ਐੱਨਐੱਚ ’ਤੇ ਬਿਨਾਂ ਰਿਫਲੈਕਟਰ ‘ਯਮਦੂਤ’ ਬਣ ਕੇ ਦੌੜ ਰਹੇ ਵਾਹਨ

ਜਾਗਰਣ ਸੰਵਾਦਦਾਤਾ, ਕਪੂਰਥਲਾ:

ਨੈਸ਼ਨਲ ਹਾਈਵੇ ’ਤੇ ਬਿਨਾਂ ਰਿਫਲੈਕਟਰ-ਟੇਪ ਦੇ ਵਾਹਨ ਯਮਦੂਤ ਬਣ ਕੇ ਦੌੜ ਰਹੇ ਹਨ। ਇਨ੍ਹਾਂ ’ਚ ਟਰੱਕ, ਟਰਾਲੀ, ਟ੍ਰੈਕਟਰ ਤੇ ਕਈ ਛੋਟੇ ਵਾਹਨ ਸ਼ਾਮਲ ਹਨ, ਜਿਨ੍ਹਾਂ ਦੇ ਪਿੱਛੇ ਰਿਫਲੈਕਟਰ ਟੇਪ ਨਹੀਂ ਲੱਗੀ, ਜਿਨ੍ਹਾਂ ਵਾਹਨਾਂ ’ਤੇ ਰਿਫਲੈਕਟਰ ਹਨ, ਉਹ ਵੀ ਬਹੁਤ ਪੁਰਾਣੇ ਹੋ ਚੁੱਕੇ ਹਨ ਪਰ ਵਾਹਨ ਚਾਲਕਾਂ ਨੂੰ ਨਵਾਂ ਲਾਉਣ ਦੀ ਕੋਈ ਚਿੰਤਾ ਨਹੀਂ। ਧੁੰਦ ’ਚ ਪਿੱਛੇ ਆ ਰਹੇ ਵਾਹਨ ਇਨ੍ਹਾਂ ਨੂੰ ਨਹੀਂ ਦੇਖ ਪਾਉਂਦੇ, ਜਿਸ ਨਾਲ ਹਾਦਸਿਆਂ ਦਾ ਖ਼ਤਰਾ ਵਧ ਜਾਂਦਾ ਹੈ।

ਦੈਨਿਕ ਜਾਗਰਣ ਦੇ ਪੱਤਰਕਾਰ ਨੇ ਵੀਰਵਾਰ ਨੂੰ ਜਦੋਂ ਨੈਸ਼ਨਲ ਹਾਈਵੇ-703-ਏ ’ਤੇ ਇਸ ਦੀ ਜਾਂਚ ਕੀਤੀ ਤਾਂ ਹਾਲਾਤ ਬਹੁਤ ਖਰਾਬ ਦਿਖਾਈ ਦਿੱਤੇ। ਹਾਈਵੇ ’ਤੇ ਬਿਨਾਂ ਰਿਫਲੈਕਟਰ-ਟੇਪ ਦੇ ਟਰੱਕ, ਟਿੱਪਰ, ਟ੍ਰੈਕਟਰ-ਟਰਾਲੀ ਤੇ ਮਾਲਵਾਹਕ ਵਾਹਨ ਬੇਖੌਫ਼ ਦੌੜ ਰਹੇ ਸਨ। ਜ਼ਿਆਦਾਤਰ ਵਾਹਨ ਅਜਿਹੇ ਸਨ, ਜਿਨ੍ਹਾਂ ਦੇ ਪਿੱਛੇ ਕੋਈ ਰਿਫਲੈਕਟਰ ਜਾਂ ਟੇਪ ਨਹੀਂ ਸੀ। ਕੁਝ ਵਾਹਨ ਅਜਿਹੇ ਵੀ ਸਨ ਜਿਨ੍ਹਾਂ ਦੇ ਪਿੱਛੇ ਲੱਗੇ ਰਿਫਲੈਕਟਰ ਬਿਲਕੁਲ ਖਰਾਬ ਹੋ ਚੁੱਕੇ ਸਨ ਤੇ ਉਨ੍ਹਾਂ ਵਿੱਚੋਂ ਰੇਡੀਅਮ ਟੇਪ ਵੀ ਉੱਡ ਚੁੱਕੀ ਸੀ। ਫਿਰ ਵੀ ਚਾਲਕ ਇਨ੍ਹਾਂ ਨੂੰ ਪੂਰੀ ਰਫ਼ਤਾਰ ’ਤੇ ਦੌੜਾ ਰਹੇ ਸਨ।

ਅਜਿਹੇ ਲਾਪਰਵਾਹ ਵਾਹਨ ਚਾਲਕਾਂ ਦੇ ਕਾਰਨ ਹੀ ਧੁੰਦ ਦੇ ਮੌਸਮ ’ਚ ਹਾਦਸੇ ਹੋ ਰਹੇ ਹਨ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਹਾਈਵੇ ’ਤੇ ਇਨ੍ਹਾਂ ਨੂੰ ਰੋਕਣ ਵਾਲਾ ਕੋਈ ਵੀ ਨਹੀਂ ਸੀ। ਬੇਖੌਫ਼ ਵਾਹਨ ਚਾਲਕ ਸੜਕ ’ਤੇ ਦਨਦਨਾਉਂਦੇ ਜਾ ਰਹੇ ਸਨ। ਕਿਸੇ ਵੀ ਥਾਂ 'ਤੇ ਟ੍ਰੈਫਿਕ ਪੁਲਿਸ ਜਾਂ ਨੈਸ਼ਨਲ ਹਾਈਵੇ ਦੇ ਅਧਿਕਾਰੀ ਜਾਂਚ-ਪੜਤਾਲ ਕਰਦੇ ਨਹੀਂ ਦਿਖਾਈ ਦਿੱਤੇ। ਹਾਲਾਂਕਿ ਅਸਲ ’ਚ ਅਜਿਹੇ ਵਾਹਨਾਂ ਦੇ ਚਲਾਨ ਨਹੀਂ, ਸਗੋਂ ਇਨ੍ਹਾਂ ਨੂੰ ਇੰਪਾਊਂਡ ਕੀਤਾ ਜਾਣਾ ਚਾਹੀਦਾ ਹੈ। ਇਹ ਸਿੱਧਾ ਲੋਕਾਂ ਦੀ ਜਾਨ ਨਾਲ ਖੇਡਣਾ ਹੈ।

ਨੈਸ਼ਨਲ ਹਾਈਵੇ ’ਤੇ ਡਡਵਿੰਡੀ, ਖੈੜਾ ਦੋਨਾ, ਪਾਜੀਆਂ, ਆਰਸੀਐੰਫ, ਬਰਿੰਦਰਪੁਰ ਦੇ ਨੇੜੇ ਬਿਨਾਂ ਰਿਫਲੈਕਟਰ-ਟੇਪ ਵਾਲੇ ਵਾਹਨਾਂ ਦੀ ਭਰਮਾਰ ਸੀ। ਹਰ ਚੌਥਾ ਵਾਹਨ ਬਿਨਾਂ ਰਿਫਲੈਕਟਰ ਦੇ ਦੌੜ ਰਿਹਾ ਸੀ। ਕੁਝ ਅਜਿਹੇ ਵਾਹਨ ਵੀ ਸਨ, ਜਿਨ੍ਹਾਂ ’ਤੇ ਰਿਫਲੈਕਟਰ-ਟੇਪ ਤਾਂ ਦੂਰ, ਨੰਬਰ ਪਲੇਟ ਵੀ ਗਾਇਬ ਸੀ। ਇਕ ਟ੍ਰੈਕਟਰ-ਟਰਾਲੀ ਤਾਂ ਅਜਿਹੀ ਸੀ, ਜਿਸ ਦੇ ਪਿੱਛੇ ਕੁਝ ਵੀ ਨਹੀਂ ਲੱਗਾ ਸੀ। ਲਗਭਗ 2 ਘੰਟੇ ਨੈਸ਼ਨਲ ਹਾਈਵੇ ’ਤੇ ਬਿਤਾਉਣ ਤੋਂ ਬਾਅਦ ਪਤਾ ਲੱਗਾ ਕਿ ਇਨ੍ਹਾਂ ਰੋਡਾਂ ’ਤੇ ਲੰਘਣਾ ਬਹੁਤ ਖਤਰਨਾਕ ਹੈ, ਕਿਉਂਕਿ ਰਾਤ ਦੇ ਸਮੇਂ ਧੁੰਦ ’ਚ ਅਜਿਹੇ ਵਾਹਨ ਬਿਨਾਂ ਰਿਫਲੈਕਟਰ ਦੇ ਦਿਖਾਈ ਨਹੀਂ ਦਿੰਦੇ ਤੇ ਜਦ ਤੱਕ ਪਤਾ ਲੱਗਦਾ ਹੈ, ਤਦ ਤੱਕ ਹਾਦਸਾ ਹੋ ਚੁੱਕਾ ਹੁੰਦਾ ਹੈ।

ਬੇਕਰੀ ਕਾਰੋਬਾਰੀ ਸਾਜਨ ਗਰੋਵਰ ਕਹਿੰਦੇ ਹਨ ਕਿ ਬਿਨਾਂ ਰਿਫਲੈਕਟਰ ਵਾਲੇ ਵਾਹਨਾਂ ਨੂੰ ਸੜਕ ’ਤੇ ਨਹੀਂ ਉਤਰਨਾ ਚਾਹੀਦਾ। ਅਜਿਹੇ ਵਾਹਨ ਨਾ ਸਿਰਫ ਆਪਣੀ ਜਾਨ ਨੂੰ ਖਤਰੇ ’ਚ ਪਾਉਂਦੇ ਹਨ ਸਗੋਂ ਦੂਜਿਆਂ ਲਈ ਵੀ ਖਤਰਨਾਕ ਸਾਬਤ ਹੁੰਦੇ ਹਨ। ਉਨ੍ਹਾਂ ਕਿਹਾ ਕਿ ਮਾਲ ਲੈ ਕੇ ਆਉਣ-ਜਾਣ ਵਾਲੇ ਵੱਡੇ ਵਾਹਨਾਂ ’ਤੇ ਧੁੰਦ ਤੇ ਕੋਹਰੇ ਦੇ ਸੀਜ਼ਨ ’ਚ ਰਿਫਲੈਕਟਰ-ਰੇਡੀਅਮ ਟੇਪ ਹੋਣਾ ਯਕੀਨੀ ਬਣਾਇਆ ਜਾਣਾ ਚਾਹੀਦਾ ਹੈ। ਇਸ ਵਿਚ ਸੜਕ ’ਤੇ ਸੈਰ ਵਾਲੇ ਹਰ ਵਿਅਕਤੀ ਦੀ ਸੁਰੱਖਿਆ ਹੈ।

ਸਵੀਟਸ ਕਾਰੋਬਾਰੀ ਵਿਸ਼ਾਲ ਆਹੂਜਾ ਕਹਿੰਦੇ ਹਨ ਕਿ ਟ੍ਰੈਫਿਕ ਪੁਲਿਸ ਮੁਹਿੰਮ ਚਲਾ ਕੇ ਬਿਨਾਂ ਰਿਫਲੈਕਟਰ ਵਾਲੇ ਵਾਹਨਾਂ ’ਤੇ ਰੇਡੀਅਮ ਟੇਪ ਤੇ ਰਿਫਲੈਕਟਰ ਲਗਾਉਂਦੀ ਹੈ ਪਰ ਮਾਲਵਾਹਕ ਵਾਹਨ ਚਾਲਕਾਂ ਨੂੰ ਵੀ ਆਪਣੀ ਜ਼ਿੰਮੇਵਾਰੀ ਸਮਝਣੀ ਚਾਹੀਦੀ ਹੈ, ਜਦ ਪਤਾ ਹੈ ਕਿ ਧੁੰਦ ਤੇ ਕੋਹਰੇ ’ਚ ਰਾਤ ਦੇ ਸਮੇਂ ਇਨ੍ਹਾਂ ਰਿਫਲੈਕਟਰਾਂ ਦੀ ਸੁਰੱਖਿਆ ਦੇ ਇੰਡੀਕੇਟਰ ਹੁੰਦੇ ਹਨ ਤਾਂ ਇਨ੍ਹਾਂ ਨੂੰ ਠੀਕ ਰੱਖਣ ’ਤੇ ਵੀ ਧਿਆਨ ਦੇਣਾ ਚਾਹੀਦਾ ਹੈ ਤਾਂ ਜੋ ਸੜਕ ’ਤੇ ਸੈਰ ਵਾਲੇ ਹਰ ਵਿਅਕਤੀ ਦੀ ਸੁਰੱਖਿਆ ਹੋ ਸਕੇ।