ਐੱਲਕੇਸੀਟੀਸੀ ਵਿਖੇ ਸਕੂਲ ਆਫ਼ ਮੈਨੇਜਮੈਂਟ ਦੀ ਸੱਭਿਆਚਾਰਕ ਕਮੇਟੀ ਨੇ ਸਿੱਖਿਆ ਤੇ ਵਿਰਾਸਤੀ ਦੌਰਾ ਕੀਤਾ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਵਿਦਿਆਰਥੀਆਂ ਨੂੰ ਪੰਜਾਬ ਦੇ ਅਮੀਰ ਵਿਰਸੇ ਤੋਂ ਜਾਣੂ ਕਰਵਾਉਣ ਲਈ, ਸਕੂਲ ਆਫ਼ ਮੈਨੇਜਮੈਂਟ ਦੀ ਸੱਭਿਆਚਾਰਕ ਕਮੇਟੀ ਨੇ ਐੱਮਬੀਏ, ਬੀਬੀਏ ਤੇ ਬੀ-ਕਾਮ (ਆਨਰਜ਼) ਕਲਾਸਾਂ ਦੇ ਵਿਦਿਆਰਥੀਆਂ ਲਈ ਅੰਮ੍ਰਿਤਸਰ ਦੇ ਸਾਡਾ ਪਿੰਡ ਦਾ ਦੌਰਾ ਕੀਤਾ। ਦੌਰੇ ਦੌਰਾਨ ਵਿਦਿਆਰਥੀਆਂ ਨੇ ਪੁਰਾਣਾ ਜ਼ਮੀਨਦਾਰ ਘਰ, ਫੁਲਕਾਰੀ ਘਰ, ਨੰਬਰਦਾਰ ਘਰ, ਪਿੰਡ ਦਾ ਡਾਕਘਰ, ਸਰਪੰਚ ਘਰ, ਬੁਣਕਰ ਘਰ, ਵਿਆਹ ਹਾਲ ਆਦਿ ਦਾ ਦੌਰਾ ਕੀਤਾ। ਵਿਦਿਆਰਥੀਆਂ ਨੇ ਇਸ ਦੌਰੇ ਰਾਹੀਂ ਪੰਜਾਬ ਦੀਆਂ ਪੁਰਾਣੀਆਂ ਪਰੰਪਰਾਵਾਂ ਤੇ ਸੱਭਿਆਚਾਰ ਬਾਰੇ ਗਿਆਨ ਪ੍ਰਾਪਤ ਕੀਤਾ। ਉਨ੍ਹਾਂ ਨੇ ਸਾਡਾ ਪਿੰਡ ਵਿਖੇ ਲੋਕ ਸੰਗੀਤ, ਰਵਾਇਤੀ ਭੋਜਨ ਤੇ ਰਵਾਇਤੀ ਖੇਡਾਂ ਦਾ ਆਨੰਦ ਮਾਣਿਆ। ਵਿਦਿਆਰਥੀਆਂ ਨੇ ਪ੍ਰਸਿੱਧ ਰਿਟਰੀਟ ਸਮਾਰੋਹ ਦੇਖਣ ਲਈ ਇਤਿਹਾਸਕ ਤੇ ਰਾਸ਼ਟਰੀ ਮਹੱਤਵ ਵਾਲੇ ਵਾਹਗਾ ਸਰਹੱਦ ਦਾ ਵੀ ਦੌਰਾ ਕੀਤਾ। ਇਸ ਦੌਰੇ ਨੇ ਵਿਦਿਆਰਥੀਆਂ ਨੂੰ ਵਾਹਗਾ ਸਰਹੱਦ ਦਾ ਸਿੱਧਾ ਅਨੁਭਵ ਤੇ ਗੁਆਂਢੀ ਦੇਸ਼ ਪਾਕਿਸਤਾਨ ਨਾਲ ਦੇਸ਼ ਭਗਤੀ ਤੇ ਸਰਹੱਦੀ ਸੁਰੱਖਿਆ ਬਾਰੇ ਜਾਗਰੂਕਤਾ ਪ੍ਰਦਾਨ ਕੀਤੀ। ਇਸ ਦੌਰੇ ਨਾਲ ਏਐੱਸ ਰਾਏ, ਭਾਰਤ ਭੂਸ਼ਣ, ਅੰਤਰਪ੍ਰੀਤ ਤਲਵਾੜ ਤੇ ਗੁਰਨੀਮ ਕੌਰ ਵੀ ਸਨ। ਕੇਸੀਐੱਲ ਗਰੁੱਪ ਦੇ ਅਕਾਦਮਿਕ ਮਾਮਲਿਆਂ ਦੇ ਡਾਇਰੈਕਟਰ ਸਰਦਾਰ ਸੁਖਬੀਰ ਸਿੰਘ ਚੱਠਾ ਤੇ ਐਲਕੇਸੀਟੀਸੀ ਦੇ ਡਾਇਰੈਕਟਰ ਡਾ. ਆਰਐੱਸ ਦਿਓਲ ਨੇ ਪੰਜਾਬ ਦੀ ਪਰੰਪਰਾ ਤੇ ਸੱਭਿਆਚਾਰ ਨੂੰ ਦਰਸਾਉਂਦੇ ਰਵਾਇਤੀ ਸਥਾਨ ਦੀ ਯਾਤਰਾ ਕਰਵਾਉਣ ਲਈ ਵਿਭਾਗ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ। ਡਾ. ਇੰਦਰਪਾਲ ਸਿੰਘ ਡੀਨ ਖੋਜ ਤੇ ਪ੍ਰੀਖਿਆ ਤੇ ਐੱਚਓਡੀ ਪ੍ਰਬੰਧਨ ਵਿਭਾਗ ਨੇ ਵਿਦਿਆਰਥੀਆਂ ਲਈ ਇਸ ਗਿਆਨਵਾਨ ਯਾਤਰਾ ਦੇ ਆਯੋਜਨ ਲਈ ਫੈਕਲਟੀ ਮੈਂਬਰਾਂ ਨੂੰ ਵਧਾਈ ਦਿੱਤੀ।