ਪੰਚਕੂਲਾ ਸਿਵਲ ਹਸਪਤਾਲ 'ਚ ਸਨਸਨੀ: ICU 'ਚ ਨਰਸਿੰਗ ਅਫ਼ਸਰ ਦੀ ਮੌਤ, ਮੋਬਾਈਲ ਗਾਇਬ ਤੇ ਸਟਾਫ਼ 'ਤੇ ਸ਼ੱਕ ਦੀ ਸੂਈ!

ਜਾਗਰਣ ਸੰਵਾਦਦਾਤਾ, ਪੰਚਕੂਲਾ : ਸੈਕਟਰ-6 ਸਥਿਤ ਸਿਵਲ ਹਸਪਤਾਲ ਦੇ ਆਈਸੀਯੂ (ICU) 'ਚ ਇਕ ਨਰਸਿੰਗ ਅਫ਼ਸਰ ਮ੍ਰਿਤਕ ਮਿਲੀ। ਇਹ ਘਟਨਾ ਐਤਵਾਰ ਰਾਤ ਦੀ ਹੈ, ਜਿਸ ਨੇ ਸਟਾਫ਼ ਦੀ ਭੂਮਿਕਾ 'ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।

ਘਟਨਾ ਤੋਂ ਅੱਧਾ ਘੰਟਾ ਪਹਿਲਾਂ ਤਕ ਪ੍ਰੀਤੀ ਨੂੰ ਮੋਬਾਈਲ 'ਤੇ ਕਿਸੇ ਨਾਲ ਗੱਲ ਕਰਦੇ ਦੇਖਿਆ ਗਿਆ ਸੀ, ਪਰ ਅਚਾਨਕ ਉਸ ਦਾ ਮੋਬਾਈਲ ਗਾਇਬ ਹੋ ਗਿਆ। ਆਖ਼ਰ ਮੋਬਾਈਲ 'ਚ ਅਜਿਹਾ ਕੀ ਰਾਜ਼ ਸੀ ਜਿਸ ਨੂੰ ਕੋਈ ਖ਼ਤਮ ਕਰਨਾ ਚਾਹੁੰਦਾ ਸੀ?

ਪੁਲਿਸ ਹੁਣ ਸੀਡੀਆਰ (CDR) ਅਤੇ ਆਖਰੀ ਲੋਕੇਸ਼ਨ ਰਾਹੀਂ ਗੁੰਝਲ ਸੁਲਝਾਉਣ ਦੀ ਕੋਸ਼ਿਸ਼ ਕਰੇਗੀ। ਇਹ ਗੱਲ ਵੀ ਸਾਹਮਣੇ ਆ ਰਹੀ ਹੈ ਕਿ ਆਈਸੀਯੂ 'ਚ ਫੋਰੈਂਸਿਕ ਟੀਮ ਨੂੰ ਵੱਡੀ ਗਿਣਤੀ 'ਚ ਐਕਸਪਾਇਰੀ ਡੇਟ ਦੇ ਇੰਜੈਕਸ਼ਨ ਮਿਲੇ ਹਨ, ਜਿਨ੍ਹਾਂ ਨੂੰ ਟੀਮ ਆਪਣੇ ਨਾਲ ਲੈ ਗਈ ਹੈ। ਮੌਤ ਦਾ ਰਾਜ਼ ਹੁਣ ਪੋਸਟਮਾਰਟਮ ਦੀ ਰਿਪੋਰਟ ਤੋਂ ਖੁੱਲ੍ਹੇਗਾ।

ਹਿਸਾਰ ਦੀ ਰਹਿਣ ਵਾਲੀ ਸੀ ਪ੍ਰੀਤੀ

ਨਰਸਿੰਗ ਅਫ਼ਸਰ ਪ੍ਰੀਤੀ ਬੈਨੀਵਾਲ ਹਰਿਆਣਾ ਦੇ ਹਿਸਾਰ ਦੀ ਰਹਿਣ ਵਾਲੀ ਸੀ। ਉਸ ਦਾ ਭਰਾ ਨਿਤਿਨ ਸਿਹਤ ਵਿਭਾਗ ਦੇ ਮੁੱਖ ਦਫ਼ਤਰ ਪੰਚਕੂਲਾ 'ਚ ਤਾਇਨਾਤ ਹੈ। ਇਕ ਭਰਾ ਅਸ਼ੀਸ਼ ਚੋਣ ਕਮਿਸ਼ਨ 'ਚ ਸੇਵਾ ਨਿਭਾ ਰਿਹਾ ਹੈ। ਪ੍ਰੀਤੀ ਦੀ ਭਾਬੀ ਪੰਚਾਇਤ ਵਿਭਾਗ ਵਿੱਚ ਸਕੱਤਰ ਦੇ ਅਹੁਦੇ 'ਤੇ ਤਾਇਨਾਤ ਹੈ।

2024 ਵਿੱਚ ਲੱਗੀ ਸੀ ਨੌਕਰੀ

ਪ੍ਰੀਤੀ ਪਰਿਵਾਰ ਸਮੇਤ ਪੰਚਕੂਲਾ ਦੇ ਸੈਕਟਰ-31 'ਚ ਰਹਿ ਰਹੀ ਸੀ। ਉਸ ਦੀ ਨੌਕਰੀ 2024 'ਚ ਹੀ ਲੱਗੀ ਸੀ। ਪਹਿਲੀ ਪੋਸਟਿੰਗ ਪੰਚਕੂਲਾ ਸਿਵਲ ਹਸਪਤਾਲ 'ਚ ਹੋਈ ਸੀ। ਡਿਊਟੀ ਦਾ ਜ਼ਿਆਦਾਤਰ ਸਮਾਂ ਆਈਸੀਯੂ 'ਚ ਬੀਤਿਆ ਸੀ। ਪ੍ਰੀਤੀ ਦੁਪਹਿਰ 2 ਵਜੇ ਘਰੋਂ ਡਿਊਟੀ ਲਈ ਆਈ ਸੀ। ਰਾਤ ਕਰੀਬ 8 ਵਜੇ ਉਸ ਦੀ ਸ਼ਿਫ਼ਟ ਖ਼ਤਮ ਹੋਣੀ ਸੀ, ਪਰ ਉਹ ਘਰ ਨਹੀਂ ਪਹੁੰਚੀ। ਜਦੋਂ ਦੂਜੀ ਸ਼ਿਫ਼ਟ ਦੇ ਮੁਲਾਜ਼ਮ ਡਿਊਟੀ 'ਤੇ ਆਏ ਤਾਂ ਨਰਸਿੰਗ ਅਫ਼ਸਰ ਸਟੋਰ ਏਰੀਆ ਵੱਲ ਫ਼ਰਸ਼ 'ਤੇ ਡਿੱਗੀ ਹੋਈ ਮਿਲੀ। ਇਸ ਤੋਂ ਬਾਅਦ ਹਸਪਤਾਲ ਦੇ ਸੀਨੀਅਰ ਅਫ਼ਸਰਾਂ ਅਤੇ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ। ਸੂਚਨਾ ਮਿਲਦਿਆਂ ਹੀ ਪਰਿਵਾਰਕ ਮੈਂਬਰ ਹਸਪਤਾਲ ਵੱਲ ਭੱਜੇ।