Punjab News : ਦੋ ਅੰਤਰਰਾਜੀ ਡਰੱਗ ਰੈਕੇਟ ਗਿਰੋਹ ਦੇ 12 ਮੈਂਬਰ ਗ੍ਰਿਫ਼ਤਾਰ,ਵੱਡੀ ਮਾਤਰਾ 'ਚ ਨਸ਼ੀਲੇ ਪਦਾਰਥ ਤੇ ਨਕਦੀ ਬਰਾਮਦ
ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਬੰਟੀ ਦਿੱਲੀ ਦੇ ਉੱਤਮ ਨਗਰ ਤੋਂ ਇਕ ਸਪਲਾਇਰ ਸੱਨੀ ਤੋਂ ਕੋਕੀਨ ਮੰਗਵਾਉਂਦਾ ਸੀ। ਇਸ ਤੋਂ ਇਲਾਵਾ ਉਹ ਦਿੱਲੀ ‘ਚ ਰਹਿੰਦੇ ਅਫਰੀਕੀ ਨਾਗਰਿਕਾਂ ਤੋਂ ਵੀ ਸਿੰਥੇਟਿਕ ਡਰੱਗਜ਼ ਖਰੀਦਦਾ ਸੀ। ਲੋਕਲ ਪੈਡਲਰ ਅਸ਼ੂ, ਸੁਨੀਲ ਅਤੇ ਸਲਮਾਨ, ਸੋਨੂ ਤੋਂ ਛੋਟੀ ਤੇ ਦਰਮਿਆਨੀ ਮਾਤਰਾ ਵਿੱਚ ਨਸ਼ਾ ਲੈ ਕੇ ਟ੍ਰਾਈਸਿਟੀ ਵਿੱਚ ਸਪਲਾਈ ਕਰਦੇ ਸਨ।
Posted By Jagjit Singh
Publish Date: Mon, 24 Nov 2025 07:40 PM (IST)
Updated Date: Mon, 24 Nov 2025 07:43 PM (IST)
ਤਰੁਣ ਭਜਨੀ, ਪੰਜਾਬੀ ਜਾਗਰਣ, ਚੰਡੀਗੜ੍ਹ : ਚੰਡੀਗੜ੍ਹ ਕ੍ਰਾਈਮ ਬ੍ਰਾਂਚ ਨੇ ਨਸ਼ਾ ਤਸਕਰੀ ਕਰਨ ਵਾਲੇ ਦੋ ਵੱਡੇ ਅੰਤਰਰਾਜੀ ਡਰੱਗ ਰੈਕੇਟਾਂ ਦਾ ਪਰਦਾਫਾਸ਼ ਕਰਦਿਆਂ 12 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਨੇ ਉਨ੍ਹਾਂ ਦੇ ਕਬਜ਼ੇ ਤੋ ਕਰੀਬ 8.15 ਕਰੋੜ ਰੁਪਏ ਦੇ ਨਸ਼ੀਲੇ ਪਦਾਰਥ ਅਤੇ ਹੋਰ ਸਮਾਨ ਜਿਸ ਵਿੱਚ 1. 2 ਕਿਲੋ ਕੋਕੀਨ, 476 ਗ੍ਰਾਮ ਚਿੱਟਾ, 2.1 ਗ੍ਰਾਮ ਆਈਸ ਡਰੱਗ, 26 ਲੱਖ ਦੀ ਡਰੱਗ ਮਨੀ, ਸੋਨੇ-ਚਾਂਦੀ ਦੇ ਗਹਿਣੇ, ਨੋਟ ਗਿਣਣ ਦੀ ਮਸ਼ੀਨ, ਪੰਜ ਵਾਹਨ ਅਤੇ ਛੇ ਕਿਊਆਰ ਸਕੈਨਰ ਕੋਡ ਬਰਾਮਦ ਕੀਤੇ ਹਨ। ਬਰਾਮਦ ਨਸ਼ੇ ਅਤੇ ਸਮਾਨ ਦੀ ਕੁੱਲ ਕੀਮਤ ਲਗਭਗ 8.15 ਕਰੋੜ ਰੁਪਏ ਦੱਸੀ ਜਾ ਰਹੀ ਹੈ।
ਇਹ ਕਾਰਵਾਈ ਐਸਪੀ ਕ੍ਰਾਈਮ ਜਸਬੀਰ ਸਿੰਘ ਅਤੇ ਡੀਐਸਪੀ ਕ੍ਰਾਈਮ ਧੀਰਜ ਕੁਮਾਰ ਦੇ ਨਿਰਦੇਸ਼ ਹੇਠ ਐਸਐਚਓ ਕ੍ਰਾਈਮ ਸਤਵਿੰਦਰ ਸਿੰਘ ਦੀਆਂ ਟੀਮਾਂ ਨੇ ਕੀਤੀ। ਐਸਪੀ ਜਸਬੀਰ ਸਿੰਘ ਦੇ ਅਨੁਸਾਰ, ਏਐਸਆਈ ਭੁਪਿੰਦਰ ਸਿੰਘ ਦੀ ਅਗਵਾਈ ਵਾਲੀ ਟੀਮ ਨੇ ਸੈਕਟਰ-40 ਤੋਂ ਅਸ਼ਵਨੀ ਕੁਮਾਰ ਉਰਫ਼ ਆਸ਼ੂ ਨੂੰ ਗ੍ਰਿਫ਼ਤਾਰ ਕੀਤਾ, ਜਿਸਦੇ ਕਬਜ਼ੇ ਤੋਂ 47.80 ਗ੍ਰਾਮ ਚਿੱਟਾ ਮਿਲਿਆ। ਉਸਦੀ ਪੁੱਛਗਿੱਛ ਦੌਰਾਨ ਮਿਲੇ ਸੁਤਰਾਂ ’ਤੇ ਕਾਰਵਾਈ ਕਰਦਿਆਂ ਪੁਲਿਸ ਨੇ ਸੈਕਟਰ-56 ਅਤੇ ਮਲੋਆ ਤੋਂ ਸੋਨੂ ਉਰਫ਼ ਕੱਲੂ ਉਰਫ਼ ਡਾਨ ਅਤੇ ਸਲਮਾਨ ਉਰਫ਼ ਮੁੰਨਾ ਨੂੰ ਗ੍ਰਿਫ਼ਤਾਰ ਕੀਤਾ। ਸੋਨੂ ਤੋਂ 100.60 ਗ੍ਰਾਮ ਚਿੱਟਾ ਅਤੇ 2.01 ਗ੍ਰਾਮ ਆਈਸ ਡਰੱਗ ਜ਼ਬਤ ਕੀਤੀ ਗਈ।
ਅੱਗੇ ਜਾਂਚ ਕਰਦਿਆਂ ਪੁਲਿਸ ਸੁਨੀਲ ਉਰਫ਼ ਦਰਜ਼ੀ ਅਤੇ ਅਨੂਪ ਤੱਕ ਪਹੁੰਚੀ, ਜਿਨ੍ਹਾਂ ਨੂੰ ਸੈਕਟਰ-38ਡੀ ਅਤੇ ਸੈਕਟਰ-25 ਤੋਂ ਕਾਬੂ ਕੀਤਾ ਗਿਆ। ਅਨੂਪ ਦੀ ਪੁੱਛਗਿੱਛ ਵਿੱਚ ਇੱਕ ਵੱਡੇ ਇੰਟਰਸਟੇਟ ਸਪਲਾਇਰ ਬੰਟੀ ਦਾ ਨਾਮ ਸਾਹਮਣੇ ਆਇਆ, ਜੋ ਢਕੋਲੀ, ਜੀਰਕਪੁਰ ਦਾ ਰਹਿਣ ਵਾਲਾ ਹੈ। ਬੰਟੀ ਦੇ ਟਿਕਾਣੇ ’ਤੇ ਰੇਡ ਦੌਰਾਨ 20,64,750 ਰੁਪਏ, ਸੋਨੇ ਦੇ ਗਹਿਣੇ ਅਤੇ ਕਾਲੀ ਡਸਟਰ ਕਾਰ ਬਰਾਮਦ ਕੀਤੀ ਗਈ। ਬਾਅਦ ਵਿੱਚ ਉਸ ਨੂੰ ਗ੍ਰਿਫ਼ਤਾਰ ਕਰਕੇ 490 ਗ੍ਰਾਮ ਕੋਕੀਨ ਵੀ ਜ਼ਬਤ ਕੀਤੀ ਗਈ।
ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਬੰਟੀ ਦਿੱਲੀ ਦੇ ਉੱਤਮ ਨਗਰ ਤੋਂ ਇਕ ਸਪਲਾਇਰ ਸੱਨੀ ਤੋਂ ਕੋਕੀਨ ਮੰਗਵਾਉਂਦਾ ਸੀ। ਇਸ ਤੋਂ ਇਲਾਵਾ ਉਹ ਦਿੱਲੀ ‘ਚ ਰਹਿੰਦੇ ਅਫਰੀਕੀ ਨਾਗਰਿਕਾਂ ਤੋਂ ਵੀ ਸਿੰਥੇਟਿਕ ਡਰੱਗਜ਼ ਖਰੀਦਦਾ ਸੀ। ਲੋਕਲ ਪੈਡਲਰ ਅਸ਼ੂ, ਸੁਨੀਲ ਅਤੇ ਸਲਮਾਨ, ਸੋਨੂ ਤੋਂ ਛੋਟੀ ਤੇ ਦਰਮਿਆਨੀ ਮਾਤਰਾ ਵਿੱਚ ਨਸ਼ਾ ਲੈ ਕੇ ਟ੍ਰਾਈਸਿਟੀ ਵਿੱਚ ਸਪਲਾਈ ਕਰਦੇ ਸਨ।
ਪੁਲਿਸ ਦੇ ਅਨੁਸਾਰ, ਗ੍ਰਿਫ਼ਤਾਰ ਅਸ਼ਵਨੀ, ਸੋਨੂ, ਸਲਮਾਨ, ਸੁਨੀਲ, ਅਨੂਪ ਅਤੇ ਬੰਟੀ ਤੋਂ ਹੁਣ ਤੱਕ 102.59 ਗ੍ਰਾਮ ਕੋਕੀਨ, 197.02 ਗ੍ਰਾਮ ਚਿੱਟਾ, 2.01 ਗ੍ਰਾਮ ਆਈਸ ਡਰੱਗ, 21 ਲੱਖ ਦੀ ਡਰੱਗ ਮਨੀ, ਦੋ ਕਾਰਾਂ ਅਤੇ ਕਾਫ਼ੀ ਮਾਤਰਾ ਵਿੱਚ ਗਹਿਣੇ ਬਰਾਮਦ ਹੋ ਚੁੱਕੇ ਹਨ।
ਮੁਲਜ਼ਮਾਂ ਦੇ ਅਪਰਾਧਿਕ ਰਿਕਾਰਡਾਂ ਦੀ ਗੱਲ ਕੀਤੀ ਜਾਵੇ ਤਾਂ ਅਸ਼ੂ ’ਤੇ 2017 ਵਿੱਚ ਐਨ ਦੀ ਪੀ ਐਸ ਦੇ ਦੋ ਕੇਸ ਦਰਜ ਹੋਏ ਸਨ। ਸੋਨੂ ਉਰਫ਼ ਕੱਲੂ ਉਰਫ਼ ਡਾਨ ’ਤੇ 2005 ਤੋਂ 2015 ਦੇ ਵਿਚਕਾਰ ਸੱਤ ਕੇਸ ਦਰਜ ਹੋਏ, ਜਿਨ੍ਹਾਂ ਵਿਚੋਂ ਚਾਰ ਐਨ ਡੀ ਪੀ ਐਸ , ਇੱਕ ਕਤਲ ਦੇ ਯਤਨ ਅਤੇ ਇੱਕ ਆਰਮਜ਼ ਐਕਟ ਦਾ ਕੇਸ ਸ਼ਾਮਲ ਹੈ। ਸਲਮਾਨ ਉਰਫ਼ ਮੁੰਨਾ ’ਤੇ ਮਲੋਆ ਥਾਣੇ ਵਿੱਚ ਐਨ ਡੀ ਪੀ ਐਸ ਦਾ ਕੇਸ ਹੈ। ਸੁਨੀਲ ਉਰਫ਼ ਦਰਜ਼ੀ ’ਤੇ 2022 ਵਿੱਚ ਐਨ ਡੀ ਪੀ ਐਸ ਅਧੀਨ ਕੇਸ ਦਰਜ ਹੋਇਆ ਸੀ। ਅਨੂਪ ਅਤੇ ਬੰਟੀ ‘ਤੇ ਕੋਈ ਪੁਰਾਣਾ ਕੇਸ ਦਰਜ ਨਹੀਂ ਹੈ।
ਪੁਲਿਸ ਦਾ ਕਹਿਣਾ ਹੈ ਕਿ ਨੈੱਟਵਰਕ ਦੀਆਂ ਹੋਰ ਕੜੀਆਂ ਦੀ ਭਾਲ ਜਾਰੀ ਹੈ ਅਤੇ ਅਗਲੇ ਦਿਨਾਂ ਵਿੱਚ ਹੋਰ ਗ੍ਰਿਫ਼ਤਾਰੀਆਂ ਹੋ ਸਕਦੀਆਂ ਹਨ।