ਜਲੰਧਰ ਬੱਸ ਸਟੈਂਡ ਦਾ ਬਦਲੇਗਾ ਚਿਹਰਾ-ਮੋਹਰਾ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਯਾਤਰੀਆਂ ਲਈ ਏਸੀ ਵੈਟਿੰਗ ਹਾਲ, ਖਾਣ-ਪੀਣ ਲਈ ਸਥਾਨਕ ਅਤੇ ਬ੍ਰਾਂਡਡ ਫੂਡ ਕੋਰਟ, ਵਾਟਰ ਏਟੀਐੱਮ ਅਤੇ ਆਰਓ ਸਿਸਟਮ ਵਰਗੀਆਂ ਸੁਵਿਧਾਵਾਂ ਨਾਲ ਜਲੰਧਰ ਦਾ ਬੱਸ ਸਟੈਂਡ ਅੱਪਗ੍ਰੇਡ ਕੀਤਾ ਜਾਵੇਗਾ। ਜਲੰਧਰ ਦੇ ਬੱਸ ਸਟੈਂਡ ਨੂੰ ਅੱਪਗ੍ਰੇਡ ਕਰਨ ਦੀ ਸਰਕਾਰ ਵੱਲੋਂ 16 ਜਨਵਰੀ ਨੂੰ ਐਲਾਨਾ ਕੀਤਾ ਗਿਆ ਸੀ। ਅੱਪਗ੍ਰੇਡੇਸ਼ਨ ਲਈ ਚੰਡੀਗੜ੍ਹ ਦੀ ਟੀਮ ਨੇ ਇੱਥੇ ਦਾ ਸਰਵੇ ਕੀਤਾ ਹੈ। ਜਿਸ ਤੋਂ ਬਾਅਦ ਡ੍ਰਾਇੰਗ ਤਿਆਰ ਕਰਕੇ ਅੱਗੇ ਦਾ ਕੰਮ ਸ਼ੁਰੂ ਕੀਤਾ ਜਾਵੇਗਾ। ਰੋਡਵੇਜ਼ ਡਿਪੋ ਦੇ ਜਨਰਲ ਮੈਨੇਜਰ ਮਨਿੰਦਰ ਸਿੰਘ ਨੇ ਕਿਹਾ ਕਿ ਹੁਣੇ ਪ੍ਰਕਿਰਿਆ ਚੱਲ ਰਹੀ ਹੈ ਅਤੇ ਸੰਭਾਵਨਾ ਹੈ ਕਿ ਜਲਦੀ ਕੰਮ ਸ਼ੁਰੂ ਹੋ ਜਾਵੇਗਾ। ਰਾਜ ਵਿਚ ਪੰਜ ਸ਼ਹਿਰਾਂ ਦੇ ਬੱਸ ਸਟੈਂਡ ਅੱਪਗ੍ਰੇਡ ਕੀਤੇ ਜਾਣੇ ਹਨ। ਯੋਜਨਾ ਲਈ ਡੀਟੇਲ ਪ੍ਰੋਜੈਕਟ ਰਿਪੋਰਟ (ਡੀਪੀਆਰ) ਤਿਆਰ ਹੋਣ ਦੀ ਜਾਣਕਾਰੀ ਮਿਲੀ ਹੈ। ਡੀਪੀਆਰ ਦੇ ਨਾਲ ਹੀ ਪੜਾਅਬੱਧ ਢੰਗ ਨਾਲ ਬੱਸ ਸਟੈਂਡ ਦਾ ਵਿਕਾਸ ਕੰਮ ਸ਼ੁਰੂ ਕੀਤਾ ਜਾਵੇਗਾ। ਵਿਕਾਸ ਕੰਮ ਦੌਰਾਨ ਬੱਸ ਸਟੈਂਡ ਨੂੰ ਪੂਰੀ ਤਰ੍ਹਾਂ ਬੰਦ ਨਹੀਂ ਕੀਤਾ ਜਾਵੇਗਾ, ਸਗੋਂ ਵੱਖ-ਵੱਖ ਪੜਾਵਾਂ ਵਿੱਚ ਕੰਮ ਕੀਤਾ ਜਾਵੇਗਾ ਤਾਂ ਜੋ ਯਾਤਰੀਆਂ ਨੂੰ ਕੋਈ ਪਰੇਸ਼ਾਨੀ ਨਾ ਹੋਵੇ। ਜਲੰਧਰ ਬੱਸ ਸਟੈਂਡ ਤੋਂ ਰੋਜ਼ਾਨਾ 60 ਤੋਂ 70 ਹਜ਼ਾਰ ਯਾਤਰੀ ਸਫਰ ਕਰਦੇ ਹਨ। ਚੰਡੀਗੜ੍ਹ ਤੋਂ ਆਏ ਆਰਕੀਟੈਕਟ ਨੇ ਇੱਥੇ ਦਾ ਮੂਆਇਨਾ ਕੀਤਾ ਹੈ, ਜਿਸ ਬਾਰੇ ਹਾਲੇ ਵਿਸਥਾਰ ਨਹੀਂ ਦਿੱਤਾ ਗਿਆ। ਮਨਿੰਦਰ ਸਿੰਘ, ਜੀਐੱਮ ਰੋਡਵੇਜ਼, ਜਲੰਧਰ ਡਿਪੂ ਨੇ ਦੱਸਿਆ ਕਿ ਬੱਸ ਸਟੈਂਡ ਨੂੰ ਅੱਪਗ੍ਰੇਡ ਕਰਨ ਦਾ ਐਲਾਨ ਪਹਿਲਾਂ ਹੀ ਕੀਤਾ ਜਾ ਚੁੱਕਾ ਹੈ। ਸਾਰਾ ਕੰਮ ਚੰਡੀਗੜ੍ਹ ਦੇ ਅਧਿਕਾਰੀ ਦੇਖ ਰਹੇ ਹਨ। ਚੰਡੀਗੜ੍ਹ ਪੱਧਰ ਤੇ ਇਹ ਫੈਸਲਾ ਲਿਆ ਗਿਆ ਹੈ। ਬੱਸ ਸਟੈਂਡ ਅੱਪਗ੍ਰੇਡ ਹੋਣ ਨਾਲ ਯਾਤਰੀਆਂ ਨੂੰ ਵਧੀਆ ਸੁਵਿਧਾਵਾਂ ਮਿਲਣਗੀਆਂ। ਫਿਜ਼ਿਕਲ ਜਾਂਚ ਤੋਂ ਬਾਅਦ ਅਗਲੀ ਪ੍ਰਕਿਰਿਆ ਦਾ ਇੰਤਜ਼ਾਰ ਹੈ।