ਗੈਸ ਸਿਲੰਡਰ ਸਪਲਾਈ ਦੀ ਸਮੇਂ ਸਿਰ ਨਾ ਮਿਲਣ ਕਾਰਨ ਰੋਕੀ ਸੜਕ

ਰਾਕੇਸ਼ ਗਾਂਧੀ, ਪੰਜਾਬੀ ਜਾਗਰਣ, ਜਲੰਧਰ : 120 ਫੁੱਟੀ ਸੜਕ ਤੇ ਸਥਿਤ ਦਮਨ ਗੈਸ ਏਜੰਸੀ ’ਚ ਸਿਲੰਡਰ ਸਪਲਾਈ ’ਚ ਸਮੇਂ ਸਿਰ ਨਾ ਮਿਲਣ ਕਾਰਨ ਪੱਛਮੀ ਹਲਕੇ ’ਚ ਲੋਕ ਗੁੱਸੇ ਨਾਲ ਭੜਕ ਉੱਠੇ। ਏਜੰਸੀ ਦਫ਼ਤਰ ਨੂੰ ਬੰਦ ਦੇਖ ਕੇ ਗੁੱਸੇ ’ਚ ਆਏ ਖਪਤਕਾਰਾਂ ਨੇ ਸੜਕ ਜਾਮ ਕਰਕੇ ਵਿਰੋਧ ਪ੍ਰਦਰਸ਼ਨ ਕੀਤਾ, ਜਿਸ ਕਾਰਨ ਇਲਾਕੇ ’ਚ ਆਵਾਜਾਈ ’ਚ ਵਿਘਨ ਪਿਆ। ਪ੍ਰਦਰਸ਼ਨਕਾਰੀਆਂ ਦਾ ਦੋਸ਼ ਹੈ ਕਿ ਉਨ੍ਹਾਂ ਨੇ ਆਪਣੇ ਗੈਸ ਸਿਲੰਡਰ ਸਮੇਂ ਸਿਰ ਬੁੱਕ ਕੀਤੇ ਸਨ ਹਾਲਾਂਕਿ ਕਈ ਹਫ਼ਤੇ ਬੀਤ ਜਾਣ ਦੇ ਬਾਵਜੂਦ ਉਨ੍ਹਾਂ ਨੂੰ ਅਜੇ ਤੱਕ ਉਨ੍ਹਾਂ ਦੀ ਡਲਿਵਰੀ ਨਹੀਂ ਮਿਲੀ ਹੈ। ਖਪਤਕਾਰਾਂ ਦਾ ਕਹਿਣਾ ਹੈ ਕਿ ਏਜੰਸੀ ਦੇਰੀ ਲਈ ਕੋਈ ਸਪੱਸ਼ਟ ਕਾਰਨ ਨਹੀਂ ਦੱਸ ਰਹੀ ਤੇ ਉਨ੍ਹਾਂ ਦੀਆਂ ਫੋਨ ਕਾਲਾਂ ਦਾ ਜਵਾਬ ਵੀ ਨਹੀਂ ਦੇ ਰਹੀ ਹੈ। ਇਕ ਗਾਹਕ ਪ੍ਰਦੀਪ ਕੁਮਾਰ ਨੇ ਦੱਸਿਆ ਕਿ ਉਸ ਨੇ ਆਪਣਾ ਸਿਲੰਡਰ ਨਿਯਮਾਂ ਅਨੁਸਾਰ ਬੁੱਕ ਕੀਤਾ ਸੀ ਫਿਰ ਵੀ ਤੈਅ ਸਮੇਂ ਡਲਿਵਰੀ ਸਮਾਂ ਬੀਤਣ ਤੋਂ ਬਾਅਦ ਵੀ ਉਸਨੂੰ ਸਿਲੰਡਰ ਨਹੀਂ ਮਿਲਿਆ। ਏਜੰਸੀ ਨੇ ਸ਼ੁਰੂ ਵਿਚ 2-3 ਦਿਨਾਂ ਦਾ ਕਿਹਾ ਸੀ ਪਰ ਮੰਗੇ ਗਏ ਸਮੇਂ ਬਾਅਦ ਵੀ ਸਿਲੰਡਰ ਡਲਿਵਰ ਨਹੀਂ ਹੋਇਆ। ਜਦੋਂ ਉਹ ਦਫ਼ਤਰ ਪੁੱਜਾ ਤਾਂ ਉਸ ਨੂੰ ਤਾਲਾ ਲੱਗਾ ਹੋਇਆ ਮਿਲਿਆ, ਜਿਸ ਨਾਲ ਗੁੱਸਾ ਹੋਰ ਵਧ ਗਿਆ। ਇੱਕ ਹੋਰ ਖਪਤਕਾਰ ਸੀਮਾ ਨੇ ਵੀ ਦੋਸ਼ ਲਾਇਆ ਕਿ ਉਸਨੂੰ ਇਕ ਮਹੀਨੇ ਤੋਂ ਵੱਧ ਇੰਤਜ਼ਾਰ ਕਰਨ ਦੇ ਬਾਵਜੂਦ ਸਿਲੰਡਰ ਨਹੀਂ ਦਿੱਤਾ ਗਿਆ। ਉਸ ਨੇ ਏਜੰਸੀ ਦੇ ਸਟਾਫ ਤੇ ਰੁੱਖੇ ਵਤਰਾਅ ਦਾ ਦੋਸ਼ ਲਾਇਆ। ਸਰਕਾਰ ਪ੍ਰਤੀ ਆਪਣੀ ਨਾਰਾਜ਼ਗੀ ਜ਼ਾਹਰ ਕਰਦੇ ਹੋਏ ਉਸ ਨੇ ਟਿੱਪਣੀ ਕੀਤੀ ਕਿ ਜ਼ਮੀਨੀ ਪੱਧਰ ਤੇ ਲੋਕਾਂ ਨੂੰ ਬਹੁਤ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਸੜਕ ਜਾਮ ਕਾਰਨ ਯਾਤਰੀਆਂ ਤੇ ਵਾਹਨ ਚਾਲਕਾਂ ਨੂੰ ਕਾਫ਼ੀ ਅਸੁਵਿਧਾ ਹੋਈ। ਵਿਰੋਧ ਪ੍ਰਦਰਸ਼ਨ ਦੌਰਾਨ ਕੁਝ ਡਰਾਈਵਰਾਂ ਤੇ ਪ੍ਰਦਰਸ਼ਨਕਾਰੀਆਂ ਵਿਚਾਲੇ ਤਿੱਖੀ ਬਹਿਸ ਵੀ ਹੋਈ। ਸੂਚਨਾ ਮਿਲਣ ਤੇ ਬਸਤੀ ਬਾਵਾ ਖੇਲ ਦੇ ਐੱਸਐੱਚਓ ਜੈਇੰਦਰ ਸਿੰਘ ਪੁਲਿਸ ਮੁਲਾਜ਼ਮ ਨਾਲ ਮੌਕੇ ਤੇ ਪੁੱਜੇ। ਉਨ੍ਹਾਂ ਪ੍ਰਦਰਸ਼ਨਕਾਰੀਆਂ ਨੂੰ ਸਮਝਾਇਆ, ਉਨ੍ਹਾਂ ਨੂੰ ਸੜਕ ਖਾਲੀ ਕਰਨ ਲਈ ਮਨਾਇਆ ਤੇ ਸਥਿਤੀ ਨੂੰ ਕਾਬੂ ’ਚ ਲਿਆਂਦਾ। ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਗੈਸ ਏਜੰਸੀ ਪ੍ਰਬੰਧਕਾਂ ਨਾਲ ਗੱਲਬਾਤ ਕੀਤੀ ਹੈ, ਜਿਨ੍ਹਾਂ ਨੇ ਭਰੋਸਾ ਦਿੱਤਾ ਹੈ ਕਿ ਸਪਲਾਈ ਜਲਦੀ ਹੀ ਬਹਾਲ ਕਰ ਦਿੱਤੀ ਜਾਵੇਗੀ ਤੇ ਖਪਤਕਾਰਾਂ ਦੀਆਂ ਸ਼ਿਕਾਇਤਾਂ ਦਾ ਹੱਲ ਕਰ ਦਿੱਤਾ ਜਾਵੇਗਾ।