ਨਿਧੀ ਪ੍ਰਭਾਕਰ ਸ਼ਰਮਾ ਨੂੰ ਨਾਰੀ ਸ਼ਕਤੀ ਸੰਗਠਨ ਦਾ ਸਲਾਮ

ਮਿਸਿਜ਼ ਇੰਡੀਆ ਪ੍ਰਾਈਡ ਆਫ਼ ਨੇਸ਼ਨ (ਕੋਲੰਬੋ) ’ਚ ਤੀਜੀ ਰਨਰਅੱਪ ਰਹੀ ਸੀ ਨਿਧੀ

ਵੈਸ਼ਨਵੀ ਵਾਣੀ ਹੈ ਉਭਰਦੀ ਐਥਲੀਟ

ਆਸ਼ੀਸ਼ ਸ਼ਰਮਾ ਪੰਜਾਬੀ ਜਾਗਰਣ

ਫਗਵਾੜਾ : ਔਰਤਾਂ ਨੂੰ ਸਸ਼ਕਤ ਬਣਾਉਣ ਤੇ ਸਮਾਜ ਵਿਚ ਸਫਲ ਮਹਿਲਾਵਾਂ ਦੀ ਹੌਸਲਾ ਅਫਜ਼ਾਈ ਕਰਨ ‘ਚ ਮੋਹਰੀ ਸਮਾਜ ਸੇਵੀ ਜਥੇਬੰਦੀ ਨਾਰੀ ਸ਼ਕਤੀ ਸੰਗਠਨ ਵੱਲੋਂ ਸਤਨਾਮਪੁਰ, ਫਗਵਾੜਾ ਵਿਚ ਇਕ ਸਨਮਾਨ ਸਮਾਗਮ ਦਾ ਆਯੋਜਨ ਕੀਤਾ ਗਿਆ। ਇਸ ਦੌਰਾਨ ਨਾਰੀ ਸ਼ਕਤੀ ਸੰਗਠਨ ਦੀਆਂ ਪ੍ਰਮੁੱਖ ਮਹਿਲਾਵਾਂ ਸ਼ਵਿੰਦਰਾ ਨਿਸ਼ਚਲ, ਸੀਤਾ ਦੇਵੀ ਅਤੇ ਮੀਨਾਕਸ਼ੀ ਵਰਮਾ ਨੇ ਦੱਸਿਆ ਕਿ ਇਹ ਸਮਾਗਮ ਇਕ ਵਿਦਿਆਰਥਣ ਸਮੇਤ ਫਗਵਾੜਾ ਦੀਆਂ ਦੋ ਮਹਿਲਾਵਾਂ ਦੇ ਸਨਮਾਨ ਵਿਚ ਆਯੋਜਿਤ ਕੀਤਾ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਆਦਰਸ਼ ਨਗਰ ਫਗਵਾੜਾ ਦੀ ਵਸਨੀਕ ਅਤੇ ਪੇਸ਼ੇ ਤੋਂ ਲੈਕਚਰਾਰ ਨਿਧੀ ਪ੍ਰਭਾਕਰ ਸ਼ਰਮਾ ਨੇ ਕੋਲੰਬੋ, ਸ਼੍ਰੀਲੰਕਾ ਵਿਖੇ ਹੋਈ ਮਿਸਿਜ਼ ਇੰਡੀਆ ਪ੍ਰਾਈਡ ਆਫ਼ ਨੇਸ਼ਨ ਪ੍ਰਤਿਯੋਗਿਤਾ ਵਿਚ ਤੀਜੀ ਰਨਰਅੱਪ ਦਾ ਖਿਤਾਬ ਜਿੱਤ ਕੇ ਪੰਜਾਬ ਦਾ ਮਾਣ ਵਧਾਇਆ। ਦੂਜੀ, ਵੈਸ਼ਨਵੀ ਵਾਣੀ ਹੈ, ਜਿਸ ਨੇ ਸਿਰਫ਼ 18 ਸਾਲ ਦੀ ਉਮਰ ਵਿਚ ਐਥਲੈਟਿਕਸ ਵਿਚ ਕਾਫ਼ੀ ਪ੍ਰਸਿੱਧੀ ਪ੍ਰਾਪਤ ਕੀਤੀ ਹੈ। ਉਹ ਹਦੀਆਬਾਦ ਦੀ ਪੁੱਤਰੀ ਪਾਠਸ਼ਾਲਾ ਦੀ ਵਿਦਿਆਰਥਣ ਹੈ। ਉਸਨੇ ਜ਼ਿਲ੍ਹੇ ਤੋਂ ਲੈ ਕੇ ਰਾਸ਼ਟਰੀ ਪੱਧਰ ਤੱਕ ਕਈ ਮੁਕਾਬਲਿਆਂ ਵਿਚ ਤਗਮੇ ਜਿੱਤੇ ਹਨ। ਹਾਲ ਹੀ ਵਿਚ ਉਸਨੇ ਰਾਜ ਪੱਧਰੀ ਮੁਕਾਬਲੇ ਵਿਚ ਸੋਨ ਤਗਮਾ ਜਿੱਤਿਆ ਅਤੇ ਝਾਰਖੰਡ ਵਿਚ ਹੋਣ ਵਾਲੇ ਰਾਸ਼ਟਰੀ ਮੁਕਾਬਲੇ ਲਈ ਕੁਆਲੀਫਾਈ ਕੀਤਾ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਇਨ੍ਹਾਂ ਮਹਿਲਾਵਾਂ ਨੂੰ ਸਨਮਾਨਿਤ ਕਰਨ ਦਾ ਉਦੇਸ਼ ਹੋਰ ਔਰਤਾਂ ਨੂੰ ਜ਼ਿੰਦਗੀ ਵਿਚ ਅੱਗੇ ਵਧਣ ਅਤੇ ਆਪਣੀ ਮਿਹਨਤ ਰਾਹੀਂ ਸਮਾਜ ਵਿਚ ਔਰਤਾਂ ਦਾ ਮਾਣ ਵਧਾਉਣ ਲਈ ਪ੍ਰੇਰਿਤ ਕਰਨਾ ਹੈ। ਇਸ ਦੌਰਾਨ ਨਿਧੀ ਪ੍ਰਭਾਕਰ ਸ਼ਰਮਾ ਨੇ ਦੱਸਿਆ ਕਿ ਸ਼੍ਰੀਲੰਕਾ ਦੀ ਰਾਜਧਾਨੀ ਕੋਲੰਬੋ ਵਿਚ ਆਯੋਜਿਤ ਇਸ ਮੁਕਾਬਲੇ ਲਈ ਦੇਸ਼ ਭਰ ਤੋਂ 24,000 ਔਰਤਾਂ ਨੇ ਰਜਿਸਟ੍ਰੇਸ਼ਨ ਕਰਵਾਈ। ਇਸ ਤੋਂ ਬਾਅਦ, ਇਕ ਚੋਣ ਪ੍ਰਕਿਰਿਆ ਹੋਈ ਤੇ ਅੰਤ ਵਿਚ ਆਡੀਸ਼ਨ ਹੋਏ। ਖੁਸ਼ਕਿਸਮਤੀ ਨਾਲ, ਉਹ ਪੰਜਾਬ ਤੋਂ ਚੁਣੀਆਂ ਗਈਆਂ ਫਾਈਨਲਿਸਟਾਂ ਵਿਚੋਂ ਇਕ ਸੀ। ਭਾਰਤ ਭਰ ਦੇ ਵੱਖ-ਵੱਖ ਰਾਜਾਂ ਤੋਂ ਕੁੱਲ 123 ਫਾਈਨਲਿਸਟਾਂ ਨੂੰ ਇਸ ਮੁਕਾਬਲੇ ਲਈ ਚੁਣਿਆ ਗਿਆ। ਉਸਨੇ ਇਸ ਵੱਕਾਰੀ ਮੁਕਾਬਲੇ ਵਿਚ ਤੀਜੀ ਰਨਰਅੱਪ ਦਾ ਖਿਤਾਬ ਪ੍ਰਾਪਤ ਕੀਤਾ। ਇਸ ਤੋਂ ਇਲਾਵਾ ਇਸੇ ਸੁੰਦਰਤਾ ਮੁਕਾਬਲੇ ਵਿਚ ਟੈਲੇਂਟਡ ਦਾ ਸਬ-ਟਾਈਟਲ ਵੀ ਉਸ ਨੂੰ ਮਿਲਿਆ ਹੈ। ਦੋਵੇਂ ਸਫਲ ਮਹਿਲਾਵਾਂ ਨੂੰ ਇਸ ਸਨਮਾਨ ਸਮਾਗਮ ਵਿਚ ਮੌਜੂਦ ਰਹੀਆਂ ਸੰਸਥਾ ਦੀਆਂ ਮੈਂਬਰਾਂ ਮੋਨਿਕਾ ਟੰਡਨ, ਰੀਟਾ ਜੌੜਾ, ਸ਼ਸ਼ੀ ਬਾਲਾ, ਸੀਆ, ਰਾਜ ਅਤੇ ਸੁਸ਼ਮਾ ਪ੍ਰਭਾਕਰ ਵੱਲੋਂ ਵੀ ਸ਼ੁੱਭ ਇੱਛਾਵਾਂ ਦਿੱਤੀਆਂ ਗਈਆਂ।