ਰੇਹੜੇ 'ਤੇ ਵੋਟ ਪਾਉਣ ਨੂੰ ਲੈ ਕੇ ਛਿੜੀ ਸਿਆਸੀ ਜੰਗ, ਵੜਿੰਗ ਨੇ ਕਵਿਤਾ ਰਾਹੀਂ ਵਿੰਨ੍ਹਿਆ CM Mann ਦੇ ਤਨਜ਼ 'ਤੇ ਨਿਸ਼ਾਨਾ
Punjab Politics : ਪੰਜਾਬ 'ਚ ਆਉਣ ਵਾਲੇ ਸਮੇਂ 'ਚ ਇੰਟਰਨੈੱਟ ਮੀਡੀਆ ਅਧਾਰਿਤ ਸਿਆਸੀ ਬਿਆਨਬਾਜ਼ੀ ਹੋਰ ਤੇਜ਼ ਹੋ ਸਕਦੀ ਹੈ। ਹੁਣ ਨੇਤਾ ਕੇਵਲ ਮੰਚਾਂ ਤੇ ਰੈਲੀਆਂ ਤਕ ਸੀਮਤ ਨਹੀਂ ਹਨ, ਬਲਕਿ ਫੇਸਬੁੱਕ ਤੇ ਹੋਰ ਇੰਟਰਨੈੱਟ ਮੋਡਾਂ ਜ਼ਰੀਏ ਸਿੱਧੇ ਜਨਤਾ ਤਕ ਆਪਣੀ ਗੱਲ ਪਹੁੰਚਾ ਰਹੇ ਹਨ। ਇਹੀ ਕਾਰਨ ਹੈ ਕਿ ਨੇਤਾਵਾਂ ਵਿਚਾਲੇ ਹੋਣ ਵਾਲੀ ਇਸ ਤਰ੍ਹਾਂ ਦੀ ਪੋਸਟ ਅਤੇ ਜਵਾਬੀ ਪੋਸਟ ਕੁਝ ਹੀ ਸਮੇਂ ਵਿੱਚ ਚਰਚਾ ਦਾ ਵੱਡਾ ਵਿਸ਼ਾ ਬਣ ਜਾਂਦੀ ਹੈ।
Posted By Seema Anand
Publish Date: Wed, 27 May 2026 03:50 PM (IST)
Updated Date: Wed, 27 May 2026 04:30 PM (IST)
ਡਿਜੀਟਲ ਡੈਸਕ, ਚੰਡੀਗੜ੍ਹ : ਪੰਜਾਬ ਦੀ ਰਾਜਨੀਤੀ 'ਚ ਇੰਟਰਨੈੱਟ ਮੀਡੀਆ ਹੁਣ ਵੱਡਾ ਸਿਆਸੀ ਅਖਾੜਾ ਬਣਦਾ ਜਾ ਰਿਹਾ ਹੈ। ਤਾਜ਼ਾ ਮਾਮਲਾ ਉਸ ਸਮੇਂ ਸਾਹਮਣੇ ਆਇਆ ਜਦੋਂ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਆਪਣੇ ਐਕਸ ਅਕਾਊਂਟ 'ਤੇ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਰਾਜਾ ਵੜਿੰਗ 'ਤੇ ਤਨਜ਼ ਕੱਸਦਿਆਂ ਇਕ ਪੋਸਟ ਸਾਂਝੀ ਕੀਤੀ। ਹਾਲਾਂਕਿ ਕੁਝ ਹੀ ਦੇਰ ਬਾਅਦ ਰਾਜਾ ਵੜਿੰਗ ਨੇ ਆਪਣੇ ਇੰਟਰਨੈੱਟ ਮੀਡੀਆ ਅਕਾਊਂਟ 'ਤੇ ਉਨ੍ਹਾਂ ਦੀ ਪੋਸਟ ਦਾ ਜਵਾਬ ਕਵਿਤਾ ਦੇ ਰੂਪ 'ਚ ਦੇ ਕੇ ਸਿਆਸੀ ਮਾਹੌਲ ਨੂੰ ਹੋਰ ਭਖਾ ਦਿੱਤਾ।
ਰਾਜਾ ਵੜਿੰਗ ਨੇ ਆਪਣੀ ਪੋਸਟ 'ਚ ਬਦਲਾਅ ਦੀ ਰਾਜਨੀਤੀ, ਪੈਟਰੋਲ-ਡੀਜ਼ਲ ਦੀਆਂ ਕੀਮਤਾਂ ਤੇ ਭਾਜਪਾ ਨਾਲ ਸਬੰਧਾਂ ਨੂੰ ਲੈ ਕੇ ਪੰਜਾਬ ਸਰਕਾਰ 'ਤੇ ਨਿਸ਼ਾਨਾ ਵਿੰਨ੍ਹਿਆ। ਉਨ੍ਹਾਂ ਕਵਿਤਾ ਜ਼ਰੀਏ ਦੋਸ਼ ਲਗਾਇਆ ਕਿ ਜੋ ਲੋਕ ਪਹਿਲਾਂ ਭਾਜਪਾ ਤੇ ਮਹਿੰਗਾਈ ਖ਼ਿਲਾਫ਼ ਆਵਾਜ਼ ਚੁੱਕਦੇ ਸਨ, ਹੁਣ ਉਹੀ ਸੱਤਾ ਲਈ ਸਮਝੌਤੇ ਕਰ ਰਹੇ ਹਨ। ਪੋਸਟ 'ਚ ਇਹ ਵੀ ਕਿਹਾ ਗਿਆ ਕਿ ਸੱਤਾ ਦੀ ਰਾਜਨੀਤੀ 'ਚ ਪੁਰਾਣੇ ਵਿਚਾਰ ਤੇ ਵਿਰੋਧ ਪਿੱਛੇ ਛੁੱਟ ਗਏ ਹਨ।
ਸੀਐਮ ਨੇ ਪੋਸਟ ਵਿੱਚ ਲਿਖਿਆ-
“ਬੁਰੇ ਦਿਨਾਂ ਦੀ ਨਿਸ਼ਾਨੀ,
ਦੇਖੋ ਕਿਸ ਕੰਮ ਤਕ ਆ ਗਏ…
ਪ੍ਰਚਾਰ ਲਈ ਡਿਫੈਂਡਰ ਗੱਡੀਆਂ 'ਤੇ ਵੋਟ ਮੰਗਣ
ਰੇਹੜੀਆਂ ਤਕ ਪਹੁੰਚ ਗਏ…
ਕੁਰਸੀ ਦੇ ਪਿੱਛੇ ਲੋਕ ਕਿਵੇਂ ਹੱਥ-ਪੈਰ ਮਾਰਦੇ ਹਨ,
ਦੇਖੋ ਭਾਈ ਬਾਲੀਆ, ਵਕਤ ਦੇ ਰੰਗ ਵੀ ਕਿਵੇਂ ਬਦਲ ਗਏ…”
ਵੜਿੰਗ ਨੇ ਪੋਸਟ ਦਾ ਜਵਾਬ ਪੋਸਟ ਨਾਲ ਦਿੱਤਾ
“ਬੁਰੇ ਦਿਨਾਂ ਦੀ ਨਿਸ਼ਾਨੀ”
ਜੋ ਲੋਕ ਬਦਲਾਅ ਦੇ ਨਾਅਰੇ ਲਗਾਉਂਦੇ ਸਨ,
ਹੁਣ ਸਿਰਫ਼ ਇਸ਼ਤਿਹਾਰਾਂ ਤਕ ਸੀਮਤ ਹੋ ਕੇ ਰਹਿ ਗਏ ਹਨ।
ਜਦੋਂ ਵੀ ਅਸੀਂ ਪੈਟਰੋਲ-ਡੀਜ਼ਲ ਦੇ ਮੁੱਦੇ 'ਤੇ ਭਾਜਪਾ ਨੂੰ ਘੇਰਿਆ,
ਉਦੋਂ ਤੁਸੀਂ ਬੇਵਜ੍ਹਾ ਨਾਰਾਜ਼ ਹੋ ਜਾਂਦੇ ਸੀ।
ਦੇਖੋ ਭਾਈ ਬਾਲਿਆ, ਕੁਰਸੀ ਦੀ ਖ਼ਾਤਰ
ਕਿਵੇਂ ਆਪਣੇ ਹੀ ਰੰਗ ਦਿਖਾ ਗਏ।
ਕੱਲ੍ਹ ਧੂਰੀ ਵਿਚ ਵੋਟਾਂ ਦੌਰਾਨ
ਤੁਸੀਂ ਭਾਜਪਾ ਦੇ ਸਾਹਮਣੇ ਪੁਲਿਸ ਦੀ ਬੇਇੱਜ਼ਤੀ ਕਰਵਾ ਗਏ।
ਦੇਖੋ ਭਾਈ ਬਾਲਿਆ, ਵਕਤ ਦੇ ਰੰਗ ਵੀ ਅਜੀਬ ਹਨ,
ਕੁਰਸੀ ਦੀ ਖ਼ਾਤਰ
ਮਾਨ ਸਾਹਿਬ ਕਿਵੇਂ ਮੋਦੀ ਅਤੇ ਸ਼ਾਹ ਦੇ ਅੱਗੇ ਸਿਰ ਝੁਕਾ ਗਏ।
ਵੜਿੰਗ ਦੀ ਪੋਸਟ 'ਚ ਧੂਰੀ ਦਾ ਵੀ ਜ਼ਿਕਰ ਕੀਤਾ ਗਿਆ, ਜਿੱਥੇ ਹਾਲ ਹੀ 'ਚ ਸਿਆਸੀ ਸਰਗਰਮੀਆਂ ਅਤੇ ਚੋਣ ਮਾਹੌਲ ਨੂੰ ਲੈ ਕੇ ਕਾਫ਼ੀ ਚਰਚਾ ਰਹੀ। ਉਨ੍ਹਾਂ ਦੋਸ਼ ਲਗਾਇਆ ਕਿ ਸੱਤਾ ਬਚਾਉਣ ਲਈ ਭਾਜਪਾ ਦੇ ਸਾਹਮਣੇ ਝੁਕਣ ਵਰਗੀ ਸਥਿਤੀ ਪੈਦਾ ਹੋ ਗਈ ਹੈ। ਇਸ ਪੋਸਟ ਤੋਂ ਬਾਅਦ ਇੰਟਰਨੈੱਟ ਮੀਡੀਆ 'ਤੇ ਸਿਆਸੀ ਸਮਰਥਕਾਂ ਵਿਚਾਲੇ ਬਹਿਸ ਸ਼ੁਰੂ ਹੋ ਗਈ।
ਪੰਜਾਬ 'ਚ ਆਉਣ ਵਾਲੇ ਸਮੇਂ 'ਚ ਇੰਟਰਨੈੱਟ ਮੀਡੀਆ ਅਧਾਰਿਤ ਸਿਆਸੀ ਬਿਆਨਬਾਜ਼ੀ ਹੋਰ ਤੇਜ਼ ਹੋ ਸਕਦੀ ਹੈ। ਹੁਣ ਨੇਤਾ ਕੇਵਲ ਮੰਚਾਂ ਤੇ ਰੈਲੀਆਂ ਤਕ ਸੀਮਤ ਨਹੀਂ ਹਨ, ਬਲਕਿ ਫੇਸਬੁੱਕ ਤੇ ਹੋਰ ਇੰਟਰਨੈੱਟ ਮੋਡਾਂ ਜ਼ਰੀਏ ਸਿੱਧੇ ਜਨਤਾ ਤਕ ਆਪਣੀ ਗੱਲ ਪਹੁੰਚਾ ਰਹੇ ਹਨ। ਇਹੀ ਕਾਰਨ ਹੈ ਕਿ ਨੇਤਾਵਾਂ ਵਿਚਾਲੇ ਹੋਣ ਵਾਲੀ ਇਸ ਤਰ੍ਹਾਂ ਦੀ ਪੋਸਟ ਅਤੇ ਜਵਾਬੀ ਪੋਸਟ ਕੁਝ ਹੀ ਸਮੇਂ ਵਿੱਚ ਚਰਚਾ ਦਾ ਵੱਡਾ ਵਿਸ਼ਾ ਬਣ ਜਾਂਦੀ ਹੈ।