21ਵਾਂ ਆਲ ਇੰਡੀਆ ਮੁਸ਼ਾਇਰਾ : ਦੇਸ਼ ਭਰ ਦੇ ਸ਼ਾਇਰਾਂ ਨੇ ਬੰਨ੍ਹਿਆ ਰੰਗ

ਅੰਗਰੇਜ਼ ਭੁੱਲਰ, ਪੰਜਾਬੀ ਜਾਗਰਣ ਫਿਰੋਜ਼ਪੁਰ : ਮਹਾਨ ਦੇਸ਼-ਭਗਤ ਸਵ. ਮੋਹਨ ਲਾਲ ਭਾਸਕਰ ਦੀ ਯਾਦ ਵਿਚ ਮੋਹਨ ਲਾਲ ਭਾਸਕਰ ਫਾਊਂਡੇਸ਼ਨ ਵੱਲੋਂ 21ਵਾਂ ‘ਆਲ ਇੰਡੀਆ ਮੁਸ਼ਾਇਰਾ’ ਆਯੋਜਿਤ ਕੀਤਾ ਗਿਆ। ਇਸ ਸਾਲ ਮੁਸ਼ਾਇਰਾ ‘‘ਵੱਡਿਆਂ ਦਾ ਸਤਕਾਰ ਕਰੋ’’ ਦੇ ਸ਼ਕਤੀਸ਼ਾਲੀ ਸੰਦੇਸ਼ ਨੂੰ ਸਮਾਜ ਤੱਕ ਪਹੁੰਚਾਉਣ ਦਾ ਇਕ ਪ੍ਰੇਰਣਾਦਾਇਕ ਮੰਚ ਬਣ ਕੇ ਉੱਭਰਿਆ, ਜੋ ਪੀੜ੍ਹੀਆਂ ਵਿੱਚ ਆਪਸੀ ਸਨਮਾਨ ਨੂੰ ਮਜ਼ਬੂਤ ਕਰਨ ਦੀ ਅਪੀਲ ਕਰਦਾ ਹੈ। ਮੋਹਨ ਲਾਲ ਭਾਸਕਰ ਫਾਊਂਡੇਸ਼ਨ ਦੇ ਵਾਈਸ ਪ੍ਰਧਾਨ ਡਾ. ਐੱਸਐੱਨ ਰੁਦਰਾ ਨੇ ਦੱਸਿਆ ਕਿ ਪ੍ਰੋਗਰਾਮ ਦੀ ਸ਼ੁਰੂਆਤ ਮੁੱਖ ਸਰਪ੍ਰਸਤ ਪ੍ਰਭਾ ਭਾਸਕਰ, ਡੀਜੀਪੀ ਪੰਜਾਬ ਲਾਅ ਐਂਡ ਆਰਡਰ ਅਰਪਿਤ ਸ਼ੁਕਲਾ, ਏਡੀਜੀਪੀ ਪੰਜਾਬ ਐੱਮਐੱਫ ਫਾਰੂਕੀ ਅਤੇ ਡਿਪਟੀ ਕਮਿਸ਼ਨਰ ਮੋਗਾ ਸਾਗਰ ਸੇਤੀਆ ਸਮੇਤ ਹੋਰ ਪਤਵੰਤਿਆਂ ਵੱਲੋਂ ਦੀਪ ਰੌਸ਼ਨ ਕਰਕੇ ਕੀਤੀ ਗਈ। ਇਸ ਮੌਕੇ ਮੇਜਰ ਜਨਰਲ ਆਰਐੱਸ ਮਨਰਾਲ, ਡੀਆਈਜੀ ਬੀਐੱਸਐੱਫ ਮੋਹਿੰਦਰ ਲਾਲ, ਐੱਸਐੱਸਪੀ ਫਿਰੋਜ਼ਪੁਰ ਭੁਪਿੰਦਰ ਸਿੰਘ ਸਿੱਧੂ ਸਮੇਤ ਕਈ ਪ੍ਰਮੁੱਖ ਸ਼ਖਸੀਅਤਾਂ ਮੌਜ਼ੂਦ ਸਨ। ਆਪਣੇ ਸੰਬੋਧਨ ਵਿਚ ਅਰਪਿਤ ਸ਼ੁਕਲਾ ਨੇ ਕਿਹਾ ਕਿ ਅੱਜ ਸਮਾਜ ਨੂੰ ਮੋਹਨ ਲਾਲ ਭਾਸਕਰ ਫਾਊਂਡੇਸ਼ਨ ਦੇ ਸੁਨੇਹੇ ਅਨੁਸਾਰ ਵੱਡਿਆਂ ਦੇ ਸਤਿਕਾਰ ਲਈ ਪ੍ਰੇਰਿਤ ਕਰਨਾ ਸਮੇਂ ਦੀ ਮੁੱਖ ਲੋੜ ਹੈ, ਤਾਂ ਜੋ ਸਾਡਾ ਸਮਾਜਿਕ ਢਾਂਚਾ ਮਜ਼ਬੂਤ ਰਹੇ। ਇਸ ਮੌਕੇ, ਪਰਉਪਕਾਰੀ ਯੋਗਦਾਨ ਲਈ ਸੰਤ ਬਾਬਾ ਗੁਰਨਾਮ ਸਿੰਘ ਜੀ (ਡਰੋਲੀ ਭਾਈ, ਮੋਗਾ) ਨੂੰ ਐੱਮਐੱਲਬੀ ਲਾਈਫਟਾਈਮ ਅਚੀਵਮੈਂਟ ਐਵਾਰਡ 2025 ਨਾਲ ਅਤੇ ਪ੍ਰਸਿੱਧ ਰੰਗਮੰਚ ਕਲਾਕਾਰ ਅਨੀਤਾ ਸ਼ਬਦੀਸ਼ ਨੂੰ ਕਲਾ ਤੇ ਥੀਏਟਰ ਵਿਚ ਸ਼ਾਨਦਾਰ ਸਫਲਤਾਵਾਂ ਲਈ ਐੱਮਐੱਲਬੀ ਲਿਟਰੇਰੀ ਐਕਸੀਲੈਂਸ ਐਵਾਰਡ 2025 ਨਾਲ ਸਨਮਾਨਿਤ ਕੀਤਾ ਗਿਆ। ਮੁਸ਼ਾਇਰੇ ਵਿਚ ਮੁੰਬਈ ਤੋਂ ਜਨਾਬ ਮਹਸ਼ਰ ਅਫ਼ਰੀਦੀ, ਲਖਨਊ ਤੋਂ ਜਨਾਬ ਤਬਰੇਜ਼ ਰਾਨਾ, ਮੇਰਠ ਤੋਂ ਯੁਵਾ ਸ਼ਾਇਰਾ ਹਿਮਾਂਸ਼ੀ ਬਾਬਰਾ ਅਤੇ ਚਿੰਦੌਸੀ ਤੋਂ ਚਿਰਾਗ ਸ਼ਰਮਾ ਸਮੇਤ ਪਟਿਆਲਾ ਤੋਂ ਅਮਰਦੀਪ ਸਿੰਘ ਅਤੇ ਜੈਪੁਰ ਤੋਂ ਇਬ੍ਰਾਹੀਮ ਜੀਸ਼ਾਨ ਵਰਗੇ ਸ਼ਾਇਰਾਂ ਨੇ ਹਾਜ਼ਰੀ ਭਰੀ। ਮਹਸ਼ਰ ਅਫ਼ਰੀਦੀ ਦੀ ਸ਼ਾਇਰੀ: ‘ਆਏਗਾ ਗੁਫ਼ਤਗੂ ਕਾ ਸਲੀਕਾ ਤੋ ਕਮ ਸੇ ਕਮ, ਸ਼ਾਇਰ ਬਹੁਤ ਜ਼ਰੂਰੀ ਹੈ ਏਕ ਖ਼ਾਨਦਾਨ ਮੇਂ”’’ ਤਬਰੇਜ਼ ਰਾਨਾ ਦੇ ਭਾਵੁਕ ਅਲਫ਼ਾਜ਼: ‘ਮੇਰੇ ਵਾਲਿਦ ਮੇਰੇ ਅੰਦਰ ਜ਼ਿੰਦਾ ਹੈਂ ਲੋਗ ਕਹਤੇ ਹੈਂ, ਮੈਂ ਜਬ ਭੀ ਬਾਤ ਕਰਤਾ ਹੂੰ ਮੇਰਾ ਲਹਜਾ ਬਤਾਤਾ ਹੈ’। ਜ਼ਿਕਰਯੋਗ ਹੈ ਕਿ ਸਵ. ਮੋਹਨ ਲਾਲ ਭਾਸਕਰ ਇਕ ਮਹਾਨ ਦੇਸ਼-ਭਗਤ, ਰਾਸ਼ਟਰੀ ਪੁਰਸਕਾਰ ਜੇਤੂ, ਕਵੀ, ਲੇਖਕ ਅਤੇ ਫ਼ਿਲਮ ਨਿਰਮਾਤਾ ਸਨ। ਉਨ੍ਹਾਂ ਨੇ ਭਾਰਤੀ ਸੁਰੱਖਿਆ ਏਜੰਸੀਆਂ ਲਈ ਕੰਮ ਕੀਤਾ ਅਤੇ ਉਨ੍ਹਾਂ ਦੀ ਕਿਤਾਬ ‘‘ਮੈਂ ਪਾਕਿਸਤਾਨ ਵਿਚ ਭਾਰਤ ਦਾ ਜਾਸੂਸ’’ ਨੂੰ 1989 ਵਿਚ ਸਾਹਿਤ ਸ਼੍ਰੀਕਾਂਤ ਵਰਮਾ ਰਾਸ਼ਟਰੀ ਪੁਰਸਕਾਰ ਮਿਲਿਆ ਸੀ। ਇਸ ਪ੍ਰੋਗਰਾਮ ਨੂੰ ਸਫਲ ਬਣਾਉਣ ਵਿਚ ਐੱਮਐੱਲਬੀ ਦੇ ਮੈਂਬਰਾਂ ਡਾ. ਹਰਸ਼ ਭੋਲਾ, ਡਾ. ਨਰੇਸ਼ ਖੰਨਾ, ਝਲਕੇਸ਼ਵਰ ਭਾਸਕਰ, ਅਮਰਜੀਤ ਸਿੰਘ ਭੋਗਲ, ਸ਼ਲਿੰਦਰ ਭੱਲਾ, ਚਰਨਜੀਤ ਸ਼ਰਮਾ ਦੇ ਨਾਲ-ਨਾਲ ਵਿਵੇਕਾਨੰਦ ਵਰਲਡ ਸਕੂਲ ਵੱਲੋਂ ਪਰਮਵੀਰ ਸ਼ਰਮਾ, ਸ਼ਿਪਰਾ ਅਰੋੜਾ (ਵੀਪੀ ਅਕੈਡਮਿਕ), ਮਹਿਮਾ ਕਪੂਰ (ਵੀਪੀ ਐਡਮਿਨ), ਸੋਨੀਆ ਅਗਰਵਾਲ, ਸਪਨ ਵਤਸ, ਦਰਸ਼ਨ ਸਿੰਘ ਸਿੱਧੂ, ਸਰਬਜੀਤ ਸਿੰਘ, ਗੁਰਪ੍ਰੀਤ ਸਿੰਘ, ਪਲਵਿੰਦਰ ਸਿੰਘ, ਗੁਰਸ਼ਰਨ ਸਿੰਘ ਅਤੇ ਦੀਪਕ ਸਿੰਗਲਾ ਨੇ ਆਪਣੇ ਯੋਗਦਾਨ ਪਾਏ।