ਮੌਸਮ ਬਦਲਣ ਦੌਰਾਨ ਸਿਹਤ ਪ੍ਰਤੀ ਰਹੋ ਜਾਗਰੂਕ : ਡਾ. ਜੋਸਨ

ਪਰਮਜੀਤ ਸਿੰਘ, ਪੰਜਾਬੀ ਜਾਗਰਣ ਡਡਵਿੰਡੀ : ਮੌਸਮ ਵਿਚ ਤਬਦੀਲੀ ਆਉਂਦਿਆਂ ਹੀ ਲੋਕਾਂ ਦੀ ਸਿਹਤ ’ਤੇ ਸਭ ਤੋਂ ਵੱਧ ਪ੍ਰਭਾਵ ਪੈਂਦਾ ਹੈ। ਖ਼ਾਸ ਕਰਕੇ ਗਰਮੀ ਤੋਂ ਠੰਢ ਜਾਂ ਵੱਧ ਠੰਢ ਤੋਂ ਹਲਕੇ ਗਰਮ ਮੌਸਮ ਦੀ ਤਬਦੀਲੀ ਦੌਰਾਨ ਵਾਇਰਲ ਅਤੇ ਬੈਕਟੀਰੀਅਲ ਇਨਫੈਕਸ਼ਨਾਂ ਦਾ ਖਤਰਾ ਕਈ ਗੁਣਾ ਵੱਧ ਜਾਂਦਾ ਹੈ। ਇਸ ਸਬੰਧ ਵਿਚ ਮਸ਼ਹੂਰ ਸਰਜਨ, ਆਪ੍ਰੇਸ਼ਨ ਮਾਹਿਰ ਅਤੇ ਲੋਕ ਜਾਗਰੂਕਤਾ ਲਈ ਸਮਰਪਿਤ ਡਾ. ਗੁਰਿੰਦਰ ਸਿੰਘ ਜੋਸਨ (ਐੱਮਬੀਬੀਐੱਸ, ਐੱਮਐੱਸ) ਨੇ ਲੋਕਾਂ ਨੂੰ ਮੌਸਮੀ ਬਿਮਾਰੀਆਂ ਤੋਂ ਬਚਣ ਲਈ ਮਹੱਤਵਪੂਰਣ ਸਲਾਹਾਂ ਦਿੱਤੀਆਂ ਹਨ ਅਤੇ ਸਾਵਧਾਨ ਰਹਿਣ ਦੀ ਅਪੀਲ ਵੀ ਕੀਤੀ ਹੈ। --ਮੌਸਮੀ ਬਦਲਾਅ ਨਾਲ ਕਿਉਂ ਵਧਦੀਆਂ ਹਨ ਬਿਮਾਰੀਆਂ? ਡਾ. ਗੁਰਿੰਦਰ ਸਿੰਘ ਜੋਸਨ ਨੇ ਦੱਸਿਆ ਕਿ ਜਦੋਂ ਮੌਸਮ ਅਚਾਨਕ ਬਦਲਦਾ ਹੈ, ਤਾਂ ਹਵਾ ਵਿਚ ਨਮੀ, ਤਾਪਮਾਨ ਅਤੇ ਵਾਇਰਸਾਂ ਦੀ ਗਤੀਵਿਧੀ ਬਦਲ ਜਾਂਦੀ ਹੈ। ਇਹ ਹਾਲਾਤ ਇਨਫੈਕਸ਼ਨ ਦੇ ਫੈਲਾਅ ਲਈ ਇਕ ਉਚਿਤ ਮਾਹੌਲ ਤਿਆਰ ਕਰਦੇ ਹਨ। ਇਸ ਕਰਕੇ ਜ਼ੁਕਾਮ, ਸੁੱਕੀ ਖਾਂਸੀ, ਵਾਇਰਲ ਫਲੂ, ਗਲੇ ਦੇ ਇਨਫੈਕਸ਼ਨ, ਐਲਰਜੀ, ਦਮੇ ਦੇ ਦੌਰੇ, ਚਮੜੀ ਦੀਆਂ ਬਿਮਾਰੀਆਂ, ਬੁਖਾਰ ਅਤੇ ਪੇਟ ਸੰਬੰਧੀ ਗੜਬੜਾਂ ਬਹੁਤ ਤੇਜ਼ੀ ਨਾਲ ਵਧਦੀਆਂ ਹਨ। ਉਨ੍ਹਾਂ ਕਿਹਾ ਕਿ ਬੱਚੇ, ਬਜ਼ੁਰਗ, ਗਰਭਵਤੀ ਮਹਿਲਾਵਾਂ ਅਤੇ ਕਮਜ਼ੋਰ ਇਮਿਊਨਿਟੀ ਵਾਲੇ ਲੋਕ ਇਸ ਦੌਰ ਵਿਚ ਖ਼ਾਸ ਤੌਰ ’ਤੇ ਪ੍ਰਭਾਵਿਤ ਹੋ ਸਕਦੇ ਹਨ। --ਲੋਕਾਂ ਲਈ 10 ਜ਼ਰੂਰੀ ਸਲਾਹਾਂ 1. ਮੌਸਮ ਅਨੁਸਾਰ ਕੱਪੜੇ ਪਹਿਨੋ-ਸਵੇਰੇ ਅਤੇ ਸ਼ਾਮ ਦੇ ਵੇਲੇ ਤਾਪਮਾਨ ਵਿਚ ਕਾਫ਼ੀ ਅੰਤਰ ਹੁੰਦਾ ਹੈ, ਇਸ ਲਈ ਲੇਅਰ ਵਾਲੇ ਕੱਪੜੇ ਪਹਿਨੋ, ਜੋ ਲੋੜ ਪੈਣ ’ਤੇ ਹਟਾਏ ਜਾਂ ਪਾਏ ਜਾ ਸਕਣ। 2. ਸਾਫ਼–ਸਫ਼ਾਈ ਨੂੰ ਤਰਜੀਹ ਦਿਓ- ਹੱਥਾਂ ਦੀ ਸਾਫ਼–ਸਫ਼ਾਈ ਸਭ ਤੋਂ ਵੱਡਾ ਬਚਾਅ ਹੈ। ਬਾਹਰੋਂ ਆਉਂਦਿਆਂ ਹੱਥ ਧੋਣਾ ਨਾ ਭੁੱਲੋ। 3. ਗਰਮ ਪਾਣੀ ਪੀਓ- ਮੌਸਮ ਬਦਲਣ ਨਾਲ ਗਲਾ ਸੰਵੇਦਨਸ਼ੀਲ ਹੋ ਜਾਂਦਾ ਹੈ। ਗਰਮ ਪਾਣੀ ਪੀਣ ਨਾਲ ਗਲਾ ਗਿੱਲਾ ਰਹਿੰਦਾ ਹੈ ਅਤੇ ਇਨਫੈਕਸ਼ਨ ਨੂੰ ਵਧਣ ਨਹੀਂ ਦਿੰਦਾ। 4. ਪੋਸ਼ਟਿਕ ਤੇ ਤਾਜ਼ਾ ਭੋਜਨ- ਵਿਟਾਮਿਨ-ਸੀ ਵਾਲੇ ਫਲ (ਸੰਤਰਾ, ਕੀਵੀ, ਆਵਲਾ), ਗੁੜ, ਹਲਦੀ, ਖ਼ੁਰਮਾਣੇ, ਬਾਦਾਮ ਆਦਿ ਇਮਿਊਨਿਟੀ ਸਿਸਟਮ ਲਈ ਬਹੁਤ ਲਾਭਕਾਰੀ ਹੁੰਦੇ ਹਨ। 5. ਖੰਘ-ਜ਼ੁਕਾਮ ਹੋਣ ’ਤੇ ਘਰੇਲੂ ਨੁਸਖੇ- ਭਾਫ਼ ਲੈਣਾ, ਗੁੜ-ਅਦਰਕ, ਥੋੜ੍ਹੀ ਹਲਦੀ ਵਾਲਾ ਦੁੱਧ-ਇਹ ਛੋਟੀਆਂ ਗੱਲਾਂ ਵੱਡੇ ਇਨਫੈਕਸ਼ਨ ਤੋਂ ਬਚਾ ਸਕਦੀਆਂ ਹਨ। 6. ਭੀੜ ਵਾਲੀਆਂ ਥਾਵਾਂ ’ਤੇ ਮਾਸਕ ਦੀ ਵਰਤੋਂ- ਫਲੂ ਜਾਂ ਵਾਇਰਲ ਦੇ ਦਿਨਾਂ ਵਿਚ ਮਾਸਕ ਲਗਾਉਣਾ ਇਕ ਬਿਹਤਰ ਤਰੀਕਾ ਹੈ। ਇਸ ਨਾਲ ਇਨਫੈਕਸ਼ਨ ਦਾ ਫੈਲਾਅ ਘਟਦਾ ਹੈ। 7. ਘਰ ਵਿਚ ਨਮੀ ਦਾ ਸੰਤੁਲਨ ਬਣਾਓ- ਵੱਧ ਸੁੱਕਾਪਣ ਜਾਂ ਵੱਧ ਨਮੀ ਇਹ ਦੋਵੇਂ ਹੀ ਸਿਹਤ ਲਈ ਠੀਕ ਨਹੀਂ ਹਨ। ਘਰ ਵਿਚ ਹਵਾਦਾਰੀ ਬਣਾਈ ਰੱਖੋ। 8. ਨਿਯਮਿਤ ਕਸਰਤ ਤੇ ਸਵੇਰੇ ਦੀ ਸੈਰ -ਸਵੇਰੇ ਤਾਜ਼ੀ ਹਵਾ ਇਮਿਊਨ ਸਿਸਟਮ ਮਜ਼ਬੂਤ ਕਰਦੀ ਹੈ। ਹਲਕੀ ਕਸਰਤ, ਯੋਗਾ, ਪ੍ਰਾਣਾਯਾਮ ਸਰੀਰ ਨੂੰ ਬਿਮਾਰੀਆਂ ਨਾਲ ਲੜਨ ਯੋਗ ਬਣਾਉਂਦੇ ਹਨ। 9. ਬੱਚਿਆਂ ਤੇ ਬਜ਼ੁਰਗਾਂ ਦਾ ਵਧੇਰੇ ਧਿਆਨ- ਦੋਵੇਂ ਉਮਰ ਦੇ ਲੋਕ ਮੌਸਮ ਬਦਲਣ ਦੇ ਦੌਰ ਵਿਚ ਸਭ ਤੋਂ ਵੱਧ ਪ੍ਰਭਾਵਿਤ ਹੁੰਦੇ ਹਨ। ਉਨ੍ਹਾਂ ਦੀ ਖੁਰਾਕ, ਪਾਣੀ, ਸੌਣ ਅਤੇ ਕੱਪੜਿਆਂ ’ਤੇ ਖ਼ਾਸ ਧਿਆਨ ਦਿਓ। 10. ਲੰਮਾ ਬੁਖਾਰ ਰਹੇ ਤਾਂ ਡਾਕਟਰੀ ਸਲਾਹ ਲਵੋ- ਅਕਸਰ ਲੋਕ ਘਰੇਲੂ ਇਲਾਜ ਨਾਲ ਹਫ਼ਤਿਆਂ ਤੱਕ ਬਿਮਾਰੀ ਢੋਹਦੇ ਰਹਿੰਦੇ ਹਨ। ਡਾ. ਜੋਸਨ ਨੇ ਕਿਹਾ ਕਿ ਜੇ ਤਿੰਨ ਤੋਂ ਚਾਰ ਦਿਨਾਂ ਵਿਚ ਬੁਖਾਰ, ਖੰਘ ਜਾਂ ਦਮੇ ਵਿਚ ਸੁਧਾਰ ਨਾ ਆਵੇ ਤਾਂ ਤੁਰੰਤ ਡਾਕਟਰ ਕੋਲ ਜਾਓ। --ਜਾਗਰੂਕਤਾ ਹੀ ਸਭ ਤੋਂ ਵੱਡੀ ਦਵਾਈ : ਡਾ. ਗੁਰਿੰਦਰ ਸਿੰਘ ਜੋਸਨ ਨੇ ਦੱਸਿਆ ਕਿ ਮੌਸਮੀ ਬਿਮਾਰੀਆਂ ਨੂੰ ਪੂਰੀ ਤਰ੍ਹਾਂ ਰੋਕਣਾ ਤਾਂ ਸੰਭਵ ਨਹੀਂ ਪਰ ਜਾਗਰੂਕਤਾ ਅਤੇ ਸਾਵਧਾਨੀਆਂ ਨਾਲ ਇਨ੍ਹਾਂ ਦਾ ਪ੍ਰਭਾਵ ਕਾਫ਼ੀ ਘੱਟ ਕੀਤਾ ਜਾ ਸਕਦਾ ਹੈ। ਉਨ੍ਹਾਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਆਪਣੇ-ਆਪ ਨੂੰ ਤੰਦਰੁਸਤ ਰੱਖਣ ਲਈ ਰੋਜ਼ਾਨਾ 20 ਮਿੰਟ ਕਸਰਤ, ਸਵੱਛਤਾ, ਪੋਸ਼ਟਿਕ ਭੋਜਨ ਅਤੇ ਸਮੇਂ-ਸਮੇਂ ’ਤੇ ਮੈਡੀਕਲ ਚੈੱਕਅੱਪ ਲਾਜ਼ਮੀ ਕਰਨ। ਉਨ੍ਹਾਂ ਕਿਹਾ ਕਿ “ਬਚਾਅ ਹਮੇਸ਼ਾ ਇਲਾਜ ਤੋਂ ਬਿਹਤਰ ਹੈ। ਸਾਡੀ ਇਕ ਛੋਟੀ-ਜਿਹੀ ਸਾਵਧਾਨੀ ਬਿਮਾਰੀਆਂ ਦੇ ਵੱਡੇ ਖ਼ਤਰੇ ਨੂੰ ਘਟਾ ਸਕਦੀ ਹੈ। ਕੈਪਸ਼ਨ : 22ਕੇਪੀਟੀ19