ਼ਵਾਸ਼ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ। ਉਨਾਂ ਨੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੇ ਨੌਜਵਾਨਾਂ ਦੇ ਸਵੈ-ਰੁਜ਼ਗਾਰ ਲਈ ਦ੍ਰਿਸ਼ਟੀਕੋਣ ਦਾ ਸਿਹਰਾ ਦਿੱਤਾ ਤੇ ਕਿਹਾ ਕਿ ਜਨਤਕ ਥਾਵਾਂ ਤੇ ਅਜਿਹੇ ਬੂਥ ਪੰਜਾਬ ਦੀ ਖੁਸ਼ਹਾਲੀ ਨੂੰ ਅੱਗੇ ਵਧਾਉਂਦੇ ਹੋਏ ਤਾਜ਼ਾ, ਸਾਫ਼-ਸੁਥਰਾ, ਕਿਫਾਇਤੀ ਡੇਅਰੀ ਪ੍ਰਦਾਨ ਕਰਦੇ ਹਨ। ਕੈਬਨਿਟ ਮੰਤਰੀ ਨੇ ਇਸ ਬੂਥ ਨੂੰ ਲਾਂਚ ਕਰਨ ’ਚ ਟੀਮ ਵਰਕ ਲਈ ਸਹਿਕਾਰਤਾ ਵਿਭਾਗ ਤੇ ਮਿਮਿਟ ਮਲੋਟ ਦੇ ਪ੍ਰਬੰਧਕਾਂ ਦੀ ਸ਼ਲਾਘਾ ਕੀਤੀ ਜੋ ਕੈਂਪਸ ਤੇ ਨੇੜਲੇ ਨਿਵਾਸੀਆਂ ਦੋਵਾਂ ਦੀ ਮੰਗ ਨੂੰ ਪੂਰਾ ਕਰੇਗਾ। ਉਨ੍ਹਾਂ ਨੇ ਸਹਿਕਾਰਤਾਵਾਂ ਨੂੰ ਮਜ਼ਬੂਤ ਕਰਨ ਤੇ ਰਾਜ ਭਰ ’ਚ ਵੇਰਕਾ ਦੇ ਪੈੜ ਨੂੰ ਵਿਸ਼ਾਲ ਕਰਨ ਲਈ ਪੰਜਾਬ ਸਰਕਾਰ ਦੇ ਯਤਨਾਂ ਦੀ ਪੁਸ਼ਟੀ ਕੀਤੀ। ਮਿਮਿਟ ਮਲੋਟ ਦੇ ਡਾਇਰੈਕਟਰ ਡਾ. ਜਸਕਰਨ ਸਿੰਘ ਭੁੱਲਰ ਤੇ ਵੇਰਕਾ ਮਿਲਕਫੈੱਡ ਬਠਿੰਡਾ ਦੇ ਜੀਐਮ ਰੁਪਿੰਦਰ ਸਿੰਘ ਸੇਖੋਂ ਨੇ ਕੈਬਨਿਟ ਮੰਤਰੀ ਡਾ. ਬਲਜੀਤ ਕੌਰ ਮਿਲਕਫੈੱਡ ਦੇ ਐਮਡੀ ਰਾਹੁਲ ਗੁਪਤਾ, ਮੁੱਖ ਮੰਤਰੀ ਦੇ ਜੁਆਇੰਟ ਪ੍ਰਮੁੱਖ ਸਕੱਤਰ ਤੇ ਵੇਰਕਾ ਦੇ ਏਐਮ੍ਹਡੀ ਕੇਸ਼ਵ ਗੋਇਲ, ਜੁਆਇੰਟ ਰਜਿਸਟਰਾਰ ਸਹਿਕਾਰੀ ਵਿਭਾਗ ਫਿਰੋਜ਼ਪੁਰ ਡਿਵੀਜ਼ਨ ਅਭਿਤੇਸ਼ ਸਿੰਘ ਸੰਧੂ ਦਾ ਉਨ੍ਹਾਂ ਦੇ ਦ੍ਰਿੜ ਸਮਰਥਨ ਲਈ ਧੰਨਵਾਦ ਕੀਤਾ। ਉਨ੍ਹਾਂ ਨੇ ਇਸ ਗੱਲ ’ਤੇ ਚਾਨਣਾ ਪਾਇਆ ਕਿ ਬੂਥ ਵਿਦਿਆਰਥੀਆਂ, ਫੈਕਲਟੀ, ਸਟਾਫ, ਪੁੱਡਾ ਕਲੋਨੀ ਨਿਵਾਸੀਆਂ ਤੇ ਆਲੇ ਦੁਆਲੇ ਦੇ ਖੇਤਰਾਂ ਨੂੰ ਕਿਵੇਂ ਲਾਭ ਪਹੁੰਚਾਏਗਾ ਤੇ ਕਿਹਾ ਕਿ ਇਹ ਬੂਥ ਦੁੱਧ ਤੇ ਡੇਅਰੀ ਉਤਪਾਦਾਂ ਦੀ ਵਿਭਿੰਨ ਸ੍ਰੇਣੀ ਦਾ ਭੰਡਾਰ ਹੈ ਜੋ ਕਿ ਮਿਮਿਟ ਭਾਈਚਾਰੇ ਤੇ ਜਨਤਾ ਦੋਵਾਂ ਲਈ ਪੌਸ਼ਟਿਕ, ਸੁਵਿਧਾਜਨਕ ਵਿਕਲਪਾਂ ਦਾ ਵਾਅਦਾ ਪੂਰਾ ਕਰੇਗਾ। ਇਸ ਮੌਕੇ ਮੌਜੂਦ ਲੋਕਾਂ ’ਚ ਸਹਿਕਾਰੀ ਵਿਭਾਗ ਪੰਜਾਬ ਦੇ ਸਹਾਇਕ ਰਜਿਸਟਰਾਰ ਪਰੀਪੂਰਨ ਸਿੰਘ ਢਿੱਲੋਂ, ਸੀਐਮਐਸ ਮਲੋਟ ਦੇ ਚੇਅਰਮੈਨ ਹਰਪ੍ਰੀਤ ਸਿੰਘ ਕਰਮਗੜ੍ਹ, ਸੀਐਮਐਸ-ਮਲੋਟ ਦੇ ਮੈਨੇਜਰ ਕੁਲਵਿੰਦਰ ਸਿੰਘ, ਅਭਿਨਵ ਵਾਟਸ ਮਾਰਕੀਟਿੰਗ ਹੈੱਡ ਵੇਰਕਾ ਬਠਿੰਡਾ ਡੇਅਰੀ, ਅਰਜੁਨ ਕਸ਼ਯਪ, ਮੈਨੇਜਰ ਇੰਜੀਨੀਅਰਿੰਗ ਵੇਰਕਾ ਬਠਿੰਡਾ ਡੇਅਰੀ, ਦੇਵ ਰਾਜ ਗੋਇਲ (ਕੇਸ਼ਵ ਗੋਇਲ ਦੇ ਪਿਤਾ), ਮਿਮਿਟ ਦੇ ਡਿਪਟੀ ਰਜਿਸਟਰਾਰ ਵਿਕਾਸ ਗੋਇਲ, ਅਸਟੇਟ ਅਫਸਰ ਅਵਤਾਰ ਸਿੰਘ, ਫੈਕਲਟੀ, ਸਟਾਫ, ਵਿਦਿਆਰਥੀ, ਪੁੱਡਾ ਜੁਆਇੰਟ ਬਲਾਕ ਕਮੇਟੀ ਦੇ ਮੈਂਬਰ ਤੇ ਸਥਾਨਕ ਨਿਵਾਸੀ ਸ਼ਾਮਲ ਸਨ।