ਮਮਦੋਟ 'ਚ ਗੁੰਡਾਗਰਦੀ: ਫਾਰਚੂਨਰ ਗੱਡੀਆਂ 'ਚ ਆਏ ਹਥਿਆਰਬੰਦ ਬਦਮਾਸ਼ਾਂ ਨੇ ਗਰੀਬ ਕਿਸਾਨ ਦੇ ਘਰ ਕੀਤੀ ਫਾਇਰਿੰਗ

ਪੰਜਾਬੀ ਜਾਗਰਣ ਮਮਦੋਟ/ਫਿਰੋਜ਼ਪੁਰ: ਮਮਦੋਟ ਦੇ ਪਿੰਡ ਖੁੰਦਰ ਹਿਠਾੜ ਵਿਖੇ ਗੁੰਡਾਗਰਦੀ ਦਾ ਬੇਹੱਦ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਫੋਰਚੂਨਰ ਗੱਡੀਆਂ 'ਚ ਆਏ ਹਥਿਆਰਬੰਦ ਬਦਮਾਸ਼ਾਂ ਨੇ ਇਕ ਗਰੀਬ ਕਿਸਾਨ ਦੇ ਘਰ ਵੜ ਕੇ ਗੋਲ਼ੀਆਂ ਚਲਾ ਦਿੱਤੀਆਂ। ਉਸ ਨੂੰ ਜਾਨੋਂ ਮਾਰਨ ਤੇ ਜ਼ਮੀਨ ’ਤੇ ਨਾਜਾਇਜ਼ ਕਬਜ਼ਾ ਕਰਨ ਦੀ ਧਮਕੀ ਦਿੱਤੀ। ਪਿੰਡ ਦੀ ਪੰਚਾਇਤ ਨੇ ਮੌਕੇ ’ਤੇ ਪਹੁੰਚ ਕੇ ਇਕ ਹਮਲਾਵਰ ਨੂੰ ਕਾਬੂ ਕਰ ਲਿਆ ਜਦਕਿ ਉਸ ਦੇ ਸਾਥੀ ਫ਼ਰਾਰ ਹੋ ਗਏ। ਮੌਜੂਦਾ ਸਰਪੰਚ ਨੇ ਦੱਸਿਆ ਕਿ ਹਮਲੇ ਦਾ ਸ਼ਿਕਾਰ ਹੋਇਆ ਵਿਅਕਤੀ ਮਹਿਜ਼ ਇਕ ਕਿੱਲੇ ਦੀ ਮਾਲਕੀ ਵਾਲਾ ਗਰੀਬ ਕਿਸਾਨ ਹੈ। ਉਸ ਦੇ ਘਰ ਦੀ ਹਾਲਤ ਇੰਨੀ ਖ਼ਸਤਾ ਹੈ ਕਿ ਘਰ ਨੂੰ ਨਾ ਤਾਂ ਕੋਈ ਚੰਗਾ ਬੂਹਾ-ਬਾਰੀ ਲੱਗਾ ਹੈ ਤੇ ਨਾ ਹੀ ਅਜੇ ਤਕ ਉਹ ਬਾਥਰੂਮ ਬਣਵਾ ਸਕਿਆ ਹੈ। ਹਮਲਾਵਰ ਇਸ ਗਰੀਬ ਕਿਸਾਨ ਨੂੰ ਆਪਣੀ ਜ਼ਮੀਨ ਉਨ੍ਹਾਂ ਦੇ ਨਾਮ ਕਰਨ ਲਈ ਡਰਾ-ਧਮਕਾ ਰਹੇ ਸਨ ਅਤੇ ਨਾਜਾਇਜ਼ ਕਬਜ਼ਾ ਕਰਨ ਦੀ ਫਿਰਾਕ 'ਚ ਸਨ। ਜ਼ਮੀਨ ਦੀ ਨਿਸ਼ਾਨਦੇਹੀ ਪਹਿਲਾਂ ਹੀ ਕਾਨੂੰਨੀ ਤੌਰ ’ਤੇ ਬਿਲਕੁਲ ਸਹੀ ਹੋ ਚੁੱਕੀ ਸੀ, ਫਿਰ ਵੀ ਇਸ ਗਰੀਬ ਪਰਿਵਾਰ ਨੂੰ ਨਿਸ਼ਾਨਾ ਬਣਾਇਆ ਗਿਆ।

ਮੌਜੂਦਾ ਸਰਪੰਚ ਨੇ ਦੱਸਿਆ ਕਿ ਰਾਤ ਨੂੰ ਵੀ ਉਕਤ ਬਦਮਾਸ਼ ਧਮਕੀਆਂ ਦਿੰਦੇ ਰਹੇ ਪਰ ਜਦੋਂ ਸਵੇਰੇ 10 ਵਜੇ ਦੇ ਕਰੀਬ ਇਹ ਬਦਮਾਸ਼ ਫੋਰਚੂਨਰ ਗੱਡੀਆਂ 'ਚ ਸਵਾਰ ਹੋ ਕੇ ਪੀੜਤ ਦੇ ਘਰ ਵੜੇ ਤਾਂ ਪਰਿਵਾਰ ਦੀਆਂ ਔਰਤਾਂ ਨੇ ਤੁਰੰਤ ਸਰਪੰਚ ਨੂੰ ਫ਼ੋਨ ਕਰ ਕੇ ਗੁਹਾਰ ਲਗਾਈ। ਰੌਲਾ ਸੁਣ ਕੇ ਮੌਜੂਦਾ ਸਰਪੰਚ ਤੇ ਸਮੁੱਚੀ ਪੰਚਾਇਤ ਤੁਰੰਤ ਮੌਕੇ ’ਤੇ ਪਹੁੰਚ ਗਈ। ਪੰਚਾਇਤ ਨੂੰ ਆਉਂਦਿਆਂ ਵੇਖ ਦੋ ਹਮਲਾਵਰ ਆਪਣੇ ਹਥਿਆਰ ਛੱਡ ਕੇ ਮੌਕੇ ਤੋਂ ਫਰਾਰ ਹੋ ਗਏ, ਜਦਕਿ ਤੀਜੇ ਨੂੰ ਪਿੰਡ ਵਾਸੀਆਂ ਨੇ ਮੌਕੇ ’ਤੇ ਹੀ ਦਬੋਚ ਲਿਆ। ਸਰਪੰਚ ਨੇ ਦੱਸਿਆ ਕਿ ਹਮਲਾਵਰਾਂ ਕੋਲੋਂ ਇਕ ਪਿਸਤੌਲ ਵੀ ਬਰਾਮਦ ਹੋਈ ਹੈ। ਫੜਿਆ ਗਿਆ ਮੁਲਜ਼ਮ ਸ਼ਰੇਆਮ ਦਾਅਵਾ ਕਰ ਰਿਹਾ ਹੈ ਕਿ ਉਸ ਨੇ ਪਹਿਲਾਂ ਵੀ ਪੰਜ ਕਤਲ ਕੀਤੇ ਹਨ ਅਤੇ ‘ਦਿਉੜੇ’ ਨਾਮ ਦੇ ਵਿਅਕਤੀ ਨੂੰ ਵੀ ਉਨ੍ਹਾਂ ਨੇ ਹੀ ਮਾਰਿਆ ਹੈ। ਪੰਚਾਇਤ ਕੋਲ ਇਸ ਗੱਲ ਦੀ ਪੂਰੀ ਆਡੀਓ ਰਿਕਾਰਡਿੰਗ ਮੌਜੂਦ ਹੈ ਜਿਸ ਵਿਚ ਉਹ ਕਹਿ ਰਹੇ ਹਨ ਕਿ ‘ਤਿੰਨ ਮਾਰ ਦਿੱਤੇ ਹਨ ਤੇ ਚੌਥਾ ਸਵੇਰੇ ਮਾਰ ਦੇਵਾਂਗੇ।’ ਇਸ ਘਟਨਾ ਤੋਂ ਬਾਅਦ ਪੰਚਾਇਤ ਨੇ ਐੱਸਐੱਸਪੀ ਫਿਰੋਜ਼ਪੁਰ, ਥਾਣਾ ਮਮਦੋਟ ਨੂੰ ਤੁਰੰਤ ਸੂਚਿਤ ਕਰ ਦਿੱਤਾ ਹੈ। ਜ਼ਖ਼ਮੀ ਵਿਅਕਤੀ ਨੂੰ ਇਲਾਜ ਲਈ ਹਸਪਤਾਲ ਪਹੁੰਚਾਇਆ ਗਿਆ ਹੈ। ਪੰਚਾਇਤ ਨੇ ਐੱਸਐੱਸਪੀ ਨੂੰ ਪੁਰਜ਼ੋਰ ਬੇਨਤੀ ਕੀਤੀ ਹੈ ਕਿ ਇਨ੍ਹਾਂ ਕਥਿਤ ਗੈਂਗਸਟਰਾਂ ਦਾ ਅਪਰਾਧਿਕ ਰਿਕਾਰਡ ਚੈੱਕ ਕੀਤਾ ਜਾਵੇ ਅਤੇ ਇਨ੍ਹਾਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇ।