ਧੁੰਦ ਤੇ ਠੰਢ ਦਾ ਕਹਿਰ ਜਾਰੀ, 3 ਵਜੇ ਤੋਂ ਬਾਅਦ ਹੋਏ ਸੂਰਜ ਦੇ ਦਰਸ਼ਨ

ਅਮਰੀਕ ਸਿੰਘ ਮੱਲ੍ਹੀ, ਪੰਜਾਬੀ ਜਾਗਰਣ ਕਪੂਰਥਲਾ : ਕਪੂਰਥਲਾ ਜ਼ਿਲ੍ਹੇ ਵਿਚ ਸੰਘਣੀ ਧੁੰਦ ਅਤੇ ਠੰਢ ਦਾ ਕਹਿਰ ਲਗਾਤਾਰ ਜਾਰੀ ਹੈ। ਕਪੂਰਥਲਾ ਵਿਚ ਸ਼ੁੱਕਰਵਾਰ ਨੂੰ ਸੂਰਜ ਦੇਵਤਾ ਦੇ ਦਰਸ਼ਨ ਕਰੀਬ 3 ਵਜੇ ਤੋਂ ਬਾਅਦ ਹੋਏ ਪਰ ਕੁਝ ਦੇਰ ਬਾਅਦ ਮੁੜ ਸੰਘਣੀ ਧੁੰਦ ਪੈਣੀ ਸ਼ੁਰੂ ਹੋ ਗਈ। ਉਸ ਤੋਂ ਪਹਿਲਾਂ ਪੂਰੇ ਸ਼ਹਿਰ ਵਿਚ ਧੁੰਦ ਦੀ ਚਿੱਟੀ ਚਾਦਰ ਲਿਪਟੀ ਰਹੀ। ਉੱਥੇ ਆਲੇ-ਦੁਆਲੇ ਦੇ ਪਿੰਡਾਂ ਵਿਚ ਵੀ ਧੁੰਦ ਦੀ ਚਾਦਰ ਹਲਕੀ ਜਿਹੀ ਛਾਈ ਰਹੀ। ਦਿਨ ਵੇਲੇ ਵਿਜ਼ੀਬਿਲਟੀ ਤਿੰਨ ਮੀਟਰ ਦੇ ਨੇੜੇ-ਤੇੜੇ ਸੀ, ਪਰ ਰਾਤ ਦੇ ਸਮੇਂ ਸੀਤ ਲਹਿਰ ਚੱਲਣੀ ਸ਼ੁਰੂ ਹੋ ਗਈ, ਜਿਸ ਨਾਲ ਠੰਡ ਵਿਚ ਹੋਰ ਵਾਧਾ ਹੋ ਗਿਆ। ਧੁੰਦ ਵਿਚ ਸਵੇਰ ਦੇ ਸਮੇਂ ਵਾਹਨ ਚਾਲਕਾਂ ਨੂੰ ਵਾਹਨ ਚਲਾਉਂਣ ਵਿਚ ਵੀ ਭਾਰੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ। ਜੇਕਰ ਮੌਸਮ ਵਿਭਾਗ ਦੀ ਗੱਲ ਕਰੀਏ ਤਾਂ ਅਗਲੇ 24 ਘੰਟਿਆਂ ਦੌਰਾਨ ਕਪੂਰਥਲਾ ਦੇ ਵੱਖ-ਵੱਖ ਥਾਵਾਂ ’ਤੇ ਸੰਘਣੀ ਧੁੰਦ ਪੈਣ ਦੀ ਸੰਭਾਵਨਾ ਹੈ ਤੇ ਵਿਭਾਗ ਵੱਲੋਂ ਅਲਰਟ ਵੀ ਜਾਰੀ ਕੀਤਾ ਗਿਆ ਹੈ ਕਿ ਬਾਹਰੀ ਗਤੀਵਿਧੀਆ ਤੋਂ ਬਚੋ ਜਾਂ ਸੀਮਤ ਕਰੋ। --ਧੁੰਦ ਕਾਰਨ ਦੁਕਾਨਦਾਰਾਂ ਦਾ ਕੰਮ ਵੀ ਰਿਹਾ ਪ੍ਰਭਾਵਿਤ ਇਸ ਸਬੰਧੀ ਦੁਕਾਨਦਾਰ ਕਰਨ ਕੱਦ, ਅਰਜਿੰਦਰ ਸਿੰਘ ਮੱਲ੍ਹੀ, ਪ੍ਰਿੰਸ ਸ਼ਰਮਾ ਆਦਿ ਦਾ ਕਹਿਣਾ ਹੈ ਕਿ ਪੈ ਰਹੀ ਸੰਘਣੀ ਧੁੰਦ ਦੇ ਕਾਰਨ ਉਨ੍ਹਾਂ ਦਾ ਕਾਰੋਬਾਰ ਵੀ ਕਾਫੀ ਪ੍ਰਭਾਵਿਤ ਹੋ ਰਿਹਾ ਹੈ। ਕਰੀਬ 2 ਵਜੇ ਤੱਕ ਧੁੰਦ ਦੀ ਚਾਦਰ ਨਾਲ ਸ਼ਹਿਰ ਲਿਪਟਿਆ ਹੋਣ ਕਾਰਨ ਕੋਈ ਵੀ ਗਾਹਕ ਖਰੀਦਦਾਰੀ ਕਰਨ ਲਈ ਨਹੀਂ ਪੁੱਜਦਾ ਅਤੇ ਇਸ ਪੈ ਰਹੀ ਸੰਘਣੀ ਧੁੰਦ ਵਿਚ ਲੋਕ ਘਰਾਂ ਅੰਦਰ ਹੀ ਰਹਿਣ ਨੂੰ ਤਰਜੀਹ ਦੇ ਰਹੇ ਹਨ।