ਰਾਮਾਇਣ ਗਿਆਨ, ਕਲਾ ਤੇ ਮੇਕਅੱਪ ਮੁਕਾਬਲੇ ਕਰਵਾਏ

-ਮੁੱਖ ਮਹਿਮਾਨ ਵਜੋਂ ਕੈਬਨਿਟ ਮੰਤਰੀ ਮਹਿੰਦਰ ਭਗਤ ਦੇ ਭਤੀਜੇ ਚੰਦਨ ਭਗਤ ਨੇ ਕੀਤੀ ਸ਼ਮੂਲੀਅਤ ਕੀਮਤੀ ਭਗਤ, ਪੰਜਾਬੀ ਜਾਗਰਣ, ਜਲੰਧਰ : ਐਤਵਾਰ ਨੂੰ ਸ਼ਿਵ ਰਾਮ ਕਲਾ ਮੰਚ ਵੱਲੋਂ ਸ਼੍ਰੀ ਲਕਸ਼ਮੀ ਨਾਰਾਇਣ ਮੰਦਰ, ਮਾਡਲ ਹਾਊਸ ਵਿਖੇ ਰਾਮਾਇਣ ਗਿਆਨ, ਕਲਾ ਤੇ ਮੇਕਅੱਪ ਮੁਕਾਬਲਾ ਕਰਵਾਏ ਗਏ। ਮੁਕਾਬਲੇ ’ਚ ਛੋਟੇ ਬੱਚਿਆ ਤੋਂ ਲੈ ਕੇ ਵੱਡੇ ਕਲਾਕਾਰਾਂ ਨੇ ਹਿੱਸਾ ਲੈ ਕੇ ਬੌਧਿਕ ਗਿਆਨ, ਕਲਾ ਅਤੇ ਬੁੱਧੀ ਦਾ ਪ੍ਰਦਰਸ਼ਨ ਕੀਤਾ। ਪੇਂਟਿੰਗ ਮੁਕਾਬਲੇ ਵਿਚ ਵਿਦਿਆਰਥੀਆਂ ਨੇ ਗਲੋਬਲ ਵਾਰਮਿੰਗ, ਧਰਤੀ ਨੂੰ ਬਚਾਉਣ, ਪਾਣੀ ਬਚਾਉਣ ਅਤੇ ਮਹਾਨ ਸ਼ਖਸੀਅਤਾਂ ਦੇ ਸੁੰਦਰ ਅਤੇ ਦਿਲਚਸਪ ਚਿੱਤਰ ਬਣਾਏ। ਮੁਕਾਬਲੇ ’ਚ 300 ਤੋਂ ਵੱਧ ਵਿਦਿਆਰਥੀਆਂ ਨੇ ਹਿੱਸਾ ਲਿਆ। ਇਸ ਤੋਂ ਇਲਾਵਾ ਇੱਕ ਮੇਕਅੱਪ ਮੁਕਾਬਲਾ ਵੀ ਕਰਵਾਇਆ ਗਿਆ, ਜਿਸ ਵਿੱਚ 30 ਮੇਕਅੱਪ ਕਲਾਕਾਰਾਂ ਨੇ ਹਿੱਸਾ ਲਿਆ। ਪ੍ਰਸਿੱਧ ਆਰਟਿਸਟ ਇੰਦਰਜੀਤ ਸਿੰਘ ਅਤੇ ਕਲਾਕਾਰ ਸੁਰਿੰਦਰ ਪਾਲ ਸਿੰਘ ਨੇ ਜੱਜਾਂ ਵਜੋਂ ਸੇਵਾ ਨਿਭਾਈ। ਮੁਕਾਬਲੇ ਦੀ ਸ਼ੁਰੂਆਤ ਭਗਵਾਨ ਰਾਮ ਜੀ ਦੀ ਆਰਤੀ ਨਾਲ ਹੋਈ। ਇਸ ਤੋਂ ਬਾਅਦ ਵੱਖ-ਵੱਖ ਕਲਾਕਾਰਾਂ ਨੇ ਸੰਵਾਦਾਂ ਨਾਲ ਦਰਸ਼ਕਾਂ ਨੂੰ ਮੋਹਿਤ ਕੀਤਾ। ਬੱਚਿਆਂ ਨੇ ਹਨੂੰਮਾਨ ਚਾਲੀਸਾ ਦਾ ਪਾਠ ਕੀਤਾ। ਪ੍ਰਧਾਨ ਰਜਨੀਸ਼ ਕੁਮਾਰ ਨੇ ਕਿਹਾ ਕਿ ਮੁਕਾਬਲੇ ਦਾ ਮੁੱਖ ਉਦੇਸ਼ ਨਵੀਂ ਪੀੜ੍ਹੀ ਨੂੰ ਆਪਣੀ ਕਲਾ ਰਾਹੀਂ ਸਮਾਜ ਅਤੇ ਦੁਨੀਆ ਨੂੰ ਦਰਪੇਸ਼ ਵੱਖ-ਵੱਖ ਚੁਣੌਤੀਆਂ ਨੂੰ ਪੇਸ਼ ਕਰਕੇ ਭਾਰਤੀ ਸੱਭਿਆਚਾਰ ਨੂੰ ਰਾਮਾਇਣ ਨਾਲ ਜੋੜਨਾ ਸੀ। ਮੁੱਖ ਮਹਿਮਾਨ ਕੈਬਨਿਟ ਮੰਤਰੀ ਮਹਿੰਦਰ ਭਗਤ ਦੇ ਭਤੀਜੇ ਚੰਦਨ ਭਗਤ ਨੇ ਮੁਕਾਬਲੇ ਲਈ ਪਲੇਟਫਾਰਮ ਦੇ ਯਤਨਾਂ ਤੇ ਖੁਸ਼ੀ ਪ੍ਰਗਟ ਕਰਦੇ ਹੋਏ ਕਿਹਾ ਕਿ ਅਜਿਹੇ ਸਮਾਗਮ ਬੱਚਿਆਂ ਨੂੰ ਬੁਰੀ ਸੰਗਤ ਤੋਂ ਬਚਣ ਅਤੇ ਧਾਰਮਿਕ ਅਤੇ ਸੱਭਿਆਚਾਰਕ ਕਦਰਾਂ-ਕੀਮਤਾਂ ਨੂੰ ਉਤਸ਼ਾਹਿਤ ਕਰਨ ਵਿੱਚ ਮਦਦ ਕਰ ਸਕਦੇ ਹਨ। ਉਨ੍ਹਾਂ ਨੇ ਮੰਚ ਵੱਲੋਂ ਕੀਤੇ ਜਾ ਰਹੇ ਕੰਮ ਦੀ ਪ੍ਰਸ਼ੰਸਾ ਕੀਤੀ। ਭਜਨ ਸਮਰਾਟ ਰੋਹਿਤ ਸਹਿਗਲ ਨੇ ਭਗਵਾਨ ਰਾਮ ਨੂੰ ਸਮਰਪਿਤ ਆਪਣੇ ਭਜਨਾਂ ਨਾਲ ਦਰਸ਼ਕਾਂ ਨੂੰ ਮੋਹਿਤ ਕੀਤਾ। ਮੁੱਖ ਮਹਿਮਾਨ ਚੰਦਨ ਭਗਤ ਤੇ ਵਿਸ਼ੇਸ਼ ਮਹਿਮਾਨ ਇਲਾਕਾ ਕੌਂਸਲਰ ਸੁਨੀਤਾ ਟਿੱਕਾ ਨੇ ਜੇਤੂਆਂ ਨੂੰ ਸਰਟੀਫਿਕੇਟ ਤੇ ਇਨਾਮ ਵੰਡੇ। ਇਸ ਮੌਕੇ ਸਾਬਕਾ ਕੌਂਸਲਰ ਓਕਾਰ ਰਾਜੀਵ ਟਿੱਕਾ, ਬ੍ਰਾਹਮਣ ਸਭਾ ਯੂਥ ਵਿੰਗ ਦੇ ਪ੍ਰਧਾਨ ਵਿਨੈ ਸ਼ਰਮਾ, ਵਿਕਰਮ ਸ਼ਰਮਾ, ਧਾਰਮਿਕ ਉਤਸਵ ਕਮੇਟੀ ਦੇ ਕਨਵੀਨਰ ਹੇਮੰਤ ਸ਼ਰਮਾ, ਕ੍ਰਿਸ਼ਨ ਲਾਲ ਸਿੰਗਲਾ, ਮੰਚ ਦੇ ਚੇਅਰਮੈਨ ਹਰਜੀਵਨ ਗੋਗਨਾ, ਪ੍ਰਧਾਨ ਰਜਨੀਸ਼ ਕੁਮਾਰ, ਜਨਰਲ ਸਕੱਤਰ ਕੁਲਵਿੰਦਰ ਸਿੰਘ ਹੀਰਾ, ਡਾਇਰੈਕਟਰ ਧੀਰਜ ਸਹਿਗਲ, ਖਜ਼ਾਨਚੀ ਵਿਸ਼ਾਲ ਭੱਲਾ, ਰਾਵਣ ਜਗਦੀਸ਼ ਬਿੱਟਾ, ਪ੍ਰੋਮਟ ਡਾਇਰੈਕਟਰ ਕਾਰਤਿਕ, ਨਿਤਕ ਵਰਮਾ, ਰਾਜੇਸ਼ ਸੋਨੀ, ਮਨੋਜ ਕਾਲੀਆ, ਸ਼ਿਵਮ ਕਾਲੀਆ, ਗੁਰਦਾਸ ਬੋਲੀਨਾ, ਮਾਨਵ, ਯਸ਼ਿਕਾ, ਸਟੇਜ ਸੰਚਾਲਕ ਅਸ਼ਵਨੀ ਭਗਤ, ਤਿਲਕ ਰਾਜ, ਮੇਕਅੱਪ ਡਾਇਰੈਕਟਰ ਚੇਤਨ ਅਤੇ ਸੂਜਲ, ਅਸ਼ੋਕ ਚੌਹਾਨ, ਸੁਰਿੰਦਰ ਸ਼ਰਮਾ, ਹਰਿੰਦਰ ਸ਼ਰਮਾ, ਮਹਾਬੀਰ ਕਲੱਬ ਕਲੱਬ ਦੇ ਪ੍ਰਧਾਨ ਪਿੰਕੀ ਜੁਲਕਾ, ਤਿਲਕ ਰਾਜ, ਸੰਜੀਵ ਤਿਵਾੜੀ, ਬਲਜੀਤ ਪੌਪੀ, ਵਿਕਰਮ ਸ਼ਰਮਾ ਅੱਜ ਵੀ ਮੌਜੂਦ ਸਨ।