ਨੌ ਸਾਲਾਂ ਤੋਂ ਸ਼ੈੱਡ ’ਚ ਧੂੜ ਫੱਕ ਰਹਆਂ ਹਨ ਪਾਣੀ 'ਚ ਚੱਲਣ ਵਾਲੀਆਂ ਬੱਸਾਂ, ਸੈਰ-ਸਪਾਟਾ ਮੰਤਰੀ ਨੇ ਬਾਦਲਾਂ ਦਾ ਘੜੁੱਕਾ ਕਹਿ ਕੇ ਕਰਵਾਈਆਂ ਸੀ ਬੰਦ

ਡਾ. ਤਰੁਣ ਜੈਨ, ਜਾਗਰਣ , ਫਿਰੋਜ਼ਪੁਰ : ਹਰੀਕੇ ਪੱਤਣ ਵਿਚ ਸੈਰ-ਸਪਾਟੇ ਨੂੰ ਉਤਸ਼ਾਹਤ ਕਰਨ ਲਈ ਕਰੋੜਾਂ ਰੁਪਏ ਖਰਚ ਕੇ ਲਿਆਂਦੀ ਗਈ ਜਲ ਬੱਸ ਪਿਛਲੇ ਨੌ ਸਾਲਾਂ ਤੋਂ ਬੰਦ ਸ਼ੈੱਡ ਵਿਚ ਧੂੜ ਫੱਕ ਰਹੀ ਹੈ। ਸਥਿਤੀ ਇੰਨੀ ਗੰਭੀਰ ਹੋ ਚੁੱਕੀ ਹੈ ਕਿ ਜਦੋਂ ਪੰਜਾਬ ਟੂਰਿਜ਼ਮ ਵਿਭਾਗ ਨੇ ਇਸ ਨੂੰ ਵੇਚਣ ਦਾ ਯਤਨ ਕੀਤਾ, ਤਾਂ ਸੰਭਾਵਿਤ ਖਰੀਦਦਾਰਾਂ ਨੇ ਇਸ ਦਾ ਮੁੱਲ ਕੌਡੀਆਂ ਦੇ ਭਾੱ ਅੰਕਿਤ ਕੀਤਾ। ਇਸ ਤੋਂ ਬਾਅਦ ਵਿਭਾਗ ਹੁਣ ਇਸ ਨੂੰ ਹੋਰ ਸਥਾਨ 'ਤੇ ਤਬਦੀਲ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ। ਜਾਣਕਾਰੀ ਅਨੁਸਾਰ, ਡੇੜ ਸਾਲ ਪਹਿਲਾਂ ਬੱਸ ਦੀ ਨੀਲਾਮੀ ਵੀ ਕੀਤੀ ਜਾ ਚੁੱਕੀ ਹੈ।

2017 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਸਾਬਕਾ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਨੇ ਐਲਾਨ ਕੀਤਾ ਸੀ ਕਿ ਉਹ ਪਾਣੀ ਵਿਚ ਬੱਸਾਂ ਚਲਾਉਣਗੇ। ਐਲਾਨ ਦੇ ਬਾਅਦ ਜਦੋਂ ਵਿਰੋਧੀਆਂ ਨੇ ਉਨ੍ਹਾਂ 'ਤੇ ਤਣਜ ਕੱਸਿਆ, ਤਾਂ ਉਨ੍ਹਾਂ ਹਰੀਕੇ ਪੱਤਣ ਵਿਚ ਇਕ ਜਲ ਬੱਸ ਦਾ ਉਦਘਾਟਨ ਕੀਤਾ। ਇਹ ਪ੍ਰੋਜੈਕਟ 8.6 ਕਰੋੜ ਰੁਪਏ ਦਾ ਸੀ, ਜਿਸ ਲਈ ਫੰਡ ਪੰਜਾਬ ਇੰਫ੍ਰਾਸਟ੍ਰਕਚਰ ਡਿਵੈਲਪਮੈਂਟ ਬੋਰਡ (ਪੀਆਈਡੀਬੀ) ਨੇ 2016 ਵਿਚ ਮੁਹੱਈਆ ਕਰਵਾਇਆ ਸੀ। ਸੁਖਬੀਰ ਸਿੰਘ ਬਾਦਲ ਨੇ 12 ਦਸੰਬਰ 2016 ਨੂੰ ਇਸ ਪ੍ਰੋਜੈਕਟ ਦਾ ਉਦਘਾਟਨ ਕੀਤਾ ਸੀ। ਜਲ ਬੱਸ ਚਲਾਉਣ ਲਈ ਨਹਿਰੀ ਵਿਭਾਗ ਨੇ ਰੋਪੜ ਡੈਮ ਤੋਂ ਹਰੀਕੇ ਵਿਚ ਵੱਧ ਪਾਣੀ ਛੱਡਿਆ, ਜਿਸ ਨਾਲ ਆਸਪਾਸ ਦੇ ਕਿਸਾਨਾਂ ਦੇ ਖੇਤਾਂ ਵਿਚ ਪਾਣੀ ਭਰ ਗਿਆ ਅਤੇ ਲਗਪਗ 500 ਏਕੜ ਕਣਕ ਦੀ ਫਸਲ ਪਾਣੀ ਵਿਚ ਡੁੱਬ ਗਈ ਸੀ। ਸੂਬੇ ਵਿਚ ਸੱਤਾ ਬਦਲਣ ਦੇ ਬਾਅਦ ਕਾਂਗਰਸ ਸਰਕਾਰ ਵਿਚ ਨਵਜੋਤ ਸਿੰਘ ਸਿੱਧੂ ਨੂੰ ਸੈਰ-ਸਪਾਟਾ ਮੰਤਰੀ ਬਣਾਇਆ ਗਿਆ। ਉਨ੍ਹਾਂ ਨੇ 16 ਜੂਨ 2017 ਨੂੰ ਹਰੀਕੇ ਦਾ ਦੌਰਾ ਕੀਤਾ ਅਤੇ ਜਲ ਬੱਸ ਸੇਵਾ ਨੂੰ ਬੰਦ ਕਰਨ ਦੇ ਹੁਕਮ ਦਿੱਤੇ ਅਤੇ ਇਸ ਨੂੰ ਬਾਦਲਾਂ ਦਾ ਘੜੁੱਕਾ ਕਰਾਰ ਦਿੱਤਾ। ਸਿੱਧੂ ਨੇ ਹਰੀਕੇ ਵਿਚ ਸੈਲਾਨੀਆਂ ਦੀ ਗਿਣਤੀ ਵਧਾਉਣ ਲਈ ਡੌਲਫਿਨ ਛੱਡਣ ਅਤੇ ਹੋਰ ਵਿਕਾਸ ਕਾਰਜਾਂ ਦੇ ਹੁਕਮ ਦਿੱਤੇ, ਪਰ ਇਹ ਸਾਰੇ ਦਾਅਵੇ ਸਿਰਫ ਕਾਗਜ਼ਾਂ ਤੱਕ ਹੀ ਸੀਮਿਤ ਰਹੇ।

---

ਪੰਜ ਮਹੀਨਿਆਂ ’ਚ ਸਿਰਫ ਦਸ ਦਿਨ ਹੀ ਚਲੀ ਬੱਸ

ਜਲ ਬੱਸ ਵਿਚ 48 ਸੀਟਾਂ ਸਨ ਅਤੇ ਇਸ ਨੂੰ ਪਾਣੀ ਵਿਚ ਉਤਾਰਨ ਲਈ 72 ਲੱਖ ਰੁਪਏ ਦੀ ਲਾਗਤ ਨਾਲ ਰੈਂਪ ਤਿਆਰ ਕੀਤਾ ਗਿਆ ਸੀ। ਯਾਤਰੀਆਂ ਨੂੰ ਤਿੰਨ ਕਿਲੋਮੀਟਰ ਦਾ ਰਾਊਂਡ ਲਗਵਾਉਣਾ ਸੀ। ਹਰੀਕੇ ਵਿਚ ਪਾਣੀ ਦਾ ਪੱਧਰ ਘਟਣ ਕਾਰਨ 15 ਫਰਵਰੀ 2017 ਨੂੰ ਬੱਸ ਨੂੰ ਬਦਲਣ ਦੀ ਗੱਲ ਸਾਹਮਣੇ ਆਈ। ਫਿਰ 31 ਮਈ 2017 ਨੂੰ ਨਵੀਂ ਬੱਸ ਮੰਗਵਾਈ ਗਈ। ਜਲ ਬੱਸ ਸਿਰਫ ਪੰਜ ਮਹੀਨਿਆਂ ਵਿਚ 10 ਦਿਨ ਹੀ ਚੱਲੀ, ਜਿਸ ਵਿਚ 97 ਸੈਲਾਨੀਆਂ ਨੇ ਯਾਤਰਾ ਕੀਤੀ ਅਤੇ 800 ਰੁਪਏ ਕਾਪੀ ਟਿਕਟ ਦੇ ਹਿਸਾਬ ਨਾਲ 77,600 ਰੁਪਏ ਦੀ ਆਮਦਨ ਹੋਈ। ਇਹ ਬੱਸ ਸਵੀਡਨ ਦੀ ਸਕੈਨੀਆ ਕੰਪਨੀ ਤੋਂ ਖਰੀਦੀ ਗਈ ਸੀ।

---

ਬੰਦ ਪਏ ਜਲ ਬੱਸ ਦੇ ਪ੍ਰੋਜੈਕਟ ’ਤੇ ਗੱਲ ਕਰਾਂਗੇ : ਵਿਧਾਇਕ

ਵਿਧਾਇਕ ਨਰੇਸ਼ ਕਟਾਰੀਆ ਨੇ ਕਿਹਾ ਕਿ ਹਰੀਕੇ ਵਿਚ ਸੈਰ-ਸਪਾਟੇ ਨੂੰ ਵਧਾਵਾ ਦੇਣ ਲਈ ਸਰਕਾਰ ਨੇ ਕਈ ਵਿਕਾਸ ਕਾਰਜ ਕੀਤੇ ਹਨ। ਵੈਟਲੈਂਡ 'ਤੇ ਸੈਲਾਨੀਆਂ ਦੀ ਗਿਣਤੀ ਵਿਚ ਵਾਧਾ ਹੋਇਆ ਹੈ। ਜਲ ਬੱਸ ਦਾ ਪ੍ਰੋਜੈਕਟ ਬੰਦ ਪਿਆ ਹੈ, ਇਸ 'ਤੇ ਵੀ ਚਰਚਾ ਕਰਾਂਗੇ। ਸ਼੍ਰੋਮਣੀ ਅਕਾਲੀ ਦਲ ਦੇ ਹਲਕਾ ਇੰਚਾਰਜ ਸੁਖਪਾਲ ਸਿੰਘ ਨੰਨੂ ਨੇ ਕਿਹਾ ਕਿ ਜਲ ਬੱਸ ਦਾ ਪ੍ਰੋਜੈਕਟ ਵਿਰੋਧੀਆਂ ਨੂੰ ਪਸੰਦ ਨਹੀਂ ਆਇਆ, ਇਸ ਲਈ ਇਸ ਨੂੰ ਬੰਦ ਕਰਵਾਇਆ ਗਿਆ। ਜੇਕਰ ਇਹ ਪ੍ਰੋਜੈਕਟ ਚੱਲਦਾ, ਤਾਂ ਇੱਥੇ ਹਜ਼ਾਰਾਂ ਸੈਲਾਨੀ ਆਉਂਦੇ ਅਤੇ ਲਾਭ ਹੁੰਦਾ।