1 ਮਈ ਤੋਂ 100 ਰੁਪਏ ਸਾਈਕਲ ਕੀਮਤ ਵਧਾਉਣ ਦਾ ਐਲਾਨ

1 ਅਪ੍ਰੈਲ ਤੋਂ 250 ਰੁਪਏ ਸਾਈਕਲ ਦੀ ਕੀਮਤ ’ਚ ਕੀਤਾ ਗਿਆ ਸੀ ਵਾਧਾ, ਕੱਚੇ ਉਤਪਾਦਾਂ ਦੀਆਂ ਕੀਮਤਾਂ ’ਚ ਵਾਧਾ ਹੋਣ ਕਰਕੇ ਲਿਆ ਫ਼ੈਸਲਾ ਪੁਨੀਤ ਬਾਵਾ, ਪੰਜਾਬੀ ਜਾਗਰਣ ਲੁਧਿਆਣਾ ਸਾਈਕਲ ਨਿਰਮਾਤਾ ਕੰਪਨੀਆਂ ਨੇ 1 ਮਈ 2026 ਤੋਂ ਪ੍ਰਤੀ ਸਾਈਕਲ 100 ਰੁਪਏ ਕੀਮਤ ਵਧਾਉਣ ਦਾ ਫ਼ੈਸਲਾ ਕੀਤਾ ਗਿਆ ਹੈ। ਹਾਲੇ 1 ਅਪ੍ਰੈਲ 2026 ਨੂੰ ਹੀ 250 ਰੁਪਏ ਪ੍ਰਤੀ ਸਾਈਕਲ ਦੀ ਕੀਮਤ ਵਿੱਚ ਵਾਧਾ ਕੀਤਾ ਗਿਆ ਸੀ। 1 ਮਹੀਨੇ ਵਿਚ ਦੂਸਰੀ ਵਾਰ ਭਾਅ ਵਧਣ ਨਾਲ ਆਮ ਲੋਕਾਂ ਦੀ ਸਵਾਰੀ ਮਹਿੰਗੀ ਹੋ ਗਈ ਹੈ। ਇਹ ਫ਼ੈਸਲਾ ਜੀ 13 ਸਾਈਕਲ ਨਿਰਮਾਤਾ ਐਸੋਸੀਏਸ਼ਨ ਦੀ ਪ੍ਰਧਾਨ ਰਜਿੰਦਰ ਜਿੰਦਲ, ਜਨਰਲ ਸਕੱਤਰ ਰੋਹਿਤ ਪਾਹਵਾ, ਕੋਆਰਡੀਨੇਟਰ ਉਮੇਸ਼ ਨਾਰੰਗ ਤੇ ਹੋਰਾਂ ਦੀ ਹਾਜ਼ਰੀ ਵਿਚ ਹੋਈ ਮੀਟਿੰਗ ਦੌਰਾਨ ਕੀਤਾ ਗਿਆ। ਆਗੂਆਂ ਨੇ ਕਿਹਾ ਕਿ ਸਾਈਕਲ ਨਿਰਮਾਣ ਵਿਚ ਵਰਤੇ ਜਾਣ ਵਾਲੇ ਕੱਚੇ ਮਾਲ ਅਤੇ ਜ਼ਰੂਰੀ ਇਨਪੁਟਸ ਦੀਆਂ ਕੀਮਤਾਂ ਵਿਚ ਲਗਾਤਾਰ ਵਾਧਾ ਹੋ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਮੈਂਬਰਾਂ ਨੇ ਪਿਛਲੇ ਕਈ ਮਹੀਨਿਆਂ ਤੋਂ ਸਟੀਲ, ਟਾਇਰਾਂ, ਟਿਊਬਾਂ, ਪੇਂਟ, ਰਸਾਇਣਾਂ ਅਤੇ ਹੋਰ ਹਿੱਸਿਆਂ ਦੀਆਂ ਕੀਮਤਾਂ ਵਿਚ ਤੇਜ਼ੀ ਨਾਲ ਵਾਧੇ ਬਾਰੇ ਚਿੰਤਾਵਾਂ ਸਾਂਝੀਆਂ ਕੀਤੀਆਂ। ਜਿਸ ਕਰਕੇ ਕੀਮਤਾਂ ਵਧਾਉਣ ਦਾ ਫ਼ੈਸਲਾ ਕੀਤਾ ਗਿਆ ਹੈ। ਚਰਚਾ ਦੌਰਾਨ ਨਿਰਮਾਤਾਵਾਂ ਨੇ ਇਸ ਗੱਲ ਨੂੰ ਉਜਾਗਰ ਕੀਤਾ ਕਿ ਇਨਪੁੱਟ ਲਾਗਤਾਂ ਵਿਚ ਲਗਾਤਾਰ ਵਾਧੇ ਨੇ ਉਤਪਾਦਨ ਅਰਥਸ਼ਾਸਤਰ ਤੇ ਕਾਫ਼ੀ ਦਬਾਅ ਪਾਇਆ ਹੈ। ਕਈ ਮੈਂਬਰਾਂ ਨੇ ਸੰਕੇਤ ਦਿੱਤਾ ਕਿ ਉਨ੍ਹਾਂ ਦੇ ਵਿਅਕਤੀਗਤ ਲਾਗਤ ਢਾਂਚੇ ਅਤੇ ਬਾਜ਼ਾਰ ਦੀਆਂ ਸਥਿਤੀਆਂ ਦੇ ਅਧਾਰ ’ਤੇ ਉਨ੍ਹਾਂ ਨੂੰ ਪਹਿਲੀ ਮਈ 2026 ਤੋਂ ਪ੍ਰਤੀ ਸਾਈਕਲ ਲਗਪਗ 100 ਦੀ ਸਮੀਖਿਆ ਅਤੇ ਵਿਵਸਥਿਤ ਕਰਨ ਲਈ ਮਜਬੂਰ ਕੀਤਾ ਜਾ ਸਕਦਾ ਹੈ। ਐਸੋਸੀਏਸ਼ਨ ਨੇ ਸਪੱਸ਼ਟ ਕੀਤਾ ਕਿ ਹਰੇਕ ਨਿਰਮਾਤਾ ਆਪਣੇ ਕਾਰੋਬਾਰੀ ਵਿਚਾਰਾਂ ਦੇ ਆਧਾਰ ਤੇ ਸੁਤੰਤਰ ਤੌਰ ਤੇ ਕੀਮਤਾਂ ਦੇ ਫੈਸਲੇ ਲਵੇਗਾ। ਮੀਟਿੰਗ ਦਾ ਉਦੇਸ਼ ਵਧਦੀਆਂ ਲਾਗਤਾਂ ਤੋਂ ਪੈਦਾ ਹੋਣ ਵਾਲੀਆਂ ਉਦਯੋਗਿਕ ਚੁਣੌਤੀਆਂ ਦੀ ਸਮੀਖਿਆ ਕਰਨਾ ਅਤੇ ਬਾਜ਼ਾਰ ਵਿੱਚ ਗੁਣਵੱਤਾ ਵਾਲੀਆਂ ਸਾਈਕਲਾਂ ਦੀ ਨਿਰਵਿਘਨ ਸਪਲਾਈ ਨੂੰ ਯਕੀਨੀ ਬਣਾਉਣ ਦੇ ਤਰੀਕਿਆਂ ਦੀ ਖੋਜ ਕਰਨਾ ਸੀ। ਜੀ 13 ਸਾਈਕਲ ਨਿਰਮਾਤਾ ਐਸੋਸੀਏਸ਼ਨ ਇਸ ਚੁਣੌਤੀਪੂਰਨ ਸਮੇਂ ਦੌਰਾਨ ਸਾਈਕਲ ਉਦਯੋਗ ਅਤੇ ਖਪਤਕਾਰਾਂ ਦਾ ਸਮਰਥਨ ਕਰਨ ਲਈ ਵਚਨਬੱਧ ਹੈ। ਉਨ੍ਹਾਂ ਕਿਹਾ ਕਿ ਸਟੀਲ ਪਾਇਪ ਦੇ ਭਾਅ 65 ਹਜ਼ਾਰ ਰੁਪਏ ਤੋਂ 73 ਹਜ਼ਾਰ ਰੁਪਏ ਪ੍ਰਤੀ ਟਨ ਹੋ ਗਈ ਹੈ। ਬ੍ਰਾਂਸ ਦੀ ਕੀਮਤ 500 ਰੁਪਏ ਤੋਂ 800 ਰੁਪਏ ਪ੍ਰਤੀ ਕਿਲੋ, ਨਿਕਲ ਦਾ ਭਾਅ 1400 ਰੁਪਏ ਤੋਂ 1700 ਰੁਪਏ ਕਿਲੋ, ਪਲਾਸਟਿਕ ਉਤਪਾਦਾਂ ਦੀਆਂ ਕੀਮਤਾਂ ਵਿਚ 50 ਤੋਂ 60 ਫ਼ੀਸਦੀ ਅਤੇ ਪੇਂਟ ਦਾ ਭਾਅ 40 ਫ਼ੀਸਦੀ ਤੱਕ ਵਧ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਭਵਿੱਖ ਵਿਚ ਕੀਮਤਾ ਬਾਰੇ ਮੁੜ ਤੋਂ ਚਰਚਾ ਕਰਕੇ ਫ਼ਿਰ ਅਗਲਾ ਕਦਮ ਚੁੱਕਾਂਗੇ। ਇਸ ਮੌਕੇ ਕੇਕੇ ਸੇਠ, ਜੇਆਰ ਸਿੰਗਲ, ਵਿਪਨ ਮਿੱਤਲ, ਰਵੀ ਮਹਾਜਨ, ਆਰਡੀ ਸ਼ਰਮਾ ਆਦਿ ਹਾਜ਼ਰ ਸਨ।