ਗੈਂਗਸਟਰਾਂ ਵੱਲੋਂ ਪਾਵਰਲਿਫਟਰ ਖਿਡਾਰੀ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ, ਖੇਡ ਛੱਡਣ ਲਈ ਗੈਂਗਸਟਰ ਪਾ ਰਹੇ ਨੇ ਦਬਾਅ

ਬਾਬੋਵਾਲ ਦੇ ਰਹਿਣ ਵਾਲੇ ਪਾਵਰ ਲਿਫਟਰ ਰਾਹੁਲ ਵਸ਼ਿਸ਼ਟ ਦਾ ਦਾਅਵਾ ਹੈ ਕਿ ਉਸ ਨੂੰ ਅੰਤਰਰਾਸ਼ਟਰੀ ਨੰਬਰਾਂ ਤੋਂ ਜਾਨੋਂ ਮਾਰਨ ਦੀਆਂ ਧਮਕੀਆਂ ਮਿਲ ਰਹੀਆਂ ਹਨ। ਇਸ ਤੋਂ ਇਲਾਵਾ ਉਸ ਨੇ ਆਪਣੇ ਘਰ ਦੇ ਆਲੇ-ਦੁਆਲੇ ਸ਼ੱਕੀ ਵਿਅਕਤੀਆਂ ਨੂੰ ਘੁੰਮਦੇ ਦੇਖਿਆ ਹੈ। ਉਸ ਨੇ ਕਿਹਾ ਕਿ ਉਸ ਨੂੰ ਬੱਬਰ ਖਾਲਸਾ ਇੰਟਰਨੈਸ਼ਨਲ ਅਤੇ ਪਾਕਿਸਤਾਨੀ ਡੌਨ ਸ਼ਹਿਜ਼ਾਦ ਭੱਟੀ ਦੇ ਨਾਂ ’ਤੇ ਧਮਕੀਆਂ ਮਿਲ ਰਹੀਆਂ ਹਨ ਜੋ ਉਸ ਨੂੰ ਖੇਡ ਛੱਡਣ ਲਈ ਦਬਾਅ ਪਾ ਰਹੇ ਹਨ। ਉਸ ਨੂੰ 50 ਲੱਖ ਦੀ ਫਿਰੌਤੀ ਦੀ ਮੰਗ ਕਰਨ ਵਾਲੇ ਵ੍ਹਟਸਐਪ ਕਾਲ ਵੀ ਆਏ ਹਨ। ਉਸ ਨੇ ਕਿਹਾ ਕਿ ਉਸ ਨੂੰ ਸੋਸ਼ਲ ਮੀਡੀਆ ’ਤੇ ਧਮਕੀਆਂ ਦਿੱਤੀਆਂ ਜਾ ਰਹੀਆਂ ਹਨ ਜਿਸ ਵਿੱਚ ਕਿਹਾ ਗਿਆ ਹੈ ਕਿ ‘ਤੂੰ ਸਾਡੀਆਂ ਚਿਤਾਵਨੀਆਂ ਨੂੰ ਨਜ਼ਰ-ਅੰਦਾਜ਼ ਕਰ ਕੇ ਬਹੁਤ ਵੱਡੀ ਗਲਤੀ ਕੀਤੀ ਹੈ। ਸੋਸ਼ਲ ਮੀਡੀਆ ’ਤੇ ਜਾ ਕੇ ਖੇਡ ਛੱਡਣ ਦਾ ਐਲਾਨ ਕਰ ਕਿ ਹੁਣ ਕਿਸੇ ਵੀ ਮੁਕਾਬਲੇ ਵਿੱਚ ਹਿੱਸਾ ਨਹੀਂ ਲਵਾਂਗਾ, ਤੂੰ ਭੱਟੀ ਦੇ ਭਰਾ ਨੂੰ ਹਰਾ ਕੇ ਗੰਭੀਰ ਅਪਰਾਧ ਕੀਤਾ ਹੈ ਅਤੇ ਤੈਨੂੰ ਅਤੇ ਤੇਰੇ ਪਰਿਵਾਰ ਨੂੰ ਇਸ ਦੇ ਨਤੀਜੇ ਭੁਗਤਣੇ ਪੈਣਗੇ। ਤੇਰਾ ਘਰ ਗੁਰਦਾਸਪੁਰ ਜ਼ਿਲ੍ਹੇ ਦੇ ਬਾਬੋਵਾਲ ਪਿੰਡ ਵਿੱਚ ਸਥਿਤ ਹੈ ਜੋ ਗੁਰਦਾਸਪੁਰ ਦੀ ਕੇਂਦਰੀ ਜੇਲ੍ਹ ਦੇ ਬਹੁਤ ਨੇੜੇ ਹੈ। ਤੂੰ ਜਿੱਥੇ ਭੱਜ ਸਕਦਾ ਹੈ ਭੱਜ ਲੈ, ਪੁਲਿਸ ਤੇਰੀ ਮਦਦ ਨਹੀਂ ਕਰੇਗੀ। ਸਾਡੀ ਚਿਤਾਵਨੀ ਯਾਦ ਰੱਖ। ਤੇਰੀ ਜਾਨ ਬਹੁਤ ਕੀਮਤੀ ਹੈ। ਤੇਰਾ ਘਰ ਬਹੁਤ ਸੁੰਦਰ ਹੈ। ਜੇਕਰ ਤੂੰ ਸਾਡੀ ਗੱਲ ਨਹੀਂ ਸੁਣੀ, ਤਾਂ ਅਸੀਂ ਤੇਰਾ ਘਰ ਉਡਾ ਦੇਵਾਂਗੇ।’