ਪਿੰਡ ਅੱਡਾਂਵਾਲੀ ’ਚ ਆਵਾਰਾ ਕੁੱਤੇ ਦੇ ਹਮਲੇ ’ਚ 2 ਬੱਚੇ ਜ਼ਖ਼ਮੀ

ਸੰਵਾਦ ਸੂਤਰ, ਜਾਗਰਣ

ਕਪੂਰਥਲਾ : ਵੀਰਵਾਰ ਦੁਪਹਿਰ ਕਪੂਰਥਲਾ ਜ਼ਿਲ੍ਹੇ ਦੇ ਪਿੰਡ ਅੱਡਾਂਵਾਲੀ ’ਚ ਉਸ ਸਮੇਂ ਦਹਿਸ਼ਤ ਦਾ ਮਾਹੌਲ ਬਣ ਗਿਆ ਜਦ ਘਰ ਦੇ ਬਾਹਰ ਖੇਡ ਰਹੇ 2 ਮਾਸੂਮ ਬੱਚਿਆਂ ’ਤੇ ਇਕ ਆਵਾਰਾ ਕੁੱਤੇ ਨੇ ਅਚਾਨਕ ਹਮਲਾ ਕਰ ਦਿੱਤਾ। ਕੁੱਤੇ ਦੇ ਹਮਲੇ ’ਚ ਦੋਵੇਂ ਬੱਚੇ ਗੰਭੀਰ ਤੌਰ ’ਤੇ ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਨੂੰ ਤੁਰੰਤ ਇਲਾਜ ਲਈ ਕਪੂਰਥਲਾ ਦੇ ਸਿਵਲ ਹਸਪਤਾਲ ’ਚ ਦਾਖਲ ਕਰਵਾਇਆ ਗਿਆ।

ਜਾਣਕਾਰੀ ਅਨੁਸਾਰ 4 ਸਾਲਾ ਬੱਚੀ ਪਰੀ ਪੁੱਤਰੀ ਸੂਰਜ ਤੇ 10 ਸਾਲਾ ਗੋਲੂ ਆਪਣੇ ਘਰ ਦੇ ਬਾਹਰ ਗਲੀ ’ਚ ਖੇਡ ਰਹੇ ਸਨ। ਇਸ ਦੌਰਾਨ ਅਚਾਨਕ ਗਲੀ ’ਚ ਘੁੰਮ ਰਿਹਾ ਇਕ ਆਵਾਰਾ ਕੁੱਤਾ ਬੱਚਿਆਂ ’ਤੇ ਝਪਟ ਪਿਆਤੇ ਉਨ੍ਹਾਂ ਨੂੰ ਬੁਰੀ ਤਰ੍ਹਾਂ ਨੋਚ ਲਿਆ। ਕੁੱਤੇ ਨੇ ਬੱਚੀ ਪਰੀ ਦੇ ਸਿਰ ’ਤੇ ਹਮਲਾ ਕੀਤਾ ਜਦਕਿ ਗੋਲੂ ਦੇ ਬੁੱਲਾਂ ’ਤੇ ਕੱਟ ਲਿਆ। ਬੱਚਿਆਂ ਦੀਆਂ ਚੀਕਾਂ ਸੁਣ ਕੇ ਆਲੇ-ਦੁਆਲੇ ਦੇ ਲੋਕ ਤੁਰੰਤ ਮੌਕੇ ’ਤੇ ਇਕੱਠਾ ਹੋ ਗਏ ਤੇ ਕਾਫੀ ਮੁਸ਼ੱਕਤ ਤੋਂ ਬਾਅਦ ਦੋਵਾਂ ਬੱਚਿਆਂ ਨੂੰ ਕੁੱਤੇ ਤੋਂ ਛੁਡਾਇਆ। ਇਸ ਤੋਂ ਬਾਅਦ ਪਿੰਡ ਵਾਲਿਆਂ ਦੀ ਮਦਦ ਨਾਲ ਦੋਵਾਂ ਜ਼ਖ਼ਮੀ ਬੱਚਿਆਂ ਨੂੰ ਤੁਰੰਤ ਕਪੂਰਥਲਾ ਦੇ ਸਿਵਲ ਹਸਪਤਾਲ ਪਹੁੰਚਾਇਆ ਗਿਆ।

ਸਿਵਲ ਹਸਪਤਾਲ ’ਚ ਤਾਇਨਾਤ ਡਿਊਟੀ ਡਾਕਟਰ ਕਰਨ ਨੇ ਦੱਸਿਆ ਕਿ 4 ਬੱਚੀ ਪਰੀ ਦੇ ਮੱਥੇ ’ਤੇ ਕੁੱਤੇ ਨੇ ਜ਼ਖ਼ਮ ਕਰ ਦਿੱਤਾ ਸੀ, ਜਿਸ ਕਾਰਨ 6-7 ਟਾਂਕੇ ਲਗਾਉਣੇ ਪਏ ਹਨ ਜਦਕਿ ਗੋਲੂ ਦੇ ਬੁੱਲਾਂ ’ਤੇ 3-4 ਟਾਂਕੇ ਲੱਗੇ ਹਨ। ਡਾਕਟਰਾਂ ਅਨੁਸਾਰ ਦੋਵਾਂ ਬੱਚਿਆਂ ਦੀ ਹਾਲਤ ਫਿਲਹਾਲ ਠੀਕ ਹੈ ਤੇ ਇਲਾਜ ਜਾਰੀ ਹੈ।