ਦਿਵਯ ਜਯੋਤੀ ਜਾਗ੍ਰਿਤੀ ਸੰਸਥਾਨ ਨੇ ਸੰਕੀਰਤਨ ਕਰਵਾਇਆ

ਅਮਰੀਕ ਸਿੰਘ ਮੱਲ੍ਹੀ, ਪੰਜਾਬੀ ਜਾਗਰਣ ਕਪੂਰਥਲਾ : ਦਿਵਯ ਜਯੋਤੀ ਜਾਗ੍ਰਿਤੀ ਸੰਸਥਾਨ ਨੇ ਕਪੂਰਥਲਾ ਦੇ ਮੁਹੱਲਾ ਸੰਤਪੁਰਾ ਸਥਿਤ ਸ਼੍ਰੀ ਸ਼ਿਵ ਮੰਦਿਰ ਵਿਖੇ ਮਾਤਾ ਦੇਵੀ ਨੂੰ ਸਮਰਪਿਤ ਸੰਕੀਰਤਨ ਦਾ ਆਯੋਜਨ ਕੀਤਾ। ਸ਼੍ਰੀ ਆਸ਼ੂਤੋਸ਼ ਮਹਾਰਾਜ ਜੀ ਦੀ ਸ਼ਿਸ਼ਯਾ ਸਾਧਵੀ ਰਿਤੂ ਭਾਰਤੀ ਨੇ ਅਧਿਆਤਮਿਕ ਰਹੱਸਾਂ ਦਾ ਖੁਲਾਸਾ ਕਰਦੇ ਹੋਏ ਦੱਸਿਆ ਕਿ ਧਰਮ ਗ੍ਰੰਥ ਮਾਤਾ ਰਾਣੀ ਦੇ ਦੋ ਮੁੱਖ ਰੂਪਾਂ ਬਾਰੇ ਚਰਚਾ ਕਰਦੇ ਹਨ ਇਕ ਰੂਪ ਸਕਾਰ ਤੇ ਦੂਜਾ ਨਿਰਾਕਾਰ। ਸਕਾਰ ਸਰੂਪ ਰੂਪ ਮੂਰਤੀ ਰੂਪ ਹੈ, ਜੋ ਧਾਰਮਿਕ ਸਥਾਨਾਂ ਤੇ ਮੰਦਿਰਾਂ ਨੂੰ ਸ਼ਿੰਗਾਰਦਾ ਹੈ, ਜਦੋਂ ਕਿ ਨਿਰਾਕਾਰ ਰੂਪ ਉਹ ਸਦੀਵੀ ਪ੍ਰਕਾਸ਼ ਹੈ ਜੋ ਹਰ ਜੀਵ ਦੇ ਅੰਦਰ ਰਹਿੰਦਾ ਹੈ। ਇਸ ਨਿਰਾਕਾਰ ਰੂਪ ਨੂੰ ਸ੍ਰਿਸ਼ਟੀ ਦਾ ਮੂਲ ਰੂਪ ਮੰਨਿਆ ਜਾਂਦਾ ਹੈ। ਇਹ ਊਰਜਾ ਆਤਮਾ ਵਿਚ ਅਨੰਤ ਚੱਕਰ, ਦਸਵੇਂ ਦੁਆਰ ਚ ਰਹਿੰਦੀ ਹੈ, ਜਿਸਨੂੰ ਬ੍ਰਹਮ ਗਿਆਨ ਦੁਆਰਾ ਦੇਖਿਆ ਜਾ ਸਕਦਾ ਹੈ। ਮਨੁੱਖ ਨੂੰ ਸਰੀਰ, ਅੱਠ ਚੱਕਰਾਂ ਤੇ ਨੌਂ ਦੁਆਰਿਆਂ ਤੋਂ ਪਾਰ ਜਾਣਾ ਚਾਹੀਦਾ ਹੈ ਤੇ ਫਿਰ ਮਾਤਾ ਦੇਵੀ ਦੇ ਦਰਸ਼ਨ ਕਰਨ ਲਈ ਦਸਵੇਂ ਦੁਆਰ ਤੇ ਪਹੁੰਚਣਾ ਚਾਹੀਦਾ ਹੈ। ਸੰਗਤ ਨੂੰ ਸੰਬੋਧਨ ਕਰਦੇ ਹੋਏ ਸਾਧਵੀ ਜੀ ਨੇ ਮਾਤਾ ਰਾਣੀ ਨੂੰ ਖੁਸ਼ ਕਰਨ ਲਈ ਕੰਜਕਾਂ ਦੀ ਪੂਜਾ ਕਰਨ ਤੇ ਆਪਣੀ ਧੀ ਨੂੰ ਸੰਸਕਾਰਾਂ ਨਾਲ ਜੋੜਨ ਦੇ ਮਹੱਤਵ ਤੇ ਜ਼ੋਰ ਦਿੱਤਾ। ਸਾਧਵੀ ਹਰੀਪ੍ਰੀਤਾ ਭਾਰਤੀ ਨੇ ਮਾਤਾ ਦੇਵੀ ਨੂੰ ਸਮਰਪਿਤ ਸੁੰਦਰ ਭਜਨ ਗਾ ਕੇ ਸਰੋਤਿਆਂ ਨੂੰ ਮੰਤਰਮੁਗਧ ਕੀਤਾ। ਸਾਰੀ ਮੰਦਿਰ ਕਮੇਟੀ ਨੇ ਕੀਰਤਨ ਦਾ ਭਰਪੂਰ ਆਨੰਦ ਮਾਣਿਆ ।