ਸੀਡ ਇੰਡੀਆ ਨੇ ਕਰਵਾਇਆ ਮਾਰਕੀਟਿੰਗ ਸੈਸ਼ਨ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਟੀਮ ਸੀਡ ਇੰਡੀਆ ਇਕ ਗੈਰ-ਸਰਕਾਰੀ ਸੰਸਥਾ ਜੋ ਯੁਵਾ ਸਸ਼ਕਤੀਕਰਨ ਤੇ ਉੱਦਮਤਾ ਦੇ ਵਿਕਾਸ ਲਈ ਕੰਮ ਕਰ ਰਹੀ ਹੈ, ਵੱਲੋਂ ਮਾਨਵਤਾ ਪਬਲਿਕ ਸੀਨੀਅਰ ਸੈਕੰਡਰੀ ਸਕੂਲ ’ਚ ਇਕ ਇੰਟਰਐਕਟਿਵ ਮਾਰਕੀਟਿੰਗ ਸੈਸ਼ਨ ਕਰਵਾਇਆ। ਇਸ ਸੈਸ਼ਨ ਤੋਂ 100 ਤੋਂ ਵੱਧ ਵਿਦਿਆਰਥੀਆਂ ਨੇ ਲਾਭ ਪ੍ਰਾਪਤ ਕੀਤਾ। ਸੈਸ਼ਨ ਦਾ ਸੰਚਾਲਨ ਟੀਮ ਦੇ ਮੈਂਬਰ ਪ੍ਰਣਵ ਪ੍ਰਾਸ਼ਰ, ਕਾਰਤਿਕ ਪਟਿਆਲ ਤੇ ਦਿਵਯਮ ਤਲਵਾਰ ਵੱਲੋਂ ਕੀਤਾ ਗਿਆ। ਉਨ੍ਹਾਂ ਨੇ ਦਿਲਚਸਪ ਵਿਚਾਰ-ਵਟਾਂਦਰੇ ਤੇ ਅਸਲ ਜੀਵਨ ਦੀਆਂ ਵਿਹਾਰਕ ਉਦਾਹਰਣਾਂ ਰਾਹੀਂ ਵਿਦਿਆਰਥੀਆਂ ਨੂੰ ਮਾਰਕੀਟਿੰਗ ਦੇ ਬੁਨਿਆਦੀ ਸਿਧਾਂਤਾਂ ਨਾਲ ਜਾਣੂ ਕਰਵਾਇਆ। ਪ੍ਰੋਗਰਾਮ ਦਾ ਮੁੱਖ ਆਕਰਸ਼ਣ “ਮਾਰਕੀਟ ਖੇਤਰ” ਮੁਕਾਬਲਾ ਰਿਹਾ, ਜਿਸ ’ਚ ਵਿਦਿਆਰਥੀਆਂ ਨੂੰ ਟੀਮਾਂ ’ਚ ਵੰਡ ਕੇ ਆਪਣੇ ਇਸ਼ਤਿਹਾਰਾਂ ਦੀਆਂ ਧਾਰਨਾਵਾਂ ਪੇਸ਼ ਕਰਨ ਦਾ ਮੌਕਾ ਦਿੱਤਾ ਗਿਆ। ਸੈਸ਼ਨ ਦੌਰਾਨ ਵਿਦਿਆਰਥੀਆਂ ਨੇ ਸਰਗਰਮੀ ਨਾਲ ਹਿੱਸਾ ਲੈਂਦੇ ਹੋਏ ਨਵੀਨਤਾਕਾਰੀ ਵਿਚਾਰ ਪੇਸ਼ ਕੀਤੇ। ਇਸ ਪਹਿਲਕਦਮੀ ਨਾਲ ਵਿਦਿਆਰਥੀਆਂ ਦੀ ਮਾਰਕੀਟਿੰਗ ਸਬੰਧੀ ਸਮਝ ’ਚ ਵਾਧਾ ਹੋਇਆ ਤੇ ਉਨ੍ਹਾਂ ’ਚ ਆਤਮ ਵਿਸ਼ਵਾਸ ਤੇ ਉੱਦਮੀ ਸੋਚ ਦਾ ਵਿਕਾਸ ਹੋਇਆ।