ਸੀਵਰਮੈਨ ਨਾਲ ਕੁੱਟਮਾਰ ਦੇ ਦੋਸ਼, ਕੌਂਸਲਰ ਨੇ ਦੋਸ਼ ਨਕਾਰੇ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ : ਵਾਰਡ ਨੰਬਰ 20 ਵਿੱਚ ਕੌਂਸਲਰ ਦੇ ਪੁੱਤਰ ‘ਤੇ ਇਕ ਸੀਵਰਮੈਨ ਵੱਲੋਂ ਮਾਰਪੀਟ ਦੇ ਦੋਸ਼ ਲਗਾਏ ਗਏ ਹਨ। ਇਸ ਦੇ ਵਿਰੋਧ ਵਿੱਚ ਨਗਰ ਨਿਗਮ ਸੀਵਰਮੈਨ ਇੰਪਲਾਈ ਯੂਨੀਅਨ ਨੇ ਬੁੱਧਵਾਰ ਨੂੰ ਸੈਂਟਰਲ ਹਲਕੇ ਵਿੱਚ ਸਫਾਈ ਅਤੇ ਸੀਵਰੇਜ ਦਾ ਕੰਮ ਬੰਦ ਕਰ ਦਿੱਤਾ। ਯੂਨੀਅਨ ਨੇ ਆਰੋਪ ਲਗਾਇਆ ਕਿ ਵਾਰਡ ਨੰਬਰ 20 ਦੇ ਕੌਂਸਲਰ ਮਨਮੋਹਨ ਰਾਜੂ ਦੇ ਪੁੱਤਰ ਨੇ ਡਿਊਟੀ ‘ਤੇ ਗਏ ਸੀਵਰਮੈਨ ਰੌਕੀ ਗਿੱਲ ਨਾਲ ਕੁੱਟਮਾਰ ਅਤੇ ਗਾਲੀ-ਗਲੋਚ ਕੀਤੀ। ਯੂਨੀਅਨ ਪ੍ਰਧਾਨ ਜਤਿੰਦਰ ਜੋਂਟੀ ਅਤੇ ਛੋਟਾ ਰਾਜੂ ਨੇ ਦੱਸਿਆ ਕਿ ਰੌਕੀ ਗਿੱਲ ਵਾਰਡ-20 ਵਿੱਚ ਸੀਵਰੇਜ ਦੀ ਸ਼ਿਕਾਇਤ ਦੂਰ ਕਰਨ ਗਿਆ ਸੀ। ਉੱਥੇ ਪਾਰਸ਼ਦ ਮਨਮੋਹਨ ਰਾਜੂ ਦੇ ਪੁੱਤਰ ਨਾਲ ਵਾਰਡ ਦੀ ਸ਼ਿਕਾਇਤ ਨੂੰ ਲੈ ਕੇ ਬਹਿਸ ਹੋ ਗਈ। ਰੌਕੀ ਦਾ ਦੋਸ਼ ਹੈ ਕਿ ਕੌਂਸਲਰ ਦੇ ਪੁੱਤਰ ਨੇ ਉਸ ਨਾਲ ਕੁੱਟਮਾਰ ਕੀਤੀ ਤੇ ਅਪਸ਼ਬਦ ਬੋਲੇ। ਘਟਨਾ ਦੀ ਜਾਣਕਾਰੀ ਮਿਲਦੇ ਹੀ ਯੂਨੀਅਨ ਮੈਂਬਰ ਮਦਨ ਫਲੋਰ ਮਿਲ ਚੌਕ ਸਥਿਤ ਨਿਗਮ ਜੋਨ ਦਫ਼ਤਰ ‘ਤੇ ਇਕੱਠੇ ਹੋ ਗਏ। ਪ੍ਰਦਰਸ਼ਨਕਾਰੀਆਂ ਨੇ ਕੌਂਸਲਰ, ਉਸ ਦੇ ਪੁੱਤਰ ਅਤੇ ਸਰਕਾਰ ਖ਼ਿਲਾਫ਼ ਨਾਅਰੇਬਾਜ਼ੀ ਕੀਤੀ। ਇਸ ਤੋਂ ਬਾਅਦ ਬਸ਼ੀਰਪੁਰਾ ਸਥਿਤ ਵਾਰਡ-20 ਦੇ ਪਾਰਸ਼ਦ ਦਫ਼ਤਰ ਦਾ ਘਿਰਾਓ ਕੀਤਾ ਗਿਆ। ਧਰਨੇ ਵਿੱਚ ਪਵਨ ਬਾਬਾ, ਗੋਲੂ, ਅਰੁਣ ਗਿੱਲ ਸਮੇਤ ਸੀਵਰਮੈਨ ਯੂਨੀਅਨ ਦੇ ਕਈ ਕਰਮਚਾਰੀ ਸ਼ਾਮਲ ਹੋਏ। ਗੁੱਸੇ ਵਿੱਚ ਆਏ ਕਰਮਚਾਰੀਆਂ ਨੇ ਮਦਨ ਫਲੋਰ ਮਿਲ ਚੌਕ ‘ਤੇ ਵਾਹਨ ਖੜ੍ਹੇ ਕਰਕੇ ਸੜਕ ਜਾਮ ਕਰ ਦਿੱਤੀ। ਪਵਨ ਬਾਬਾ ਨੇ ਕਿਹਾ ਕਿ ਵਾਰਡ ਦਾ ਕੌਂਸਲਰ ਹੀ ਨਿਗਮ ਕਰਮਚਾਰੀਆਂ ਨਾਲ ਕੰਮ ਸਬੰਧੀ ਗੱਲ ਕਰੇ ਤੇ ਕੌਂਸਲਰ ਦੇ ਘਰ ਦਾ ਕੋਈ ਮੈਂਬਰ ਕਰਮਚਾਰੀਆਂ ਨਾਲ ਬਦਸਲੂਕੀ ਨਾ ਕਰੇ। ਯੂਨੀਅਨ ਨੇ ਚਿਤਾਵਨੀ ਦਿੱਤੀ ਕਿ ਮੇਅਰ ਵਨੀਤ ਧੀਰ ਨੂੰ ਮੰਗ ਪੱਤਰ ਸੌਂਪਿਆ ਜਾਵੇਗਾ। ਮੰਗ ਕੀਤੀ ਗਈ ਹੈ ਕਿ 85 ਵਾਰਡਾਂ ਵਿੱਚ ਸਾਰੇ ਪਾਰਸ਼ਦ ਖੁਦ ਨਿਗਮ ਕਰਮਚਾਰੀਆਂ ਨਾਲ ਗੱਲਬਾਤ ਕਰਨ ਅਤੇ ਪਰਿਵਾਰ ਦਾ ਕੋਈ ਮੈਂਬਰ ਦਖਲ ਨਾ ਦੇਵੇ। ਉੱਧਰ ਵਾਰਡ-20 ਦੇ ਪਾਰਸ਼ਦ ਮਨਮੋਹਨ ਰਾਜੂ ਨੇ ਸਾਰੇ ਦੋਸ਼ਾਂ ਨੂੰ ਨਕਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਸੀਵਰਮੈਨ ਨੇ ਉਨ੍ਹਾਂ ਦੇ ਪੁੱਤਰ ਨਾਲ ਗਲਤ ਵਿਵਹਾਰ ਕੀਤਾ ਸੀ, ਇਸ ਕਰਕੇ ਪੁੱਤਰ ਨੇ ਉਸ ਨੂੰ ਦਫ਼ਤਰ ਤੋਂ ਬਾਹਰ ਕੱਢ ਦਿੱਤਾ। ਕੁੱਟਮਾਰ ਦੇ ਦੋਸ਼ ਪੂਰੀ ਤਰ੍ਹਾਂ ਝੂਠੇ ਹਨ। ਰਾਜੂ ਨੇ ਕਿਹਾ ਕਿ ਉਹ ਲੋਕਾਂ ਦੇ ਕੰਮ ਕਰਵਾ ਰਹੇ ਹਨ ਪਰ ਜੋ ਵੀ ਕੰਮ ਵਿੱਚ ਰੁਕਾਵਟ ਪੈਦਾ ਕਰੇਗਾ, ਉਸ ਦੀ ਜ਼ਿੰਮੇਵਾਰੀ ਤੈਅ ਹੋਣੀ ਚਾਹੀਦੀ ਹੈ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਕੋਲ ਸੀਸੀਟੀਵੀ ਕੈਮਰੇ ਦੀ ਫੁਟੇਜ ਹੈ ਜਿਸ ਵਿੱਚ ਸਾਫ਼ ਦਿਖ ਰਿਹਾ ਹੈ ਕਿ ਸੀਵਰਮੈਨ ਬਿਲਕੁਲ ਠੀਕ ਹਾਲਤ ’ਚ ਦਫ਼ਤਰ ਤੋਂ ਬਾਹਰ ਗਿਆ ਅਤੇ ਬਾਅਦ ਵਿੱਚ ਉਸ ਨੇ ਆਪਣੇ ਕੱਪੜੇ ਖੁਦ ਫਾੜੇ। ਨਿਗਮ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਗੱਲਬਾਤ ਰਾਹੀਂ ਇਸ ਮਾਮਲੇ ਦਾ ਹੱਲ ਕੱਢਿਆ ਜਾਵੇਗਾ।