ਪੰਜਾਬ ਦੇ ਸਰਕਾਰੀ ਸਕੂਲ ਸਟਾਫ਼ ਲਈ ਵੱਡੀ ਰਾਹਤ: ਬਦਲੀਆਂ ਲਈ ਅਪਲਾਈ ਕਰਨ ਦੀ ਤਾਰੀਖ਼ ਵਧੀ, ਹੁਣ 22 ਮਈ ਤੱਕ ਖੁੱਲ੍ਹੇਗਾ ਪੋਰਟਲ
ਪੰਜਾਬ ਦੇ ਸਰਕਾਰੀ ਸਕੂਲਾਂ ਵਿੱਚ ਤਾਇਨਾਤ ਅਧਿਆਪਕਾਂ, ਕੰਪਿਊਟਰ ਫੈਕਲਟੀ ਅਤੇ ਗੈਰ-ਅਧਿਆਪਨ (ਨੌਨ-ਟੀਚਿੰਗ) ਕਰਮਚਾਰੀਆਂ ਲਈ ਰਾਹਤ ਭਰੀ ਖ਼ਬਰ ਹੈ। ਸਕੂਲ ਸਿੱਖਿਆ ਡਾਇਰੈਕਟੋਰੇਟ (ਸੈਕੰਡਰੀ) ਪੰਜਾਬ ਨੇ ਸਾਲ 2026 ਦੀਆਂ ਆਮ ਬਦਲੀਆਂ (ਜਨਰਲ ਟਰਾਂਸਫਰ) ਲਈ ਅਪਲਾਈ ਕਰਨ ਅਤੇ ਆਪਣੇ ਸਰਵਿਸ ਰਿਕਾਰਡ ਦੇ ਵੇਰਵੇ ਅਪਡੇਟ ਕਰਨ ਦੀ ਆਖਰੀ ਮਿਤੀ ਵਧਾ ਦਿੱਤੀ ਹੈ। ਵਿਭਾਗ ਵੱਲੋਂ ਲਏ ਗਏ ਨਵੇਂ ਫ਼ੈਸਲੇ ਮੁਤਾਬਕ ਹੁਣ ਇੱਛੁਕ ਕਰਮਚਾਰੀ 22 ਮਈ 2026 ਨੂੰ ਸ਼ਾਮ 5:00 ਵਜੇ ਤੱਕ ਔਨਲਾਈਨ ਪੋਰਟਲ 'ਤੇ ਆਪਣੀ ਅਰਜ਼ੀ ਸਬਮਿਟ ਕਰ ਸਕਦੇ ਹਨ।
Posted By Sunita
Publish Date: Wed, 20 May 2026 12:55 PM (IST)
Updated Date: Wed, 20 May 2026 01:00 PM (IST)
ਸੰਜੀਵ ਸੂਦ, ਪੰਜਾਬੀ ਜਾਗਰਣ, ਹੁਸ਼ਿਆਰਪੁਰ : ਪੰਜਾਬ ਦੇ ਸਰਕਾਰੀ ਸਕੂਲਾਂ ਵਿੱਚ ਤਾਇਨਾਤ ਅਧਿਆਪਕਾਂ, ਕੰਪਿਊਟਰ ਫੈਕਲਟੀ ਅਤੇ ਗੈਰ-ਅਧਿਆਪਨ (ਨੌਨ-ਟੀਚਿੰਗ) ਕਰਮਚਾਰੀਆਂ ਲਈ ਰਾਹਤ ਭਰੀ ਖ਼ਬਰ ਹੈ। ਸਕੂਲ ਸਿੱਖਿਆ ਡਾਇਰੈਕਟੋਰੇਟ (ਸੈਕੰਡਰੀ) ਪੰਜਾਬ ਨੇ ਸਾਲ 2026 ਦੀਆਂ ਆਮ ਬਦਲੀਆਂ (ਜਨਰਲ ਟਰਾਂਸਫਰ) ਲਈ ਅਪਲਾਈ ਕਰਨ ਅਤੇ ਆਪਣੇ ਸਰਵਿਸ ਰਿਕਾਰਡ ਦੇ ਵੇਰਵੇ ਅਪਡੇਟ ਕਰਨ ਦੀ ਆਖਰੀ ਮਿਤੀ ਵਧਾ ਦਿੱਤੀ ਹੈ। ਵਿਭਾਗ ਵੱਲੋਂ ਲਏ ਗਏ ਨਵੇਂ ਫ਼ੈਸਲੇ ਮੁਤਾਬਕ ਹੁਣ ਇੱਛੁਕ ਕਰਮਚਾਰੀ 22 ਮਈ 2026 ਨੂੰ ਸ਼ਾਮ 5:00 ਵਜੇ ਤੱਕ ਔਨਲਾਈਨ ਪੋਰਟਲ 'ਤੇ ਆਪਣੀ ਅਰਜ਼ੀ ਸਬਮਿਟ ਕਰ ਸਕਦੇ ਹਨ।
ਤਕਨੀਕੀ ਮੁਸ਼ਕਿਲਾਂ ਕਾਰਨ ਵਧਾਈ ਗਈ ਸਮਾਂ-ਸੀਮਾ
ਵਿਭਾਗ ਵੱਲੋਂ ਜਾਰੀ ਜਨਹਿੱਤ ਸੂਚਨਾ ਅਨੁਸਾਰ, ਪਹਿਲਾਂ ਆਮ ਵੇਰਵੇ, ਸਾਲਾਨਾ ਨਤੀਜੇ (ਰਿਜ਼ਲਟ) ਅਤੇ ਸੇਵਾ ਰਿਕਾਰਡ ਭਰਨ ਦੀ ਆਖਰੀ ਮਿਤੀ 18 ਮਈ 2026 ਤੈਅ ਕੀਤੀ ਗਈ ਸੀ। ਪਰ ਇਸ ਦੌਰਾਨ ਸੂਬੇ ਭਰ ਦੇ ਅਨੇਕਾਂ ਅਧਿਆਪਕਾਂ ਅਤੇ ਕਰਮਚਾਰੀਆਂ ਨੇ ਸ਼ਿਕਾਇਤ ਕੀਤੀ ਸੀ ਕਿ 'ਈ-ਪੰਜਾਬ ਸਕੂਲ ਪੋਰਟਲ' 'ਤੇ ਭਾਰੀ ਟ੍ਰੈਫਿਕ ਅਤੇ ਤਕਨੀਕੀ ਨੁਕਸ ਕਾਰਨ ਉਨ੍ਹਾਂ ਨੂੰ ਲੌਗਇਨ ਕਰਨ ਅਤੇ ਡੇਟਾ ਅਪਲੋਡ ਕਰਨ ਵਿੱਚ ਵੱਡੀਆਂ ਦਿੱਕਤਾਂ ਆ ਰਹੀਆਂ ਹਨ। ਕਰਮਚਾਰੀਆਂ ਦੀ ਇਸ ਜਾਇਜ਼ ਸਮੱਸਿਆ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਵਿਭਾਗ ਨੇ ਇਹ ਰਾਹਤ ਦਿੱਤੀ ਹੈ।
ਵਿਭਾਗ ਦੀ ਚਿਤਾਵਨੀ: ਇਹ ਹੋਵੇਗਾ ਆਖਰੀ ਮੌਕਾ
ਟ੍ਰਾਂਸਫਰ ਸੈੱਲ ਦੇ ਸਹਾਇਕ ਨਿਰਦੇਸ਼ਕ ਨੇ ਸਪੱਸ਼ਟ ਹਦਾਇਤ ਕੀਤੀ ਹੈ ਕਿ ਸਮਾਂ-ਸੀਮਾ ਵਿੱਚ ਕੀਤਾ ਗਿਆ ਇਹ ਵਾਧਾ ਬਿਲਕੁਲ ਆਖਰੀ ਹੈ। 22 ਮਈ ਤੋਂ ਬਾਅਦ ਕਿਸੇ ਵੀ ਸੂਰਤ ਵਿੱਚ ਡੇਟਾ ਅਪਲੋਡ ਜਾਂ ਲੌਗਇਨ ਲਈ ਵਾਧੂ ਸਮਾਂ ਨਹੀਂ ਦਿੱਤਾ ਜਾਵੇਗਾ। ਟ੍ਰਾਂਸਫਰ ਨੀਤੀ-2019 ਅਤੇ ਇਸ ਤੋਂ ਬਾਅਦ ਹੋਈਆਂ ਸੋਧਾਂ ਦੇ ਦਾਇਰੇ ਵਿੱਚ ਆਉਣ ਵਾਲੇ ਸਾਰੇ ਯੋਗ ਕਰਮਚਾਰੀ ਆਪਣੀ ਨਿੱਜੀ ਲੌਗਇਨ ਆਈਡੀ (Login ID) ਰਾਹੀਂ ਇਸ ਪ੍ਰਕਿਰਿਆ ਨੂੰ ਸਮੇਂ ਸਿਰ ਪੂਰਾ ਕਰ ਲੈਣ।
ਸਮੱਸਿਆ ਆਉਣ 'ਤੇ ਜ਼ਿਲ੍ਹਾ MIS ਕੋਆਰਡੀਨੇਟਰਾਂ ਨਾਲ ਕਰੋ ਸੰਪਰਕ
ਸਿੱਖਿਆ ਵਿਭਾਗ ਨੇ ਅਧਿਆਪਕਾਂ ਦੀ ਸਹੂਲਤ ਲਈ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਜੇਕਰ ਹੁਣ ਵੀ ਫਾਰਮ ਭਰਨ ਜਾਂ ਡੇਟਾ ਲਾਕ ਕਰਨ ਦੌਰਾਨ ਕੋਈ ਤਕਨੀਕੀ ਸਮੱਸਿਆ ਪੇਸ਼ ਆਉਂਦੀ ਹੈ, ਤਾਂ ਕਰਮਚਾਰੀ ਤੁਰੰਤ ਆਪਣੇ ਜ਼ਿਲ੍ਹੇ ਦੇ ਐਮ.ਆਈ.ਐਸ. (MIS) ਕੋਆਰਡੀਨੇਟਰ ਨਾਲ ਰਾਬਤਾ ਕਾਇਮ ਕਰਕੇ ਮਦਦ ਲੈ ਸਕਦੇ ਹਨ। ਜ਼ਿਲ੍ਹਾ ਕੋਆਰਡੀਨੇਟਰਾਂ ਦੇ ਫ਼ੋਨ ਨੰਬਰ ਅਤੇ ਪੂਰੀ ਸੂਚੀ ਈ-ਪੰਜਾਬ ਪੋਰਟਲ 'ਤੇ ਉਪਲਬਧ ਕਰਵਾ ਦਿੱਤੀ ਗਈ ਹੈ।