ਮੇਅਰ ਤੇ ਹਲਕਾ ਇੰਚਾਰਜ ਨੇ ਪੈਚ ਵਰਕ ਦਾ ਕੀਤਾ ਮੁਆਇਨਾ

ਟਰਾਂਸਪੋਰਟ ਨਗਰ ਤੇ ਗਦਈਪੁਰ ਤੇ ਆਸ-ਪਾਸ ਦੇ ਇਲਾਕੇ ਵੀ ਦੇਖੇ

ਪੰਜਾਬੀ ਜਾਗਰਣ ਪ੍ਰਤੀਨਿਧ, ਜਲੰਧਰ

ਮੇਅਰ ਵਨੀਤ ਧੀਰ ਤੇ ਹਲਕਾ ਇੰਚਾਰਜ ਦਿਨੇਸ਼ ਢੱਲ ਨਾਲ ਲੰਮਾ ਪਿੰਡ ਤੋਂ ਮਕਸੂਦਾਂ ਤਕ ਦੇ ਪੈਚ ਵਰਕ ਦਾ ਮੁਆਇਨਾ ਕੀਤਾ। ਇਸ ਦੌਰਾਨ ਉਨ੍ਹਾਂ ਟਰਾਂਸਪੋਰਟ ਨਗਰ ਚੌਕ, ਮਕਸੂਦਾਂ ਚੌਕ, ਗਦਈਪੁਰ ਤੇ ਨਾਲ ਦੇ ਇਲਾਕਿਆ ਦਾ ਜਾਇਜ਼ਾ ਲਿਆ। ਮੇਅਰ ਤੇ ਹਲਕਾ ਇੰਚਾਰਜ ਨੇ ਲੋਕਾਂ ਨਾਲ ਗੱਲਬਾਤ ਕੀਤੀ, ਉਨ੍ਹਾਂ ਦੀਆਂ ਸ਼ਿਕਾਇਤਾਂ ਸੁਣੀਆਂ ਤੇ ਸਬੰਧਤ ਅਧਿਕਾਰੀਆਂ ਨੂੰ ਇਨ੍ਹਾਂ ਮੁੱਦਿਆਂ ਨੂੰ ਜਲਦੀ ਹੱਲ ਕਰਨ ਦੇ ਨਿਰਦੇਸ਼ ਜਾਰੀ ਕੀਤੇ। ਨਿਰੀਖਣ ਦੌਰਾਨ, ਸੜਕ ਦੇ ਪੈਚਵਰਕ ਤੇ ਨਿਰਮਾਣ, ਸੈਂਟਰਲ ਵਰਜ ਦੀ ਮੁਰੰਮਤ ਕਰਨ ਦੇ ਹੁਕਮ ਜਾਰੀ ਕੀਤੇ। ਲੰਮਾ ਪਿੰਡ ਚੌਕ ਨੇੜੇ ਪਠਾਨਕੋਟ ਫਲਾਈਓਵਰ ਦੇ ਹੇਠਾਂ ਖੇਤਰ ਦਾ ਸੁੰਦਰੀਕਰਨ, ਲੰਮਾ ਪਿੰਡ ਚੌਕ ਤੋਂ ਮਕਸੂਦਾਂ ਚੌਕ ਤੱਕ ਸੜਕ ਦੇ ਦੋਵੇਂ ਪਾਸੇ ਵਿਆਪਕ ਸਫਾਈ ਆਦਿ ਦਾ ਜਾਇਜ਼ਾ ਲਿਆ। ਮੇਅਰ ਨੇ ਸੀਵਰੇਜ ਬੋਰਡ ਦੇ ਕਾਰਜਕਾਰੀ ਇੰਜੀਨੀਅਰ (ਐਕਸੀਅਨ) ਨੂੰ ਖਾਸ ਆਦੇਸ਼ ਜਾਰੀ ਕਰਦਿਆਂ ਨਿਰਦੇਸ਼ ਦਿੱਤੇ ਕਿ ਜਿੱਥੇ ਵੀ ਸੀਵਰੇਜ ਪਾਈਪਾਂ ਵਿਛਾਉਣ ਦਾ ਕੰਮ ਰੁਕਿਆ ਹੋਇਆ ਹੈ, ਉਸ ਨੂੰ ਤੁਰੰਤ ਪੂਰਾ ਕੀਤਾ ਜਾਵੇ। ਮੇਅਰ ਨੇ ਕਿਹਾ ਕਿ ਲੰਮਾ ਪਿੰਡ ਚੌਕ ਤੋਂ ਮਕਸੂਦਾਂ ਚੌਕ ਤੱਕ ਰਾਸ਼ਟਰੀ ਰਾਜਮਾਰਗ ਦੇ ਪੂਰੇ ਹਿੱਸੇ ਨਾਲ ਸਬੰਧਤ ਮੁੱਦਿਆਂ ਨੂੰ ਹੱਲ ਕਰਨ ਲਈ ਜਲਦੀ ਹੀ ਰਾਸ਼ਟਰੀ ਰਾਜਮਾਰਗ ਅਥਾਰਟੀ ਤੇ ਡਿਪਟੀ ਕਮਿਸ਼ਨਰ ਨਾਲ ਇਕ ਮੀਟਿੰਗ ਕੀਤੀ ਜਾਵੇਗੀ। ਉਨ੍ਹਾਂ ਦੇ ਤੇਜ਼ੀ ਨਾਲ ਲਾਗੂ ਕਰਨ ਨੂੰ ਯਕੀਨੀ ਬਣਾਉਣ ਲਈ ਐੱਨਐੱਚਏਆਈ ਦੇ ਚੱਲ ਰਹੇ ਪ੍ਰੋਜੈਕਟਾਂ ਬਾਰੇ ਵਿਚਾਰ-ਵਟਾਂਦਰਾ ਕੀਤਾ ਜਾਵੇਗਾ। ਹਾਈਵੇ ਤੇ ਨਾਲੀਆਂ ਦੀ ਸਫਾਈ ਅਤੇ ਮੀਂਹ ਦੇ ਪਾਣੀ ਦੇ ਨਿਕਾਸ ਲਈ ਪਾਈਪ ਪਾਉਣ ਲਈ ਪਹਿਲਾਂ ਹੀ ਟੈਂਡਰ ਜਾਰੀ ਕਰ ਦਿੱਤੇ ਹਨ। ਹਾਲਾਂਕਿ, ਇਨ੍ਹਾਂ ਕੰਮਾਂ ਨੂੰ ਸ਼ੁਰੂ ਕਰਨ ’ਚ ਕੁਝ ਸਮਾਂ ਲੱਗ ਸਕਦਾ ਹੈ। ਮੇਅਰ ਨੇ ਕਿਹਾ ਕਿ ਸ਼ਹਿਰ ਦੇ ਵਸਨੀਕਾਂ ਨੂੰ ਬੁਨਿਆਦੀ ਸਹੂਲਤਾਂ ਨੂੰ ਯਕੀਨੀ ਬਨਾਉਣਾ ਹੈ। ਲੰਮਾ ਪਿੰਡ ਚੌਕ ਤੋਂ ਮਕਸੂਦਾਂ ਚੌਕ ਤੱਕ ਦਾ ਖੇਤਰ ਇੱਕ ਮਹੱਤਵ ਪੂਰਨ ਹਿੱਸਾ ਹੈ, ਜਿੱਥੇ ਟ੍ਰੈਫਿਕ ਪ੍ਰਬੰਧਨ ਤੇ ਸੈਨੀਟੇਸ਼ਨ ਨਾਲ ਸਬੰਧਤ ਮੁੱਦੇ ਹਰ ਕੀਮਤ ’ਤੇ ਹੱਲ ਕੀਤੇ ਜਾਣਗੇ। ਉਨ੍ਹਾਂ ਨਾਲ, ਸਹਾਇਕ ਕਮਿਸ਼ਨਰ ਵਿਕਰਾਂਤ ਵਰਮਾ, ਸੁਪਰਡੈਂਟ ਇੰਜੀਨੀਅਰ ਰਾਹੁਲ ਧਵਨ, ਸੁਪਰਡੈਂਟ (ਤਹਿਬਾਜ਼ਾਰੀ) ਕੁਲਵਿੰਦਰ ਸਿੰਘ, ਐੱਸਡੀਓ (ਬੀ ਐਂਡ ਆਰ) ਤਰੁਨਪ੍ਰੀਤ ਸਿੰਘ, ਜੇਈ ਕਾਰਤਿਕ ਕੁਮਾਰ, ਅਤੇ ਐਕਸੀਅਨ (ਸੀਵਰੇਜ ਬੋਰਡ) ਮਨਿੰਦਰ ਸਿੰਘ ਵੀ ਮੌਜੂਦ ਸਨ।