Mansa News : ਦੋਸਤਾਂ 'ਚ ਤਕਰਾਰ ਤੋਂ ਬਾਅਦ ਚੱਲੀ ਗੋਲ਼ੀ, ਦੋ ਜਣੇ ਜ਼ਖਮੀ

ਹਰਕ੍ਰਿਸ਼ਨ ਸ਼ਰਮਾ, ਪੰਜਾਬੀ ਜਾਗਰਣ, ਮਾਨਸਾ : ਬਰਨਾਲਾ ਸਿਰਸਾ ਨੈਸ਼ਨਲ ਹਾਈਵੇ ‘ਤੇ ਮਾਨਸਾ ਵਿੱਚ ਅਰਵਿੰਦ ਨਗਰ ਨਜ਼ਦੀਕ ਇਕੱਠੇ ਹੋਏ ਦੋਸਤਾਂ ਦੀ ਆਪਸ ਵਿੱਚ ਤਕਰਾਰ ਹੋ ਗਈ। ਇਸ ਦੌਰਾਨ ਇੱਕ ਲੜਕੇ ਵੱਲੋਂ ਗੋਲ਼ੀ ਚਲਾਉਣ ਨਾਲ ਦੋ ਜਣੇ ਜ਼ਖ਼ਮੀ ਹੋ ਗਏ। ਉਧਰ ਇਸ ਮਾਮਲੇ ’ਚ ਥਾਣਾ ਸਿਟੀ 2 ਮਾਨਸਾ ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਜ਼ਖ਼ਮੀ ਹੋਏ ਹਰਦੀਪ ਸਿੰਘ ਨੇ ਦੱਸਿਆ ਕਿ ਉਹ ਚੰਡੀਗੜ੍ਹ ਮਿਊਜ਼ਿਕ ਦੀ ਪੜ੍ਹਾਈ ਕਰਦਾ ਸੀ ਤਾਂ ਹੋਰ ਦੋਸਤਾਂ ਨਾਲ ਰਹਿੰਦਾ ਸੀ। ਪਰ ਉਨ੍ਹਾਂ ਵਿੱਚੋਂ ਫ਼ਿਰ ਇੱਕ ਦੋਸਤ ਕੈਨੇਡਾ ਚਲਿਆ ਗਿਆ ਸੀ। ਉਸ ਨਾਲ ਤਕਰਾਰ ਵੀ ਹੋ ਗਈ ਸੀ। ਪਰ ਜਦ ਉਹ ਹੁਣ ਕੈਨੇਡਾ ਤੋਂ ਮਾਨਸਾ ਆਇਆ ਹੋਇਆ ਸੀ ਤਾਂ ਅੱਜ ਉਸ ਨੇ ਉਸ ਨੂੰ ਬੁਲਾਇਆ ਸੀ। ਮੁੱਦਈ ਹਰਦੀਪ ਸਿੰਘ ਨੇ ਦੱਸਿਆ ਕਿ ਅਸੀਂ ਸੋਚਿਆ ਕਿ ਚੱਲ ਮਿਲ ਲਵਾਂਗੇ ਅਤੇ ਅਸੀਂ ਚਾਰ ਦੋਸਤ ਤੁਰਦੇ ਹੋਏ ਅਰਵਿੰਦ ਨਗਰ ਕੋਲ ਚਲੇ ਗਏ। ਉਥੇ ਹੀ ਕੈਨੇਡਾ ਵਾਲਾ ਦੋਸਤ ਵੀ ਹੋਰ ਤਿੰਨ ਜਣਿਆਂ ਨਾਲ ਆਇਆ। ਇਸ ਦੌਰਾਨ ਅਚਾਨਕ ਹੀ ਤਕਰਾਰ ਹੋ ਗਈ। ਉਨ੍ਹਾਂ ਵਿੱਚ ਇੱਕ ਨੇ ਪਹਿਲਾਂ ਹਵਾਈ ਫਾਇਰ ਚਲਾਇਆ ਅਤੇ ਫ਼ਿਰ ਉਨ੍ਹਾਂ ਵੱਲ ਗੋਲ਼ੀ ਚਲਾ ਦਿੱਤੀ। ਹਰਦੀਪ ਸਿੰਘ ਨੇ ਦੱਸਿਆ ਕਿ ਇਸ ਨਾਲ ਉਹ ਅਤੇ ਉਸ ਦਾ ਦੋਸਤ ਸੰਦੀਪ ਸਿੰਘ ਜ਼ਖ਼ਮੀ ਹੋ ਗਿਆ। ਉਸ ਨ੍ਹਾਂ ਦੋਨਾਂ ਨੂੰ ਫ਼ਿਰ ਹਸਪਤਾਲ ਪਹੁੰਚਾਇਆ ਗਿਆ। ਉਧਰ ਇਸ ਮਾਮਲੇ ’ਚ ਥਾਣਾ ਸਿਟੀ 2 ਮਾਨਸਾ ਪੁਲਿਸ ਨੇ ਜਾਂਚ ਕਰਨੀ ਸ਼ੁਰੂ ਕਰ ਦਿੱਤੀ ਹੈ। ਡੀਐਸਪੀ ਬੂਟਾ ਸਿੰਘ ਗਿੱਲ ਨੇ ਦੱਸਿਆ ਕਿ ਇਸ ਮਾਮਲੇ ’ਚ ਜਾਂਚ ਚੱਲ ਰਹੀ ਹੈ। ਅਸਲੀਅਤ ਜਾਂਚ ਦੇ ਬਾਅਦ ਹੀ ਸਾਹਮਣੇ ਆਵੇਗੀ।