ਖੈੜਾ ਦੋਨਾ ਸਕੂਲ ’ਚ ਜ਼ਿਲ੍ਹਾ ਪੱਧਰੀ ਵਿਗਿਆਨ ਪ੍ਰਦਰਸ਼ਨੀ ਮੁਕਾਬਲੇ ਹੋਏ

- ਵਿਦਿਆਰਥੀਆਂ ਨੂੰ ਜੀਵਨ ਦੀ ਸਹੀ ਸਿੱਖਿਆ ਦੇਣ ਦਾ ਆਧਾਰ ਵਿਗਿਆਨਕ ਸੋਚ ਜ਼ਰੂਰੀ : ਖੈੜਾ ਅਮਰੀਕ ਸਿੰਘ ਮੱਲ੍ਹੀ, ਪੰਜਾਬੀ ਜਾਗਰਣ ਕਪੂਰਥਲਾ : ਰਾਸ਼ਟਰੀ ਅਵਿਸ਼ਕਾਰ ਅਭਿਆਨ ਤਹਿਤ ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਰਜਿੰਦਰ ਸਿੰਘ ਅਤੇ ਉਪ ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਰਾਜੇਸ਼ ਭੱਲਾ ਸਟੇਟ ਐਵਾਰਡੀ ਦੇ ਆਦੇਸ਼ਾਂ ਤਹਿਤ ਜ਼ਿਲ੍ਹੇ ਦੇ 18 ਵਿਗਿਆਨ ਗਰੁੱਪਾਂ ਵਾਲੇ ਸੀਨੀਅਰ ਸੈਕੰਡਰੀ ਸਕੂਲਾਂ ਦੀ ਜ਼ਿਲ੍ਹਾ ਪੱਧਰੀ ਵਿਗਿਆਨ ਪ੍ਰਦਰਸ਼ਨੀ ਮੁਕਾਬਲੇ ਪ੍ਰਿੰਸੀਪਲ ਅਨੁਰਾਗ ਭੱਲਾ ’ਤੇ ਜ਼ਿਲ੍ਹਾ ਸਾਇੰਸ ਕੋਆਰਡੀਨੇਟਰ ਸਤੀਸ਼ ਕੁਮਾਰ ਦੀ ਅਗਵਾਈ ਵਿੱਚ ਸਰਕਾਰੀ ਸੀਨੀਅਰ ਸੈਕੰਡਰੀ ਸਮਾਰਟ ਸਕੂਲ ਖੈੜਾ ਦੋਨਾ ਵਿਖੇ ਕਰਵਾਏ ਗਏ। ਇਨ੍ਹਾਂ ਪ੍ਰਦਰਸ਼ਨੀ ਮੁਕਾਬਲਿਆਂ ਦਾ ਰਸਮੀ ਉਦਘਾਟਨ ਸਕੂਲ ਮੈਨੇਜਮੈਂਟ ਕਮੇਟੀ ਦੇ ਚੇਅਰਮੈਨ ਸਤਨਾਮ ਸਿੰਘ ਖੈੜਾ ਅਤੇ ਉੱਘੇ ਸਿੱਖਿਆ ਸ਼ਾਸਤਰੀ ਰੌਸ਼ਨ ਖੈੜਾ ਸਟੇਟ ਐਵਾਰਡੀ ਨੇ ਸਾਂਝੇ ਤੌਰ ’ਤੇ ਕੀਤਾ। ਇਸ ਮੌਕੇ ਰੌਸ਼ਨ ਖੈੜਾ ਸਟੇਟ ਐਵਾਰਡੀ ਨੇ ਕਿਹਾ ਕਿ ਇਸ ਸਦੀ ਨੂੰ ਵਿਗਿਆਨ ਦੀ ਸਦੀ ਵਜੋਂ ਮੰਨਿਆ ਜਾਂਦਾ ਹੈ, ਵਿਗਿਆਨ ਦੀ ਤਰੱਕੀ ਕਾਰਣ ਅਸੀਂ ਆਪਣੇ ਪ੍ਰਕਿਰਤਕ ਜੀਵਨ ਨੂੰ ਭੁੱਲ ਕੇ ਤੇਜ਼ੀ ਨਾਲ ਅੱਗੇ ਵੱਧਣ ਲਈ ਫਾਸਟ ਫੂਡ ਜ਼ਿੰਦਗੀ ਨੂੰ ਭੁਗਤਦੇ ਹੋਏ ਤਨਾਓ ਭਰੇ ਜੀਵਨ ਦੇ ਆਦੀ ਹੋ ਗਏ ਹਾਂ। ਗਿਆਨ ਅਤੇ ਵਿਗਿਆਨ ਦਾ ਸੰਤੁਲਨ ਨਾ ਬਣਾ ਸਕਣ ਦੀ ਕਮਜ਼ੋਰੀ ਕਾਰਨ ਅਸੀਂ ਹਵਾ, ਪਾਣੀ ਅਤੇ ਧਰਤੀ ਨੂੰ ਪ੍ਰਦੂਸ਼ਿਤ ਕਰਦੇ ਹੋਏ ਆਪਣੀਆਂ ਖਾਣ-ਪੀਣ ਦੀਆਂ ਵਸਤਾਂ ਨੂੰ ਇਸ ਕਦਰ ਪ੍ਰਦੂਸ਼ਿਤ ਕਰ ਲਿਆ ਹੈ ਕਿ ਬਿਮਾਰੀਆਂ ਦੀ ਜਕੜਨ ਮਾਨਵੀ ਜ਼ਿੰਦਗੀ ਲਈ ਖ਼ਤਰਾ ਬਣ ਰਹੀ ਹੈ। ਅਜਿਹੇ ਸੰਵੇਦਨਸ਼ੀਲ ਹਾਲਤਾਂ ਵਿੱਚ ਵਿਗਿਆਨ ਆਪਣੀਆਂ ਗਲਤੀਆਂ ਨੂੰ ਸੁਧਾਰ ਕੇ ਤੰਦਰੁਸਤ ਅਤੇ ਤਨਾਓ ਮੁਕਤ ਜੀਵਨ ਜਿਊਣ ਨਵੀਂਆਂ ਕਾਢਾਂ ਅਨੁਸਾਰ ਨਵੀਂ ਜੀਵਨ ਜਾਚ ਦੇ ਰਿਹਾ ਹੈ। ਇਸ ਮੌਕੇ ਚੇਅਰਮੈਨ ਸਤਨਾਮ ਸਿੰਘ ਖੈੜਾ ਨੇ ਕਿਹਾ ਕਿ ਵਿਗਿਆਨ ਪ੍ਰਦਰਸ਼ਨੀ ਮੁਕਾਬਲਿਆਂ ਵਿੱਚ ਵਿਗਿਆਨ ਅਧਿਆਪਕਾਂ ਦੀ ਨਿੱਗਰ ਉੱਤੇ ਉਸਾਰੂ ਅਗਵਾਈ ਵਿੱਚ ਜੋ ਵਿਦਿਆਰਥੀਆਂ ਨੇ ਮਾਡਲ ਤਿਆਰ ਕੀਤੇ ਹਨ, ਨੂੰ ਦੇਖ ਕੇ ਅਸੀਂ ਸੁਚੇਤ ਰੂਪ ਵਿਚ ਸੁਰੱਖਿਅਤ ਮਹਿਸੂਸ ਕਰ ਰਹੇ ਹਾਂ। ਇਸ ਜ਼ਿਲ੍ਹਾ ਪੱਧਰੀ ਪ੍ਰਦਰਸ਼ਨੀ ਮੁਕਾਬਲਿਆਂ ਨੂੰ ਸਫਲ ਬਣਾਉਣ ਲਈ ਲੈਕਚਰਾਰ ਸੁਨੀਲ ਬਜਾਜ, ਜਸਪਾਲ ਸਿੰਘ, ਸੁਨੀਲ ਸ਼ਰਮਾ ਅਤੇ ਬੀਬੀ ਰਾਜਵੰਤ ਕੌਰ ਨੇ ਹਰ ਸੰਭਵ ਕੋਸ਼ਿਸ਼ ਕੀਤੀ। ਇਨ੍ਹਾਂ ਮੁਕਾਬਲਿਆਂ ਦੀ ਨਿਰਣਾਇਕ ਭੂਮਿਕਾ ਲੈਕ. ਸਰਬਜੀਤ ਸਿੰਘ, ਲੈਕ. ਮਨਜੀਤ ਕੌਰ, ਲੈਕ. ਪ੍ਰਦੀਪ ਸੂਦ ਨੇ ਬਾਖੂਬੀ ਨਿਭਾਈ। ਇਸ ਮੌਕੇ ਲੈਕਚਰਾਰ ਪਵਿੱਤਰ ਉੱਪਲ, ਮਨਜੀਤ ਥਿੰਦ, ਸਤਵੰਤ ਕੌਰ, ਅਮਰਜੀਤ ਕੌਰ, ਨਿਸ਼ੀਕਾਂਤ ਅਹੂਜਾ, ਪਰਮਿੰਦਰ ਕੌਰ, ਰਜਵੰਤ ਕੌਰ, ਮੈਨੇਜਰ ਸਰਬਜੀਤ ਸਿੰਘ ਬਾਠ ਅਤੇ ਸਮੂਹ ਸਟਾਫ ਨੇ ਇਸ ਜ਼ਿਲ੍ਹਾ ਪੱਧਰੀ ਮੁਕਾਬਲਿਆਂ ਨੂੰ ਸਫਲ ਬਨਾਉਣ ਲਈ ਸਮਰਪਿਤ ਭਾਵਨਾਵਾਂ ਨਾਲ ਫਰਜ਼ ਨਿਭਾਏ। ਸਮਾਗਮ ਦੀ ਸਮਾਪਤੀ ਮੌਕੇ ਜੇਤੂ ਵਿਦਿਆਰਥੀਆਂ ਨੂੰ ਇਨਾਮ ਵੰਡਣ ਤੋਂ ਪਹਿਲਾਂ ਪ੍ਰਿੰਸੀਪਲ ਅਨੁਰਾਗ ਭੱਲਾ ਨੇ ਜ਼ਿਲ੍ਹੇ 18 ਸਕੂਲਾਂ ਤੋਂ ਪਹੁੰਚੇ ਵਿਦਿਆਰਥੀਆਂ, ਲੈਕਚਰਾਰਾਂ ਅਤੇ ਸਹਿਯੋਗੀਆਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਵਿਭਾਗ ਵੱਲੋਂ ਵਿਗਿਆਨ ਦਾ ਵਾਤਾਵਰਨ ਸਿਰਜਣ ਲਈ ਵਿਗਿਆਨਕ ਸੋਚ ਪੈਦਾ ਕਰਨ ਲਈ, ਜੋ ਥੀਮ ਦਿੱਤੇ ਹਨ, ਬਾਰੇ ਜਾਣਕਾਰੀ ਹਾਸਲ ਕਰ ਕੇ ਸਾਡੇ ਵਿਦਿਆਰਥੀ ਸਮਾਜ ਵਿੱਚ ਜੀਵਨ ਨੂੰ ਸੇਧ ਦਿੱਤੀ ਹੋਈ ਵਿਗਿਆਨਕ ਲਹਿਰ ਪੈਦਾ ਕਰਨਗੇ।