ਹੰਗਾਮੇ ਵਿਚਕਾਰ ਢਾਈ ਮਿੰਟ ’ਚ 569 ਕਰੋੜ ਦਾ ਨਗਰ ਨਿਗਮ ਬਜਟ ਪਾਸ, ਪਿਛਲੇ ਸਾਲ ਦੇ ਮੁਕਾਬਲੇ 15 ਫੀਸਦੀ ਦਾ ਵਾਧਾ

ਜਾਸ, ਜਾਲੰਧਰ ਨਗਰ ਨਿਗਮ ਹਾਊਸ ਵਿਚ ਸਾਲ 2026-27 ਦਾ 569 ਕਰੋੜ ਦਾ ਬਜਟ ਹੰਗਾਮੇ ਦੇ ਵਿਚਕਾਰ ਢਾਈ ਮਿੰਟ ਵਿਚ ਪਾਸ ਹੋ ਗਿਆ। ਵਿਛੜੀਆਂ ਰੂਹਾਂ ਦੀ ਸ਼ਾਂਤੀ ਲਈ ਦੋ ਮਿੰਟ ਦਾ ਮੌਨ ਰੱਖਣ ਦੇ ਬਾਅਦ ਜਦੋਂ ਹੀ ਮੀਟਿੰਗ ਸ਼ੁਰੂ ਹੋਈ, ਤਾਂ ਮੇਅਰ ਵਨੀਤ ਧੀਰ ਨੇ ਬਜਟ ਪੇਸ਼ ਕਰਨ ਲਈ ਕਿਹਾ। ਕਾਂਗਰਸ ਦੇ ਕੌਂਸਲਰ ਪਰਮਜੋਤ ਸਿੰਘ ਸ਼ੈਰੀ ਚੱਡਾ ਅਤੇ ਗੁਰਨਾਮ ਸਿੰਘ ਮੁਲਤਾਨੀ ਨੇ ਪਹਿਲਾਂ ਸਿਫ਼ਰ ਕਾਲ ਦੀ ਮੰਗ ਕਰ ਦਿੱਤੀ ਅਤੇ ਬਜਟ ਪੇਸ਼ ਕਰਨ ਤੋਂ ਰੋਕਿਆ। ਕਾਂਗਰਸ ਦੇ ਹੋਰ ਕੌਂਸਲਰਾਂ ਅਤੇ ਭਾਜਪਾ ਦੇ ਕੌਂਸਲਰਾਂ ਨੇ ਵੀ ਜ਼ੀਰੋ ਕਾਲ ਦੀ ਮੰਗ ਕਰ ਕੇ ਹੰਗਾਮਾ ਕਰ ਦਿੱਤਾ। ਇਸ ਦੇ ਜਵਾਬ ਵਿਚ ਆਮ ਆਦਮੀ ਪਾਰਟੀ ਦੇ ਕੌਂਸਲਰ ਵੀ ਵਿਰੋਧ ਦੇ ਸਾਹਮਣੇ ਡਟ ਗਏ ਅਤੇ ਲਗਪਗ ਢਾਈ ਮਿੰਟ ਤੱਕ ਨਾਅਰੇਬਾਜ਼ੀ ਚੱਲਦੀ ਰਹੀ। ਇਸ ਦੌਰਾਨ ਨਗਰ ਨਿਗਮ ਸਟਾਫ ਨੇ ਬਜਟ ਮਤਾ ਪੜ੍ਹ ਦਿੱਤਾ ਅਤੇ ਮੇਅਰ ਵਨੀਤ ਧੀਰ ਨੇ ਬਜਟ ਪਾਸ ਕਰ ਦਿੱਤਾ। ਵਿਰੋਧੀ ਪਾਰਟੀ ਕਾਂਗਰਸ ਅਤੇ ਭਾਜਪਾ ਦੇ ਪਹਿਲੇ ਦੋ ਮਿੰਟ ਹੀ ਤੇਵਰ ਨਜ਼ਰ ਆਏ ਅਤੇ ਉਸ ਤੋਂ ਬਾਅਦ ਲਗਪਗ ਚਾਰ ਘੰਟੇ ਤੱਕ ਮੀਟਿੰਗ ਬਹੁਤ ਹੀ ਸ਼ਾਂਤ ਰਹੀ। ਹਾਲਾਂਕਿ ਕਈ ਮੁੱਦਿਆਂ ਤੇ ਵਿਰੋਧ ਦੇ ਕੋਲ ਸੱਤਾ ਧਿਰ ਨੂੰ ਘੇਰਨ ਦਾ ਮੌਕਾ ਸੀ, ਪਰ ਇਕਜੁੱਟਤਾ ਦੀ ਕਮੀ ਕਾਰਨ ਉਹ ਮੇਅਰ ਨੂੰ ਨਹੀਂ ਘੇਰ ਸਕੇ। ਇਸ ਵਾਰ ਦਾ ਬਜਟ ਸਾਲ 2025-26 ਦੇ ਮੁਕਾਬਲੇ 15 ਫੀਸਦੀ ਵੱਧ ਹੈ। ਨਗਰ ਨਿਗਮ ਨੂੰ ਸਭ ਤੋਂ ਵੱਧ ਪ੍ਰਾਪਤੀ ਪੰਜਾਬ ਸਰਕਾਰ ਤੋਂ ਜੀਐੱਸਟੀ ਦੇ ਰੂਪ ਵਿਚ 310 ਕਰੋੜ ਰੁਪਏ ਹੋਣ ਦੀ ਉਮੀਦ ਹੈ। ਸਭ ਤੋਂ ਵੱਡਾ ਖਰਚ 312 ਕਰੋੜ ਰੁਪਏ ਤਨਖਾਹ ਅਤੇ ਪੈਨਸ਼ਨ ਤੇ ਹੈ। ਰੈੱਡ ਕ੍ਰਾਸ ਭਵਨ ਵਿਚ ਹੋਈ ਮੀਟਿੰਗ ਵਿਚ ਬਜਟ ਵਿਚ ਵਿਕਾਸ ਕਾਰਜਾਂ ਲਈ 200 ਕਰੋੜ ਰੁਪਏ ਰੱਖੇ ਗਏ ਹਨ, ਜਦਕਿ ਹੋਰ ਖਰਚਾਂ ਲਈ 56 ਕਰੋੜ ਦਾ ਬੰਦੋਬਸਤ ਹੈ। ਉਥੇ ਹੀ, ਨਿਗਮ ਦੇ ਪੱਧਰ ਤੇ ਸਭ ਤੋਂ ਵੱਧ ਆਮਦਨ 100 ਕਰੋੜ ਰੁਪਏ ਬਿਲਡਿੰਗ ਬ੍ਰਾਂਚ ਤੋਂ ਹੋਣ ਦੀ ਉਮੀਦ ਹੈ। ਸਾਲ 2025-26 ਵਿਚ ਸਿਰਫ ਬਿਲਡਿੰਗ ਬ੍ਰਾਂਚ ਹੀ ਟੀਚਾ ਨੂੰ ਪੂਰਾ ਕਰ ਸਕੀ। ਪਿਛਲੇ ਸਾਲ ਬਿਲਡਿੰਗ ਬ੍ਰਾਂਚ ਦਾ ਟੀਚਾ 64.40 ਕਰੋੜ ਸੀ। ਨਵੇਂ ਸਾਲ ਵਿਚ ਪ੍ਰਾਪਰਟੀ ਟੈਕਸ ਤੋਂ 80 ਕਰੋੜ ਰੁਪਏ ਦੀ ਆਮਦਨ ਦੀ ਉਮੀਦ ਹੈ। ਇਸ਼ਤਿਹਾਰ ਸ਼ਾਖਾ ਤੋਂ 14 ਕਰੋੜ, ਐਕਸਾਈਜ਼ ਡਿਊਟੀ ਤੋਂ 8 ਕਰੋੜ ਅਤੇ ਬਿਜਲੀ ਤੇ ਚੁੰਗੀ ਤੋਂ 1 ਕਰੋੜ ਰੁਪਏ ਮਿਲਣ ਦੀ ਉਮੀਦ ਹੈ। ਹੈਲਥ ਬ੍ਰਾਂਚ ਨੂੰ ਵੀ ਇਸ ਵਾਰ 15 ਕਰੋੜ ਰੁਪਏ ਦੀ ਆਮਦਨ ਦਾ ਟੀਚਾ ਦਿੱਤਾ ਗਿਆ ਹੈ। ਵਾਟਰ ਸਪਲਾਈ ਡਿਪਾਰਟਮੈਂਟ ਦਾ ਟੀਚਾ 25 ਕਰੋੜ ਹੈ। ਨਗਰ ਨਿਗਮ ਨੂੰ ਜੋ ਆਮਦਨ ਹੋਵੇਗੀ, ਉਸ ਵਿੱਚੋਂ ਸੜਕਾਂ ਲਈ 50 ਕਰੋੜ, ਬਾਗਬਾਨੀ ਵਿਭਾਗ ਲਈ 8 ਕਰੋੜ, ਡੇਅਰੀ ਕੰਪਲੈਕਸ ਦੀਆਂ ਸੜਕਾਂ ਲਈ 2 ਕਰੋੜ, ਵਰਿਆਣਾ ਡੰਪ ਸਮੇਤ ਹੋਰ ਸਾਈਟਾਂ ਤੇ ਜ਼ਮੀਨ ਦੀ ਖਰੀਦ ਲਈ 15 ਕਰੋੜ, ਸਾਲਿਡ ਵੈਸਟ ਮੈਨੇਜਮੈਂਟ ਪ੍ਰੋਜੈਕਟ-ਬਾਇਓਮਾਈਨਿੰਗ ਲਈ 30 ਕਰੋੜ, ਬਿਜਲੀ ਦੇ ਬਿੱਲ ਲਈ 22 ਕਰੋੜ, ਸੀਵਰੇਜ ਪੰਪਿੰਗ ਸਟੇਸ਼ਨ ਅਤੇ ਸੁਪਰ ਸੱਕਸ਼ਨ ਸਫਾਈ ਲਈ 15 ਕਰੋੜ ਦਾ ਖਰਚ ਹੋਵੇਗਾ। ਸਾਲ 2026-27 ਵਿਚ ਪੈਟਰੋਲ ਡੀਜ਼ਲ ਤੇ 21 ਕਰੋੜ, ਸਾਫ਼-ਸਫਾਈ ਅਤੇ ਹੈਲਥ ਬ੍ਰਾਂਚ ਲਈ 8 ਕਰੋੜ, ਵਾਹਨਾਂ ਦੇ ਰੱਖ-ਰਖਾਅ ਲਈ 5 ਕਰੋੜ ਦਾ ਬਜਟ ਰੱਖਿਆ ਗਿਆ ਹੈ। ਬਜਟ ਸਾਰ **ਆਮਦਨ** - ਜੀਐੱਸਟੀ ’ਚ ਹਿੱਸਾ 310 ਕਰੋੜ - ਐਕਸਾਈਜ਼ ਡਿਊਟੀ 8 ਕਰੋੜ - ਪ੍ਰਾਪਰਟੀ ਟੈਕਸ 80 ਕਰੋੜ - ਬਿਲਡਿੰਗ ਬ੍ਰਾਂਚ 100 ਕਰੋੜ - ਇਸ਼ਤਿਹਾਰ 14 ਕਰੋੜ - ਹੈਲਥ ਬ੍ਰਾਂਚ 15 ਕਰੋੜ - ਗਊ ਸੈੱਸ 2 ਕਰੋੜ - ਟੈਕਸ, ਲਾਇਸੈਂਸ ਅਤੇ ਰੇਂਟ 9.10 ਕਰੋੜ - ਹੋਰ ਸਰੋਤ 30.9 ਕਰੋੜ ਕੁੱਲ 569 ਕਰੋੜ ਖਰਚ - ਤਨਖਾਹ ਤੇ ਪੈਨਸ਼ਨ 312.70 ਕਰੋੜ - ਸੜਕ ਨਿਰਮਾਣ 50 ਕਰੋੜ - ਹਾਰਟੀਕਲਚਰ 8 ਕਰੋੜ - ਸਾਲਿਡ ਵੈਸਟ ਪ੍ਰੋਜੈਕਟ-ਬਾਇਓਮਾਈਨਿੰਗ 30 ਕਰੋੜ - ਜ਼ਮੀਨ ਦੀ ਖਰੀਦ 15 ਕਰੋੜ - ਸਟ੍ਰੀਟ ਲਾਈਟਸ ਰੱਖ-ਰਖਾਅ 10 ਕਰੋੜ - ਬਿਜਲੀ ਦੇ ਬਿੱਲ 32 ਕਰੋੜ - ਸੀਐੱਲਸੀ ਇੰਫਰਾਸਟਰਕਚਰ 9 ਕਰੋੜ - ਵਾਟਰ ਸਪਲਾਈ ਸੀਵਰੇਜ 9 ਕਰੋੜ - ਟਿਊਬਵੈੱਲ ਡਿਸਪੋਜ਼ਲ ਬਿਜਲੀ ਬਿੱਲ 22 ਕਰੋੜ - ਸੀਵਰੇਜ ਪੰਪਿੰਗ ਸਟੇਸ਼ਨ-ਐੱਸਟੀਪੀ 22 ਕਰੋੜ **ਹੋਰ ਖਰਚ 49.30 ਕਰੋੜ** **ਕੁੱਲ ਖਰਚ 569 ਕਰੋੜ**