ਐੱਸਜੀਟੀਬੀ ਪਬਲਿਕ ਸਕੂਲ ’ਚ ਮਜ਼ਦੂਰ ਦਿਵਸ ਮਨਾਇਆ

ਸੁਖਵਿੰਦਰ ਸਿੰਘ, ਪੰਜਾਬੀ ਜਾਗਰਣ, ਭੋਗਪੁਰ : ਸਹਾਇਕ ਸਟਾਫ ਦੀ ਮਿਹਨਤ ਤੇ ਸਮਰਪਣ ਨੂੰ ਸਨਮਾਨ ਦੇਣ ਲਈ ਐੱਸਜੀਟੀਬੀ ਪਬਲਿਕ ਸਕੂਲ, ਸਨੌਰਾ ਵਿੱਚ ਮਜ਼ਦੂਰ ਦਿਵਸ ਬੜੀ ਉਤਸ਼ਾਹ ਨਾਲ ਮਨਾਇਆ ਗਿਆ। ਇਹ ਮੌਕਾ ਉਨ੍ਹਾਂ ਲੋਕਾਂ ਦੇ ਅਹਿਮ ਯੋਗਦਾਨ ਨੂੰ ਸਲਾਮ ਕਰਨ ਲਈ ਸੀ, ਜੋ ਅਕਸਰ ਸਮਾਜ ਦੇ ਅਣਸੁਣੇ ਹੀਰੋ ਹੁੰਦੇ ਹਨ। ਇਸ ਸਮਾਗਮ ਦਾ ਮਕਸਦ ਵਿਦਿਆਰਥੀਆਂ ’ਚ ਮਜ਼ਦੂਰ ਵਰਗ ਲਈ ਸਤਿਕਾਰ ਤੇ ਕਦਰ ਦੀ ਭਾਵਨਾ ਪੈਦਾ ਕਰਨਾ ਸੀ, ਕਿਉਂਕਿ ਇਹੀ ਲੋਕ ਸਾਡੇ ਸਮਾਜ ਦੇ ਅਸਲ ਨਿਰਮਾਤਾ ਹਨ। ਐੱਸਜੀਟੀਬੀ ਪਬਲਿਕ ਸਕੂਲ ’ਚ ਅਸੀਂ ਹਮੇਸ਼ਾਂ ਛੋਟੀਆਂ ਪਰ ਅਰਥਪੂਰਨ ਗਤੀਵਿਧੀਆਂ ਰਾਹੀਂ ਸੰਵੇਦਨਸ਼ੀਲਤਾ ਤੇ ਕ੍ਰਿਤਜਤਾ ਨੂੰ ਉਤਸਾਹਿਤ ਕਰਨ ’ਚ ਵਿਸ਼ਵਾਸ ਕਰਦੇ ਹਾਂ ਅਤੇ ਇਹ ਸਮਾਗਮ ਇਸੇ ਸੋਚ ਦੀ ਝਲਕ ਸੀ। ਵਿਦਿਆਰਥੀਆਂ ਨੇ ਨੈਨੀਆਂ, ਡਰਾਈਵਰਾਂ, ਕੰਡਕਟਰਾਂ, ਗਾਰਡਾਂ ਤੇ ਸਫਾਈ ਕਰਮਚਾਰੀਆਂ ਦੀ ਅਨਮੋਲ ਸੇਵਾ ਲਈ ਭਾਵੁਕ ਭਾਸ਼ਣਾਂ ਤੇ ਕਵਿਤਾਵਾਂ ਰਾਹੀਂ ਆਪਣੀ ਕਦਰ ਪ੍ਰਗਟ ਕੀਤੀ। ਪ੍ਰੋਗਰਾਮ ’ਚ ਸਮੂਹ ਗੀਤ, ਸਕਿੱਟਾਂ ਤੇ ਨਾਟਕ ਵੀ ਪੇਸ਼ ਕੀਤੇ ਗਏ, ਜਿਨ੍ਹਾਂ ’ਚ ਮਿਹਨਤ ਦੀ ਮਹੱਤਤਾ ਨੂੰ ਦਰਸਾਇਆ ਗਿਆ। ਸਤਿਕਾਰ ਦੇ ਤੌਰ ’ਤੇ ਵਿਦਿਆਰਥੀਆਂ ਨੇ ਉਨ੍ਹਾਂ ਨੂੰ ਤੋਹਫੇ ਦਿੱਤੇ ਤੇ ਆਪਣੇ ਹੱਥਾਂ ਨਾਲ ਰਿਫਰੈਸ਼ਮੈਂਟ ਵੀ ਪੇਸ਼ ਕੀਤੀ। ਇਸ ਸਮਾਗਮ ਨੇ ਵਿਦਿਆਰਥੀਆਂ ’ਚ ਇਹ ਸਮਝ ਵਧਾਈ ਕਿ ਇਹ ਲੋਕ ਸਕੂਲ ਦੀ ਸੁਚਾਰੂ ਕਾਰਗੁਜ਼ਾਰੀ ’ਚ ਕਿੰਨਾ ਮਹੱਤਵਪੂਰਨ ਯੋਗਦਾਨ ਪਾਉਂਦੇ ਹਨ। ਸਹਾਇਕ ਸਟਾਫ ਇਸ ਪਿਆਰ ਭਰੇ ਸਨਮਾਨ ਤੋਂ ਬਹੁਤ ਪ੍ਰਭਾਵਿਤ ਹੋਏ ਤੇ ਉਨ੍ਹਾਂ ਨੇ ਸਕੂਲ ਪ੍ਰਬੰਧਕਾਂ, ਅਧਿਆਪਕਾਂ ਤੇ ਵਿਦਿਆਰਥੀਆਂ ਦਾ ਦਿਲੋਂ ਧੰਨਵਾਦ ਕੀਤਾ।