ਰੇਲ ਗਾਰਡ ਦੀ ਸ਼ਰਮਨਾਕ ਕਰਤੂਤ: ਬੁਕਿੰਗ ਦੇ ਬਾਵਜੂਦ ਪਾਲਤੂ ਕੁੱਤੇ ਨੂੰ ਚਲਦੀ ਟ੍ਰੇਨ 'ਚੋਂ ਬਾਹਰ ਸੁੱਟਿਆ, ਕੁੱਤੇ ਨੂੰ ਬਚਾਉਣ ਲਈ ਰੇਲਵੇ ਮੁਲਾਜ਼ਮ ਨੇ ਟ੍ਰੇਨ ਤੋਂ ਮਾਰੀ ਛਾਲ
ਜਬਲਪੁਰ ਐਕਸਪ੍ਰੈਸ ਟ੍ਰੇਨ ਰਾਹੀਂ ਬੁਕਿੰਗ ਕਰਵਾ ਕੇ ਲੁਧਿਆਣਾ ਤੋਂ ਜਬਲਪੁਰ ਭੇਜੇ ਜਾ ਰਹੇ ਲੇਬਰੇਡੋਰ ਨਸਲ ਦੇ ਪਾਲਤੂ ਕੁੱਤੇ ਨੂੰ ਰੇਲ ਗਾਰਡ ਨੇ ਲੁਧਿਆਣਾ ਰੇਲਵੇ ਸਟੇਸ਼ਨ ਦੇ ਪਲੇਟਫਾਰਮ ’ਤੇ ਚਲਦੀ ਗੱਡੀ ਵਿੱਚੋਂ ਹੀ ਬਾਹਰ ਸੁੱਟ ਦਿੱਤਾ। ਜਦੋਂ ਕੁੱਤੇ ਨੂੰ ਜਬਲਪੁਰ ਭੇਜਣ ਲਈ ਬੁਕਿੰਗ ਕਰਨ ਵਾਲੇ ਟਰਾਂਸਪੋਰਟ ਕੰਪਨੀ ਦੇ ਰੇਲਗੱਡੀ ਵਿੱਚ ਹੀ ਸਵਾਰ ਮੁਲਾਜ਼ਮ ਨੂੰ ਇਸ ਗੱਲ ਦਾ ਪਤਾ ਲੱਗਾ ਤਾਂ ਉਸਨੇ ਬੁਕਿੰਗ ਕੀਤੇ ਕੁੱਤੇ ਦੀ ਜਾਨ ਬਚਾਉਣ ਲਈ ਚਲਦੀ ਗੱਡੀ ਵਿੱਚੋਂ ਬਾਹਰ ਛਲਾਂਗ ਮਾਰ ਦਿੱਤੀ।
Posted By Anuradha Bains
Publish Date: Sat, 09 May 2026 04:23 PM (IST)
Updated Date: Sat, 09 May 2026 04:27 PM (IST)
ਐੱਸਪੀ ਜੋਸ਼ੀ, ਪੰਜਾਬੀ ਜਾਗਰਣ, ਲੁਧਿਆਣਾ। ਜਬਲਪੁਰ ਐਕਸਪ੍ਰੈਸ ਟ੍ਰੇਨ ਰਾਹੀਂ ਬੁਕਿੰਗ ਕਰਵਾ ਕੇ ਲੁਧਿਆਣਾ ਤੋਂ ਜਬਲਪੁਰ ਭੇਜੇ ਜਾ ਰਹੇ ਲੇਬਰੇਡੋਰ ਨਸਲ ਦੇ ਪਾਲਤੂ ਕੁੱਤੇ ਨੂੰ ਰੇਲ ਗਾਰਡ ਨੇ ਲੁਧਿਆਣਾ ਰੇਲਵੇ ਸਟੇਸ਼ਨ ਦੇ ਪਲੇਟਫਾਰਮ ’ਤੇ ਚਲਦੀ ਗੱਡੀ ਵਿੱਚੋਂ ਹੀ ਬਾਹਰ ਸੁੱਟ ਦਿੱਤਾ। ਜਦੋਂ ਕੁੱਤੇ ਨੂੰ ਜਬਲਪੁਰ ਭੇਜਣ ਲਈ ਬੁਕਿੰਗ ਕਰਨ ਵਾਲੇ ਟਰਾਂਸਪੋਰਟ ਕੰਪਨੀ ਦੇ ਰੇਲਗੱਡੀ ਵਿੱਚ ਹੀ ਸਵਾਰ ਮੁਲਾਜ਼ਮ ਨੂੰ ਇਸ ਗੱਲ ਦਾ ਪਤਾ ਲੱਗਾ ਤਾਂ ਉਸਨੇ ਬੁਕਿੰਗ ਕੀਤੇ ਕੁੱਤੇ ਦੀ ਜਾਨ ਬਚਾਉਣ ਲਈ ਚਲਦੀ ਗੱਡੀ ਵਿੱਚੋਂ ਬਾਹਰ ਛਲਾਂਗ ਮਾਰ ਦਿੱਤੀ।
ਉਸਨੇ ਕੁੱਤੇ ਨੂੰ ਤਾਂ ਬਚਾ ਲਿਆ ਪਰ ਦਸਤਾਵੇਜ਼ ਪੂਰੇ ਹੋਣ ਦੇ ਬਾਵਜੂਦ ਅਜਿਹੀ ਹਰਕਤ ਕਰਨ ਵਾਲੇ ਰੇਲ ਗਾਰਡ ਖ਼ਿਲਾਫ਼ ਕਾਰਵਾਈ ਲਈ ਸ਼ਿਕਾਇਤ ਕੀਤੀ ਤਾਂ ਉਸਦੀ ਕਿਸੇ ਨੇ ਵੀ ਸੁਣਵਾਈ ਨਹੀਂ ਕੀਤੀ।
ਪਾਲਤੂ ਜਾਨਵਰਾਂ ਨੂੰ ਇੱਕ ਥਾਂ ਤੋਂ ਦੂਜੀ ਥਾਂ ਭੇਜਣ ਦਾ ਕੰਮ ਕਰਨ ਵਾਲੀ ਫਰਮ ਦੇ ਮੁਲਾਜ਼ਮ ਸੰਜੇ ਕੁਮਾਰ ਮੁਤਾਬਕ ਮੋਗਾ ਦੀ ਰਹਿਣ ਵਾਲੀ ਐੱਨ. ਆਰ. ਆਈ. ਔਰਤ ਹਰਪ੍ਰੀਤ ਕੌਰ ਨੇ ਆਪਣਾ ਪਾਲਤੂ ਕੁੱਤਾ ਬੇਟੀ ਦੇ ਸਹੁਰੇ ਘਰ ਜਬਲਪੁਰ ਭੇਜਣਾ ਸੀ। ਉਕਤ ਔਰਤ ਨੇ ਕੁੱਤਾ ਭੇਜਣ ਦਾ ਭੁਗਤਾਨ ਕੀਤਾ ਜਿਸਤੋਂ ਬਾਅਦ ਉਸਦੀ ਟਰਾਂਸਪੋਰਟ ਕੰਪਨੀ ਵਲੋਂ ਲੇਬਰੇ ਨਸਲ ਦੇ ਇਸ ਕੁੱਤੇ ਦਾ ਨਿਯਮਾਂ ਮੁਤਾਬਕ ਮੈਡੀਕਲ ਕਰਵਾ ਕੇ ਬਕਾਇਦਾ ਬਿਲਟੀ ਬਣਵਾ ਕੇ ਰੇਲਵੇ ਨੂੰ ਬਣਦੀ 240 ਰੁਪਏ ਕਿਰਾਇਆ ਫੀਸ ਵੀ ਭਰੀ ਗਈ।
ਸਵੇਰੇ ਇਸ ਕੁੱਤੇ ਨੂੰ ਪਿੰਜਰੇ ਵਿੱਚ ਪਾਕੇ ਗਾਰਡ ਡੱਬੇ ਵਿੱਚ ਰੱਖਿਆ ਗਿਆ। ਜਦੋਂ ਲੁਧਿਆਣਾ ਸਟੇਸ਼ਨ ਤੋਂ ਗੱਡੀ ਚੱਲੀ ਤਾਂ ਗਾਰਡ ਨੇ ਪਿੰਜਰੇ ਸਮੇਤ ਕੁੱਤੇ ਨੂੰ ਚਲਦੀ ਗੱਡੀ ਵਿੱਚੋਂ ਬਾਹਰ ਸੁੱਟ ਦਿੱਤਾ। ਜਦੋਂ ਉਸਨੂੰ ਕੁੱਤਾ ਬਾਹਰ ਸੁੱਟੇ ਜਾਣ ਦਾ ਪਤਾ ਲੱਗਾ ਤਾਂ ਉਸਨੇ ਗਾਰਡ ਤੋਂ ਇਸਦਾ ਕਾਰਨ ਪੁੱਛਿਆ ਪਰ ਦਸਤਾਵੇਜ ਹੋਣ ਦੇ ਬਾਵਜੂਦ ਗਾਰਡ ਨੇ ਦਸਤਾਵੇਜ਼ ਪੂਰੇ ਨਾ ਹੋਣ ਦਾ ਬਹਾਨਾ ਬਣਾਇਆ।
ਸੰਜੇ ਨੇ ਕੁੱਤੇ ਨੂੰ ਸਹੀ ਸਲਾਮਤ ਪਹੁੰਚਾਉਣ ਦੀ ਜ਼ਿੰਮੇਵਾਰੀ ਦੇ ਚੱਲਦੇ ਇਸ ਚਲਦੀ ਟਰੇਨ ਤੋਂ ਛਲਾਂਗ ਮਾਰ ਕੇ ਕੁੱਤੇ ਨੂੰ ਤਾਂ ਬਚਾ ਲਿਆ ਪਰ ਉਸਦੇ ਕਈ ਥਾਂ ’ਤੇ ਸੱਟਾਂ ਲੱਗ ਗਈਆਂ। ਇਸ ਸਾਰੇ ਘਟਨਾ ਕ੍ਰਮ ਕਾਰਨ ਬੁਕਿੰਗ ਦੇ ਬਾਵਜੂਦ ਕੁੱਤਾ ਜਬਲਪੁਰ ਨਾਂ ਜਾ ਸਕਿਆ ਅਤੇ ਵਾਪਿਸ ਮੋਗਾ ਲਿਜਾਣਾ ਪਿਆ।
ਸੰਜੇ ਕੁਮਾਰ ਮੁਤਾਬਿਕ ਉਸਨੇ ਜੀ.ਆਰ.ਪੀ. ਪੁਲਿਸ ਕੋਲ ਵੀ ਸ਼ਿਕਾਇਤ ਕੀਤੀ ਪਰ ਕੋਈ ਸੁਣਵਾਈ ਨਹੀਂ ਹੋਈ। ਜਾਣਕਾਰੀ ਮੁਤਾਬਿਕ ਹੁਣ ਟਰਾਂਸਪੋਰਟਰ ਵੱਲੋਂ ਇਹ ਮਾਮਲਾ ਫਿਰੋਜ਼ਪੁਰ ਮੰਡਲ ਰੇਲ ਅਧਿਕਾਰੀਆਂ ਦੇ ਧਿਆਨ ਵਿੱਚ ਲਿਆਂਦਾ ਜਾਵੇਗਾ।