ਬਦਇੰਤਜ਼ਾਮੀ ਵਿਚਾਲੇ ਨਵੇਂ ਰਾਸ਼ਨ ਡੀਪੂ ਦੀ ਅਲਾਟਮੈਂਟ ਦੀ ਪ੍ਰਕਿਰਿਆ ਸ਼ੁਰੂ

-ਪਹਿਲੇ ਦਿਨ ਪੱਖੇ ਤੇ ਪੀਣ ਵਾਲੇ ਪਾਣੀ ਦਾ ਨਹੀਂ ਕੀਤਾ ਗਿਆ ਇੰਤਜ਼ਾਮ - 20 ਮਈ ਤੱਕ ਚੱਲੇਗੀ ਇੰਟਰਵਿਊ ਦੀ ਪ੍ਰਕਿਰਿਆ --- ਜਾਗਰਣ ਸੰਵਾਦਦਾਤਾ, ਜਲੰਧਰ : ਖੁਰਾਕ ਅਤੇ ਸਪਲਾਈ ਵਿਭਾਗ ਵੱਲੋਂ ਸ਼ਹਿਰ ਵਿਚ ਨਵੇਂ ਰਾਸ਼ਨ ਡੀਪੂ ਅਲਾਟ ਕਰਨ ਲਈ ਸ਼ੁੱਕਰਵਾਰ ਨੂੰ ਇੰਟਰਵਿਊ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਗਈ। ਪਹਿਲੇ ਦਿਨ ਬਦਇੰਤਜ਼ਾਮੀ ਕਾਰਨ ਬਿਨੈਕਾਰਾਂ ਨੂੰ ਕਈ ਤਰ੍ਹਾਂ ਦੀਆਂ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਮਾਸਟਰ ਤਾਰਾ ਸਿੰਘ ਨਗਰ ਸਥਿਤ ਖੁਰਾਕ ਤੇ ਸਪਲਾਈ ਵਿਭਾਗ ਦੇ ਜ਼ਿਲ੍ਹਾ ਦਫਤਰ ’ਚ ਸਵੇਰੇ ਤੋਂ ਹੀ ਬਿਨੈਕਾਰਾਂ ਦੀ ਭੀੜ ਉਮੜ ਪਈ ਪਰ ਨਾ ਤਾਂ ਪੀਣ ਵਾਲੇ ਪਾਣੀ ਦੀ ਸਹੂਲਤ ਦਿੱਤੀ ਗਈ ਤੇ ਨਾ ਹੀ ਆਪਣੀ ਬਾਰੀ ਦਾ ਇੰਤਜ਼ਾਰ ਕਰਨ ਵਾਲਿਆਂ ਲਈ ਪੱਖਿਆਂ ਦਾ ਪ੍ਰਬੰਧ ਕੀਤਾ ਗਿਆ। ਇਸ ਤੋਂ ਇਲਾਵਾ ਵਿਭਾਗ ਦੇ ਦਫਤਰ ਦੇ ਅੰਦਰ ਤੇ ਬਾਹਰ ਖੜ੍ਹੇ ਵਾਹਨਾਂ ਦੇ ਕਾਰਨ ਦਫਤਰ ’ਚ ਜਾਣਾ ਵੀ ਮੁਸ਼ਕਲ ਹੋ ਗਿਆ। ਦੂਜੇ ਪਾਸੇ, ਜਿਨ੍ਹਾਂ ਬਿਨੈਕਾਰਾਂ ਨੂੰ ਇੰਟਰਵਿਊ ਲਈ ਨਹੀਂ ਬੁਲਾਇਆ ਗਿਆ ਸੀ, ਉਹ ਵੀ ਪੁੱਜ ਗਏ, ਜਿਸ ਨਾਲ ਭੀੜ ਹੋਰ ਵੱਧ ਗਈ। ਹਾਲਾਂਕਿ ਡੀਐੱਫਐੱਸਸੀ ਨਰਿੰਦਰ ਸਿੰਘ ਅਨੁਸਾਰ, ਬਿਨੈਕਾਰਾਂ ਦੇ ਨਾਲ ਕਈ ਪਰਿਵਾਰਕ ਮੈਂਬਰਾਂ ਦੇ ਆ ਜਾਣ ਤੇ ਜਿਨ੍ਹਾਂ ਦਾ ਇੰਟਰਵਿਊ ਅੱਜ ਨਹੀਂ ਹੋਣਾ ਸੀ, ਉਨ੍ਹਾਂ ਦੇ ਆ ਜਾਣ ਕਾਰਨ ਭੀੜ ਵਧੀ ਹੈ। ਇਸ ਲਈ, ਆਉਣ ਵਾਲੇ ਦਿਨਾਂ ਵਿਚ ਇਸ ਬਾਰੇ ਵੀ ਇੰਤਜ਼ਾਮ ਕੀਤਾ ਜਾਵੇਗਾ। ਸ਼ਹਿਰ ਵਿਚ ਵਧੇਰੇ ਦਾਇਰੇ ਤੇ ਆਬਾਦੀ ਕਾਰਨ ਸਰਕਾਰ ਦੀ ਆਟਾ ਦਾਲ ਸਕੀਮ ਅਤੇ ਆਪਣੀ ਰਸੋਈ ਯੋਜਨਾ ਤਹਿਤ ਲੋਕਾਂ ਤੱਕ ਰਾਸ਼ਨ ਪਹੁੰਚਾਉਣ ਲਈ ਨਵੇਂ ਰਾਸ਼ਨ ਡੀਪੂ ਲਈ ਅਰਜ਼ੀਆਂ ਮੰਗੀਆਂ ਗਈਆਂ ਸਨ। ਅਰਜ਼ੀ ਲਈ ਸਾਰੀਆਂ ਪ੍ਰਕਿਰਿਆ ਪਿਛਲੇ ਸਾਲ ਅਪ੍ਰੈਲ ਵਿਚ ਪੂਰੀਆਂ ਕੀਤੀਆਂ ਗਈਆਂ ਸਨ। ਇਸ ਤੋਂ ਬਾਅਦ ਹੋਰ ਰਸਮਾਂ ਪੂਰੀਆਂ ਕੀਤੀਆਂ ਜਾਂਦੀਆਂ ਰਹੀਆਂ। 15 ਮਈ ਤੋਂ 20 ਮਈ ਤੱਕ ਜ਼ਿਲ੍ਹੇ ਦੇ ਵੱਖ-ਵੱਖ ਹਲਕਿਆਂ ਤੋਂ ਬਿਨੈ ਕਰਨ ਵਾਲਿਆਂ ਦੀ ਇੰਟਰਵਿਊ ਰੱਖੀ ਗਈ ਹੈ। ਜੋ ਪਹਿਲੇ ਦਿਨ ਹੀ ਬਦਇੰਤਜ਼ਾਮੀ ਦੀ ਸ਼ਿਕਾਰ ਹੋ ਗਈ। ਸ਼ੁੱਕਰਵਾਰ ਨੂੰ ਪਹਿਲੇ ਦਿਨ ਕਰਤਾਰਪੁਰ, ਭੋਗਪੁਰ, ਜਲੰਧਰ ਸ਼ਹਿਰੀ, ਕੈਂਟ ਤੇ ਆਦਮਪੁਰ ਖੇਤਰ ਦੇ ਬਿਨੈਕਾਰਾਂ ਨੂੰ ਇੰਟਰਵਿਊ ਲਈ ਬੁਲਾਇਆ ਗਿਆ ਸੀ। ਸਵੇਰੇ ਤੋਂ ਹੀ ਦਫਤਰ ਵਿਚ ਬਿਨੈਕਾਰਾਂ ਦੀ ਭੀੜ ਉਮੜ ਪਈ ਪਰ ਵਿਭਾਗ ਵੱਲੋਂ ਗਰਮੀ ਤੋਂ ਰਾਹਤ ਲਈ ਕੋਈ ਇੰਤਜ਼ਾਮ ਨਹੀਂ ਕੀਤਾ ਗਿਆ। ਡੀਐੱਫਐੱਸਸੀ ਦੇ ਦਫਤਰ ਦੇ ਬਾਹਰ ਧੂਪ ਤੋਂ ਬਚਾਅ ਲਈ ਟੈਂਟ ਤੇ ਬੈਠਣ ਦੀ ਸਹੂਲਤ ਤਾਂ ਕੀਤੀ ਗਈ ਸੀ ਪਰ ਨਾ ਤਾਂ ਪੱਖਿਆਂ ਦਾ ਇੰਤਜ਼ਾਮ ਕੀਤਾ ਗਿਆ ਤੇ ਨਾ ਹੀ ਪੀਣ ਦੇ ਪਾਣੀ ਦੀ ਸਹੂਲਤ ਸੀ। ਇਸ ਲਈ ਲੋਕਾਂ ਨੇ ਆਪਣੇ ਪੈਸੇ ਖਰਚ ਕਰਕੇ ਪਾਣੀ ਦਾ ਪ੍ਰਬੰਧਕੀਤਾ। ਅਰਜ਼ੀ ਦੇਣ ਆਏ ਜਸਪਾਲ ਸਿੰਘ ਨੇ ਕਿਹਾ ਕਿ ਪ੍ਰਸ਼ਾਸਨ ਨੇ ਇੰਟਰਵਿਊ ਤਾਂ ਨਿਯਮਤ ਸਮੇਂ ਤੇ ਸ਼ੁਰੂ ਕਰ ਦਿੱਤੇ ਪਰ ਘੱਟੋ-ਘੱਟ ਸਹੂਲਤਾਂ ਤੇ ਧਿਆਨ ਨਹੀਂ ਦਿੱਤਾ। 40 ਡਿਗਰੀ ਦੇ ਆਸ-ਪਾਸ ਤਾਪਮਾਨ ਵਿਚ ਘੰਟਿਆਂ ਇੰਤਜ਼ਾਰ ਕਰਨਾ ਮੁਸ਼ਕਲ ਹੋ ਗਿਆ। ਬਜ਼ੁਰਗ ਤੇ ਔਰਤ ਬਿਨੈਕਾਰਾਂ ਨੂੰ ਸਭ ਤੋਂ ਵੱਧ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਇਸੇ ਤਰ੍ਹਾਂ ਵਿਜੇ ਕੁਮਾਰ ਨੇ ਕਿਹਾ ਕਿ ਪਾਣੀ ਦਾ ਇੰਤਜ਼ਾਮ ਨਾ ਹੋਣ ਕਾਰਨ ਬੋਤਲਾਂ ਖਰੀਦਣੀਆਂ ਪਈਆਂ। ਰਾਸ਼ਨ ਡੀਪੂ ਅਲਾਟਮੈਂਟ ਲਈ ਇੰਟਰਵਿਊ ਦੀ ਪ੍ਰਕਿਰਿਆ 20 ਮਈ ਤੱਕ ਚੱਲੇਗੀ। ਨਿਯਮਿਤ ਸ਼ਡਿਊਲ ਮੁਤਾਬਕ 18 ਮਈ ਨੂੰ ਲੋਹੀਆਂ ਖਾਸ ਅਤੇ ਸ਼ਾਹਕੋਟ, 19 ਮਈ ਨੂੰ ਮਹਿਤਪੁਰ ਤੇ ਨਕੋਦਰ ਅਤੇ 20 ਮਈ ਨੂੰ ਫਿਲੌਰ, ਅਪਰਾ ਅਤੇ ਗੁਰਾਇਆ ਦੇ ਬਿਨੈਕਾਰਾਂ ਦੇ ਇੰਟਰਵਿਊ ਲਏ ਜਾਣਗੇ।