ਰਿਅਲ ਅਸਟੇਟ ਕਾਰੋਬਾਰੀ ਦੇ ਘਰ ਈਡੀ ਦਾ ਛਾਪਾ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈਡੀ) ਦੀਆਂ ਟੀਮਾਂ ਪਿਛਲੇ ਦੋ ਦਿਨਾਂ ਤੋਂ ਜਲੰਧਰ ’ਚ ਸਰਗਰਮ ਹਨ। ਸ਼ੁੱਕਰਵਾਰ ਸਵੇਰੇ ਈਡੀ ਦੀਆਂ ਟੀਮਾਂ ਨੇ ਸ਼ਹਿਰ ਦੇ ਇਕ ਪ੍ਰਸਿੱਧ ਰਿਅਲ ਅਸਟੇਟ ਕਾਰੋਬਾਰੀ ਦੇ ਘਰ ਛਾਪੇਮਾਰੀ ਕੀਤੀ। ਜਲੰਧਰ ਦੇ ਪੌਸ਼ ਇਲਾਕੇ ਜੀਟੀਬੀ ਨਗਰ ਵਿੱਚ ਸਥਿਤ ਮਸ਼ਹੂਰ ਰਿਅਲ ਐਸਟੇਟ ਕਾਰੋਬਾਰੀ ਚੰਦਰ ਅਗਰਵਾਲ ਦੇ ਨਿਵਾਸ ‘ਤੇ ਸਵੇਰੇ ਤੜਕੇ ਰੇਡ ਕੀਤੀ ਗਈ। ਸ਼ਾਮ ਦੇ ਦੇਰ ਤੱਕ ਈਡੀ ਦੀ ਜਾਂਚ ਜਾਰੀ ਰਹੀ। ਇਹ ਕਾਰਵਾਈ ਮਨੀ ਲਾਂਡ੍ਰਿੰਗ ਤੇ ਜ਼ਮੀਨ ਧੋਖਾਧੜੀ ਦੇ ਮਾਮਲੇ ਨੂੰ ਲੈ ਕੇ ਕੀਤੀ ਜਾ ਰਹੀ ਹੈ। ਜਾਂਚ ਟੀਮ ਸਵੇਰੇ ਹੀ ਕਾਰੋਬਾਰੀ ਦੇ ਘਰ ਪਹੁੰਚ ਗਈ ਸੀ, ਜਿਸ ਤੋਂ ਬਾਅਦ ਘਰ ਦੇ ਅੰਦਰ ਲਗਾਤਾਰ ਤਲਾਸ਼ੀ ਮੁਹਿੰਮ ਚਲਦੀ ਰਹੀ। ਟੀਮ ਨੇ ਘਰ ਵਿੱਚੋਂ ਇਲੈਕਟ੍ਰਾਨਿਕ ਗੈਜਟਸ ਦੀ ਵੀ ਜਾਂਚ ਕੀਤੀ। ਜਾਣਕਾਰੀ ਮੁਤਾਬਕ ਪੰਜਾਬ ਦੇ ਕੈਬਨਿਟ ਮੰਤਰੀ ਸੰਜੀਵ ਅਰੋੜਾ ਨਾਲ ਅਗਰਵਾਲ ਦੇ ਸਬੰਧਾਂ ਦੇ ਐਂਗਲ ਤੋਂ ਵੀ ਜਾਂਚ ਕੀਤੀ ਜਾ ਰਹੀ ਹੈ। ਅਗਰਵਾਲ ਨੂੰ ਸੰਜੀਵ ਅਰੋੜਾ ਦਾ ਕਰੀਬੀ ਮੰਨਿਆ ਜਾਂਦਾ ਹੈ। ਜਦੋਂ ਜਲੰਧਰ ’ਚ ਈਡੀ ਦੀ ਟੀਮ ਜੀਟੀਬੀ ਨਗਰ ਪਹੁੰਚੀ, ਉਸੇ ਸਮੇਂ ਈਡੀ ਦੀ ਇੱਕ ਹੋਰ ਟੀਮ ਕੈਬਨਿਟ ਮੰਤਰੀ ਸੰਜੀਵ ਅਰੋੜਾ ਦੇ ਠਿਕਾਣਿਆਂ ‘ਤੇ ਵੀ ਜਾਂਚ ਲਈ ਪਹੁੰਚੀ। ਈਡੀ ਇਹ ਪਤਾ ਲਗਾਉਣ ਵਿੱਚ ਜੁਟੀ ਹੈ ਕਿ ਕੀ ਦੋਵਾਂ ਦੇ ਕਾਰੋਬਾਰੀ ਤੇ ਵਿੱਤੀ ਲੈਣ-ਦੇਣ ਵਿੱਚ ਕੋਈ ਸੰਬੰਧ ਹੈ। --------------- ਮਨੀ ਲਾਂਡ੍ਰਿੰਗ ਤੇ ਜ਼ਮੀਨ ਧੋਖਾਧੜੀ ਦੇ ਦੋਸ਼ ਈਡੀ ਦੀ ਇਹ ਕਾਰਵਾਈ ਕਥਿਤ ਤੌਰ ‘ਤੇ ਜ਼ਮੀਨ ਧੋਖਾਧੜੀ ਤੇ ਮਨੀ ਲਾਂਡਰਿੰਗ ਦੇ ਗੰਭੀਰ ਦੋਸ਼ਾਂ ਕਾਰਨ ਕੀਤੀ ਗਈ ਹੈ। ਈਡੀ ਅਧਿਕਾਰੀਆਂ ਨੇ ਅਗਰਵਾਲ ਦੇ ਘਰ ਤੋਂ ਮਹੱਤਵਪੂਰਨ ਦਸਤਾਵੇਜ਼, ਬੈਂਕ ਖਾਤਿਆਂ ਦੀ ਜਾਣਕਾਰੀ ਅਤੇ ਡਿਜ਼ਿਟਲ ਸੰਪਤੀਆਂ ਦੇ ਰਿਕਾਰਡ ਦੀ ਜਾਂਚ ਕੀਤੀ। --------------------- ਮਿੱਤਲ ਪਰਿਵਾਰ ਵੀ ਜਾਂਚ ਦੇ ਘੇਰੇ ’ਚ ਲਵਲੀ ਗਰੁੱਪ ’ਤੇ ਈਡੀ ਦੀ ਲਗਾਤਾਰ 24 ਘੰਟੇ ਚੱਲੀ ਰੇਡ ਤੋਂ ਬਾਅਦ ਮਹੱਤਵਪੂਰਨ ਰਿਕਾਰਡ ਜ਼ਬਤ ਕੀਤੇ ਗਏ ਹਨ। ਲਵਲੀ ਪ੍ਰੋਫੈਸ਼ਨਲ ਯੂਨੀਵਰਸਿਟੀ ਦੇ ਚਾਂਸਲਰ ਤੇ ਰਾਜਸਭਾ ਮੈਂਬਰ ਅਸ਼ੋਕ ਮਿੱਤਲ, ਉਨ੍ਹਾਂ ਦੇ ਭਰਾ ਰਮੇਸ਼ ਮਿੱਤਲ, ਨਰੇਸ਼ ਮਿੱਤਲ ਅਤੇ ਹੋਰ ਕਾਰੋਬਾਰ ਨਾਲ ਜੁੜੇ ਪਰਿਵਾਰਕ ਮੈਂਬਰਾਂ ਦੇ ਦਸਤਾਵੇਜ਼ ਈਡੀ ਵੱਲੋਂ ਜ਼ਬਤ ਕੀਤੇ ਗਏ ਹਨ। ਵਿਭਾਗੀ ਸੂਤਰਾਂ ਮੁਤਾਬਕ, ਈਡੀ ਹੁਣ ਜਾਂਚ ਦੇ ਦੌਰਾਨ ਉਨ੍ਹਾਂ ਦੇ ਹੋਰ ਪਰਿਵਾਰਕ ਮੈਂਬਰਾਂ ਨੂੰ ਵੀ ਪੁੱਛਗਿੱਛ ਲਈ ਬੁਲਾ ਸਕਦੀ ਹੈ। ਲਵਲੀ ਗਰੁੱਪ ਦੇ ਯੂਨੀਅਨ ਕਾਲਜ ਆਫ ਬਿਜ਼ਨਸ ਐਂਡ ਮਾਸਟਰਜ਼ ਤੇ ਟੀਈਟੀਅਰ ਕਾਲਜ ਆਫ ਬਿਜ਼ਨਸ ਗੁਰੁਗ੍ਰਾਮ ਵਿੱਚ ਸਥਿਤ ਹਨ, ਜਿਥੋਂ ਇਹ ਜਾਂਚ ਜਲੰਧਰ ਤੱਕ ਪੁੱਜੀ ਹੈ।