ਜਲੰਧਰ ’ਚ ਵਿਆਹ ਕਰ ਕੇ ਲਾੜੇ ਤੋਂ ਲਿਆ ‘ਦਾਜ’, ਵਿਦੇਸ਼ ਲੈ ਜਾ ਕੇ ਝੂਠੇ ਕੇਸਾਂ ’ਚ ਫਸਾ ਕਰਵਾ ਦਿੱਤਾ ਡਿਪੋਰਟ

- ਵਿਆਹ ਦੇ ਨਾਂ ’ਤੇ ਠੱਗੀ, ਵਿਦੇਸ਼ੀ ਵਿਆਹ ਦਾ ਜਾਲ, ਜਲੰਧਰ ’ਚ ਦਾਜ ਲੈ ਕੇ ਨੌਜਵਾਨਾਂ ਨੂੰ ਫਸਾਉਣ ਦੀ ਖੇਡ ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਫੁੱਟਬਾਲ ਚੌਕ ਨੇੜੇ ਰਹਿਣ ਵਾਲੀ ਇਕ ਲੜਕੀ ਨੇ ਵਿਦੇਸ਼ ਜਾਣ ਦੀ ਇੱਛਾ ’ਚ ਇਕ ਨੌਜਵਾਨ ਨਾਲ ਵਿਆਹ ਕੀਤਾ। ਵਿਆਹ ਤੋਂ ਬਾਅਦ ਉਸ ਨੇ ਵਿਦੇਸ਼ ਜਾ ਕੇ ਪੜ੍ਹਾਈ ਕਰਨ ਤੇ ਸੈਟਲ ਹੋਣ ਦੀ ਗੱਲ ਕੀਤੀ। ਵਿਆਹ ਤੋਂ ਪਹਿਲਾਂ ਉਸ ਨੇ ਪੜ੍ਹਾਈ ਤੇ ਵੀਜ਼ਾ ਪ੍ਰਕਿਰਿਆ ਦੇ ਨਾਂ ’ਤੇ ‘ਦਾਜ’ ’ਚ ਵੱਡੀ ਰਕਮ ਲਈ ਤੇ ਵਿਦੇਸ਼ ਚਲੀ ਗਈ। ਬਾਅਦ ’ਚ ਉਸ ਨੇ ਆਪਣੇ ਪਤੀ ਨੂੰ ਵੀ ਵਿਦੇਸ਼ ਬੁਲਾਇਆ ਤੇ ਉੱਥੇ ਉਸ ’ਤੇ ਝੂਠੇ ਕੇਸ ਦਰਜ ਕਰਵਾ ਦਿੱਤੇ। ਇਸ ਤੋਂ ਬਾਅਦ ਨੌਜਵਾਨ ਨੂੰ ਕਾਨੂੰਨੀ ਪੇਚੀਦਗੀਆਂ ’ਚ ਫਸਾ ਕੇ ਡਿਪੋਰਟ ਕਰਵਾ ਦਿੱਤਾ ਗਿਆ। ਇਹ ਸਿਰਫ਼ ਇਕ ਮਾਮਲਾ ਨਹੀਂ, ਬਲਕਿ ਜਲੰਧਰ ’ਚ ਅੱਜ-ਕੱਲ੍ਹ ਵਿਆਹ ਦੇ ਨਾਂ ’ਤੇ ਠੱਗੀ ਤੇ ਸ਼ੋਸ਼ਣ ਦੇ ਮਾਮਲਿਆਂ ’ਚ ਤੇਜ਼ੀ ਨਾਲ ਵਾਧਾ ਹੋ ਰਿਹਾ ਹੈ। ਪੁਲਿਸ ਕੋਲ ਇਸ ਤਰ੍ਹਾਂ ਦੇ ਕਈ ਮਾਮਲੇ ਪਹੁੰਚ ਰਹੇ ਹਨ, ਜਿਨ੍ਹਾਂ ’ਚ ਵਿਆਹ ਨੂੰ ਇਕ ਜ਼ਰੀਆ ਬਣਾ ਕੇ ਨੌਜਵਾਨਾਂ ਨੂੰ ਠੱਗਿਆ ਜਾਂਦਾ ਹੈ। ਜਾਂਚ ਅਧਿਕਾਰੀਆਂ ਮੁਤਾਬਕ ਅਜਿਹੇ ਮਾਮਲਿਆਂ ’ਚ ਮੁਲਜ਼ਮ ਅਕਸਰ ਵਿਦੇਸ਼ ’ਚ ਰਹਿੰਦੇ ਹਨ, ਜਿਸ ਕਰ ਕੇ ਕਾਰਵਾਈ ਮੁਸ਼ਕਲ ਹੋ ਜਾਂਦੀ ਹੈ। ਕਈ ਕੇਸ ਅਦਾਲਤਾਂ ’ਚ ਪੈਂਡਿੰਗ ਹਨ ਤੇ ਪੀੜਤ ਲੰਮੇ ਸਮੇਂ ਤੱਕ ਇਨਸਾਫ ਲਈ ਭਟਕਦੇ ਰਹਿੰਦੇ ਹਨ। ਕੁਝ ਮਾਮਲਿਆਂ ’ਚ ਨੌਜਵਾਨ ਸਮਝੌਤਾ ਕਰਨ ਲਈ ਮਜਬੂਰ ਹੋ ਕੇ ਵੱਡੀ ਰਕਮ ਦੇ ਕੇ ਮਾਮਲਾ ਖਤਮ ਕਰਵਾਉਂਦੇ ਹਨ। -------------------------- ਲੋਕ ਕਿਵੇਂ ਫਸਦੇ ਹਨ? ਅਜਿਹੇ ਮਾਮਲਿਆਂ ’ਚ ਆਮ ਤੌਰ ’ਤੇ ਇਕ ਨਿਸ਼ਚਿਤ ਪੈਟਰਨ ਦੇਖਣ ਨੂੰ ਮਿਲਦਾ ਹੈ। ਜ਼ਿਆਦਾਤਰ ਮਾਮਲਿਆਂ ’ਚ ਕੁੜੀਆਂ ਆਇਲਟਸ ਕਰ ਕੇ ਵਿਦੇਸ਼ ਜਾਣ ਲਈ ਇੱਛੁਕ ਹੁੰਦੀਆਂ ਹਨ। ਪਹਿਲਾਂ ਸੋਸ਼ਲ ਮੀਡੀਆ ਜਾਂ ਰਿਸ਼ਤੇਦਾਰਾਂ ਰਾਹੀਂ ਰਿਸ਼ਤਾ ਤੈਅ ਕੀਤਾ ਜਾਂਦਾ ਹੈ। ਕੁੜੀ ਜਾਂ ਉਸਦਾ ਪਰਿਵਾਰ ਖ਼ੁਦ ਨੂੰ ਪੜ੍ਹਿਆ-ਲਿਖਿਆ ਤੇ ਵਿਦੇਸ਼ ’ਚ ਸੈਟਲ ਦੱਸਦਾ ਹੈ। ਵਿਆਹ ਤੋਂ ਪਹਿਲਾਂ ਵੀਜ਼ਾ, ਪੜ੍ਹਾਈ ਜਾਂ ਸੈਟਲਮੈਂਟ ਦੇ ਨਾਂ ’ਤੇ ਪੈਸੇ ਮੰਗੇ ਜਾਂਦੇ ਹਨ। ਵਿਆਹ ਤੋਂ ਬਾਅਦ ਨੌਜਵਾਨ ਨੂੰ ਵਿਦੇਸ਼ ਬੁਲਾਇਆ ਜਾਂਦਾ ਹੈ, ਜਿੱਥੇ ਪਹੁੰਚਦੇ ਹੀ ਉਸ ‘ਤੇ ਘਰੇਲੂ ਹਿੰਸਾ, ਦਾਜ ਜਾਂ ਹੋਰ ਝੂਠੇ ਦੋਸ਼ ਲਗਾ ਕੇ ਕੇਸ ਦਰਜ ਕਰਵਾ ਦਿੱਤੇ ਜਾਂਦੇ ਹਨ। ਇਸ ਤੋਂ ਬਾਅਦ ਜਾਂ ਤਾਂ ਨੌਜਵਾਨ ਨੂੰ ਜੇਲ੍ਹ ਜਾਣਾ ਪੈਂਦਾ ਹੈ ਜਾਂ ਉਸਨੂੰ ਡਿਪੋਰਟ ਕਰ ਦਿੱਤਾ ਜਾਂਦਾ ਹੈ। ------------------------------ ਸੋਚ-ਸਮਝ ਕੇ ਕਰੋ ਰਿਸ਼ਤੇ ਸਾਇਬਰ ਐਕਸਪਰਟ ਪਲਵਿੰਦਰ ਸਿੰਘ ਨੇ ਦੱਸਿਆ ਕਿ ਅਜਿਹੇ ਮਾਮਲਿਆਂ ਤੋਂ ਬਚਣ ਲਈ ਸਾਵਧਾਨੀ ਬਹੁਤ ਜ਼ਰੂਰੀ ਹੈ। ਵਿਆਹ ਤੋਂ ਪਹਿਲਾਂ ਕੁੜੀ ਤੇ ਉਸਦੇ ਪਰਿਵਾਰ ਦੀ ਪੂਰੀ ਜਾਂਚ ਕਰੋ। ਵਿਦੇਸ਼ ’ਚ ਉਸਦੀ ਸਥਿਤੀ, ਪੜ੍ਹਾਈ ਜਾਂ ਨੌਕਰੀ ਦੀ ਸੱਚਾਈ ਨੂੰ ਅਧਿਕਾਰਕ ਦਸਤਾਵੇਜ਼ਾਂ ਨਾਲ ਪੱਕਾ ਕਰੋ। ਕਿਸੇ ਵੀ ਤਰ੍ਹਾਂ ਦਾ ਪੈਸਾ ਦੇਣ ਤੋਂ ਪਹਿਲਾਂ ਕਾਨੂੰਨੀ ਸਲਾਹ ਲਾਜ਼ਮੀ ਲਵੋ। ਵਿਆਹ ਤੋਂ ਬਾਅਦ ਵਿਦੇਸ਼ ਜਾਣ ਤੋਂ ਪਹਿਲਾਂ ਉੱਥੇ ਦੇ ਕਾਨੂੰਨਾਂ ਤੇ ਆਪਣੇ ਅਧਿਕਾਰਾਂ ਬਾਰੇ ਜਾਣਕਾਰੀ ਲਵੋ। ਨਾਲ ਹੀ ਸਾਰੇ ਲੈਣ-ਦੇਣ ਦਾ ਲਿਖਤੀ ਰਿਕਾਰਡ ਤੇ ਸਬੂਤ ਸੰਭਾਲ ਕੇ ਰੱਖੋ। ------------------------------ ਕੇਸ ਸਟਡੀ 1 ਜਲੰਧਰ ਦੇ ਇਕ ਨੌਜਵਾਨ ਨੇ ਕੈਨੇਡਾ ’ਚ ਰਹਿਣ ਵਾਲੀ ਕੁੜੀ ਨਾਲ ਵਿਆਹ ਕੀਤਾ। ਵਿਆਹ ਤੈਅ ਹੋਣ ਤੋਂ ਬਾਅਦ ਉਸਨੇ ਉੱਥੇ ਘਰ ਆਦਿ ਲਈ ਕਰੀਬ 15 ਲੱਖ ਰੁਪਏ ਦਿੱਤੇ। ਵਿਦੇਸ਼ ਪਹੁੰਚਣ ’ਤੇ ਕੁੜੀ ਨੇ ਉਸ ‘ਤੇ ਮਾਰਪੀਟ ਦਾ ਦੋਸ਼ ਲਗਾ ਕੇ ਕੇਸ ਦਰਜ ਕਰਵਾ ਦਿੱਤਾ। ਨੌਜਵਾਨ ਨੂੰ ਜੇਲ੍ਹ ਜਾਣਾ ਪਿਆ ਤੇ ਬਾਅਦ ’ਚ ਡਿਪੋਰਟ ਕਰ ਦਿੱਤਾ ਗਿਆ। ਕੇਸ ਸਟਡੀ 2 ਜਲੰਧਰ ਦੇ ਹੀ ਇਕ ਹੋਰ ਨੌਜਵਾਨ ਨੂੰ ਆਸਟ੍ਰੇਲੀਆ ਬੁਲਾਇਆ ਗਿਆ। ਉੱਥੇ ਵਿਆਹ ਦੇ ਨਾਂ ‘ਤੇ ਲੱਖਾਂ ਰੁਪਏ ਲਏ ਗਏ। ਪਹੁੰਚਦੇ ਹੀ ਪਤਨੀ ਨੇ ਦਹੇਜ ਉਤਪੀੜਨ ਦਾ ਦੋਸ਼ ਲਗਾਇਆ। ਮਾਮਲਾ ਅਦਾਲਤ ਵਿੱਚ ਚੱਲਿਆ ਅਤੇ ਨੌਜਵਾਨ ਨੂੰ ਭਾਰੀ ਜੁਰਮਾਨਾ ਭਰਨਾ ਪਿਆ। ਬਾਅਦ ਵਿੱਚ ਉਸਨੇ ਸਮਝੌਤਾ ਕਰਕੇ ਮਾਮਲਾ ਖਤਮ ਕੀਤਾ। ਕੇਸ ਸਟਡੀ 3 ਨਕੋਦਰ ਨੇੜੇ ਇਕ ਪਿੰਡ ਦੇ ਨੌਜਵਾਨ ਨੇ ਯੂਕੇ ’ਚ ਰਹਿਣ ਵਾਲੀ ਕੁੜੀ ਨਾਲ ਵਿਆਹ ਕੀਤਾ। ਕੁੜੀ ਨੇ ਪਹਿਲਾਂ ਪੜ੍ਹਾਈ ਦੇ ਨਾਂ ‘ਤੇ ਪੈਸੇ ਲਏ। ਵਿਦੇਸ਼ ਪਹੁੰਚਣ ਤੋਂ ਬਾਅਦ ਨੌਜਵਾਨ ਦਾ ਪਾਸਪੋਰਟ ਛੀਣ ਲਿਆ ਗਿਆ ਤੇ ਝੂਠੇ ਕੇਸ ਵਿੱਚ ਫਸਾ ਕੇ ਉਸਨੂੰ ਵਾਪਸ ਭੇਜ ਦਿੱਤਾ ਗਿਆ। ਕੇਸ ਸਟਡੀ 4 ਜਲੰਧਰ ਦੇ ਇਕ ਹੋਰ ਮਾਮਲੇ ਵਿੱਚ ਨੌਜਵਾਨ ਨੂੰ ਅਮਰੀਕਾ ਬੁਲਾਇਆ ਗਿਆ। ਉੱਥੇ ਪਤਨੀ ਨੇ ਇਮੀਗ੍ਰੇਸ਼ਨ ਨਿਯਮਾਂ ਦੀ ਉਲੰਘਣਾ ਦੱਸ ਕੇ ਸ਼ਿਕਾਇਤ ਕੀਤੀ। ਨੌਜਵਾਨ ਨੂੰ ਹਿਰਾਸਤ ’ਚ ਲਿਆ ਗਿਆ ਤੇ ਬਾਅਦ ’ਚ ਡਿਪੋਰਟ ਕਰ ਦਿੱਤਾ ਗਿਆ। ਬਾਅਦ ’ਚ ਪਤਾ ਲੱਗਿਆ ਕਿ ਇਹ ਸਾਰੀ ਯੋਜਨਾ ਪੈਸੇ ਹੜਪਣ ਲਈ ਬਣਾਈ ਗਈ ਸੀ।